The Comprehensive Aramaic Lexicon

00108_58	ܘܨܹܝܕ ܐܼܢܵܫܽܘܬܵܐ ܫܲܝܢܵܐ ܘܚܽܘܒܵܐ ܘܡܲܟܝܼܟܽܘܬܵܐ܀
00108_59	ܟܲܕ ܪܵܕܸܦ ܗܼܘܵܐ ܢܒܝܼܵܐ ܠܛܘܽܥܝܲܝ ܥܲܙܝܼܙܵܐ ܗܼܘܵܐ܃
00108_60	ܘܟܲܕ ܐܸܠܨܲܬ̤ ܗܼܘܵܬ̤ ܢܲܥܒܲܪ ܠܵܐܚܵܒ ܐܸܬܡܲܟܲܟ ܠܸܗ܀
00108_61	ܒܲܚܕܵܐ ܕܽܘܟܬܵܐ ܚܪܲܒ ܡܲܐܘ̈ܵܬܵܐ ܬܫ̈ܲܥ ܒܲܛܢܵܢܸܗ܃
00108_62	ܒܕܽܘܟܬܵܐ ܐܼܚܪܼܬܵܐ ܪܵܗܸܛ ܒܲܪܓܸܠ ܥܲܡ ܪܲܟܵܒܵܐ܀
00108_63	ܕܡܲܠܟܵܐ ܠܡܲܠܟܵܐ ܐܵܦ ܕܲܐܠܵܗܵܐ ܝܲܗܼܒ ܠܲܐܠܵܗܵܐ܃
00108_64	ܕܠܵܐ ܢܸܛܠܘܽܡ ܗܼܘܵܐ ܐܵܦܠܵܐ ܠܡܲܠܟܵܐ ܘܠܵܐ ܠܲܐܠܵܗܵܐ܀
00108_65	ܠܵܐ ܐܸܬܬܪܝܼܡ ܗܼܘܵܐ ܒܓܲܒܪ̈ܲܘܵܬܵܐ ܕܲܢܩܝܼ̈ܦܵܢ ܠܸܗ܃
00108_66	ܕܢܸܒ݂ܣܸܐ ܗܵܝܕܸܝܢ ܥܲܠ ܫܽܘܠܛܵܢܸܗ ܕܡܸܢ ܐܲܠܵܗܵܐ ܗ̄ܘ܀
00108_67	ܒܵܬܲܪ ܕܲܡܠܵܝܗܼܝ ܠܵܐܚܵܒ ܬܸܗܪܵܐ ܒܢܽܘܪܵܐ ܕܲܐܚܸܬ܃
00108_68	ܡܲܟܸܟ ܢܲܦܫܸܗ ܘܲܪܗܸܛ ܩܽܘܕܡܲܘܗܼܝ ܐܲܝܟ ܚܲܝܵܒܵܐ܀
00108_69	ܡܲܟܝܼܟܽܘܬܵܐ ܢܲܩܝܼܦܵܐ ܠܵܗ݀ ܠܲܓܡܝܼܪܽܘܬܵܐ܃
00108_70	ܘܲܒܬܲܪ̈ܬܲܝܗܸܝܢ ܐܸܨܛܲܒܲܬ ܗܼܘܵܐ ܢܒܝܼܵܐ ܪܲܒܵܐ܀
00108_71	ܐܸܣܲܪ ܗܵܟܝܼܠ ܙܲܗܝܵܐ ܚܲܨܲܘܗܼܝ ܘܲܪܕܵܐ ܥܲܡܸܗ܃
00108_72	ܕܵܐܚܵܒ ܡܲܠܟܵܐ ܥܕܲܡܵܐ ܕܥܲܠ ܗܼܘܵܐ ܠܒܸܝܬ ܡܲܠܟܽܘܬܸܗ܀
00108_73	ܐܵܦ ܙܵܕܸܩ ܗܼܘܵܐ ܕܥܲܡ ܗܲܘ ܡܸܛܪܵܐ ܪܲܒܵܐ ܕܸܐܬܵܐ܃
00108_74	ܢܼܐܬܸܐ ܢܒܝܼܵܐ ܕܲܥܢܵܢܵܐ ܗܼܘܵܐ ܕܡܲܠܝܵܐ ܣܲܒܪܵܐ܀
00108_75	ܕܟܲܕ ܪܵܗܸܛ ܗܼܘܵܐ ܩܕܵܡ ܗܲܘ ܡܲܠܟܵܐ ܢܸܚܙܸܐ ܟܽܠ ܐܼܢܵܫ܃
00108_76	ܕܗܽܘܝܽܘ ܐܲܝܬܝܼ ܡܸܛܪܵܐ ܥܲܡܸܗ ܘܠܲܘ ܥܲܘܵܠܵܐ܀
00108_77	ܩܕܵܡ ܗܲܘ ܡܲܠܟܵܐ ܢܒܝܼܵܐ ܘܡܸܛܪܵܐ ܐܬܲܘ ܠܼܐܝܙܪܲܥܸܝܠ܃
00108_78	ܕܬܸܗܘܸܐ ܣܒܲܪܬܵܐ ܕܗܵܐ ܐܸܠܝܼܵܐ ܘܡܸܛܪܵܐ ܪܲܒܵܐ܀
00108_79	ܠܸܗ ܝܵܐܸܐ ܗܼܘܵܐ ܕܲܒܣܲܒܪ̈ܵܬܵܐ ܢܸܬܡܲܠܲܠ ܗܼܘܵܐ܃
00108_80	ܕܒܼܐܝܕ̈ܲܘܗܼܝ ܣܝܼܡ ܗܼܘܵܐ ܩܠܝܼܕܵܐ ܪܲܒܵܐ ܕܦܵܬܲܚ ܘܵܐܚܸܕ܀
00108_81	ܠܸܗ ܫܲܦܝܼܪ ܗܼܘܵܐ ܫܡܵܐ ܘܸܢܨܚܵܢܵܐ ܘܓܲܢܼܒܵܪܽܘܬܵܐ܃
00108_82	ܕܲܡܫܲܡܠܲܝ ܗܼܘܵܐ ܒܲܓܡܝܼܪܽܘܬܵܐ ܘܡܲܟܝܼܟܽܘܬܵܐ܀

00108_83	ܪܗܸܛ ܗܼܘܵܐ ܢܒܝܼܵܐ ܩܕܵܡܲܘܗܼܝ ܕܵܐܚܵܒ ܐܲܝܟ ܕܸܐܡܲܪܢܲܢ܃

00108_84	ܘܸܐܬܵܐ ܡܲܠܟܵܐ ܘܥܲܠ ܠܼܐܝܙܪܲܥܸܝܠ ܐܲܝܟ ܕܲܫܡܲܥܬܘܽܢ܀
00108_85	ܘܫܲܪܝܲܬ ܐܝܼܙܒܸܠ ܠܲܡܫܲܐܵܠܘܽ ܥܲܠ ܣܽܘܥܪܵܢܵܐ܃
00108_86	ܘܸܐܫܬܲܥܝܼ ܠܵܗ ܐܵܚܵܒ ܓܲܒܪܵܗ݀ ܟܽܠܗܸܝܢ ܕܲܗܘ̈ܲܝ܀
00108_87	ܐܵܡܪܵܐ ܐܡܲܪ ܠܝܼ ܡܵܢܵܐ ܥܒܲܕܬܘܽܢ ܥܲܡ ܐܸܠܝܼܵܐ܃
00108_88	ܘܲܐܝܟܲܢ ܩܲܒܠܸܗ ܥܲܡܵܐ ܒܛܘܽܪܵܐ ܠܗܲܘ ܕܵܠܘܽܚܵܐ܀
00108_89	ܡܽܘܢ ܐܸܬܡܲܠܲܠ ܡܸܢܟܽܘܢ ܥܲܡܸܗ ܕܸܐܬܟܲܢܲܫܬܘܽܢ܃
00108_90	ܘܡܽܘܢ ܡܲܠܸܠ ܗܽܘ ܒܗܲܘ ܪܸܥܝܵܢܵܐ ܪܵܡܵܐ ܕܵܩܢܵܐ܀
00108_91	ܐܲܝܟ ܕܵܐܡܪܝܼܢ ܠܝܼ ܡܵܪܝܵܐ ܘܒܲܥܠܵܐ ܥܒܲܕܘ ܬܲܟܬܘܽܫܵܐ܃
00108_92	ܐܸܫܬܲܥܵܐ ܠܝܼ ܡܲܢܽܘ ܕܲܙܟܵܐ ܡܸܢ ܐܲܠ̈ܵܗܸܐ܀
00108_93	ܒܗܲܘ ܚܸܙܘܵܢܵܐ ܕܲܗܘܵܐ ܒܛܘܽܪܵܐ ܡܲܢ ܐܸܬܢܲܨܲܚ܃
00108_94	ܢܒܝܼܸ̈ܐ ܕܒܲܥܠܵܐ ܐܲܘ݁ ܗܲܘ ܪܵܡܵܐ ܢܩܸܐ ܠܡܲܨܽܘܬܵܐ܀
00108_95	ܐܸܢ ܠܲܕܪܵܫܵܐ ܥܲܠܬܘܽܢ ܥܲܡܸܗ ܡܲܢܽܘ ܕܲܙܟܵܐ܃
00108_96	ܟܽܘܡܪܸ̈ܐ ܕܝܼܠܲܢ ܐܲܘ݁ ܠܸܘܵܝܵܐ ܒܲܪܬܲܘܬܵܒܸ̈ܐ܀
00108_97	ܐܸܢ ܐܲܠܵܗܸ̈ܐ ܕܲܐܪܵܐ ܒܛܘܽܪܵܐ ܥܒܲܕܘ ܘܲܚܙܝܼܬܘܽܢ܃
00108_98	ܐܸܫܬܲܥܵܐ ܠܝܼ ܨܹܝܕ ܡܲܢ ܫܸܪܟܲܬ̤ ܚܲܝܵܒܽܘܬܵܐ܀
00108_99	ܓܲܢܼܒܵܪܽܘܬܵܐ ܕܒܲܥܠܵܐ ܕܝܼܠܲܢ ܠܵܐ ܡܸܙܕܲܟܝܵܐ܃
00109_00	ܐܡܲܪ ܠܝܼ ܗܵܫܵܐ ܐܲܝܟܲܢܵܐ ܙܟܵܐ ܩܕܵܡ ܥܸܒܪ̈ܵܝܸܐ܀
00109_01	ܐܸܡܲܪ ܐܵܚܵܒ ܨܸܝܕܲܘܗܼܝ ܫܸܪܟܲܬ̤ ܚܲܝܵܒܽܘܬܵܐ܃
00109_02	ܘܲܫܡܵܐ ܣܲܪܝܵܐ ܘܒܸܗܬܲܬ̤ ܐܲܦܸ̈ܐ ܘܓܘܽܚܟܵܐ ܪܲܒܵܐ܀
00109_03	ܢܨܲܚ ܐܸܠܝܼܵܐ ܘܚܲܘܝܼ ܚܲܝܠܵܐ ܕܓܲܢܼܒܵܪܽܘܬܵܐ܃
00109_04	ܘܲܢܓ݂ܲܕ ܒܲܬܪܸܗ ܠܟܽܠܗܽܘܢ ܫܲܒ̈ܛܸܐ ܠܘܵܬ ܐܲܠܵܗܵܐ܀
00109_05	ܥܒܲܕ ܬܸܕܡܽܘܪܬܵܐ ܪܲܒܬܵܐ ܒܛܘܽܪܵܐ ܘܲܐܬܗܲܪ ܠܲܢ ܒܵܗ݀܃
00109_06	ܕܲܐܚܸܬ ܢܽܘܪܵܐ ܘܸܐܟܠܲܬ̤ ܡܲܝ̈ܵܐ ܘܥܲܦܪܵܐ ܕܲܐܪܥܵܐ܀
00109_07	ܙܲܘܥܲܐ ܗܼܘ ܓܲܒܪܵܐ ܕܲܟܡܵܐ ܩܲܢܝܵܐ ܡܸܠܬܸܗ ܚܲܝܠܵܐ܃
00109_08	ܕܡܸܪܬܲܡ ܪܵܬܸܡ ܨܹܝܕ ܒܸܪ̈ܝܵܬܵܐ ܘܡܸܫܬܲܡ̈ܥܵܢ ܠܸܗ܀