← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63403: JS_Elijah (Jacob of Saroug on Elijah)

Click on a word for lexical analysis
Click on a red-colored coordinate for comments and/or translations of the line

▲ earlier lines

00234_9 ܘܡܸܚܕܵܐ ܕܝܲܩܪܸܗ ܒܗܵܝ ܬܸܕܡܽܘܪܬܵܐ ܕܚܲܘܝܼ ܒܼܐܝܕܲܘ̈ܗ̄ܝ܃
00235_0 ܕܠܵܐ ܢܸܬܬܪܝܼܡ ܗ̄ܘܵܐ ܐܲܪܦܝܼ ܘܫܲܒܩܸܗ ܢܸܨܛܲܥܲܪ ܗ̄ܘܵܐ܀
00235_1 ܘܲܗܘܵܬ ܐܝܼܙܒܸܠ ܫܦܵܝܵܐ ܘܓܸܙܡܲܬ ܘܲܕܚܸܠ ܡܸܢܵܗ݀܃
00235_2 ܕܢܸܬܩܲܦܲܚ ܗ̄ܘܵܐ ܒܵܬܲܪ ܐܵܬܵܐ ܪܲܒܬܵܐ ܕܲܣܥܲܪ܀
00235_3 ܒܝܲܕ ܥܸ̈ܠܠܵܬܵܐ ܡܸܢ ܐ̄ܢܵܫܽܘܬܵܐ ܡܲܥܪܸܩ ܗ̄ܘܵܐ ܠܸܗ܃
00235_4 ܕܠܵܐ ܬܸܐܚܽܘܕ ܒܸܗ ܘܟܲܕ ܡܸܬܝܲܩܲܪ ܢܸܬܪܲܦܸܐ ܠܸܗ܀
00235_5 ܘܲܕܡܲܘܬܲܪ ܠܵܗ݀ ܠܢܲܦܫܵܐ ܨܲܥܪܵܐ ܫܒܲܩ ܢܸܨܛܲܥܲܪ܃
00235_6 ܘܲܕܢܸܬܩܲܦܲܚ ܘܲܕܢܸܕܚܲܠ ܗ̄ܘܵܐ ܠܲܡܫܲܢܵܝܽܘ܀
00235_7 ܠܵܐ ܫܲܒܩܸܗ ܗ̄ܘܵܐ ܘܠܵܐ ܚܲܕ ܝܲܘܡܵܐ ܒܗܲܘ ܐܝܼܩܵܪܵܐ܃
00235_8 ܕܠܵܐ ܢܟܲܢܸܫ ܗ̄ܘܵܐ ܥܲܡܵܐ ܨܸܐܕܲܘܗ̄ܝ ܟܲܕ ܣܵܓܸܕ ܠܸܗ܀
00235_9 ܘܲܒܩܽܘ̈ܠܵܣܸܐ ܘܲܒܣܸܓ̈ܕܵܬܵܐ ܢܸܬܢܲܚܲܬ ܗ̄ܘܵܐ܃
00236_0 ܡܸܢ ܗܲܘ ܪܲܘܡܵܐ ܕܪܽܘܚܵܢܽܘܬܵܐ ܕܩܵܐܸܡ ܗ̄ܘܵܐ ܒܸܗ܀
00236_1 ܫܲܒܩܸܗ ܠܫܲܝܢܵܐ ܕܦܲܚܵܐ ܗ̄ܘ ܪܲܒܵܐ ܠܝܼܚܝܼܕܵܝܵܐ܃
00236_2 ܘܲܐܦܩܸܗ ܠܚܽܘܪܒܵܐ ܕܝܵܗܸܒ ܐܝܼܕܵܐ ܠܪܽܘܚܵܢܽܘܬܵܐ܀
00236_3 ܘܕܲܒܪܸܗ ܒܡܲܕܒܪܵܐ ܕܠܵܐ ܡܸܐܟܽܘܠܬܵܐ ܐܲܪܒܥܝܼܢ ܝܲܘ̈ܡܝܼܢ܃
00236_4 ܕܢܸܫܬܲܦܸܐ ܗ̄ܘܵܐ ܟܝܵܢܵܐ ܕܢܲܦܫܸܗ ܒܨܲܘܡܵܐ ܪܲܒܵܐ܀
00236_5 ܘܲܫܓܝܼܫܽܘܬܸܗ ܕܥܵܠܡܵܐ ܥܸܒܪܲܬ ܡܸܢ ܪܸܥܝܵܢܸܗ܃
00236_6 ܘܲܛܥܵܐ ܒܗܸܪܓܵܐ ܐܲܠܵܗܵܝܵܐ ܨܲܘܬܵܗ݀ ܕܲܐܪܥܵܐ܀
00236_7 ܘܲܠܚܸܪ̈ܝܵܢܲܘܗ̄ܝ ܕܵܐܚܵܒ ܘܼܐܝܙܒܸܠ ܐܸܬܢܲܫܝܼ ܗ̄ܘܵܐ܃
00236_8 ܘܡܸܢ ܐ̄ܢܵܫܽܘܬܵܐ ܘܡܸܢ ܥܸܢܝܵܢܵܗ݀ ܐܸܬܪܲܚܲܩ ܗ̄ܘܵܐ܀
00236_9 ܘܥܲܡ ܐܲܠܵܗܵܐ ܚܠܲܛ ܗ̄ܘܵܐ ܗܲܘܢܸܗ ܐܵܦ ܚܽܘܫܵܒܲܘ̈ܗ̄ܝ܃
00237_0 ܘܲܠܒܲܪ ܡܸܢܸܗ ܠܵܐ ܡܸܬܬܙܝܼܥ ܗ̄ܘܵܐ ܐܵܦܠܵܐ ܩܲܠܝܼܠ܀
00237_1 ܘܗܵܠܸܝܢ ܟܽܠܗܸܝܢ ܕܲܦܓܲܥ̈ܝ ܗ̄ܘ̈ܲܝ ܒܸܗ ܥܒܲܪ̈ܝ ܡܸܢ ܠܸܒܸܗ܃
00237_2 ܘܠܵܐ ܐܝܼܬ ܗ̄ܘܵܐ ܒܸܗ ܪܸܢܝܵܐ ܕܡܸܕܸܡ ܦܲܓܪܵܢܵܝܵܐ܀
00237_3 ܘܲܡܛܵܐ ܠܣܝܼܢܲܝ ܟܲܕ ܕܵܠܩܵܐ ܒܸܗ ܩܲܕܝܼܫܽܘܬܵܐ܃
00237_4 ܘܲܕܢܲܚ ܥܠܲܘܗ̄ܝ ܗܲܘ ܓܸܠܝܵܢܵܗ݀ ܕܲܐܠܵܗܽܘܬܵܐ܀
00237_5 ܘܡܸܚܕܵܐ ܫܲܕܪܸܗ ܕܢܸܗܦܽܘܟ ܠܽܐܘܪܚܵܐ ܕܸܐܬܵܐ ܡܸܢܵܗ݀܃
00237_6 ܕܗܵܝ ܕܵܐܠܨܵܐ ܗ̄ܘܵܬ ܕܬܸܗܘܸܐ ܨܸܐܕܲܘܗ̄ܝ ܐܸܬܓܲܡܪܲܬ ܠܵܗ݀܀
00237_7 ܡܵܪܝܵܐ ܠܡܽܘܫܸܐ ܒܣܝܼܢܲܝ ܙܲܗܝܸܗ ܟܲܕ ܐܸܙܕܲܗܝܼ܃
00237_8 ܐܵܦ ܠܸܐܠܝܼܵܐ ܬܲܡܵܢ ܫܲܡܠܝܼ ܟܲܕ ܐܸܫܬܲܡܠܝܼ܀
00237_9 ܡܥܲܪܬܸܗ ܕܡܽܘܫܸܐ ܝܲܗ̄ܒ ܠܸܐܠܝܼܵܐ ܕܢܸܫܬܲܡܠܸܐ ܒܵܗ݀܃
00238_0 ܘܲܒܓܸܠܝܵܢܵܐ ܪܲܒܵܐ ܓܲܡܪܸܗ ܘܫܲܕܪܸܗ ܠܽܐܘܪܚܸܗ܀
00238_1 ܐܸܬܝܲܬܲܪ ܗ̄ܘܵܐ ܒܩܲܪܝܼܒܽܘܬܵܐ ܕܨܹܝܕ ܐܲܠܵܗܵܐ܃
00238_2 ܥܕܲܡܵܐ ܕܥܵܠܡܵܐ ܠܵܐ ܢܸܫܘܸܐ ܠܸܗ ܕܲܢܩܲܘܸܐ ܒܸܗ܀
00238_3 ܘܟܲܕ ܥܸܒܪܲܬ ܠܵܗ݀ ܡܫܽܘܚܬܸܗ ܪܵܡܬܵܐ ܐܵܦ ܠܲܓܡܝܼܪܸ̈ܐ܃
00238_4 ܢܒܝܼܵܐ ܐ̄ܚܪܼܢܵܐ ܕܢܸܗܘܸܐ ܚܠܵܦܲܘܗ̄ܝ ܐܸܬܛܲܝܲܒ ܗ̄ܘܵܐ܀
00238_5 ܡܫܽܘܚ ܠܸܐܠܝܼܫܲܥ ܕܢܸܗܘܸܐ ܚܠܵܦܲܝܟ ܐܵܡܲܪ ܗ̄ܘܵܐ ܠܸܗ܃
00238_6 ܕܝܸܪܒܲܬ ܗ̄ܘܵܬ ܠܵܗ݀ ܡܫܽܘܚܬܸܗ ܕܝܼܠܸܗ ܡܸܢ ܕܲܢܒܝܼܸ̈ܐ܀
00238_7 ܐܲܝܟ ܒܲܝܬܵܝܵܐ ܘܝܵܕܲܥ ܐ̄ܪܵܙܵܐ ܫܲܕܪܸܗ ܕܲܢܩܝܼܡ܃
00238_8 ܢܒܝܼܸ̈ܐ ܘܡܲܠܟܸ̈ܐ ܠܥܲܡ̈ܡܸܐ ܘܥܲܡܵܐ ܕܢܸܡܫܽܘܚ ܐܸܢܽܘܢ܀
00238_9 ܥܲܠ ܕܲܡܠܸܐ ܗ̄ܘܵܐ ܠܸܒܸܗ ܛܢܵܢܵܐ ܥܲܠ ܪ̈ܲܫܝܼܥܸܐ܃
00239_0 ܓܒܵܐ ܠܛܲܢܵܢܸ̈ܐ ܢܥܝܼܪܽܘܢ ܚܲܪܒܵܐ ܥܲܠ ܡܵܪ̈ܽܘܕܸܐ܀
00239_1 ܘܲܕܢܸܕܲܥ ܬܽܘܒ ܕܼܐܝܬ ܗ̄ܽܘ ܠܡܵܪܝܵܐ ܥܲܡܵܐ ܟܲܣܝܵܐ܃
00239_2 ܓܠܵܐ ܠܸܗ ܕܼܐܝܬ ܠܸܗ ܐܲܠܦܸ̈ܐ ܫܲܒܥܵܐ ܕܠܵܐ ܡܸܬܚܲܪܒܝܼܢ܀
00239_3 ܐܝܼܬ ܗ̄ܽܘ ܛܵܒܸ̈ܐ ܒܲܝܢܵܬ ܒܝܼ̈ܫܸܐ ܕܥܵܠܡܵܐ ܟܽܠܸܗ܃
00239_4 ܘܡܵܪܝܵܐ ܗ̄ܘ ܝܵܕܲܥ ܡܸܢܝܵܢܲܝ̈ܗܽܘܢ ܘܲܫܡܵܗܲܝ̈ܗܽܘܢ܀
00239_5 ܒܩܽܘܛܢܵܐ ܒܨܝܼܪܵܐ ܘܲܒܡܽܘ̈ܫܚܵܬܵܐ ܕܠܵܐ ܝܼܕܝܼ̈ܥܵܢ܃
00239_6 ܐܝܼܬ ܠܲܐܠܵܗܵܐ ܪ̈ܲܚܡܸܐ ܘܲܟܣܸܝܢ ܡܸܢ ܐ̄ܢܵܫܽܘܬܵܐ܀
00239_7 ܫܚܝܼ̈ܡܸܐ ܘܫܝܼ̈ܛܸܐ ܘܠܵܐ ܝܼܕܝܼ̈ܥܸܐ ܐܵܦ ܡܲܣ̈ܠܲܝܵܐ܃
00239_8 ܐܝܼܬ ܕܩܲܪܝܼܒܝܼܢ ܨܹܝܕ ܐܲܠܵܗܵܐ ܘܠܵܐ ܐ̄ܢܵܫ ܝܵܕܲܥ܀
00239_9 ܒܡܲܟܝܼܟܽܘܬܵܐ ܘܠܸܒܵܐ ܕܲܫܦܸܐ ܡܸܢ ܒܝܼ̈ܫܵܬܵܐ܃