The Comprehensive Aramaic Lexicon

00105_58	ܘܡܲܝ̈ܵܐ ܣܵܡ ܠܵܗ݀ ܕܡܵܐ ܕܵܐܟܠܵܐ ܠܗܽܘܢ ܫܽܘܒܚܵܐ ܢܸܣܲܩ܀
00105_59	ܐܲܪܡܝܼ ܡܲܝ̈ܵܐ ܕܢܸܩܪܸܐ ܠܢܽܘܪܵܐ ܘܲܢܚܲܘܸܐ ܗܼܘܵܐ܃
00105_60	ܕܠܲܘ ܒܲܟܝܵܢܵܐ ܐܸܠܵܐ ܒܚܲܝܠܵܐ ܡܙܝܼܥ ܬܸܕܡܽܘܪܬܵܐ܀
00105_61	ܗܵܝ ܕܲܒܩܲܝ̈ܣܸܐ ܬܸܕܠܲܩܝ ܢܽܘܪܵܐ ܕܲܟܝܵܢܵܐ ܗܼܘܵܬ̤܃
00105_62	ܕܲܒܡܲܝ̈ܵܐ ܕܹܝܢ ܬܸܬܓܲܘܙܲܠܝ ܗܼܘܵܬ ܪܲܒ ܕܽܘܡܵܪܵܐ܀
00105_63	ܙܲܝܚܵܗ݀ ܠܵܐܬܵܐ ܕܲܢܡܲܠܸܐ ܢܲܦܫܵܐ ܕܚܲܢ̈ܦܸܐ ܬܸܗܪܵܐ܃
00105_64	ܘܲܒܬܸܕܡܽܘܪܬܵܐ ܢܸܚܛܽܘܦ ܐܸܢܽܘܢ ܨܹܝܕ ܐܲܠܵܗܵܐ܀
00105_65	ܡܸܛܽܠܗܵܢܵܐ ܐܲܪܡܝܼ ܡܲܝ̈ܵܐ ܥܲܠ ܩܽܘܪܒܵܢܵܐ܃
00105_66	ܘܩܵܡ ܒܲܨܠܘܽܬܵܐ ܩܕܵܡ ܐܲܠܵܗܵܐ ܢܒܝܼܵܐ ܪܲܒܲܐ܀
00105_67	ܩܵܡ ܐܸܠܝܼܵܐ ܒܲܝܢܵܬ ܟܸܢܫܸ̈ܐ ܠܲܡܨܲܠܵܝܽܘ܃
00105_68	ܘܬܲܪ̈ܥܲܝ ܪܲܘܡܵܐ ܐܸܬܦܲܬܲܚܘ ܗܼܘܲܘ ܠܲܡܩܲܒܵܠܘܽ܀
00105_69	ܐܘ݁ܢ ܐܲܠܵܗܸܗ ܕܲܐܒܪܵܡ ܘܝܼܣܚܵܩ ܘܲܕܼܐܝܣܪܵܐܸܠ܃
00105_70	ܢܸܕܲܥ ܝܲܘܡܵܢ ܟܽܠܸܗ ܥܲܡܵܐ ܕܲܐܠܵܗܵܐ ܐܲܢܼܬ܀
00105_71	ܝܲܘܡܵܢܵܐ ܡܵܪܝ ܚܲܘܸܐ ܕܪܵܥܵܐ ܕܓܲܢܼܒܵܪܽܘܬܵܟ܃
00105_72	ܘܢܸܕܥܽܘܢ ܫܲܒ̈ܛܸܐ ܕܠܲܝܬ ܐܲܠܵܗܵܐ ܐܼܚܪܼܢܵܐ ܥܲܡܵܟ܀
00105_73	ܡܵܪܝܵܐ ܐܲܠܵܗܵܐ ܚܲܘܵܐ ܠܥܲܡܵܐ ܕܥܲܒܕܵܟ ܐܸܢܵܐ܃
00105_74	ܘܲܒܦܸܬܓܵܡܵܟ ܣܸܥܪܸܬ ܟܽܠܗܸܝܢ ܡܸܛܽܠܵܬܵܟ܀
00105_75	ܥܢܝܼܢܝ ܐܲܠܵܗܵܐ ܥܢܝܼܢܝ ܐܲܠܵܗܵܐ ܘܩܲܒܸܠ ܒܵܥܽܘܬܝ܃
00105_76	ܘܲܐܦܢܵܐ ܠܸܒܗܽܘܢ ܕܲܒܢܲܝ ܥܲܡܵܐ ܠܗܲܝܡܵܢܽܘܬܵܟ܀
00105_77	ܨܲܠܝܼ ܢܒܝܼܵܐ ܘܟܲܕ ܒܵܥܘܽܬܸܗ ܒܪܝܼܫ ܠܸܫܵܢܸܗ܃
00105_78	ܢܽܘܪܸܗ ܕܡܵܪܝܵܐ ܒܙܲܘܥܵܐ ܢܸܦܠܲܬ ܥܲܠ ܩܽܘܪܒܵܢܵܐ܀
00105_79	ܨܠܘܽܬܸܗ ܣܸܠܩܲܬ̤ ܫܲܕܪܲܬ̤ ܢܽܘܪܵܐ ܩܲܠܝܼܠܵܐܝܼܬ܃
00105_80	ܥܲܠ ܗܲܘ ܕܸܒܚܸܗ ܓܡܝܼܪܵܐ ܕܓܲܒܝܵܐ ܕܢܸܚܙܸܐ ܥܲܡܵܐ܀
00105_81	ܢܸܦܠܲܬ ܢܽܘܪܵܐ ܘܸܐܟܠܲܬ̤ ܕܸܒܚܵܐ ܘܠܵܐ ܟܲܕܽܘ ܠܵܗ݀܃
00105_82	ܘܝܸܩܕܲܬ̤ ܗܼܘܵܬ̤ ܒܵܗ݀ ܟܽܠܵܗ݀ ܥܠܵܬܵܐ ܘܬܘܽܒ ܟܵܦܢܵܐ ܗܼܘܵܬ܀

00105_83	ܕܸܒܚܵܐ ܘܡܲܕܒܚܵܐ ܘܟܼܐܦܸ̈ܐ ܐܸܟܠܲܬ̤ ܒܲܕܟܵܦܢܵܐ ܗܼܘܵܬ܃

00105_84	ܠܢܽܘܓܪܵܐ ܢܸܚܬܲܬ̤ ܥܲܠ ܩܽܘܪܒܵܢܵܐ ܝܲܐܝܼܒܵܐ ܗܼܘܵܬ܀
00105_85	ܒܡܲܝ̈ܵܐ ܣܸܦܲܬ̤ ܘܲܐܝܟ ܠܲܥܡܝܼܪܵܐ ܐܸܟܠܲܬ̤ ܐܸܢܽܘܢ܃
00105_86	ܘܥܲܦܪܵܐ ܟܽܠܸܗ ܕܗܵܝ ܚܸܐܪܝܼܬܵܐ ܬܘܽܒ ܝܵܩܸܕ ܗܼܘܵܐ܀
00105_87	ܐܲܝܟ ܒܲܩܢܲܝ̈ܵܐ ܒܩܸܒܝܵܐ ܕܡܲܝ̈ܵܐ ܣܲܦܝܼܦܵܐ ܗ̄ܘܵܬ܃
00105_88	ܘܲܡܛܲܠܩܵܐ ܠܗܽܘܢ ܐܲܝܟ ܕܲܠܟܽܘܒܸ̈ܐ ܒܚܲܝܠܵܐ ܪܲܒܵܐ܀
00105_89	ܒܲܣܝܼܡ ܗܼܘܵܐ ܠܵܗ݀ ܗܲܘ ܬܘܽܩܵܢܸܗ ܕܗܵܢܵܐ ܙܲܗܝܵܐ܃
00105_90	ܘܟܲܕ ܠܵܐ ܡܲܛܥܡܵܐ ܒܠܲܥܬ݂ܸܗ ܠܟܽܠܸܗ ܕܗܲܢܝܼ ܗܼܘܵܐ ܠܵܗ݀܀
00105_91	ܙܡܝܼܢܬܵܐ ܢܸܚܬܲܬ̤ ܥܲܠ ܫܵܪܽܘܬܵܐ ܕܸܐܬܩܲܪܝܵܬ̤ ܠܵܗ݀܃
00105_92	ܘܲܕܒܸܣܡܲܬ̤ ܠܵܗ݀ ܐܸܟܠܲܬ̤ ܥܲܡܵܗ݀ ܘܲܠܦܵܬܘܽܪܵܗ݀܀
00105_93	ܡܲܝ̈ܵܐ ܦܓܲܥܘ ܒܵܗ݀ ܘܲܐܝܟ ܕܲܠܕܸܒܚܵܐ ܫܸܩܠܲܬ̤ ܐܸܢܽܘܢ܃
00105_94	ܕܲܛܥܸܡ ܐܝܼܕܸܗ ܕܗܲܘ ܕܲܩܪܵܐ ܠܵܗ݀ ܢܩܸܕ ܗܼܘܵܐ ܣܲܓܝܼ܀
00105_95	ܢܵܗܡܵܐ ܢܽܘܪܵܐ ܥܲܠ ܩܽܘܪܒܵܢܵܐ ܘܥܲܡܵܐ ܪܵܥܸܠ܃
00105_96	ܕܵܠܩܵܐ ܒܡܲܝ̈ܵܐ ܫܲܠܗܸܒܝܼܬܵܐ ܘܡܲܢ ܠܵܐ ܢܸܕܚܲܠ܀
00105_97	ܓܲܠ̈ܝܵܢ ܐܲܦܸ̈ܝܗ݀ ܕܗܲܝܡܵܢܽܘܬܵܐ ܕܒܸܝܬ ܐܲܠܵܗܵܐ܃
00105_98	ܘܲܣܚܝܼܦ ܓܲܒܵܗ݀ ܕܲܦܬܲܟܪܽܘܬܵܐ ܩܕܵܡ ܐܸܠܝܼܵܐ܀
00105_99	ܒܲܗܝܼܬ ܒܲܥܠܵܐ ܘܲܡܫܲܡܫܵܢܲܘܗܼܝ ܐܵܦ ܣܵܓܽܘܕܲܘܗܼܝ܃
00106_00	ܘܪܵܥܠܝܼܢ ܟܽܘܡܪ̈ܲܘܗܼܝ ܡܸܢ ܬܸܕܡܽܘܪܬܵܐ ܕܨܸܦܚܲܬ̤ ܐܸܢܽܘܢ܀
00106_01	ܙܪܝܼܒܝܼܢ ܫܲܒ̈ܛܸܐ ܚܲܕ ܒܵܬܲܪ ܚܲܕ ܡܸܢ ܙܲܘܥܲܬܗܽܘܢ܃
00106_02	ܕܲܚܙܲܘ ܢܽܘܪܵܐ ܕܵܐܟܠܵܐ ܡܲܝ̈ܵܐ ܘܥܲܦܪܵܐ ܕܲܐܪܥܵܐ܀
00106_03	ܝܲܗܼܒ ܗܼܘܵܐ ܩܥܵܬܵܐ ܟܽܠܸܗ ܥܲܡܵܐ ܒܚܲܝܠܵܐ ܪܲܒܵܐ܃
00106_04	ܡܵܪܝܵܐ ܡܵܪܝܵܐ ܗܽܘ ܐܝܼܬ ܐܲܠܵܗܵܐ ܘܲܐܼܚܪܼܢܵܐ ܠܵܐ܀
00106_05	ܚܲܕ ܗܼܽܘ ܡܵܪܝܵܐ ܗܲܘ ܕܸܐܠܝܼܵܐ ܘܠܲܝܬ ܐܲܠ̈ܵܗܸܐ܃
00106_06	ܒܗܸܬ ܠܸܗ ܒܲܥܠܵܐ ܘܒܸܗܬܲܬ̤ ܛܘܽܥܝܲܝ ܕܲܚܬܝܼܪܵܐ ܒܸܗ܀
00106_07	ܐܸܬܓܲܠܝܵܬ̤ ܠܵܗ݀ ܕܠܲܝܬ ܐܲܠܵܗܵܐ ܐܸܠܵܐ ܐܸܢ ܚܲܕ܃
00106_08	ܗܲܘ ܕܸܐܠܝܼܵܐ ܥܒܝܼܕ ܠܸܗ ܢܒܝܼܵܐ ܘܟܵܗܢܵܐ ܙܲܗܝܵܐ܀