The Comprehensive Aramaic Lexicon

00106_52	ܪܽܘܚܸܗ ܕܡܵܪܝܵܐ ܒܝܲܕ ܐܸܠܝܼܵܐ ܘܡܽܘܫܸܐ ܫܲܚܩܲܬ̤܀
00106_53	ܢܒܝܼܸ̈ܐ ܕܬܸܗܪܵܐ ܡܗ̈ܲܝܡܢܸܐ ܙܲܗ̈ܝܸܐ ܕܒܸܝܬ ܐܲܕܽܘܢܲܝ܃
00106_54	ܢܲܩܦܽܘܗ݀ ܠܚܼܐܪܬܵܐ ܪܵܚܡܲܬ̤ ܓܲܘܪܵܐ ܕܠܵܐ ܬܸܫܬܲܛܸܐ܀
00106_55	ܘܡܵܐ ܕܽܢܘܟܪܵܝܵܐ ܡܕܝܼܩ ܗܼܘܵܐ ܨܸܝܕܸܝܗ݀ ܕܢܸܙܢܸܐ ܒܵܗ݀܃
00106_56	ܚܲܕ ܚܲܕ ܡܸܢܗܽܘܢ ܫܵܚܸܩ ܗܼܘܵܐ ܠܸܗ ܘܠܵܗ݀ ܢܵܛܲܪ ܗܼܘܵܐ܀
00106_57	ܗܝܼ ܕܹܝܢ ܟܲܠܬܵܐ ܡܸܨܛܲܠܝܵܐ ܗܼܘܵܬ̤ ܠܲܡܙܲܢܵܝܽܘ܃
00106_58	ܘܥ̈ܲܒܕܲܝ ܡܵܪܝܵܐ ܙܗܝܼܪܝܼܢ ܗܼܘܲܘ ܒܵܗ݀ ܡܸܢ ܦܲܚܙܽܘܬܵܐ܀
00106_59	ܟܲܕ ܩܲܕܝܼܫܵܐ ܘܢܲܟܦܵܐ ܘܕܲܟܝܵܐ ܘܡܲܠܝܵܐ ܫܽܘܦܪܸ̈ܐ܃
00106_60	ܒܵܥܝܢ ܗܼܘܲܘ ܠܵܗ݀ ܕܬܸܡܛܸܐ ܓܢܽܘܢܵܗ݀ ܘܠܵܐ ܐܸܨܛܲܒܝܲܬ܀
00106_61	ܘܡܵܐ ܕܓܸܢܒܲܬ̤ ܗܼܘܵܬ ܡܸܢܗܽܘܢ ܓܵܪܲܬ ܐܲܪܓܸܫܘ ܗܼܘܲܘ ܒܵܗ݀܃
00106_62	ܩܲܝܛܘܽܢ̈ܩܵܢܸܝܗ݀ ܦܲܪܣܝܼܘ ܙܼܐܦܵܗ݀ ܕܛܲܢܵܢܸ̈ܐ ܗܼܘܲܘ܀
00106_63	ܢܵܛܪܝܼܢ ܗܼܘܵܘ ܠܸܗ ܫܪ̈ܵܪܸܐ ܠܚܲܬܢܵܐ ܕܫܲܕܲܪ ܐܸܢܽܘܢ܃
00106_64	ܘܡܵܐ ܕܨܹܝܕ ܟܲܠܬܵܐ ܚܙܲܘ ܫܽܘܟܵܪܵܐ ܛܲܢܘ ܥܲܙܝܼ̈ܙܸܐ܀
00106_65	ܟܲܕ ܐܲܕܝܼܩ ܗܼܘܵܐ ܥܸܓܠܵܐ ܠܘܵܬܵܗ݀ ܪܬܲܚ ܗܼܘܵܐ ܡܽܘܫܸܐ܃
00106_66	ܣܲܚܦܸܗ ܘܲܢܦܲܠ ܫܵܦܸܗ ܘܲܐܘܦܝܼ ܙܲܪܩܸܗ ܘܸܐܒܲܕ܀
00106_67	ܘܟܲܕ ܥܲܠ ܒܲܥܠܵܐ ܕܲܢܓܲܝܲܪ ܒܵܗ݀ ܩܵܡ ܐܸܠܵܝܵܐ܃
00106_68	ܘܲܣܠܸܩ ܪܽܘܓܙܸܗ ܘܲܟܠܵܐ ܡܸܛܪܵܐ ܘܲܥܒܲܕ ܟܲܦܢܵܐ܀
00106_69	ܐܸܣܲܪ ܠܲܫܡܲܝܵܐ ܘܓܲܙܝܼ ܠܲܐܪܥܵܐ ܘܲܐܚܸܬ ܢܽܘܪܵܐ܃
00106_70	ܘܲܐܘܩܸܕ ܡܲܝ̈ܵܐ ܘܲܫܩܲܠ ܚܲܪܒܵܐ ܘܩܲܛܸܠ ܟܽܘܡܪܸ̈ܐ܀
00106_71	ܘܲܐܪܡܝܼ ܫܠ̈ܲܕܸܐ ܘܲܣܚܵܐ ܒܲܕܡܵܐ ܘܚܲܘܝܼ ܛܢܵܢܸܗ܃
00106_72	ܘܲܠܓܲܝܵܪܵܐ ܕܥ݂ܲܠ ܨܹܝܕ ܟܲܠܬܵܐ ܓܽܘܚܟܵܐ ܥܲܒܕܸܗ܀
00106_73	ܒܝܲܕ ܐܵܬܘ̈ܵܬܵܐ ܘܲܬܡܝܼ̈ܗܵܬܵܐ ܡܸܙܕܲܪܒܵܐ ܗܼܘܵܬ܃
00106_74	ܟܲܠܬܵܐ ܕܬܸܦܢܸܐ ܨܹܝܕ ܩܲܕܝܼܫܵܐ ܡܵܐ ܕܸܐܬܒܲܣܪܲܬ܀
00106_75	ܚܙܵܬ ܗܼܘܵܬ ܢܽܘܪܵܐ ܕܲܐܚܸܬ ܙܲܗܝܵܐ ܥܲܠ ܩܽܘܪܒܵܢܵܐ܃
00106_76	ܘܒܲܡܫܲܚܛܵܢܵܗ݀ ܒܲܥܠܵܐ ܟܸܦܪܲܬ ܟܲܕ ܒܲܗܝܼܬܵܐ܀

00106_77	ܙܲܪܒܵܗ݀ ܒܢܽܘܪܵܐ ܡܗܲܝܡܢܵܐ ܪܲܒܵܐ ܕܢܵܛܲܪ ܗܼܘܵܐ ܠܵܗ݀܃

00106_78	ܥܕܲܡܵܐ ܕܝܸܬܒܲܬ̤ ܒܲܫܡܸܗ ܕܚܲܬܢܵܐ ܩܲܕܝܼܫܵܐܝܼܬ܀
00106_79	ܩܥܵܬ ܥܲܠ ܡܵܪܝܵܐ ܕܲܐܠܵܗܲܗ݀ ܗܼܽܘ ܡܸܢ ܕܸܐܙܕܲܟܝܲܬ܃
00106_80	ܕܲܥܝܵܕܵܗ݀ ܗܼܘܵܐ ܕܸܐܠܵܐ ܙܲܪܒܵܗ݀ ܠܵܐ ܝܕܲܥܬ݂ܸܗ܀
00106_81	ܚܙܵܐ ܟܝܼܬ ܥܲܡܵܐ ܢܽܘܪܵܐ ܘܲܐܘܕܝܼ ܒܡܵܪܝܵܐ ܡܵܪܸܗ܃
00106_82	ܘܲܠܸܐܠܝܼܵܐ ܟܠܝܼܠ ܩܽܘ̈ܠܵܣܸܐ ܓܕܲܠ ܒܲܩܥܵܬܵܐ܀
00106_83	ܐܸܡܲܪ ܙܲܗܝܵܐ ܐܚܽܘܕܘ ܠܲܢ̈ܒܝܼܸܐ ܕܕܲܓܵܠܘܽܬܵܐ܃
00106_84	ܘܸܐܚܲܕ ܐܸܢܽܘܢ ܥܲܡܵܐ ܠܟܽܠܗܽܘܢ ܩܲܠܝܼܠܵܐܝܼܬ܀
00106_85	ܘܲܐܚܸܬ ܐܸܢܽܘܢ ܡܸܢ ܗܲܘ ܛܘܽܪܐ ܕܒܸܝܬ ܩܽܘܪܒܵܢܵܐ܃
00106_86	ܠܢܲܚܠܵܐ ܕܩܝܼܫܽܘܢ ܘܲܫܩܲܠ ܚܲܪܒܵܐ ܘܲܢܟܲܣ ܐܸܢܽܘܢ܀
00106_87	ܐܲܟܵܪܵܐ ܗܼܘܵܐ ܕܣܵܢܸܐ ܕܢܸܚܙܸܐ ܒܚܲܩܠܸܗ ܟܽܘ̈ܒܸܐ܃
00106_88	ܘܲܐܝܟ ܕܲܠܝܲܥܪܵܐ ܒܡܲܓܠܵܐ ܕܚܲܪܒܵܐ ܥܲܕ ܗܼܘܵܐ ܐܸܢܽܘܢ܀
00106_89	ܙܝܼܙ̈ܵܢܸܐ ܗܼܘܲܘ ܘܥܲܠ ܕܲܢܕܲܟܸܐ ܡܸܢܗܽܘܢ ܐܲܪܥܸܗ܃
00106_90	ܡܠܲܓ ܗܼܘܵܐ ܘܲܫܕܵܐ ܠܟܽܠܗܽܘܢ ܡܸܢܵܗ݀ ܕܠܵܐ ܢܲܐܟܽܘܢܵܗ݀܀
00106_91	ܕܠܵܐ ܢܲܪܦܸܐ ܗܼܘܵܐ ܟܽܘ̈ܒܸܐ ܒܙܲܪܥܵܐ ܕܒܸܝܬ ܐܲܒܪܵܗܵܡ܃
00106_92	ܒܲܥܲܪ ܐܸܢܽܘܢ ܡܸܢ ܗܵܝ ܚܲܩܠܸܗ ܒܪܝܼܟܬܵܐ ܕܼܐܝܣܚܲܩ܀
00106_93	ܥܽܘܩ̈ܣܸܐ ܒܝܼ̈ܫܸܐ ܚܙܵܐ ܒܸܐܫܟܵܪܵܗ݀ ܕܟܼܐܢܵܐ ܝܲܥܩܽܘܒ܃
00106_94	ܘܲܕܠܵܐ ܢܣܲܬܬܘܽܢ ܫܩܲܠ ܣܲܟܝܼܢܵܐ ܘܲܦܣܲܩ ܐܸܢܽܘܢ܀
00106_95	ܛܸܢܲܬ̤ ܪܽܘܚܵܐ ܕܲܢܒܝܼܽܘܬܵܐ ܗܵܝ ܕܸܐܼܠܝܵܐ܃
00106_96	ܒܪܽܘܚܵܐ ܕܫܽܘܩܪܵܐ ܗܵܝ ܕܲܢܒܝܼܸ̈ܐ ܕܕܲܓܵܠܘܽܬܵܐ܀
00106_97	ܘܲܕܬܸܛܪܽܘܕܝ ܗܼܘܵܬ ܗܵܝ ܩܲܕܝܼܫܬܵܐ ܠܲܡܣܲܝܲܒܬܵܐ܃
00106_98	ܠܲܡ̈ܫܲܡܫܵܢܸܝܗ݀ ܟܽܠܗܽܘܢ ܚܸܪܒܲܬ ܩܲܠܝܼܠܵܠܝܼܬ܀
00106_99	ܕܲܝܘܵܐ ܐܝܼܬ ܗܼܘܵܐ ܠܥܲܡܵܐ ܘܲܦܩܝܼܪ ܒܵܬܲܪ ܨ̈ܲܠܡܸܐ܃
00107_00	ܘܠܸܗ ܠܗܲܘ ܕܲܝܘܵܐ ܛܪܲܕ ܐܸܠܝܼܵܐ ܒܟܽܘܡܪܸ̈ܐ ܕܩܲܛܸܠ܀
00107_01	ܢܒܝܼܸ̈ܐ ܕܒܲܥܠܵܐ ܘܲܕܕܸܚ̈ܠܵܬܵܐ ܬܫܲܥܡܵܐܐ ܢܲܟܸܣ܃
00107_02	ܕܢܸܦܣܽܘܩ ܛܘܽܥܝܲܝ ܡܸܢ ܓܲܘ ܥܲܡܡܸ̈ܐ ܒܲܫܠ̈ܲܕܲܝܗܽܘܢ܀