The Comprehensive Aramaic Lexicon

00310_0	ܐܵܦ ܒܲܪ̄ܬ ܐ̄ܪܵܙܵܐ ܕܟܽܠܗܽܘܢ ܟܽܘܡܪܸ̈ܐ ܕܲܥܠܲܘ̈ܵܬܵܐ܀
00310_1	ܡܫܲܡܫܵܢܝܼܬܵܐ ܕܲܦܬܲܟܪ̈ܵܬܵܐ ܕܵܐܡܽܘܪ̈ܵܝܸܐ܃
00310_2	ܘܡܲܣܩܲܬ ܕܸܒܚܸ̈ܐ ܠܨܲܠܡܸ̈ܐ ܚܲܪ̈ܒܸܐ ܕܝܵܒܽܘܣܵܝܸ̈ܐ܀
00310_3	ܡܚܲܕܬܵܢܝܼܬܵܐ ܕܟܽܠ ܕܸܚ̈ܠܵܬܵܐ ܕܨܽܘܪ ܘܲܕܨܲܝܕܵܢ܃
00310_4	ܢܲܦܫܵܐ ܣܪܝܼܚܬܵܐ ܕܝܵܠܕܵܐ ܟܽܠܝܽܘܡ ܚܲܫܸ̈ܐ ܒܝܼܫܸ̈ܐ܀
00310_5	ܗܝܼ ܕܹܝܢ ܗܵܕܸܐ ܚܲܢܦܬܵܐ ܪܲܒܬܵܐ ܕܲܫܡܵܗ̈ܵܬܵܐ܃
00310_6	ܩܸܪܒܲܬ ܨܸܐܕܲܘܗ̄ܝ ܕܵܐܚܵܒ ܒܲܥܠܵܗ݀ ܠܲܡܫܲܐܵܠܽܘ܀
00310_7	ܡܵܢܵܐ ܗ̄ܝ ܥܸܠܬܵܐ ܕܥܵܩܬܵܟ ܡܲܠܟܵܐ ܠܵܐ ܬܟܲܣܸܐ ܡܸܢܝ܃
00310_8	ܘܫܲܪܝܼ ܚܲܢܦܵܐ ܒܚܲܫܵܐ ܨܸܐܕܸܝܗ݀ ܠܲܡܡܲܠܵܠܽܘ܀
00310_9	ܟܲܪܡܸܗ ܕܢܵܒܽܘܬ ܒܥܝܼܬ ܒܲܕܡܲܝ̈ܵܐ ܘܠܵܐ ܐ̄ܢܵܫ ܝܲܗ̄ܒ ܠܝܼ܃
00311_0	ܐܲܘ ܬܲܚܠܽܘܦܸܗ ܨܒܸܝܬ ܐܸܬܸܠ ܠܸܗ ܘܠܵܐ ܩܲܒܸܠ ܡܸܢܝ܀
00311_1	ܐܵܡܪܵܐ ܐܝܼܙܒܸܠ ܕܓܽܘܚܟܵܐ ܗ̄ܝ ܥܵܩܬܵܟ ܐܸܢ ܗܵܟܲܢ ܗ̄ܝܼ܃
00311_2	ܕܡܲܠܟܵܐ ܪܲܒܵܐ ܒܥܵܬܵܐ ܙܥܽܘܪܬܵܐ ܒܥܵܐ ܘܸܐܬܟܲܠܝܲܬ܀
00311_3	ܥܠܲܝ ܣܽܘܥܪܵܢܵܟ ܕܸܐܣܥܽܘܪ ܘܲܐܬܩܸܢ ܐܲܝܟ ܨܸܒܝܵܢܵܟ܃
00311_4	ܨܸܐܕܲܝ ܟܲܪܡܵܐ ܘܝܵܗܒܵܐ ܐ̄ܢܵܐ ܠܵܟ ܕܲܦܫܝܼܩ ܗ̄ܽܘ ܠܝܼ܀
00311_5	ܚܲܟܝܼܡܵܢܵܐ ܘܲܢܟܝܼܠܵܢܵܐ ܘܲܨܢܝܼܥܵܢܵܐ܃
00311_6	ܘܲܡܕܲܪܫܵܢܵܐ ܒܢܸܟܠܵܐ ܘܩܸܛܠܵܐ ܘܕܲܓܵܠܽܘܬܵܐ܀
00311_7	ܟܽܠ ܣܽܘܥܪܵܢܵܐ ܕܼܐܝܬ ܒܸܗ ܩܸܛܠܵܐ ܠܝܼ ܐܲܓܥܸܠܵܝܗܝ܃
00311_8	ܘܫܵܪܝܵܐ ܐ̄ܢܵܐ ܠܸܗ ܟܲܕ ܠܵܐ ܫܚܝܼܩ ܐܲܢ̄ܬ ܕܲܡܗܝܼܪܵܐ ܐ̄ܢܵܐ܀
00311_9	ܐܲܢ̄ܬܬܵܐ ܐܝܼܬ ܠܵܟ ܠܵܐ ܬܸܬܦܲܫܲܚ ܒܲܗ̈ܦܵܟܵܬܵܐ܃
00312_0	ܕܟܽܠܗܽܘܢ ܩܸܛܪܸ̈ܐ ܕܥܲܘܠܵܐ ܦܫܝܼܩܝܼܢ ܘܲܕܠܝܼܠܝܼܢ ܠܝܼ܀
00312_1	ܝܵܗܒܵܐ ܐ̄ܢܵܐ ܠܵܟ ܟܲܪܡܸܗ ܕܢܵܒܽܘܬ ܐܲܝܟ ܕܲܫܐܸܠܬܵܝܗܝ܃
00312_2	ܐܲܟܽܘܠ ܘܸܐܬܬܢܝܼܚ ܘܲܐܟܫܲܪ ܡܲܠܟܵܐ ܘܩܽܘܡ ܥܲܠ ܥܲܡܵܐ܀
00312_3	ܠܲܒܸܒܬܸܗ ܗ̄ܘܵܬ ܗܵܝ ܪܲܫܝܼܥܬܵܐ ܠܚܲܢܦܵܐ ܪܲܒܵܐ܃
00312_4	ܘܛܲܝܒܲܬ ܢܲܦܫܵܗ݀ ܠܲܡܫܲܦܵܥܽܘ ܕܡܵܐ ܙܲܟܵܝܵܐ܀
00312_5	ܘܫܲܪܝܲܬ ܕܬܲܦܸܩ ܡܸܢ ܬܲܘܬܵܪܸ̈ܐ ܕܠܸܒܵܗ݀ ܩܸܛܠܵܐ܃
00312_6	ܒܲܪܬܸܗ ܕܩܵܐܸܝܢ ܢܲܟܽܘܠܬܵܢܵܐ ܘܲܨܗܸܐ ܠܲܕܡܵܐ܀
00312_7	ܝܸܬܒܲܬ ܕܬܸܙܩܽܘܪ ܟܽܘܬܝܼܢ ܥܲܘܠܵܐ ܒܢܲܘܠܵܐ ܕܲܕܡܵܐ܃
00312_8	ܡܸܢ ܬܲܥܬܽܘܕܵܐ ܕܩܸܛܠܵܐ ܥܠܝܼܒܵܐ ܕܗܝܼ ܥܲܬܸܕܬܸܗ܀
00312_9	ܫܸܩܠܲܬ ܩܲܢܝܵܐ ܘܡܸܢ ܨܸܒ̈ܥܵܬܵܗ݀ ܡܲܘܬܵܐ ܢܸܣܟܲܬ܃
00313_0	ܘܒܲܟܬܝܼܒ̈ܵܬܵܐ ܫܠܲܕܵܐ ܨܵܪܲܬ ܥܲܠ ܩܲܪܛܲܝܣܵܐ܀
00313_1	ܝܸܬܒܲܬ ܟܸܬܒܲܬ ܗܵܝ ܐܸܓܲܪܬܵܐ ܕܡܲܠܝܵܐ ܢܸܟܠܵܐ܃
00313_2	ܘܲܒܣܽܘܪ̈ܓܵܕܸܐ ܐܲܝܟ ܕܲܒܓܲܘ̈ܢܸܐ ܡܲܘܬܵܐ ܪܸܫܡܲܬ܀
00313_3	ܘܟܸܬܒܲܬ ܗܵܟܲܢ ܠܣܵܒܸ̈ܐ ܘܚܼܐܪܸ̈ܐ ܕܼܐܝܬ ܒܼܐܝܙܲܪܥܸܝܠ܃
00313_4	ܕܲܓܙܽܘܪܘ ܨܲܘܡܵܐ ܘܲܒܪܝܼܫ ܥܲܡܵܐ ܠܢܵܒܽܘܬ ܐܲܘܬܸܒܘ܀
00313_5	ܘܲܒܢ̈ܲܝ ܥܲܘܠܵܐ ܬܪܸܝܢ ܡܸܢ ܥܲܡܵܐ ܠܩܽܘܒܠܸܗ ܐܲܘܬܸܒܘ܃
00313_6	ܘܣܵܗ̈ܕܸܐ ܕܫܽܘܩܪܵܐ ܕܲܡܗܝܼܪܝܼܢ ܗ̄ܘܲܘ ܒܕܲܓܵܠܽܘܬܵܐ܀
00313_7	ܘܢܼܐܡܪܽܘܢ ܕܨܲܚܝܼ ܢܵܒܽܘܬ ܠܡܲܠܟܵܐ ܐܵܦ ܠܲܐܠܵܗܵܐ܃
00313_8	ܘܲܐܦܸܩܘ ܪܽܘܓܡܽܘܗ̄ܝ ܟܽܠܸܗ ܥܲܡܵܐ ܒܟܼܐܦܸ̈ܐ ܘܲܢܡܽܘܬ܀
00313_9	ܗܵܠܸܝܢ ܡܸ̈ܠܸܐ ܒܓܲܘ ܐܸܓܲܪܬܵܐ ܕܢܸܟܠܵܐ ܣܵܡܲܬ܃
00314_0	ܘܲܠܙܲܕܝܼܩܵܐ ܦܲܚܵܐ ܛܸܡܪܲܬ ܙܼܐܦܵܢܝܼܬܵܐ܀
00314_1	ܠܸܛܫܲܬ ܣܲܝܦܵܐ ܕܬܸܥܒܸܕ ܩܸܛܠܵܐ ܘܬܸܣܚܸܐ ܒܲܕܡܵܐ܃
00314_2	ܘܲܒܟܲܪܛܲܝܣܵܐ ܟܪܲܟܬܸܗ ܕܢܸܩܛܽܘܠ ܟܲܕ ܠܵܐ ܝܼܕܝܼܥ܀
00314_3	ܒܓܲܘ ܐܸܓܲܪܬܵܐ ܟܡܼܐܢܵܐ ܥܸܒܕܲܬ ܒܲܨܢܝܼܥܽܘܬܵܗ݀܃
00314_4	ܕܲܬܩܽܘܡ ܬܲܪܡܸܐ ܚܲܪܒܵܐ ܒܟܸܣܝܵܐ ܘܠܵܐ ܐ̄ܢܵܫ ܢܸܪܓܲܫ܀