The Comprehensive Aramaic Lexicon

00412_2	ܥܲܠ ܕܲܫܒܲܩܘ ܗ̄ܘܲܘ ܐܘܽܪܚܸܗ ܕܡܵܪܝܵܐ ܕܫܲܦܝܼܪܵܐ ܗ̄ܘܵܬ̤܀
00412_3	ܐ̄ܬܵܐ ܐܸܠܝܼܵܐ ܘܩܵܡ ܠܸܗ ܒܽܐܘܪܚܵܐ ܩܕܵܡ ܐܝܼܙ̈ܓܲܕܸܐ܃
00412_4	ܕܗܲܘ ܒܲܪ ܐܵܚܵܒ ܟܲܕ ܨܹܝܕ ܒܥܸܠܙܒܽܘܒ ܫܲܕܲܪ ܐܸܢܽܘܢ܀
00412_5	ܐܵܡܲܪ ܠܗܽܘܢ ܙܸܠܘ ܐܸܡܲܪܘ ܠܸܗ ܠܡܵܪܟܽܘܢ ܡܲܠܟܵܐ܃
00412_6	ܕܡܸܛܽܠ ܡܵܢܵܐ ܫܲܕܲܪ ܠܥܸܩܪܽܘܢ ܐܲܝܟ ܚܲܣܝܼܪܵܐ܀
00412_7	ܡܸܢ ܒܠܲܝ ܕܠܲܝܬ ܒܸܗ ܡܵܪܝܵܐ ܒܥܲܡܵܐ ܐܲܝܟ ܕܵܐܡܲܪ ܐܲܢ̄ܬ܃
00412_8	ܫܲܕܲܪܬ ܕܬܸܫܐܲܠ ܡܸܢ ܐܲܠܵܗܵܐ ܕܲܦܠܸܫ̈ܬܵܝܸܐ܀
00412_9	ܡܲܢ ܠܵܐ ܝܵܕܲܥ ܕܼܐܝܬ ܐܲܠܵܗܵܐ ܠܲܒܢ̈ܲܝ ܝܲܥܩܽܘܒ܃
00413_0	ܘܲܠܡܲܢ ܠܵܐ ܫܡܝܼܥ ܕܪܲܒ ܗ̄ܽܘ ܡܵܪܝܵܐ ܡܸܢ ܐܲܠܵܗܸ̈ܐ܀
00413_1	ܒܟܽܠ ܐܲܬܪ̈ܲܘܵܢ ܘܲܒܟܽܠ ܥܲܡ̈ܡܝܼܢ ܡܵܪܝܵܐ ܢܲܨܝܼܚ܃
00413_2	ܘܟܽܠܗܽܘܢ ܣܲܘ̈ܦܸܐ ܙܵܝܥܝܼܢ ܡܸܢܸܗ ܘܥܵܡܽܘܪ̈ܲܝܗܽܘܢ܀
00413_3	ܒܡܸܨܪܸܝܢ ܛܸܒܸܗ ܘܲܒܓܲܘ ܝܲܡܵܐ ܓܲܢ̄ܒܵܪܽܘܬܸܗ܃
00413_4	ܒܚܽܘܪܝܼܒ ܥܽܘܫܢܸܗ ܘܲܒܐܲܫܝܼܡܽܘܢ ܥܲܙܝܼܙܽܘܬܸܗ܀
00413_5	ܫܟܝܼܢܬܸܗ ܒܣܝܼܢܲܝ ܘܲܕܚܝܼܠܽܘܬܸܗ ܒܥܵܠܡܵܐ ܟܽܠܸܗ܃
00413_6	ܒܝܽܘܪܕܢܵܢ ܬܲܗܪܸܗ ܘܨܹܝܕ ܐܝܼܪܝܼܚܽܘ ܫܡܸܗ ܢܲܨܝܼܚܵܐ܀
00413_7	ܒܥܲܡ̈ܡܸܐ ܚܲܪܒܸܗ ܘܲܒܟܽܠ ܩܼܐܪ̈ܣܝܼܢ ܪܵܡܵܐ ܩܸܫܬܸܗ܃
00413_8	ܕܸܚܠܬܸܗ ܒܲܦܠܸܫܬ ܘܲܒܓܵܙܪ̈ܵܬܵܐ ܚܲܝܠܸܗ ܪܲܒܵܐ܀
00413_9	ܡܲܢ ܠܵܐ ܝܵܕܲܥ ܕܼܐܝܬ ܐܲܠܵܗܵܐ ܠܲܒܢ̈ܲܝ ܝܲܥܩܽܘܒ܃
00414_0	ܘܲܠܡܵܢ ܗܵܫܵܐ ܐܲܝܟ ܡܵܐ ܕܠܲܝܬܲܘܗ̄ܝ ܗܵܐ ܡܸܬܒܲܙܲܚ܀
00414_1	ܡܸܛܽܠ ܗܵܢܵܐ ܫܡܲܥ ܡܵܢ ܐܸܡܲܪ ܡܵܪܝܵܐ ܕܼܐܝܬܲܘܗ̄ܝ܃
00414_2	ܕܲܡܡܵܬ ܬܡܽܘܬ ܘܬܽܘܒ ܡܸܢ ܥܲܪܣܵܟ ܠܵܐ ܢܵܚܸܬ ܐܲܢ̄ܬ܀
00414_3	ܠܵܐ ܐܝܼܬ ܚܲܝܸ̈ܐ ܒܼܐܝ̈ܕܲܝ ܒܥܸܠܙܒܽܘܒ ܠܲܕܒܵܥܸܐ ܠܸܗ܃
00414_4	ܡܵܪܝܵܐ ܗ̄ܘ ܡܲܚܸܐ ܘܲܕܠܵܐ ܒܥܲܝܬܵܝܗ̄ܝ ܠܵܐ ܚܵܝܸܐ ܐܲܢ̄ܬ܀
00414_5	ܡܵܪܝܵܐ ܗ̄ܘ ܫܲܠܝܼܛ ܥܲܠ ܚܲܝܲܝ̈ܗܽܘܢ ܕܲܒܢ̈ܲܝ ܐ̄ܢܵܫܵܐ܃
00414_6	ܘܠܸܗ ܙܵܕܸܩ ܗ̄ܘܵܐ ܬܸܒܥܸܐ ܚܲܝܸ̈ܐ ܘܝܵܗܸܒ ܗ̄ܘܵܐ ܠܵܟ܀
00414_7	ܕܲܝܘܵܗ݀ ܕܥܸܩܪܽܘܢ ܠܵܐ ܥܵܢܸܐ ܠܵܟ ܠܵܐ ܢܸܫܬܲܐܲܠ܃
00414_8	ܡܵܪܝܵܐ ܕܝܵܕܲܥ ܗܽܘ ܦܲܢܝܼ ܠܵܟ ܕܲܡܡܵܬ ܬܡܽܘܬ܀
00414_9	ܫܡܲܥܘ ܐܝܼܙ̈ܓܲܕܸܐ ܕܗܲܘ ܒܲܪ ܐܵܚܵܒ ܡܸܢ ܐܸܠܝܼܵܐ܃
00415_0	ܘܲܗܦܲܟܘ ܨܸܐܕܲܘܗ̄ܝ ܘܲܛܥܝܼܢܝܼܢ ܠܸܗ ܛܸܒܸ̈ܐ ܒܝܼ̈ܫܸܐ܀
00415_1	ܥܲܠܘ ܘܸܐܡܲܪܘ ܠܸܗ ܟܽܠ ܡܵܢ ܕܲܫܡܲܥܘ ܡܸܢ ܐܸܠܝܼܵܐ܃
00415_2	ܘܲܬܢܲܘ ܩܽܘܕܡܲܘܗ̄ܝ ܕܬܽܘܒ ܡܸܢ ܥܲܪܣܸܗ ܠܵܐ ܢܵܚܸܬ ܗ̄ܘܵܐ܀
00415_3	ܣܒܲܪܬܸܗ ܕܡܲܘܬܵܐ ܐܲܥܸܠܘ ܗ̄ܘܲܘ ܠܸܗ ܠܚܲܢܦܵܐ ܕܲܟܪܝܼܗ܃
00415_4	ܕܲܥܪܽܘܗ̄ܝ ܠܸܒܸܗ ܒܡܸܠܬܵܐ ܕܲܫܡܲܥܘ ܡܸܢ ܐܸܠܝܼܵܐ܀
00415_5	ܐܲܝܟ ܢܵܛܽܘܪܵܐ ܥܒܝܼܕ ܗ̄ܘܵܐ ܢܒܝܼܵܐ ܠܲܒܢ̈ܲܝ ܝܲܥܩܽܘܒ܃
00415_6	ܘܲܒܚܲܢܦܲܝ̈ܗܽܘܢ ܡܲܟܣܵܢܽܘܬܸܗ ܣܲܓܝܼܐܵܐ ܗ̄ܘܵܬ܀
00415_7	ܩܲܛܠܸܗ ܠܵܐܚܵܒ ܒܲܓܙܵܪ ܕܝܼܢܵܐ ܕܲܐܦܸܩ ܗ̄ܘܵܐ ܠܸܗ܃
00415_8	ܘܸܐܬܵܐ ܡܒܲܥܲܪ ܒܵܬܲܪ ܝܲܠܕܲܘ̈ܗ̄ܝ ܣܽܘܥܪ̈ܵܢܲܝܗܽܘܢ܀
00415_9	ܕܢܸܥܩܽܘܪ ܫܸܪ̈ܫܸܝܗ݀ ܕܗܵܝ ܚܲܢܦܽܘܬܵܐ ܡܸܢ ܓܲܘ ܥܲܡܵܐ܃
00416_0	ܚܦܝܼܛ ܗ̄ܘܵܐ ܢܒܝܼܵܐ ܒܲܓܙܵܪ ܕܝܼܢܲܘ̈ܗ̄ܝ ܪ̈ܽܘܚܵܢܵܝܸܐ܀
00416_1	ܒܲܐܦܲܘ̈ܗ̄ܝ ܕܵܐܚܵܒ ܐ̄ܡܲܪ ܠܸܗ ܕܟܲܠܒܸ̈ܐ ܠܵܥܝܼܢ ܠܲܕܡܸܗ܃
00416_2	ܘܲܫܠܲܚ ܠܲܒܪܸܗ ܕܡܸܢ ܥܲܪܣܵܟ ܠܲܡ ܠܵܐ ܢܵܚܸܬ ܐܲܢ̄ܬ܀
00416_3	ܩܪܲܒܬܵܢܵܐ ܗ̄ܘܵܐ ܕܠܽܘܩܒܲܠ ܡܲܠܟܸ̈ܐ ܚܲܢ̈ܦܸܐ ܡܲܩܪܸܒ܃
00416_4	ܘܡܲܟܸܣ ܗ̄ܘܵܐ ܠܗܽܘܢ ܥܲܠ ܐܲܦܲܝ̈ܗܽܘܢ ܟܲܕ ܠܵܐ ܕܵܚܸܠ܀
00416_5	ܡܵܐ ܕܡܲܣܛܸܝܢ ܗ̄ܘܲܘ ܡܸܢ ܐܲܠܵܗܵܐ ܨܹܝܕ ܐܲܠܵܗܸ̈ܐ܃
00416_6	ܒܟܽܠ ܐܽܘܪ̈ܚܵܬܗܽܘܢ ܦܵܓܲܥ ܗ̄ܘܵܐ ܒܗܽܘܢ ܐܲܝܟ ܥܲܙܝܼܙܵܐ܀
00416_7	ܐܝܼܬ ܕܲܠܟܲܠܒܸ̈ܐ ܘܼܐܝܬ ܕܲܠܡܲܘܬܵܐ ܝܵܗܸܒ ܗ̄ܘܵܐ ܠܸܗ܃
00416_8	ܕܒܲܓܙܵܪ ܕܝܼ̈ܢܸܐ ܕܚܝܼ̈ܠܸܐ ܕܡܵܪܝܵܐ ܥܲܡܸܗ ܢܸܛܽܘܪ܀
00416_9	ܕܲܢܣܽܘܓ ܐܽܘܪܚܵܗ݀ ܕܲܦܬܲܟܪܽܘܬܵܐ ܡܸܬܦܲܪܲܣ ܗ̄ܘܵܐ܃
00417_0	ܕܠܵܐ ܢܗܲܠܟܽܘܢ ܒܵܗ݀ ܐ̄ܢܵܫܵܐ ܓܙܝܼܪܸ̈ܐ ܒܢ̈ܲܝ ܐܲܒܪܵܗܵܡ܀
00417_1	ܡܟܲܢܸܫ ܗ̄ܘܵܐ ܠܗܽܘܢ ܡܸܢ ܟܽܠ ܓܲܒܝܼ̈ܢ ܨܹܝܕ ܐܲܠܵܗܵܐ܃
00417_2	ܕܲܡܒܲܕܪܝܼܢ ܗ̄ܘܲܘ ܨܹܝܕ ܕܸܚ̈ܠܵܬܵܐ ܕܲܟܢܲܥܢܵܝܸ̈ܐ܀