← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63403: JS_Elijah (Jacob of Saroug on Elijah)

Click on a word for lexical analysis
Click on a red-colored coordinate for comments and/or translations of the line

▲ earlier lines

00105_94 ܕܲܛܥܸܡ ܐܝܼܕܸܗ ܕܗܲܘ ܕܲܩܪܵܐ ܠܵܗ݀ ܢܩܸܕ ܗܼܘܵܐ ܣܲܓܝܼ܀
00105_95 ܢܵܗܡܵܐ ܢܽܘܪܵܐ ܥܲܠ ܩܽܘܪܒܵܢܵܐ ܘܥܲܡܵܐ ܪܵܥܸܠ܃
00105_96 ܕܵܠܩܵܐ ܒܡܲܝ̈ܵܐ ܫܲܠܗܸܒܝܼܬܵܐ ܘܡܲܢ ܠܵܐ ܢܸܕܚܲܠ܀
00105_97 ܓܲܠ̈ܝܵܢ ܐܲܦܸ̈ܝܗ݀ ܕܗܲܝܡܵܢܽܘܬܵܐ ܕܒܸܝܬ ܐܲܠܵܗܵܐ܃
00105_98 ܘܲܣܚܝܼܦ ܓܲܒܵܗ݀ ܕܲܦܬܲܟܪܽܘܬܵܐ ܩܕܵܡ ܐܸܠܝܼܵܐ܀
00105_99 ܒܲܗܝܼܬ ܒܲܥܠܵܐ ܘܲܡܫܲܡܫܵܢܲܘܗܼܝ ܐܵܦ ܣܵܓܽܘܕܲܘܗܼܝ܃
00106_00 ܘܪܵܥܠܝܼܢ ܟܽܘܡܪ̈ܲܘܗܼܝ ܡܸܢ ܬܸܕܡܽܘܪܬܵܐ ܕܨܸܦܚܲܬ̤ ܐܸܢܽܘܢ܀
00106_01 ܙܪܝܼܒܝܼܢ ܫܲܒ̈ܛܸܐ ܚܲܕ ܒܵܬܲܪ ܚܲܕ ܡܸܢ ܙܲܘܥܲܬܗܽܘܢ܃
00106_02 ܕܲܚܙܲܘ ܢܽܘܪܵܐ ܕܵܐܟܠܵܐ ܡܲܝ̈ܵܐ ܘܥܲܦܪܵܐ ܕܲܐܪܥܵܐ܀
00106_03 ܝܲܗܼܒ ܗܼܘܵܐ ܩܥܵܬܵܐ ܟܽܠܸܗ ܥܲܡܵܐ ܒܚܲܝܠܵܐ ܪܲܒܵܐ܃
00106_04 ܡܵܪܝܵܐ ܡܵܪܝܵܐ ܗܽܘ ܐܝܼܬ ܐܲܠܵܗܵܐ ܘܲܐܼܚܪܼܢܵܐ ܠܵܐ܀
00106_05 ܚܲܕ ܗܼܽܘ ܡܵܪܝܵܐ ܗܲܘ ܕܸܐܠܝܼܵܐ ܘܠܲܝܬ ܐܲܠ̈ܵܗܸܐ܃
00106_06 ܒܗܸܬ ܠܸܗ ܒܲܥܠܵܐ ܘܒܸܗܬܲܬ̤ ܛܘܽܥܝܲܝ ܕܲܚܬܝܼܪܵܐ ܒܸܗ܀
00106_07 ܐܸܬܓܲܠܝܵܬ̤ ܠܵܗ݀ ܕܠܲܝܬ ܐܲܠܵܗܵܐ ܐܸܠܵܐ ܐܸܢ ܚܲܕ܃
00106_08 ܗܲܘ ܕܸܐܠܝܼܵܐ ܥܒܝܼܕ ܠܸܗ ܢܒܝܼܵܐ ܘܟܵܗܢܵܐ ܙܲܗܝܵܐ܀
00106_09 ܡܵܪܝܲܐ ܗܼܘ ܫܲܪܝܼܪ ܕܗܽܘܝܽܘ ܡܵܪܝܵܐ ܐܵܦ ܐܲܠܵܗܵܐ܃
00106_10 ܠܸܗ ܙܵܟܽܘܬܵܐ ܘܲܠܕܲܓ̈ܵܠܸܐ ܚܲܝܵܒܽܘܬܵܐ܀
00106_11 ܪܒܵܒܬܵܐ ܕܫܽܘܒܚܵܐ ܡܸܢ ܟܽܠ ܦܽܘܡ̈ܝܼܢ ܡܸܫܬܲܡܥܵܐ ܗܼܘܵܬ܃
00106_12 ܘܲܫܡܸܗ ܕܡܵܪܝܵܐ ܒܟܽܠ ܠܸܫ̈ܵܢܝܼܢ ܡܸܬܢܲܨܲܪ ܗܼܘܵܐ܀
00106_13 ܠܒܲܥܠܵܐ ܩܠܵܠܵܐ ܘܨܲܥܪܵܐ ܘܚܸܣܕܵܐ ܘܲܫܡܵܐ ܒܝܼܫܵܐ܃
00106_14 ܘܲܠܣܵܓܽܘ̈ܕܲܘܗܼܝ ܒܸܗܬܲܬ̤ ܐܲܦܸ̈ܐ ܘܚܲܝܵܒܽܘܬܵܐ܀
00106_15 ܠܡܵܪܝܵܐ ܫܽܘܒܚܵܐ ܘܗܸܕܪܵܐ ܘܲܫܡܵܐ ܘܓܲܢܼܒܵܪܽܘܬܵܐ܃
00106_16 ܘܲܠܸܐܠܝܼܵܐ ܟܠܝܼܠ ܢܸܨܚ̈ܵܢܸܐ ܘܙܵܟܽܘܬܵܐ܀
00106_17 ܒܟܽܠܗܽܘܢ ܦܽܘ̈ܡܸܐ ܚܕܵܐ ܬܸܫܒܽܘܚܬܵܐ ܕܡܲܠܝܵܐ ܬܸܗܪܵܐ܃
00106_18 ܡܸܙܕܲܡܪܵܐ ܗܼܘܵܬ̤ ܡܸܢ ܥܸܒܪ̈ܵܝܸܐ ܒܩܵܠܵܐ ܪܵܡܵܐ܀
00106_19 ܢܨܲܚ ܐܸܠܝܼܵܐ ܒܕܲܐܪܵܗ݀ ܪܲܒܵܐ ܕܗܵܝ ܚܲܢܦܽܘܬܵܐ܃
00106_20 ܘܲܐܩܝܼܡ ܓܲܒܵܗ݀ ܕܗܲܝܡܵܢܽܘܬܵܐ ܕܲܡܣܲܚܲܦ ܗܼܘܵܐ܀
00106_21 ܒܢܵܐ ܗܼܘܵܐ ܣܝܵܓܵܐ ܠܟܲܪܡܵܐ ܕܚܲܒܝܼܒ ܕܲܡܬܲܪܲܥ ܗܼܘܵܐ܃
00106_22 ܘܲܒܝܽܘܠܦܵܢܵܐ ܕܩܽܘܫܬܵܐ ܦܲܠܚܸܗ ܕܦܼܐܪܸ̈ܐ ܢܸܬܸܠ܀
00106_23 ܥܒܲܕ ܬܸܕܡܽܘܪܬܵܐ ܕܒܵܗܬܝܼܢ ܚܲܢ̈ܦܸܐ ܡܸܢ ܪܲܒܽܘܬܵܗ݀܃
00106_24 ܘܲܙܪܲܒ ܐܸܢܽܘܢ ܒܵܐܬܵܐ ܕܢܲܘܕܽܘܢ ܟܲܕ ܠܵܐ ܨܵܒܸܝܢ܀
00106_25 ܩܵܐܸܡ ܙܲܗܝܵܐ ܘܢܽܘܪܵܐ ܡܪܲܚܦܵܐ ܥܲܠ ܩܽܘܪܒܵܢܸܗ܃
00106_26 ܘܣܸܕܪ̈ܲܝ ܥܲܡܵܐ ܡܙܝܼܥܝܼܢ ܫܽܘܒܚܵܐ ܥܲܙܝܼܙܵܐܝܼܬ܀
00106_27 ܪܲܒ ܗܼܘܵܐ ܟܸܢܫܵܐ ܘܵܐܬܵܐ ܬܡܝܼܗܵܐ ܘܟܵܗܢܵܐ ܩܲܕܝܼܫ܃
00106_28 ܘܓܲܢܼܒܵܪܽܘܬܸܗ ܕܡܵܪܝܵܐ ܓܲܠܝܵܐ ܠܥܸܝܢ ܣܲܓܝܼܸ̈ܐܐ܀
00106_29 ܟܦܸܝܢ ܥܸܒܪ̈ܵܝܸܐ ܥܲܠ ܐܲܦܲܝ̈ܗܽܘܢ ܡܸܢ ܕܸܚܠܲܬܗܽܘܢ܃
00106_30 ܕܲܕܠܵܐ ܬܚܽܘܡܵܐ ܚܙܲܐܽܘܗ݀ ܠܢܽܘܪܵܐ ܕܵܐܟܠܵܐ ܪܸܒܲܬ܀
00106_31 ܡܲܝ̈ܵܐ ܘܥܲܦܪܵܐ ܘܟܼ̈ܐܦܸܐ ܠܸܚܟܲܬ̤ ܥܲܡ ܩܽܘܪܒܵܢܵܐ܃
00106_32 ܘܫܽܘܒܚܵܐ ܒܙܲܘܥܵܐ ܡܸܢ ܬܸܕܡܽܘܪܬܵܐ ܙܥܲܩ ܗܼܘܵܐ ܥܲܡܵܐ܀
00106_33 ܐܵܚܵܒ ܡܲܠܟܵܐ ܡܢܝܼܦ ܩܽܘ̈ܠܵܣܸܐ ܨܹܝܕ ܐܸܠܝܼܵܐ܃
00106_34 ܘܥܲܡܵܐ ܟܽܠܸܗ ܡܝܲܒܸܒ ܫܽܘܒܚܵܐ ܒܩܵܠܵܐ ܪܵܡܵܐ܀
00106_35 ܐܵܬܵܐ ܪܲܒܬܵܐ ܥܨܵܬܸܗ ܠܚܲܢܦܵܐ ܕܟܲܕ ܠܵܐ ܨܵܒܸܐ܃
00106_36 ܥܲܡ ܣܲܓܝܼܸ̈ܐܐ ܠܡܵܪܝܵܐ ܢܲܘܪܸܒ ܕܲܚܙܵܐ ܚܲܝܠܸܗ܀
00106_37 ܥܲܡܵܐ ܡܠܝܼܓܵܐ ܕܲܕܠܵܐ ܐܵܬܵܐ ܡܬܘܽܡ ܠܵܐ ܗܲܝܡܸܢ܃
00106_38 ܩܛܝܼܪܵܗ݀ ܕܵܐܬܵܐ ܥܨܵܝܗܼܝ ܗܼܘܵܐ ܕܢܸܕܲܥ ܡܲܢܽܘ ܡܵܪܸܗ܀
00106_39 ܚܝܼܠ ܐܲܠܵܗܵܐ ܐܸܬܚܲܕܲܬ ܗܼܘܵܐ ܟܲܕ ܠܵܐ ܡܲܥܬܸ݂ܩ܃
00106_40 ܒܝܲܕ ܐܸܠܝܼܵܐ ܡܽܘܫܸܐ ܕܲܬܪܸ̈ܝܢ ܒܲܬܡܝܼ̈ܗܵܬܵܐ܀
00106_41 ܥܲܒܕܸܗ ܠܟܲܪܡܠܵܐ ܣܝܼܢܲܝ ܐܵܦ ܠܸܗ ܒܢܽܘܪܵܐ ܕܲܐܚܸܬ܃
00106_42 ܘܡܲܠܝܼ ܠܥܲܡܵܐ ܕܽܘܟܲܬ ܡܽܘܫܸܐ ܒܕܸܒܚܵܐ ܕܲܐܣܸܩ܀
00106_43 ܫܽܘܚܢܵܐ ܪܲܒܵܐ ܐܝܼܬ ܗܼܘܵܐ ܒܥܲܡܵܐ ܕܗܵܝ ܚܲܢܦܽܘܬܵܐ܃
00106_44 ܘܲܒܓܲܘܙܲܠܬܵܐ ܟܗܵܝܗܼܝ ܐܸܠܝܼܵܐ ܘܟܸܢ ܐܸܬܲܐܣܝܼ܀

▼ later lines