The Comprehensive Aramaic Lexicon

00322_6	ܓܲܠܝܵܐ ܨܽܘܪܬܸܗ ܘܕܵܡܸܐ ܒܡܲܘܬܸܗ ܠܒܲܪ ܐܲܠܵܗܵܐ܀
00322_7	ܗܵܐ ܒܢ̈ܲܝ ܥܲܘܠܵܐ ܬܪܸܝܢ ܓܲܝ̈ܵܣܸܐ ܕܥܲܠ ܓܵܓܽܘܠܬܵܐ܃
00322_8	ܐܸܬܛܲܝܲܒܘ ܗ̄ܘܲܘ ܨܹܝܕ ܬܲܡܝܼܡܵܐ ܡܸܢ ܪ̈ܲܫܝܼܥܸܐ܀
00322_9	ܐܝܼܙܒܸܠ ܦܸܩܪܲܬ ܕܲܬܨܽܘܪ ܨܲܠܡܵܐ ܠܲܨܠܝܼܒܽܘܬܵܐ܃
00323_0	ܘܟܲܕ ܠܵܐ ܝܵܕܥܵܐ ܪܫܲܡܬܸܗ ܠܩܸܛܠܸܗ ܕܒܲܪ ܐܲܠܵܗܵܐ܀
00323_1	ܒܢ̈ܲܝ ܥܲܘܠܵܐ ܬܪܸܝܢ ܐܲܩܦܲܬ ܗ̄ܘܵܬ ܠܸܗ ܠܗܲܘ ܠܙܲܕܝܼܩܵܐ܃
00323_2	ܕܲܢܨܽܘܪ ܕܽܘܡܝܸܗ ܕܗܲܘ ܕܸܐܬܡܲܨܲܥ ܒܸܝܬ ܓܲܝ̈ܵܣܸܐ܀
00323_3	ܟܬܝܼܒ ܥܲܠ ܡܵܪܲܢ ܕܲܡܢܲܐܽܘܗ̄ܝ ܗ̄ܘܲܘ ܥܲܡ ܥܲܘ̈ܵܠܸܐ܃
00323_4	ܘܗܵܢܵܐ ܥܠܝܼܒܵܐ ܒܲܒܢ̈ܲܝ ܥܲܘܠܵܐ ܐܵܦ ܠܸܗ ܚܲܠܛܽܘܗ̄ܝ܀
00323_5	ܗܵܐ ܥܲܘ̈ܵܠܸܐ ܘܲܒܢ̈ܲܝ ܥܲܘܠܵܐ ܠܥܲܒܕܵܐ ܘܡܵܪܸܗ܃
00323_6	ܬܪܸܝܢ ܬܪܸܝܢ ܝܲܗ̄ܒ ܗ̄ܘ̈ܲܝ ܨܸܗܝܽܘܢ ܘܼܐܝܙܒܸܠ ܟܲܕ ܡܸܬܩܲܛܠܝܼܢ܀
00323_7	ܕܲܗܘܵܬ ܕܵܡܝܵܐ ܟܢܽܘܫܬܵܐ ܠܼܐܝܙܒܸܠ ܒܲܥܒܝܼ̈ܕܵܬܵܗ݀܃
00323_8	ܘܗܲܘ ܡܲܟܝܼܟܵܐ ܒܡܲܘܬܸܗ ܥܠܝܼܒܵܐ ܠܲܕܦܵܪܽܘܩܲܢ܀
00323_9	ܠܗܵܢܵܐ ܓܲܒܪܵܐ ܠܵܐ ܐܝܼܬ ܗ̄ܘܵܐ ܠܸܗ ܒܲܪ ܝܲܡܝܼܢܵܐ܃
00324_0	ܕܲܒܢ̈ܲܝ ܥܲܘܠܵܐ ܬܪ̈ܲܝܗܽܘܢ ܕܝܼܠܸܗ ܕܣܸܡܵܠܵܐ ܗ̄ܘܲܘ܀
00324_1	ܪܵܡ ܗ̄ܽܘ ܡܵܪܲܢ ܡܸܢ ܕܸܡܘ̈ܵܬܵܐ ܘܡܸܢ ܨܽܘܪ̈ܵܬܵܐ܃
00324_2	ܕܝܼܚܝܼܕܵܝܵܐ ܗ̄ܘ ܘܗܽܘ ܠܸܗ ܕܵܡܸܐ ܘܲܐ̄ܚܪܼܢܵܐ ܠܵܐ܀
00324_3	ܡܵܐ ܕܸܐܬܬܲܚܬܝܼ ܕܢܸܬܬܨܝܼܪ ܛܽܘܦܣܸܗ ܒܕܽܘܟܵܐ ܕܽܘܟܵܐ܃
00324_4	ܫܸܦܥܲܬ ܨܽܘܪܬܸܗ ܠܵܐ ܡܸܬܚܲܒܫܵܐ ܒܓܲܘ ܕܸܡܘ̈ܵܬܵܐ܀
00324_5	ܡܵܐ ܕܝܲܗ̄ܒ ܢܲܦܫܸܗ ܡܲܟܝܼܟܵܐܝܼܬ ܕܲܢܨܽܘܪܽܘܢܵܝܗܝ܃
00324_6	ܐܲܙܠܸܓ ܫܽܘܦܪܸܗ ܚܵܒܘ ܣܲܡ̈ܡܵܢܸܐ ܘܠܵܐ ܡܲܘܦܸܝܢ ܠܸܗ܀
00324_7	ܒܲܒܢ̈ܲܝ ܥܲܘܠܵܐ ܕܝܼܬܸܒܘ ܥܲܡܸܗ ܨܵܪܸܗ ܢܵܒܽܘܬ܃
00324_8	ܘܦܵܫ ܠܸܗ ܡܸܢܸܗ ܒܗܵܝ ܕܲܐܚܝܼ ܗ̄ܘܵܐ ܠܒܲܪ ܝܲܡܝܼܢܵܐ܀
00324_9	ܐܸܬܕܲܡܝܼ ܠܸܗ ܒܲܬܪܸܝܢ ܒܝܼ̈ܫܝܼܢ ܕܲܐܩܸܦܘ ܗ̄ܘܲܘ ܠܸܗ܃
00325_0	ܠܵܐ ܕܹܝܢ ܐܸܫܟܲܚ ܕܲܠܚܲܕ ܡܸܢܗܽܘܢ ܓܲܢܬܵܐ ܢܸܦܬܲܚ܀

00325_1	ܠܗܲܘ ܕܲܝܵܢܵܐ ܕܡܝܼ̈ܬܸܐ ܘܚܲܝܸ̈ܐ ܐܸܫܬܲܟܚܲܬ ܗܵܝ܃

00325_2	ܕܒܸܝܬ ܝܲܡܝܼܢܵܐ ܘܲܠܣܸܡܵܠܵܐ ܒܡܲܘܬܸܗ ܢܸܦܪܽܘܫ܀
00325_3	ܗܽܘܝܽܘ ܡܸܫܟܲܚ ܘܵܐܦ ܡܸܢ ܕܼܐܒܸ̈ܐ ܐܸܡܪܸ̈ܐ ܢܸܥܒܸܕ܃
00325_4	ܘܲܚܘܲܘ̈ܵܬܵܐ ܠܝܲܘ̈ܢܸܐ ܢܸܗܦܽܘܟ ܡܵܐ ܕܲܩܪܸܒܘ ܠܸܗ܀
00325_5	ܢܕܲܟܸܐ ܠܛܲܡ̈ܐܸܐ ܠܵܐ ܐ̄ܢܵܫ ܡܸܫܟܲܚ ܐܸܠܵܐ ܐܸܢ ܗܽܘ܃
00325_6	ܘܠܵܐ ܕܲܠܒܝܼ̈ܫܸܐ ܢܸܥܒܸܕ ܛܵܒܸ̈ܐ ܘܢܲܚܸܐ ܐܸܢܽܘܢ܀
00325_7	ܦܫܝܼܩ ܠܸܗ ܕܝܼܠܸܗ ܕܵܐܦ ܡܸܢ ܟܽܘ̈ܒܸܐ ܚܸ̈ܛܸܐ ܢܸܟܢܽܘܫ܃
00325_8	ܘܡܸܢ ܙܝܼ̈ܙܵܢܸܐ ܢܸܥܒܸܕ ܟܲܪܝܵܐ ܕܙܲܪ̈ܥܸܐ ܛܵܒܸ̈ܐ܀
00325_9	ܥܲܡ ܥܲܘ̈ܵܠܸܐ ܡܢܲܐܽܘܗ̄ܝ ܒܝܼ̈ܫܸܐ ܘܲܠܚܲܕ ܫܲܩܠܸܗ܃
00326_0	ܘܝܲܗ̄ܒ ܠܸܗ ܩܠܝܼ̈ܕܸܐ ܘܥܲܒܕܸܗ ܫܠܝܼܚܵܐ ܠܓܲܘ ܦܲܪܕܲܝܣܵܐ܀
00326_1	ܐܲܝܟܵܐ ܕܲܐܠܨܲܬ ܥܒܲܕ ܡܸܢ ܡܲܝ̈ܵܐ ܚܲܡܪܵܐ ܛܵܒܵܐ܃
00326_2	ܘܲܐܝܟܵܐ ܕܲܒܥܵܐ ܡܸܢ ܠܸܣܛܵܝܵܐ ܝܵܪܬܵܐ ܠܲܥܕܸܢ܀
00326_3	ܦܵܫ ܠܸܗ ܢܵܒܽܘܬ ܡܸܢ ܦܽܘܚܵܡܸܗ ܕܒܲܪ ܐܲܠܵܗܵܐ܃
00326_4	ܕܪܲܒ ܗ̄ܽܘ ܨܲܠܡܸܗ ܡܸܢ ܨܲܝܵܪܸ̈ܐ ܘܡܸܢ ܣܲܡ̈ܡܵܢܸܐ܀
00326_5	ܠܲܘ ܡܸܨܥܵܝܵܐ ܡܨܸܐ ܗ̄ܘܵܐ ܕܢܸܗܘܸܐ ܐܲܝܟ ܦܵܪܽܘܩܲܢ܃
00326_6	ܘܠܵܐ ܒܝܲܡܝܼܢܸܗ ܚܲܝܸ̈ܐ ܐܝܼܬ ܗ̄ܘܵܐ ܠܲܕܩܵܪܼܒ ܠܸܗ܀
00326_7	ܬܪ̈ܲܝܗܽܘܢ ܓܲܒܪ̈ܲܘܗ̄ܝ ܒܚܲܕ ܗ̄ܘܲܘ ܓܲܒܵܐ ܡܸܢ ܣܸܡܵܠܵܐ܃
00326_8	ܘܗܲܘ ܙܲܕܝܼܩܵܐ ܒܓܲܒܵܐ ܐ̄ܚܪܼܢܵܐ ܕܡܸܢ ܝܲܡܝܼܢܵܐ܀
00326_9	ܡܸܨܥܵܝܵܐ ܕܹܝܢ ܐܝܼܬ ܗ̄ܘܵܐ ܬܲܡܵܢ ܘܲܟܣܸܐ ܡܸܢ ܟܽܠ܃
00327_0	ܕܚܵܙܸܐ ܘܬܵܒܲܥ ܠܲܕܡܸܗ ܕܢܵܒܽܘܬ ܡܸܢ ܥܲܘ̈ܵܠܸܐ܀
00327_1	ܐ̄ܬܲܘ ܟܝܼܬ ܗܵܠܸܝܢ ܓܲܒܪܸ̈ܐ ܢܟܝܼ̈ܠܸܐ ܘܲܒܢ̈ܲܝ ܥܲܘܠܵܐ܃
00327_2	ܘܲܒܪܝܼܫ ܥܲܡܵܐ ܝܼܬܸܒܘ ܨܸܐܕܲܘܗ̄ܝ ܐܲܝܟ ܕܸܐܬܦܲܩܲܕܘ܀
00327_3	ܐ̄ܬܲܘ ܛܲܪ̈ܟܵܢܸܐ ܘܸܐܣܟܼܡ̈ܬܵܢܸܐ ܨܢܝܼ̈ܥܸܐ ܘܒܝܼ̈ܫܸܐ܃
00327_4	ܡܕܲܪ̈ܫܸܐ ܒܥܲܘܠܵܐ ܡܢܲܦܩܸ̈ܐ ܒܟܽܠܵܗ݀ ܕܲܓܵܠܽܘܬܵܐ܀
00327_5	ܚܵܫ̈ܠܲܝ ܢܸܟܠܵܐ ܡܗܝܼܪܸ̈ܐ ܒܩܸܛܠܵܐ ܘܪ̈ܵܚܡܸܐ ܒܲܕܡܵܐ܃
00327_6	ܒܢܲܝܵܐ ܕܥܲܘܠܵܐ ܘܚܲܒܪܸ̈ܐ ܕܟܽܠܵܗ݀ ܣܵܪܽܘܒܽܘܬܵܐ܀