The Comprehensive Aramaic Lexicon

00380_1	ܢܸܚܙܸܐ ܗܵܫܵܐ ܐܸܢ ܐܝܼܬ ܗܵܠܸܝܢ ܨܹܝܕ ܐܲܠܵܗܵܐ܃
00380_2	ܘܸܐܢ ܗܽܘ ܟܝܵܢܸܗ ܕܽܝܠܗܸܝܢ ܐܝܼܬܲܘܗ̄ܝ ܐܲܝܟ ܕܸܐܬܡܲܠܲܠ܀
00380_3	ܢܸܒܥܸܐ ܐܸܢ ܐܝܼܬ ܡܲܘܬܒܵܐ ܘܟܽܘܪܣܝܵܐ ܠܲܐܠܵܗܽܘܬܵܐ܃
00380_4	ܐܲܘ ܝܲܡܝܼܢܵܐ ܐܲܘ ܣܸܡܵܠܵܐ ܐܲܘ ܪܽܘܟܵܒܵܐ܀
00380_5	ܢܸܣܬܲܟܲܠ ܬܽܘܒ ܐܸܢ ܗܽܘ ܕܫܵܩܸܠ ܡܸܠܟܵܐ ܡܸܢ ܐ̄ܢܵܫ܃
00380_6	ܒܡܲܢ ܠܲܡ ܐܸܬܡܠܸܟ ܚܲܘܝܼ ܗܵܪܟܵܐ ܕܲܕܠܵܐ ܡܸܠܟܵܐ ܗ̄ܘ܀
00380_7	ܘܟܲܕ ܗܽܘ ܟܝܵܢܸܗ ܪܵܡ ܗ̄ܽܘ ܡܸܢܗܸܝܢ ܡܸܛܽܠ ܡܵܢܵܐ܃
00380_8	ܫܩܲܠ ܐܸܢܸܝܢ ܠܸܗ ܕܟܽܠܗܸܝܢ ܕܝܼܠܸܗ ܢܸܥܒܸܕ ܐܸܢܸܝܢ܀
00380_9	ܐܲܝܢܵܐ ܟܽܘܪܣܝܵܐ ܐܝܼܬ ܕܵܐܚܸܕ ܠܸܗ ܕܢܸܣܬܲܝܲܟ ܒܸܗ܃
00381_0	ܕܠܵܐ ܠܒܲܪ ܡܸܢܸܗ ܘܠܵܐ ܠܓܲܘ ܡܸܢܸܗ ܐܲܬܪܵܐ ܡܸܡܬܽܘܡ܀
00381_1	ܠܵܐ ܠܥܸܠ ܡܸܢܸܗ ܘܠܵܐ ܠܬܲܚܬ ܡܸܢܸܗ ܕܽܘܟܬܵܐ ܘܲܐܝܟܲܢ܃
00381_2	ܟܵܐܸܦ ܝܵܬܸܒ ܗܲܘ ܕܲܦܫܝܼܛ ܗ̄ܽܘ ܘܡܵܠܸܐ ܟܽܠܵܐ ܗ̄ܘ܀
00381_3	ܐܸܢ ܥܲܠ ܟܽܘܪܣܝܵܐ ܗ̄ܘ ܒܸܣܬܲܪ ܟܽܘܪܣܝܸܗ ܡܲܢ ܐܝܼܬ ܬܲܡܵܢ܃
00381_4	ܓܢܸܐ ܟܲܝ ܡܸܢܸܗ ܐܸܢ ܒܸܣܬܪܸܗ ܗ̄ܽܘ ܐܲܝܟ ܕܸܐܫܬܲܡܥܲܬ܀
00381_5	ܐܸܢ ܡܸܢ ܥܝܼܪܸ̈ܐ ܫܵܩܸܠ ܡܸܠܟܵܐ ܚܲܒܪ̈ܲܘܗ̄ܝ ܐܸܢܽܘܢ܃
00381_6	ܘܲܐܝܟܲܢ ܗܵܪܟܵܐ ܪܽܘܚܵܐ ܡܲܠܟܸܗ ܕܡܵܢܵܐ ܢܸܥܒܸܕ܀
00381_7	ܘܲܕܠܵܐ ܐܝܼܬ ܠܸܗ ܟܢܵܬܵܐ ܘܚܲܒܪܵܐ ܘܠܵܐ ܡܵܠܽܘܟܵܐ܃
00381_8	ܓܲܠܝܵܐ ܗ̄ܝ ܣܲܓܝܼ ܘܲܕܠܵܐ ܒܥܵܬܵܐ ܗ̄ܝ ܢܸܫܠܸܐ ܡܸܢܵܗ݀܀
00381_9	ܗܵܝ ܡܸܬܒܲܥܝܵܐ ܗܵܝ ܕܥܲܠ ܡܵܢܵܐ ܢܚܸܬ ܘܲܫܩܲܠ ܠܸܗ܃
00382_0	ܕܸܡ̈ܘܵܢ ܕܸܡ̈ܘܵܢ ܘܲܗܘ̈ܲܝ ܕܝܼܠܸܗ ܟܲܕ ܡܲܟܝܼ̈ܟܵܢ܀
00382_1	ܢܼܐܡܲܪ ܗܵܫܵܐ ܕܗܵܕܵܐ ܗ̄ܝ ܥܸܠܬܵܐ ܕܟܽܠ ܓܸܠܝܵܢܝܼ̈ܢ܃
00382_2	ܚܽܘܒܸܗ ܕܲܐܣܝܼܪ ܒܲܒܢܲܝܢܵܫܵܐ ܕܢܲܚܸܐ ܐܸܢܽܘܢ܀
00382_3	ܡܸܛܽܠܵܬܗܽܘܢ ܐܲܪܟܸܢ ܪܲܘܡܸܗ ܘܲܒܕܸܡ̈ܘܵܬܗܽܘܢ܃
00382_4	ܐܸܬܬܲܚܬܝܼ ܠܗܽܘܢ ܕܠܵܐ ܢܸܣܬܲܪܕܽܘܢ ܡܸܢ ܪܲܒܽܘܬܸܗ܀
00382_5	ܠܲܡܢܲܘ̈ܵܬܵܐ ܘܲܠܕܸܡ̈ܘܵܬܵܐ ܒܙܲܒܢܝܼ̈ܢ ܙܲܒܢܝܼ̈ܢ܃
00382_6	ܢܚܸܬ ܕܲܢܡܲܠܸܠ ܥܲܡ ܐ̄ܢܵܫܽܘܬܵܐ ܕܚܲܒܝܼܒܵܐ ܠܸܗ܀
00382_7	ܘܣܵܗܕܵܐ ܠܡܸܠܲܬܝ ܗܵܝ ܡܸܐܬܝܼܬܵܐ ܪܲܒܬܵܐ ܕܲܒܪܸܗ܃
00382_8	ܕܡܸܛܽܠ ܚܽܘܒܸܗ ܐ̄ܬܵܐ ܠܒܸܫ ܦܲܓܪܲܢ ܘܲܡܚܝܼܠܽܘܬܲܢ܀
00382_9	ܘܲܫܩܲܠ ܚܲܫܲܝ̈ܢ ܘܲܛܥܲܢ ܟܼܐܒܲܝ̈ܢ ܘܲܛܥܸܡ ܡܲܘܬܲܢ܃
00383_0	ܘܚܲܘܝܼ ܒܓܸܠܝܵܐ ܚܽܘܒܸܗ ܪܲܒܵܐ ܠܥܵܠܡܸ̈ܐ ܕܵܐܬܸܝܢ܀
00383_1	ܒܗܵܢܵܐ ܚܽܘܒܵܐ ܕܲܡܩܲܕܸܡ ܗ̄ܘܵܐ ܠܘܵܬ ܐܲܠܵܗܵܐ܃
00383_2	ܡܸܬܢܲܚܲܬ ܗ̄ܘܵܐ ܠܲܡܚܝܼ̈ܠܵܬܵܐ ܘܲܠܕܸܡ̈ܘܵܬܵܐ܀
00383_3	ܘܲܒܓܸܠܝܵܢܵܐ ܕܲܢܒܝܼܽܘܬܵܐ ܠܦܽܘܬ ܣܽܘܥܪܵܢܵܐ܃
00383_4	ܡܸܬܚܲܘܸܐ ܗ̄ܘܵܐ ܒܕܽܘܟܵܐ ܕܽܘܟܵܐ ܠܲܡܥܲܕܵܪܽܘ܀
00383_5	ܡܵܕܸܝܢ ܗܵܫܵܐ ܡܵܐ ܕܫܵܡܲܥ ܐܲܢ̄ܬ ܥܲܠ ܐܲܠܵܗܵܐ܃
00383_6	ܡܫܽܘܚܬܵܐ ܒܨܝܼܪܬܵܐ ܠܵܐ ܢܸܙܥܲܪ ܠܵܟ ܡܸܢ ܐܲܝܟ ܕܼܐܝܬܲܘܗ̄ܝ܀
00383_7	ܡܵܐ ܕܓܸܠܝܵܢܵܐ ܨܵܪܸܗ ܩܕܵܡܲܝܟ ܒܲܙܥܽܘܪܽܘܬܵܐ܃
00383_8	ܒܥܝܼ ܐܲܢ̄ܬ ܬܲܡܵܢ ܡܵܢܵܐ ܗ̄ܝ ܥܸܠܬܸܗ ܕܗܲܘ ܓܸܠܝܵܢܵܐ܀
00383_9	ܘܡܸܢܵܗ݀ ܕܥܸܠܬܵܐ ܝܵܠܸܦ ܐܲܢ̄ܬ ܠܵܟ ܕܲܠܡܵܢ ܗܵܟܲܢ܃
00384_0	ܐܸܬܬܲܚܬܝܼ ܠܵܗ݀ ܠܲܙܥܽܘܪܽܘܬܵܐ ܕܠܲܘ ܕܝܼܠܸܗ ܗ̄ܝܼ܀
00384_1	ܗܲܘ ܓܸܠܝܵܢܸܗ ܕܡܝܼܟܵܐ ܡܵܕܸܝܢ ܥܸܠܬܸܗ ܗܵܕܵܐ ܗ̄ܝ܃
00384_2	ܕܲܒܗܲܘ ܚܸܙܘܵܐ ܡܕܲܒܪܵܢܽܘܬܵܐ ܟܽܠܵܗ݀ ܢܼܐܠܲܦ܀
00384_3	ܗܵܝ ܕܲܚܙܵܝܗ̄ܝ ܗ̄ܘܵܐ ܠܡܵܪܝܵܐ ܕܝܵܬܸܒ ܡܸܛܽܠ ܗܵܕܸܐ܃
00384_4	ܕܼܐܝܬ ܗ̄ܘܵܐ ܬܲܡܵܢ ܡܲܠܟܸ̈ܐ ܕܝܵܬܒܝܼܢ ܒܲܕܚܝܼܠܽܘܬܵܐ܀
00384_5	ܘܠܽܘܩܒܲܠ ܟܸܢ̈ܫܸܐ ܕܲܩܕܵܡ ܡܲܠܟܸ̈ܐ ܚܙܵܐ ܒܲܫܡܲܝܵܐ܃
00384_6	ܚܲܝ̈ܠܲܝ ܡܵܪܝܵܐ ܡܸܢ ܝܲܡܝܼܢܸܗ ܘܡܸܢ ܣܸܡܵܠܸܗ܀
00384_7	ܘܲܕܠܵܐ ܢܙܝܼܥܸܗ ܠܒܽܘܫܵܐ ܒܵܪܕܵܐ ܘܬܵܓܸ̈ܐ ܕܲܓܐܸܝܢ܃
00384_8	ܐܲܣܪܵܗ݀ ܠܢܲܦܫܸܗ ܒܗܵܝ ܬܸܫܒܽܘܚܬܵܐ ܕܚܝܼܠܬܵܐ ܕܲܠܥܸܠ܀
00384_9	ܘܗܵܝ ܕܵܐܡܪܝܼܢ ܗ̄ܘܲܘ ܗܲܘ ܗܵܟܲܢܵܐ ܘܗܲܘ ܗܵܟܲܢܵܐ܃
00385_0	ܠܦܽܘܬ ܚܽܘ̈ܫܵܒܸܐ ܗܵܠܸܝܢ ܕܲܠܬܲܚܬ ܐܸܫܬܲܡܲܫܘ ܗ̄ܘܲܘ܀
00385_1	ܕܡܸܬܐܲܡܪܵܐ ܗ̄ܘܵܬ ܕܢܼܐܙܲܠ ܢܲܩܪܸܒ ܐܲܘ ܠܵܐ ܢܼܐܙܲܠ܃