← Back
The Comprehensive Aramaic Lexicon
← Return to the Text Browser
click on the file description for more information

63403: JS_Elijah (Jacob of Saroug on Elijah)

Click on a word for lexical analysis
Click on a red-colored coordinate for comments and/or translations of the line

▲ earlier lines

00395_5 ܪܡܲܙ ܠܸܗ ܠܦܲܪܙܠܵܐ ܕܲܠܒܸܫ ܡܲܠܟܵܐ ܘܪܲܦܝܼ ܢܲܦܫܸܗ܃
00395_6 ܘܦܲܪܸܩ ܕܸܒܩܲܘ̈ܗ̄ܝ ܚܲܕ ܡܸܢ ܚܲܒܪܸܗ ܕܢܸܒܠܲܥ ܐܵܚܵܒ܀
00395_7 ܘܬܲܪܨܸܗ ܡܵܪܝܵܐ ܠܓܸܐܪܵܐ ܒܚܼܐܦܵܐ ܠܽܘܩܒܲܠ ܕܸܒܩܵܐ܃
00395_8 ܘܲܒܠܲܥ ܕܵܘܝܵܐ ܕܢܸܬܬܒܲܥ ܡܸܢܸܗ ܕܡܵܐ ܕܸܐܫܲܕ ܗ̄ܘܵܐ܀
00395_9 ܐܸܬܦܲܪܣܝܼ ܗ̄ܘܵܐ ܠܒܽܘܫܵܐ ܚܫܝܼܠܵܐ ܕܠܲܘ ܡܸܕܸܡ ܗ̄ܽܘ܃
00396_0 ܕܢܸܕܲܥ ܟܽܠܢܵܫ ܕܡܵܪܝܵܐ ܗ̄ܘ ܫܲܠܝܼܛ ܥܲܠ ܙܵܟܽܘܬܵܐ܀
00396_1 ܚܲܕ ܬܲܡܝܼܡܵܐ ܠܙܲܝܢܸܗ ܕܡܲܠܟܵܐ ܡܚܵܐ ܘܸܐܬܦܲܚܲܪ܃
00396_2 ܕܠܵܐ ܡܨܸܐ ܙܲܝܢܵܐ ܕܢܸܛܽܘܪ ܡܵܪܸܗ ܡܸܢ ܢܸܟܝܵܢܵܐ܀
00396_3 ܐܲܝܟܵܐ ܕܡܵܪܝܵܐ ܨܵܒܸܐ ܕܢܲܒܐܸܫ ܠܲܒܢܲܝܢܵܫܵܐ܃
00396_4 ܠܵܐ ܐܝܼܬ ܦܽܘܪܣܵܐ ܕܢܲܘܬܲܪ ܙܲܝܢܵܐ ܠܲܕܠܵܒܸܫ ܠܸܗ܀
00396_5 ܗܵܝ ܟܼܐܢܽܘܬܵܐ ܠܒܲܟܬܸܗ ܠܓܸܐܪܵܐ ܕܗܲܘ ܬܲܡܝܼܡܵܐ܃
00396_6 ܘܲܡܚܵܬ ܠܵܐܚܵܒ ܘܙܲܝܢܸܗ ܢܣܲܬܪܸܗ ܠܵܐ ܐܸܫܟܲܚ ܗ̄ܘܵܐ܀
00396_7 ܬܪܲܥܬܸܗ ܒܓܸܐܪܵܐ ܘܸܐܫܕܲܬ ܠܲܕܡܸܗ ܥܲܠ ܡܲܪܟܲܒܬܸܗ܃
00396_8 ܕܬܼܐܬܸܐ ܬܲܪܡܸܝܘܗ̄ܝ ܥܲܠ ܗܵܝ ܕܽܘܟܬܵܐ ܕܡܝܼܬ ܒܵܗ݀ ܢܵܒܽܘܬ܀
00396_9 ܩܒܸܐ ܕܡܵܐ ܘܩܵܐܸܡ ܥܲܠ ܡܲܪܟܲܒܬܵܐ ܘܠܵܐ ܡܸܣܬܲܦܲܩ܃
00397_0 ܘܲܢܛܝܼܪ ܢܸܦܸܠ ܐܲܝܟܵܐ ܕܓܸܙܪܲܬ ܗܵܝ ܟܼܐܢܽܘܬܵܐ܀
00397_1 ܠܲܐܝܟܵܐ ܕܙܲܡܢܲܬ ܘܲܩܪܵܬ ܟܲܠܒܸ̈ܐ ܢܛܲܪܬܸܗ ܠܲܕܡܵܐ܃
00397_2 ܕܬܲܡܵܢ ܬܸܐܫܕܸܗ ܐܲܝܟ ܕܸܐܬܐܸܫܸܕ ܗܲܘ ܕܲܥܠܝܼܒܵܐ܀
00397_3 ܗܸܦܟܲܬ ܘܲܩܪܵܬ ܣܸܦܪܵܗ݀ ܪܲܒܵܐ ܘܲܐܝܟ ܕܲܓܙܝܼܪ ܗ̄ܘܵܐ܃
00397_4 ܕܝܼܢܸܗ ܕܵܐܚܵܒ ܡܸܢ ܐܸܠܝܼܵܐ ܬܒܲܥܬܸܗ ܬܲܡܵܢ܀
00397_5 ܘܟܲܕ ܟܼܐܢܽܘܬܵܐ ܬܸܒܥܲܬ ܕܝܼܠܵܗ݀ ܒܲܕܡܵܐ ܕܸܐܫܕܲܬ܃
00397_6 ܪܸܡܙܲܬ ܢܸܫܠܸܐ ܩܪܵܒܵܐ ܕܓܲܒܸ̈ܐ ܡܸܢ ܬܲܟܬܽܘܫܵܐ܀
00397_7 ܣܲܦܩܲܬ ܠܲܕܡܸܗ ܥܲܠ ܗܵܝ ܕܽܘܟܬܵܐ ܕܡܝܼܬ ܒܵܗ݀ ܢܵܒܽܘܬ܃
00397_8 ܘܸܐܬܲܘ ܟܲܠܒܸ̈ܐ ܕܲܩܪܸܝܢ ܗ̄ܘܲܘ ܠܵܗ݀ ܠܲܥܘ ܘܸܐܬܦܲܪܥܲܬ܀
00397_9 ܐܲܢܝܼܚܲܬ ܗ̄ܘܵܬ ܚܸܡܬܵܗ݀ ܬܲܡܵܢ ܕܲܠܚܝܼܡܵܐ ܗ̄ܘܵܬ܃

00398_0 ܒܲܕܡܸܗ ܕܡܲܠܟܵܐ ܕܲܩܕܵܡ ܟܲܠܒܸ̈ܐ ܐܸܣܬܲܦܲܩ ܗ̄ܘܵܐ܀

00398_1 ܐܲܩܝܼܡܲܬ ܠܵܗ݀ ܨܲܠܡܵܐ ܒܥܵܠܡܵܐ ܕܲܡܠܸܐ ܫܽܘܦܪܸ̈ܐ܃
00398_2 ܕܢܸܕܥܽܘܢ ܕܵܪܸ̈ܐ ܕܠܵܐ ܡܸܨܛܲܠܝܵܐ ܠܡܸܣܲܒ ܒܲܐܦܸ̈ܐ܀
00398_3 ܕܡܸܗ ܕܡܸܣܟܼܢܵܐ ܘܲܕܡܸܗ ܕܡܲܠܟܵܐ ܚܲܕ ܐܸܢܽܘܢ ܠܵܗ݀܃
00398_4 ܒܲܪܢܵܫܵܐ ܗ̄ܘ ܓܹܝܪ ܐܵܦ ܗܽܘ ܡܲܠܟܵܐ ܐܵܦ ܡܸܣܟܼܢܵܐ܀
00398_5 ܫܠܲܕܸܗ ܕܢܵܒܽܘܬ ܚܙܵܬ ܕܲܣܚܝܼܦܵܐ ܩܕܵܡ ܪ̈ܵܓܽܘܡܸܐ܃
00398_6 ܘܣܸܚܦܲܬ ܚܽܘܠܦܸܝܗ݀ ܫܠܲܕܸܗ ܕܡܲܠܟܵܐ ܩܕܵܡ ܩܵܛܽܘ̈ܠܸܐ܀
00398_7 ܠܵܐ ܢܸܣܒܲܬ ܗ̄ܘܵܬ ܒܲܐܦ̈ܲܝ ܬܵܓܸܗ ܕܡܲܠܟܵܐ ܪܲܒܵܐ܃
00398_8 ܘܝܸܗܒܲܬ ܠܩܸܛܠܵܐ ܚܠܵܦ ܡܸܣܟܼܢܵܐ ܒܕܝܼܢܵܐ ܟܼܐܢܵܐ܀
00398_9 ܓܽܘܫܡܵܐ ܓܽܘܫܡܵܐ ܗ̄ܘ ܘܲܕܥܲܬܝܼܪܵܐ ܘܲܕܡܸܣܟܼܢܵܐ܃
00399_0 ܘܲܕܡܵܐ ܚܲܕ ܗ̄ܽܘ ܕܡܲܠܟܵܐ ܘܡܵܟܵܐ ܕܚܲܕ ܗ̄ܽܘ ܓܸܢܣܵܐ܀
00399_1 ܠܗܲܘ ܨܲܝܵܪܵܐ ܕܥܽܘ̈ܠܸܐ ܕܲܐܫܘܝܼ ܦܲܪ̈ܨܽܘܦܲܝܗܽܘܢ܃
00399_2 ܫܘܸܝܢ ܐܸܢܽܘܢ ܠܸܗ ܐܵܦ ܥܲܬܝܼܪܸ̈ܐ ܐܵܦ ܡܸܣ̈ܟܼܢܸܐ܀
00399_3 ܕܡܽܘܬܵܐ ܘܨܲܠܡܵܐ ܘܨܽܘܪܬܵܐ ܘܲܕܡܵܐ ܕܟܽܠܗܽܘܢ ܚܲܕ ܗ̄ܽܘ܃
00399_4 ܕܗܲܘ ܕܹܝܢ ܝܲܩܝܼܪ ܕܲܐܝܢܵܐ ܕܩܲܪܝܼܒ ܨܹܝܕ ܐܲܠܵܗܵܐ܀
00399_5 ܚܠܵܦ ܡܸܣܟܼܢܵܐ ܡܲܠܟܵܐ ܩܛܝܼܠ ܗ̄ܘܵܐ ܡܸܢ ܟܼܐܢܽܘܬܵܐ܃
00399_6 ܘܠܵܐ ܟܲܕܽܘ ܠܵܗ݀ ܒܲܕܡܸܣܟܼܢܵܐ ܙܲܕܝܼܩܵܐ ܗ̄ܘܵܐ܀
00399_7 ܒܟܲܦܵܐ ܕܩܽܘܫܬܵܐ ܬܸܩܠܲܬ ܠܲܕܡܸܗ ܕܗܵܢܵܐ ܘܲܕܗܲܘ܃
00399_8 ܘܙܸܠ ܗܲܘ ܕܵܐܚܵܒ ܘܸܐܬܬܲܘܣܲܦ ܠܸܗ ܕܡܵܗ݀ ܕܒܲܪ̄ܬ ܙܲܘܓܸܗ܀
00399_9 ܡܲܠܟܬܵܐ ܘܡܲܠܟܵܐ ܚܠܵܦ ܡܸܣܟܼܢܵܐ ܠܩܸܛܠܵܐ ܝܸܗܒܲܬ܃