The Comprehensive Aramaic Lexicon

00420_2	ܠܵܐ ܙܵܕܸܩ ܗ̄ܘܵܐ ܐܸܠܵܐ ܕܼܐܝܙܒܸܠ ܬܸܗܘܸܐ ܐܸܡܵܐ܀
00420_3	ܐܸܠܽܘܠܵܐ ܗ̄ܘܵܐ ܒܪܵܗ݀ ܒܲܫܪܵܪܵܐ ܠܵܗ݀ ܕܵܡܸܐ ܗ̄ܘܵܐ܃
00420_4	ܟܡܵܐ ܟܲܝ ܗܵܫܵܐ ܕܗܝܼ ܝܼܠܸܕܬܸܗ ܘܬܲܪܒܝܼܬܵܗ݀ ܗ̄ܽܘ܀
00420_5	ܒܚܲܡܫܝܼܢ ܓܲܒܪ̈ܝܼܢ ܥܲܡ ܐܸܠܝܼܵܐ ܒܥܵܐ ܢܸܬܟܲܬܲܫ܃
00420_6	ܠܸܒܵܐ ܩܲܫܝܵܐ ܕܕܵܡܸܐ ܠܼܐܝܙܒܸܠ ܒܲܥܒܝܼ̈ܕܵܬܸܗ܀
00420_7	ܟܝܵܢܸ̈ܐ ܟܽܠܗܽܘܢ ܪܵܬܸܝܢ ܡܸܢܸܗ ܕܒܲܪ ܬܲܘ̈ܬܵܒܸܐ܃
00420_8	ܘܲܐܝܟܲܢ ܚܲܡܫܝܼܢ ܙܵܟܸܝܢ ܗ̄ܘܲܘ ܠܸܗ ܕܸܐܫܬܲܕܲܪܘ ܗ̄ܘܲܘ܀
00420_9	ܪܲܘܡܵܐ ܘܥܽܘܡܩܵܐ ܪܗܝܼܒܝܼܢ ܡܸܢܸܗ ܕܗܲܘ ܥܲܙܝܼܙܵܐ܃
00421_0	ܘܲܒܪܵܗ݀ ܕܼܐܝܙܒܸܠ ܓܵܙܸܡ ܢܲܝܬܝܼܘܗ̄ܝ ܐܲܝܟ ܠܲܡܚܝܼܠܵܐ܀
00421_1	ܠܢܽܘܪܵܐ ܦܩܲܕ ܗ̄ܘܵܐ ܘܡܸܚܕܵܐ ܕܲܩܪܵܐ ܥܢܵܬܸܗ ܘܸܐܬܵܬ܃
00421_2	ܘܲܐܝܟܲܢ ܓܸ̈ܠܸܐ ܙܵܟܸܝܢ ܗ̄ܘܲܘ ܠܸܗ ܕܥܲܡܗܽܘܢ ܢܸܚܽܘܬ܀
00421_3	ܫܲܠܗܸܒܝܼܬܵܐ ܝܵܕܥܵܐ ܩܵܠܸܗ ܘܡܸܫܬܲܡܥܵܐ ܠܸܗ܃
00421_4	ܘܲܠܡܵܢ ܠܵܐ ܕܚܸܠ ܡܸܢܸܗ ܟܪܝܼܗܵܐ ܕܡܸܬܠܲܚܲܡ ܠܸܗ܀
00421_5	ܠܸܐܡܸܗ ܕܵܡܸܐ ܕܵܐܦ ܗܝܼ ܓܸܙܡܲܬ ܥܲܠ ܓܲܢ̄ܒܵܪܵܐ܃
00421_6	ܘܲܨܒܵܬ ܬܸܩܛܽܘܠ ܠܗܲܘ ܕܵܐܦ ܡܲܘܬܵܐ ܡܙܵܥ ܗ̄ܘܵܐ ܡܸܢܸܗ܀
00421_7	ܣܠܸܩ ܗ̄ܘܵܐ ܒܵܬܪܸܗ ܪܲܒܵܐ ܕܚܲܡܫܝܼܢ ܐܲܝܟ ܕܸܐܫܬܲܕܲܪ܃
00421_8	ܘܲܚܙܵܐ ܕܝܵܬܸܒ ܥܲܠ ܪܝܼܫ ܛܽܘܪܵܐ ܝܼܚܝܼܕܵܐܝܼܬ܀
00421_9	ܗܲܘ ܗ̄ܽܘ ܥܲܬܝܼܪ ܐܲܝܢܵܐ ܕܩܲܪܝܼܒ ܨܹܝܕ ܐܲܠܵܗܵܐ܃
00422_0	ܛܵܒ ܡܸܢ ܡܲܠܟܸ̈ܐ ܘܫܲܠܝܼ̈ܛܵܢܸܐ ܕܥܵܠܡܵܐ ܟܽܠܸܗ܀
00422_1	ܢܒܝܼܵܐ ܒܛܽܘܪܵܐ ܘܠܵܐ ܩܸܢܝܵܢܸ̈ܐ ܘܠܵܐ ܒܸܢܝܵܢܸ̈ܐ܃
00422_2	ܘܡܲܠܟܵܐ ܒܗܲܝܟܠܵܐ ܟܲܕ ܪܵܡ ܬܵܓܸܗ ܘܪܲܒ ܫܽܘܠܛܵܢܸܗ܀
00422_3	ܢܸܚܙܸܐ ܗܵܫܵܐ ܡܸܢ ܡܲܢ ܡܲܢܽܘ ܪܲܒ ܗ̄ܘܵܐ ܘܲܫܒܝܼܚ܃
00422_4	ܒܲܪ ܬܲܘ̈ܬܵܒܸܐ ܐܲܘ ܗܲܘ ܡܲܠܟܵܐ ܒܓܲܘ ܐܵܦܲܕܢܸܗ܀
00422_5	ܗܲܘ ܡܸܣܟܼܢܵܐ ܥܲܠ ܪܝܼܫ ܛܽܘܪܵܐ ܕܠܲܝܬ ܠܸܗ ܡܸܕܸܡ܃
00422_6	ܘܲܒܒܸܢܝ̈ܵܢܸܐ ܪ̈ܵܡܸܐ ܡܲܠܟܵܐ ܫܪܸܐ ܥܲܠ ܥܽܘܬܪܸܗ܀
00422_7	ܚܲܣܝܼܪ ܗ̄ܘܵܐ ܕܹܝܢ ܡܸܢ ܚܽܘܠܡܵܢܵܐ ܘܠܵܐ ܝܵܗܒܝܼܢ ܠܸܗ܃
00422_8	ܘܲܟܪܝܼܗ ܘܲܚܢܸܦ ܘܠܲܝܬ ܐܲܠܵܗܵܐ ܒܓܲܘ ܪܸܥܝܵܢܸܗ܀
00422_9	ܘܚܽܘܛܵܐ ܕܚܲܝܲܘ̈ܗ̄ܝ ܦܲܣܩܸܗ ܢܒܝܼܵܐ ܒܲܓܙܵܪ ܕܝܼܢܵܐ܃
00423_0	ܘܟܲܕ ܗܽܘ ܒܛܽܘܪܵܐ ܐܲܪܡܝܼ ܚܲܪܒܵܐ ܒܓܲܘ ܐܵܦܲܕܢܲܘ̈ܗ̄ܝ܀
00423_1	ܡܸܣܟܝܼܢ ܚܸܙܘܸܗ ܘܲܨܪܝܼܟ ܐܲܬܪܸܗ ܘܠܲܝܬ ܠܸܗ ܡܸܕܸܡ܃
00423_2	ܚܽܘܪܒܵܐ ܥܽܘܡܪܸܗ ܘܲܒܪܝܼܫ ܛܽܘܪܵܐ ܣܦܝܼܩܵܐ ܝܲܬܒܸܗ܀
00423_3	ܥܵܠܡܵܐ ܒܲܝܬܸܗ ܡܛܲܠܬܸܗ ܫܡܲܝܵܐ ܘܝܲܬܒܸܗ ܛܽܘܪܵܐ܃
00423_4	ܐܲܪܥܵܐ ܥܲܪܣܸܗ ܘܡܲܣܡܲܟ ܪܝܼܫܸܗ ܚܕܵܐ ܡܸܢ ܟܼܐܦܸ̈ܐ܀
00423_5	ܪܵܡ ܡܸܢ ܨܸܦܬܵܐ ܘܡܲܠܝܵܐ ܢܲܦܫܸܗ ܗܲܝܡܵܢܽܘܬܵܐ܃
00423_6	ܩܲܪܝܼܒ ܠܡܵܪܝܵܐ ܘܪܲܒܵܐ ܡܸܠܬܸܗ ܥܲܠ ܒܸܪ̈ܝܵܬܵܐ܀
00423_7	ܠܕܲܗܒܵܐ ܣܵܢܸܐ ܘܨܹܝܕ ܩܸܢܝܵܢܸ̈ܐ ܠܵܐ ܡܸܬܬܲܚܬܸܐ܃
00423_8	ܡܣܲܪܲܩ ܘܲܢܩܸܕ ܕܗܵܠܸܝܢ ܦܲܐܝ̈ܵܢ ܠܝܼܚܝܼܕܵܝܵܐ܀
00423_9	ܣܠܸܩ ܗ̄ܘܵܐ ܗܵܟܝܼܠ ܪܲܒܵܐ ܕܚܲܡܫܝܼܢ ܐܲܝܟ ܕܸܐܫܬܲܕܲܪ܃
00424_0	ܘܲܒܪܝܼܫ ܛܽܘܪܵܐ ܚܙܵܝܗ̄ܝ ܠܸܐܠܝܼܵܐ ܟܲܕ ܝܵܬܸܒ ܗ̄ܘܵܐ܀
00424_1	ܘܫܲܪܝܼ ܕܵܘܝܵܐ ܒܪܽܘܚܵܐ ܪܵܡܬܵܐ ܕܲܢܡܲܠܸܠ ܗ̄ܘܵܐ܃
00424_2	ܥܲܡ ܗܲܘ ܪܲܒܵܐ ܕܠܵܐ ܚܫܝܼܒ ܗ̄ܘܵܐ ܠܸܗ ܥܵܠܡܵܐ ܡܸܕܸܡ܀
00424_3	ܐܲܪܝܼܡ ܗ̄ܘܵܐ ܕܹܝܢ ܩܵܠܸܗ ܨܸܐܕܲܘܗ̄ܝ ܟܲܕ ܐܵܡܲܪ ܗ̄ܘܵܐ܃
00424_4	ܢܒܝܼܸܗ ܕܡܵܪܝܵܐ ܡܲܠܟܵܐ ܐܵܡܲܪ ܚܽܘܬ ܡܸܢ ܬܲܡܵܢ܀
00424_5	ܐܵܡܲܪ ܙܲܗܝܵܐ ܐܸܢ ܢܒܝܼܵܐ ܐ̄ܢܵܐ ܐܲܝܟܲܢ ܕܸܐܡܲܪܬ܃
00424_6	ܬܸܚܽܘܬ ܢܽܘܪܵܐ ܘܠܵܟ ܘܲܠܚܲܡܫܝܼܢ ܡܸܚܕܵܐ ܬܸܐܟܽܘܠ܀
00424_7	ܘܡܵܪܝܵܐ ܕܪܵܚܸܡ ܢܸܗܘܸܐ ܗ̄ܘܵܐ ܠܸܗ ܢܒܝܼܵܐ ܕܲܐܝܟ ܗܲܘ܃
00424_8	ܡܸܚܕܵܐ ܕܫܲܡܥܸܗ ܫܕܵܐ ܗ̄ܘܵܐ ܢܽܘܪܵܐ ܘܸܐܟܠܲܬ ܐܸܢܽܘܢ܀
00424_9	ܐܲܝܟ ܡܵܐ ܕܼܐܝܬ ܗ̄ܘܵܐ ܢܽܘܪܵܐ ܒܦܽܘܡܸܗ ܦܬܲܚ ܣܸܦ̈ܘܵܬܸܗ܃
00425_0	ܘܥܲܡܵܗ݀ ܕܡܸܠܬܸܗ ܣܸܦܲܬ ܒܗܽܘܢ ܩܲܠܝܼܠܵܐܝܼܬ܀
00425_1	ܒܪܝܼܫ ܠܸܫܵܢܸܗ ܬܪܝܼܥ ܗ̄ܘܵܐ ܢܲܗܪܵܐ ܕܫܲܠܗܸܒܝܼܬܵܐ܃
00425_2	ܘܲܓܪܲܦ ܐܸܢܽܘܢ ܠܲܒܢ̈ܲܝ ܥܲܘܠܵܐ ܕܸܐܫܬܲܕܲܪܘ ܗ̄ܘܲܘ܀