← Back
The Comprehensive Aramaic Lexicon
← Return to the Text Browser
click on the file description for more information

63403: JS_Elijah (Jacob of Saroug on Elijah)

Click on a word for lexical analysis
Click on a red-colored coordinate for comments and/or translations of the line

▲ earlier lines

00200_6 ܚܵܒܲܬ ܡܸܠܬܵܐ ܘܗܽܘ ܒܓܸܠܝܵܢܲܘ̈ܗ̄ܝ ܡܸܬܓܲܐܸܐ ܗ̄ܘܵܐ܀
00200_7 ܥܕܲܡܵܐ ܠܲܐܝܟܵܐ ܕܓܸܙܡܲܬ ܐܝܼܙܒܸܠ ܐܸܬܡܲܠܲܠ ܗ̄ܘܵܐ܃
00200_8 ܫܲܪܒܸܗ ܕܚܝܼܠܵܐ ܒܲܙܥܽܘܪ̈ܝܵܬܵܐ ܘܢܵܚ ܐܵܡܽܘܪܵܐ܀
00200_9 ܐܲܝܟܵܐ ܗܵܫܵܐ ܬܸܒܥܸܝܘܗ̄ܝ ܡܸܠܬܵܐ ܕܲܬܡܲܠܸܠ ܒܸܗ܃
00201_0 ܕܟܽܠܸܗ ܫܲܝܢܵܗ ܕܲܐܪܥܵܐ ܙܥܽܘܪ ܗ̄ܽܘ ܕܢܸܣܬܲܝܲܟ ܒܸܗ܀
00201_1 ܠܚܽܘܪܒܵܐ ܫܲܢܝܼ ܢܸܪܕܸܐ ܡܹܐܡܪܵܐ ܒܵܬܲܪ ܥܸܩܒܸܗ܃
00201_2 ܘܸܐܢ ܡܲܕܪܸܟ ܠܸܗ ܢܡܲܠܸܠ ܥܠܲܘܗ̄ܝ ܐܲܝܟܵܐ ܕܼܐܝܬܲܘܗ̄ܝ܀
00201_3 ܡܲܢ ܓܹܝܪ ܡܸܫܟܲܚ ܢܸܪܕܸܐ ܥܲܡܸܗ ܕܗܲܘ ܩܲܠܝܼܠܵܐ܃
00201_4 ܕܲܐܝܟ ܫܵܪܽܘܬܵܐ ܚܫܝܼܒ ܠܸܗ ܨܲܘܡܵܐ ܘܡܸܬܦܲܛܲܡ ܒܸܗ܀
00201_5 ܐܲܪܒܥܝܼܢ ܝܲܘ̈ܡܝܼܢ ܕܠܵܐ ܡܸܐܟܽܘܠܬܵܐ ܘܲܕܠܵܐ ܫܸܩܝܵܐ܃
00201_6 ܒܚܽܘܪܒܵܐ ܪܕܵܐ ܗ̄ܘܵܐ ܘܡܲܢ ܠܵܐ ܕܵܚܸܠ ܢܼܐܙܲܠ ܥܲܡܸܗ܀
00201_7 ܐܽܘܪܚܸܗ ܪܗܝܼܒܵܐ ܕܡܸܥܪܲܩ ܥܵܪܸܩ ܡܸܢ ܚܲܛܵܝܬܵܐ܃
00201_8 ܘܨܲܘܡܸܗ ܢܲܓܝܼܪ ܘܲܥܣܝܼܩ ܐܲܬܪܵܐ ܘܡܲܢ ܠܵܘܸܐ ܠܸܗ܀
00201_9 ܚܵܒ ܠܸܗ ܡܹܐܡܪܵܐ ܘܠܵܐ ܡܨܸܐ ܡܗܲܠܸܟ ܥܲܡ ܟܲܫܝܼܪܵܐ܃
00202_0 ܕܗܽܘ ܠܵܐ ܠܵܐܸܐ ܕܠܲܝܠܲܝ ܐܝܼܡܵܡ ܪܵܕܸܐ ܒܽܐܘܪܚܸܗ܀
00202_1 ܚܽܘܒܵܐ ܗ̄ܘ ܕܡܸܫܟܲܚ ܢܼܐܙܲܠ ܥܲܡܸܗ ܕܵܐܦ ܗܽܘ ܟܲܫܝܼܪ܃
00202_2 ܘܠܵܐ ܡܬܽܘܡ ܠܵܐܸܐ ܒܽܐܘܪܚܵܐ ܕܒܵܥܸܐ ܕܲܢܗܲܠܸܟ ܒܵܗ݀܀
00202_3 ܡܵܕܸܝܢ ܡܸܠܬܵܐ ܕܡܲܠܝܵܐ ܚܽܘܒܵܐ ܬܡܲܠܸܠ ܫܲܪܒܸܗ܃
00202_4 ܘܗܵܐ ܠܵܐ ܚܵܒܲܬ ܕܵܐܦܸܢ ܬܸܙܥܲܪ ܠܵܐ ܡܸܬܪܲܫܝܵܐ܀
00202_5 ܐܵܦ ܠܵܗ݀ ܠܸܐܕܢܵܐ ܚܽܘܒܵܐ ܢܸܦܬܲܚ ܠܲܡܩܲܒܵܠܽܘ܃
00202_6 ܕܸܐܠܵܐ ܫܵܡܥܵܐ ܒܚܽܘܒܵܐ ܓܠܝܼܙܵܐ ܗ̄ܝ ܡܸܢ ܝܽܘܬܪ̈ܵܢܸܐ܀
00202_7 ܓܸܙܡܲܬ ܗ̄ܘܵܬ ܟܝܼܬ ܗܵܝ ܡܲܪܵܚܬܵܐ ܠܗܲܘ ܩܲܕܝܼܫܵܐ܃
00202_8 ܘܙܵܥ ܡܸܢ ܩܽܘܕܡܸܝܗ݀ ܕܲܢܚܲܠܸܦ ܗ̄ܘܵܐ ܐܲܬܪܵܐ ܡܸܢܵܗ݀܀
00202_9 ܝܵܕܲܥ ܗ̄ܘܵܐ ܠܵܗ݀ ܕܲܐܫܝܼܕ ܗ̄ܘܵܐ ܠܵܗ݀ ܕܡܵܐ ܕܲܢܒܝܼܸ̈ܐ܃
00203_0 ܘܡܵܢ ܕܲܥܒܝܼܕ ܠܵܗ݀ ܐܸܡܪܲܬ ܕܥܵܒܕܵܐ ܘܥܲܠ ܗܵܝ ܐܲܫܲܪ܀

00203_1 ܡܢܲܣܲܝ ܗ̄ܘܵܐ ܠܸܗ ܒܚܲܒܪ̈ܲܘܗ̄ܝ ܪܽܘܓܙܵܗ݀ ܕܲܡܣܲܝܲܒܬܵܐ܃

00203_2 ܕܠܵܐ ܚܫܝܼܒ ܗ̄ܘܵܐ ܠܵܗ݀ ܕܡܵܐ ܕܲܢܒܝܼܸ̈ܐ ܐܵܦܠܵܐ ܡܸܕܸܡ܀
00203_3 ܗܽܘܝܽܘ ܒܲܠܚܽܘܕ ܐܸܬܦܲܠܲܛ ܗ̄ܘܵܐ ܡܸܢ ܒܸܝܬ ܐܝܼ̈ܕܸܝܗ݀܃
00203_4 ܘܚܵܪ ܚܲܟܝܼܡܵܐ ܕܸܐܢ ܠܵܒܟܵܐ ܠܸܗ ܘܠܵܐ ܗܽܘ ܦܵܠܸܛ܀
00203_5 ܘܲܕܚܸܠ ܘܲܥܪܲܩ ܕܲܢܦܲܠܸܛ ܗ̄ܘܵܐ ܢܲܦܫܸܗ ܡܸܢܵܗ݀܃
00203_6 ܕܵܐܦ ܒܵܗ݀ ܒܗܵܕܸܐ ܛܽܘܦܣܸܗ ܕܡܵܪܲܢ ܡܸܬܢܲܨܲܪ ܗ̄ܘܵܐ܀
00203_7 ܚܛܝܼܬܵܐ ܒܼܐܝܙܒܸܠ ܡܸܬܚܲܙܝܵܐ ܗ̄ܘܵܬ ܓܽܘܫܡܵܢܵܐܝܼܬ܃
00203_8 ܘܗܽܘ ܐܸܠܝܼܵܐ ܨܝܼܪ ܗ̄ܘܵܐ ܒܡܵܪܲܢ ܐ̄ܪܵܙܵܢܵܐܝܼܬ܀
00203_9 ܒܲܢܒܝܼܸ̈ܐ ܕܹܝܢ ܕܸܐܬܩܲܛܲܠܘ ܗ̄ܘܲܘ ܟܽܠܗܽܘܢ ܡܸܢܵܗ݀܃
00204_0 ܝܲܠܕ̈ܲܘܗ̄ܝ ܕܵܐܕܵܡ ܡܸܬܪܲܫܡܝܼܢ ܗ̄ܘܲܘ ܢܲܗܝܼܪܵܐܝܼܬ܀
00204_1 ܡܸܢܵܗ݀ ܕܼܐܝܙܒܸܠ ܗܽܘ ܐܸܠܝܼܵܐ ܦܠܲܛ ܗ̄ܘܵܐ ܒܲܠܚܽܘܕ܃
00204_2 ܗܝܼ ܗ̄ܝܼ ܕܲܒܪܵܐ ܕܗܽܘ ܒܲܠܚܽܘܕܲܘܗ̄ܝ ܙܟܵܐ ܠܲܚܛܝܼܬܵܐ܀
00204_3 ܠܟܽܠܸܗ ܟܸܢܫܵܐ ܕܲܒܢ̈ܲܝ ܐܵܕܵܡ ܚܛܝܼܬܵܐ ܚܸܪܒܲܬ܃
00204_4 ܘܸܐܠܵܐ ܡܵܪܲܢ ܠܵܐ ܐܸܬܦܲܠܲܛ ܟܲܕ ܙܲܟܵܝܵܐ ܗ̄ܘ܀
00204_5 ܠܟܽܠܵܗ݀ ܓܽܘܕܵܐ ܗܵܝ ܕܲܢܒܝܼܸ̈ܐ ܐܝܼܙܒܸܠ ܩܸܛܠܲܬ܃
00204_6 ܘܸܐܠܵܐ ܗܵܢܵܐ ܢܒܝܼܵܐ ܕܐ̄ܪ̈ܵܙܸܐ ܠܵܐ ܐܸܬܦܲܠܲܛ܀
00204_7 ܡܸܢ ܨܲܝܕܢܵܝܬܵܐ ܚܲܕ ܗ̄ܽܘ ܢܒܝܼܵܐ ܐܸܬܦܲܨܝܼ ܗ̄ܘܵܐ܃
00204_8 ܐܵܦ ܠܲܚܛܝܼܬܵܐ ܚܲܕ ܗ̄ܽܘ ܒܲܠܚܽܘܕ ܕܲܙܟܵܐ ܘܲܩܛܲܠ܀
00204_9 ܟܸܐܡܲܬ ܐܝܼܙܒܸܠ ܩܢܽܘܡܵܐ ܘܓܽܘܫܡܵܐ ܗܘܵܬ ܠܲܚܛܝܼܬܵܐ܃
00205_0 ܘܗܽܘ ܐܸܠܝܼܵܐ ܨܽܘܪܬܵܐ ܘܛܽܘܦܣܵܐ ܠܒܲܪ ܐܲܠܵܗܵܐ܀
00205_1 ܚܛܝܼܬܵܐ ܫܸܠܛܲܬ ܒܲܒܢܲܝܢܵܫܵܐ ܘܚܸܪܒܲܬ ܐܸܢܽܘܢ܃
00205_2 ܘܼܐܝܙܒܸܠ ܐܸܚܕܲܬ ܐܵܦ ܠܲܢܒܝܼܸ̈ܐ ܘܩܲܛܠܲܬ ܐܸܢܽܘܢ܀
00205_3 ܐܸܢܵܐ ܗ̄ܘ ܒܲܠܚܽܘܕ ܠܲܡ ܐܸܫܬܲܚܪܸܬ ܢܒܝܼܵܐ ܠܡܵܪܝܵܐ܃
00205_4 ܐܲܝܟ ܕܸܐܬܐܲܡܪܲܬ ܕܸܐܢܵܐ ܙܟܝܼܬܸܗ ܠܥܵܠܡܵܐ ܒܲܠܚܽܘܕ܀
00205_5 ܒܟܽܠܡܸܕܸܡ ܓܹܝܪ ܕܵܡܸܐ ܢܒܝܼܵܐ ܠܲܟܢܲܘ̈ܵܬܸܗ܃
00205_6 ܣܛܲܪ ܡܸܢ ܕܼܐܝܙܒܸܠ ܠܵܐ ܩܛܲܠܬܸܗ ܗ̄ܘܵܬ ܐܲܝܟ ܕܲܠܚܲܒܪ̈ܲܘܗ̄ܝ܀

▼ later lines