← Back
The Comprehensive Aramaic Lexicon
← Return to the Text Browser
click on the file description for more information

63403: JS_Elijah (Jacob of Saroug on Elijah)

Click on a word for lexical analysis
Click on a red-colored coordinate for comments and/or translations of the line

▲ earlier lines

00371_4 ܘܠܵܐ ܠܲܫܪܵܪܵܐ ܕܲܢܪܝܼܡ ܩܵܠܸܗ ܒܒܲܝܬܸܗ ܕܵܐܚܵܒ܀
00371_5 ܠܕܲܓܵܠܽܘܬܵܐ ܐܝܼܬ ܗ̄ܘܵܐ ܐܲܬܪܵܐ ܕܬܸܬܪܲܘܪܲܒ ܗ̄ܘܵܬ܃
00371_6 ܕܕܝܼܠܵܗ݀ ܒܲܠܚܽܘܕ ܪܵܡ ܗ̄ܘܵܐ ܪܝܼܫܵܗ݀ ܒܸܝܬ ܥܲܘ̈ܵܠܸܐ܀
00371_7 ܢܒܝܼܵܐ ܕܫܲܪܝܼܪ ܠܵܐ ܚܵܫܲܚ ܗ̄ܘܵܐ ܢܡܲܠܸܠ ܬܲܡܵܢ܃
00371_8 ܕܟܽܠܸܗ ܒܲܝܬܵܐ ܕܕܲܓ̈ܵܠܸܐ ܗ̄ܘܵܐ ܘܲܕܫܲܩܵܪܸ̈ܐ܀
00371_9 ܐܝܼܬ ܠܲܡ ܗܵܪܟܵܐ ܢܒܝܼܵܐ ܡܝܼܟܵܐ ܘܣܵܢܸܐ ܐ̄ܢܵܐ ܠܸܗ܃
00372_0 ܘܲܥܨܵܝܗ̄ܝ ܡܲܠܟܵܐ ܚܲܒܪܸܗ ܘܫܲܕܲܪ ܒܵܬܪܸܗ ܢܲܝܬܝܼܘܗ̄ܝ܀
00372_1 ܐ̄ܬܵܐ ܕܹܝܢ ܡܝܼܟܵܐ ܢܒܝܼܵܐ ܕܩܽܘܫܬܵܐ ܡܠܸܐ ܓܸܠܝ̈ܵܢܸܐ܃
00372_2 ܘܥܲܠ ܢܸܫܬܲܐܲܠ ܥܲܠ ܬܲܟܬܽܘܫܵܐ ܕܲܐܕܽܘܡܵܝܸ̈ܐ܀
00372_3 ܐܵܡܲܪ ܡܲܠܟܵܐ ܐܸܣܲܩ ܗܵܫܵܐ ܠܪܵܡܲܬ ܓܸܠܥܵܕ܃
00372_4 ܐܲܘ ܠܵܐ ܐܸܣܲܩ ܥܲܠ ܬܲܟܬܽܘܫܵܐ ܡܵܢ ܐܵܡܲܪ ܐܲܢ̄ܬ܀
00372_5 ܐܵܡܲܪ ܡܝܼܟܵܐ ܐܲܢ̄ܬ ܣܲܩ ܘܲܙܟܝܼ ܘܢܲܫܠܸܡ ܐܸܢܽܘܢ܃
00372_6 ܡܵܪܝܵܐ ܒܼܐܝ̈ܕܲܝܟ ܠܲܐܕܽܘܡܵܝܸ̈ܐ ܐܲܝܟ ܨܸܒܝܵܢܵܟ܀
00372_7 ܠܵܐ ܡܸܢ ܡܝܼܟܵܐ ܘܠܵܐ ܡܸܢ ܡܵܪܝܵܐ ܢܸܦܩܲܬ ܗܵܕܸܐ܃
00372_8 ܐܸܠܵܐ ܫܐܝܼܠܬܵܐ ܝܲܗ̄ܒ ܠܸܗ ܡܝܼܟܵܐ ܐܲܝܟ ܨܸܒܝܵܢܸܗ܀
00372_9 ܐܸܢ ܠܲܡ ܬܸܙܟܸܐ ܒܪܵܡܲܬ ܓܸܠܥܵܕ ܡܵܢ ܚܵܣܲܪ ܐ̄ܢܵܐ܃
00373_0 ܡܸܢ ܨܸܐܕܲܝ ܕܝܼܠܝ ܐܲܢ̄ܬ ܣܲܩ ܘܲܙܟܝܼ ܐܸܢ ܙܵܟܸܐ ܐܲܢ̄ܬ܀
00373_1 ܢܲܫܠܸܡ ܐܸܢܽܘܢ ܡܵܪܝܵܐ ܒܼܐܝ̈ܕܲܝܟ ܠܲܐܕܽܘܡܵܝܸ̈ܐ܃
00373_2 ܠܵܐ ܓܹܝܪ ܐܸܡܲܪ ܡܲܫܠܸܡ ܠܗܽܘܢ ܐܲܝܟ ܕܲܓܵܠܵܐ܀
00373_3 ܥܲܠ ܕܸܐܡܲܪ ܗ̄ܘܵܐ ܥܲܕܠܵܐ ܢܼܐܬܸܐ ܕܣܵܢܸܐ ܐ̄ܢܵܐ ܠܸܗ܃
00373_4 ܐܸܡܲܪ ܠܸܗ ܗܽܘ ܕܢܲܫܠܸܡ ܐܸܢܽܘܢ ܡܵܪܝܵܐ ܒܼܐܝ̈ܕܲܝܟ܀
00373_5 ܘܟܲܕ ܝܵܕܲܥ ܗ̄ܘܵܐ ܕܠܵܐ ܙܵܟܸܐ ܗ̄ܘܵܐ ܒܪܵܡܲܬ ܓܸܠܥܵܕ܃
00373_6 ܒܲܪܟܸܗ ܕܢܸܙܟܸܐ ܕܢܲܘܕܲܥ ܚܽܘܒܸܗ ܘܡܲܟܝܼܟܽܘܬܸܗ܀
00373_7 ܐܵܡܲܪ ܐܵܚܵܒ ܡܲܘܡܸܐ ܐ̄ܢܵܐ ܠܵܟ ܒܲܫܡܸܗ ܕܡܵܪܝܵܐ܃
00373_8 ܕܗܵܝ ܫܲܪܝܼܪܬܵܐ ܕܸܐܡܲܪ ܡܵܪܝܵܐ ܗܝܼ ܬܼܐܡܲܪ ܠܝܼ܀

00373_9 ܘܡܸܚܕܵܐ ܢܗܲܪ ܗ̄ܘܵܐ ܢܒܝܼܵܐ ܒܪܽܘܚܵܐ ܠܲܡܡܲܠܵܠܽܘ܃

00374_0 ܕܲܢܚܲܘܸܐ ܠܸܗ ܒܓܸܠܝܵܐ ܠܡܲܠܟܵܐ ܥܲܠ ܡܲܦܽܘܠܬܸܗ܀
00374_1 ܚܙܝܼܬ ܠܝܼܣܪܵܝܸܠ ܕܲܡܒܲܕܲܪ ܠܲܡ ܥܲܠ ܪܝܼܫ ܛܽܘܪܸ̈ܐ܃
00374_2 ܘܕܵܡܸܐ ܠܥܵܢ̈ܵܐ ܕܠܲܝܬ ܠܵܗ݀ ܪܵܥܝܵܐ ܕܲܡܟܲܢܸܫ ܠܵܗ݀܀
00374_3 ܠܥܲܡܵܐ ܒܥܵܢ̈ܵܐ ܐܵܦ ܠܸܗ ܠܡܲܠܟܵܐ ܒܪܵܥܝܵܐ ܨܵܪܸܗ܃
00374_4 ܕܲܢܚܲܘܸܐ ܠܸܗ ܕܠܲܝܬܲܘܗ̄ܝ ܡܲܠܟܵܐ ܡܸܟܵܐ ܘܲܠܗܲܠ܀
00374_5 ܢܒܝܼܸ̈ܐ ܣܪ̈ܝܼܚܸܐ ܡܲܛܥܸܝܢ ܗ̄ܘܲܘ ܠܸܗ ܒܓܸܠܝܵܢܲܝ̈ܗܽܘܢ܃
00374_6 ܘܚܲܕ ܚܲܕ ܡܸܢܗܽܘܢ ܡܲܬܟܸܠ ܗ̄ܘܵܐ ܠܸܗ ܥܲܠ ܙܵܟܽܘܬܵܐ܀
00374_7 ܚܲܕ ܩܲܪ̈ܢܵܬܵܐ ܕܦܲܪܙܠܵܐ ܥܒܲܕ ܠܸܗ ܟܲܕ ܡܸܫܬܲܢܸܐ܃
00374_8 ܘܨܵܪ ܠܸܗ ܛܽܘܦܣܵܐ ܕܲܡܕܲܩܲܪ ܠܲܡ ܠܲܐܕܽܘܡܵܝܸ̈ܐ܀
00374_9 ܐ̄ܚܪ̈ܵܢܸܐ ܫܓܝܼܫܝܼܢ ܩܵܝܡܝܼܢ ܬܲܡܵܢ ܟܲܕ ܡܸܬܢܲܒܸܝܢ܃
00375_0 ܥܲܠ ܙܵܟܽܘܬܵܐ ܕܡܲܝܬܸܐ ܡܲܠܟܵܐ ܡܸܢ ܬܲܟܬܽܘܫܵܐ܀
00375_1 ܩܵܐܸܡ ܡܝܼܟܵܐ ܗܲܘ ܫܲܪܝܼܪܵܐ ܒܸܝܬ ܕܲܓ̈ܵܠܸܐ܃
00375_2 ܘܫܝܼܛܵܐ ܡܸܠܬܸܗ ܘܕܝܼܠܗܽܘܢ ܪܵܡܵܐ ܘܓܲܠܝ̈ܵܢ ܐܲܦܸ̈ܝܗ݀܀
00375_3 ܩܵܐܸܡ ܬܲܡܵܢ ܟܸܢܫܵܐ ܪܲܒܵܐ ܘܲܡܫܲܬܸܩ ܠܸܗ܃
00375_4 ܕܢܼܐܡܲܪ ܛܵܒܬܵܐ ܡܸܛܽܠ ܡܲܠܟܵܐ ܘܠܵܐ ܨܵܒܸܐ ܗ̄ܘܵܐ܀
00375_5 ܝܵܬܒܝܼܢ ܡܲܠܟܸ̈ܐ ܟܲܕ ܥܲܙܝܼܙܝܼܢ ܒܲܠܒܽܘܫܲܝ̈ܗܽܘܢ܃
00375_6 ܘܩܵܐܸܡ ܥܲܡܵܐ ܒܟܽܠ ܣܸܓܕ̈ܵܬܵܐ ܝܲܩܝܼܪ̈ܵܬܵܐ܀
00375_7 ܚܙܵܐ ܗ̄ܘܵܐ ܢܒܝܼܵܐ ܠܒܽܘ̈ܫܸܐ ܘܬܵܓܸ̈ܐ ܘܟܽܘܪ̈ܣܲܘܵܬܵܐ܃
00375_8 ܘܠܵܐ ܐܸܬܬܲܚܬܝܼ ܕܢܼܐܡܲܪ ܛܵܒܬܵܐ ܐܲܝܟ ܕܲܒܥܲܐܽܘܗ̄ܝ܀
00375_9 ܗܽܘ ܒܲܠܚܽܘܕܲܘܗ̄ܝ ܡܸܬܢܲܒܸܐ ܗ̄ܘܵܐ ܒܝܼܫܬܵܐ ܬܲܡܵܢ܃
00376_0 ܘܒܲܐܦ̈ܲܝ ܡܲܠܟܸ̈ܐ ܘܫܽܘܠܛܵܢܲܝ̈ܗܽܘܢ ܠܵܐ ܢܵܣܸܒ ܗ̄ܘܵܐ܀
00376_1 ܡܸܠܬܵܐ ܕܩܽܘܫܬܵܐ ܡܸܫܬܲܡܥܵܐ ܗ̄ܘܵܬ ܡܸܢ ܣܸܦܘ̈ܵܬܸܗ܃
00376_2 ܕܲܢܒܝܼܽܘܬܵܐ ܠܸܗ ܒܲܠܚܽܘܕܲܘܗ̄ܝ ܐܝܼܬ ܗ̄ܘܵܐ ܬܲܡܵܢ܀
00376_3 ܕܵܠ ܓܸܠܝܵܢܵܐ ܥܠܲܘܗ̄ܝ ܕܲܢܒܝܼܵܐ ܡܸܢ ܐܲܠܵܗܵܐ܃
00376_4 ܘܚܸܙܘܵܐ ܪܲܒܵܐ ܦܲܬܚܵܗ݀ ܠܢܲܦܫܸܗ ܠܡܸܬܢܲܗܵܪܽܘ܀

▼ later lines