The Comprehensive Aramaic Lexicon

00436_5	ܠܲܘ ܝܲܩܕܵܢܵܐ ܕܐ̄ܢܵܫܵܐ ܪܚܝܼܡ ܗ̄ܘܵܐ ܥܲܠ ܐܸܠܝܼܵܐ܃
00436_6	ܕܸܐܠܵܐ ܒܪܽܘܚܵܐ ܠܵܐ ܡܸܬܬܙܝܼܥ ܗ̄ܘܵܐ ܥܲܠ ܣܽܘܥܪܵܢܵܐ܀
00436_7	ܠܵܐ ܐ̄ܢܵܫ ܢܸܪܢܸܐ ܥܠܲܘܗ̄ܝ ܕܸܐܬܚܲܡܲܬ ܦܲܓܪܵܢܵܐܝܼܬ܃
00436_8	ܘܲܣܠܸܩ ܪܽܘܓܙܸܗ ܘܕܲܢܢܝܼܚ ܚܸܡܬܸܗ ܥܒܲܕ ܝܲܩܕܵܢܵܐ܀
00436_9	ܪܽܘܚܵܐ ܕܲܒܪܸܗ ܐܲܝܟܲܢ ܕܲܒܥܵܐ ܒܟܽܠ ܣܽܘܥܪ̈ܵܢܝܼܢ܃
00437_0	ܕܗܽܘ ܢܙܝܼܥ ܗ̄ܘܵܐ ܠܚܲܢ̈ܦܸܐ ܕܢܲܪܦܽܘܢ ܠܲܐܠܵܗܲܝ̈ܗܽܘܢ܀
00437_1	ܥܲܒܕܸܗ ܡܵܪܝܵܐ ܐܲܝܟ ܡܸܨܥܵܝܵܐ ܒܸܝܬ ܠܸܗ ܘܲܠܗܽܘܢ܃
00437_2	ܕܢܸܣܥܽܘܪ ܒܼܐܝܕܸܗ ܚܲܝ̈ܠܸܐ ܬܡܝܼ̈ܗܸܐ ܘܢܲܦܢܸܐ ܐܸܢܽܘܢ܀
00437_3	ܐܲܘܩܸܕ ܠܲܡܵܐܐ ܕܲܠܪܸܒܽܘܬܵܐ ܕܥܲܡܵܐ ܢܲܘܬܲܪ܃
00437_4	ܟܲܕ ܡܲܦܢܸܐ ܠܗܽܘܢ ܡܸܢ ܚܲܢܦܽܘܬܵܐ ܒܵܐܬܵܐ ܕܲܥܒܲܕ܀
00437_5	ܩܫܸܝܢ ܗ̄ܘܲܘ ܚܲܢ̈ܦܸܐ ܘܲܐܚܝܼܕܝܼܢ ܗ̄ܘܲܘ ܒܲܐܠܵܗܲܝ̈ܗܽܘܢ܃
00437_6	ܘܸܐܠܵܐ ܒܢܽܘܪܵܐ ܠܵܐ ܡܸܫܟܲܚ ܗ̄ܘܵܐ ܢܡܲܠܸܠ ܥܲܡܗܽܘܢ܀
00437_7	ܐܵܚܵܒ ܘܲܒܢܲܘ̈ܗ̄ܝ ܠܽܘܩܒܲܠ ܡܵܪܝܵܐ ܒܲܥܠܵܐ ܐܲܩܝܼܡܘ܃
00437_8	ܘܲܒܓܲܘܙܲܠܬܵܐ ܡܩܲܦܲܚ ܗ̄ܘܵܐ ܠܗܽܘܢ ܢܸܙܟܸܐ ܐܸܢܽܘܢ܀
00437_9	ܐܝܼܙܒܸܠ ܟܲܢܫܲܬ ܚܲܓܸ̈ܐ ܪܲܘܪ̈ܒܸܐ ܠܲܦܬܲܟܪܽܘܬܵܐ܃
00438_0	ܘܲܒܗܵܝ ܥܸܠܬܵܐ ܣܢܝܼܩ ܗ̄ܘܵܐ ܢܒܝܼܵܐ ܥܲܠ ܬܸܕܡܽܘܪܬܵܐ܀
00438_1	ܘܲܐܠܨܲܬ ܗ̄ܘܵܬ ܠܸܗ ܥܲܠ ܢܸܨܚܵܢܸ̈ܐ ܕܓܲܢ̄ܒܵܪܽܘܬܵܐ܃
00438_2	ܕܲܫܡܸܗ ܕܡܵܪܸܗ ܢܸܗܘܸܐ ܥܲܙܝܼܙ ܡܸܢ ܕܲܦܬܲܟܪܸ̈ܐ܀
00438_3	ܕܡܵܐ ܕܸܐܬܚܲܙܝܲܬ ܕܲܟܠܵܐ ܡܸܛܪܵܐ ܘܲܐܚܸܬ ܢܽܘܪܵܐ܃
00438_4	ܢܸܒܥܽܘܢ ܡܸܢܸܗ ܘܢܼܐܬܽܘܢ ܥܲܡܸܗ ܨܹܝܕ ܐܲܠܵܗܸܗ܀
00438_5	ܘܲܒܨܲܗܘܵܢܵܐ ܘܲܒܝܲܩܕܵܢܵܐ ܪܕܵܐ ܗ̄ܘܵܐ ܐܸܢܽܘܢ܃
00438_6	ܘܟܽܠܗܸܝܢ ܕܲܥܒܲܕ ܡܸܛܽܠܵܬܗܽܘܢ ܢܲܚܸܐ ܐܸܢܽܘܢ܀
00438_7	ܗܵܢܲܘ ܡܲܘܬܵܐ ܡܵܐ ܕܪܲܚܝܼܩ ܐ̄ܢܵܫ ܡܸܢ ܐܲܠܵܗܵܐ܃
00438_8	ܘܕܲܢܩܲܪܸܒ ܠܸܗ ܐ̄ܢܵܫܵܐ ܕܢܸܚܽܘܢ ܩܵܡ ܐܸܠܝܼܵܐ܀
00438_9	ܘܲܩܛܲܠ ܘܲܐܘܒܸܕ ܠܲܘ ܟܲܕ ܣܵܢܸܐ ܐܸܠܵܐ ܡܸܛܽܠ܃

00439_0	ܕܲܒܥܸܠܲܬܗܽܘܢ ܢܸܚܽܘܢ ܐܲܠܦܸ̈ܐ ܕܡܲܝܝܼܬܝܼܢ ܗ̄ܘܲܘ܀

00439_1	ܕܡܵܐ ܕܒܲܙܥܽܘܪܸ̈ܐ ܥܒܲܕ ܢܸܨܚܵܢܸ̈ܐ ܕܓܲܢ̄ܒܵܪܽܘܬܵܐ܃
00439_2	ܢܬܲܠܡܸܕ ܟܸܢ̈ܫܸܐ ܕܠܵܐ ܡܸܢܝܵܢܵܐ ܘܢܲܚܸܐ ܐܸܢܽܘܢ܀
00439_3	ܘܟܲܕ ܡܲܟܝܼܟ ܗ̄ܘܵܐ ܡܸܢܸܗ ܘܲܠܓܲܘ ܨܹܝܕ ܐܲܠܵܗܵܐ܃
00439_4	ܡܸܛܽܠ ܚܲܢ̈ܦܸܐ ܡܸܢܸܗ ܘܲܠܒܲܪ ܡܸܬܩܲܫܸܐ ܗ̄ܘܵܐ܀
00439_5	ܦܵܓܲܥ ܗ̄ܘܵܐ ܒܗܽܘܢ ܘܲܒܣܲܟܝܼܢܵܐ ܘܲܒܓܲܘܙܲܠܬܵܐ܃
00439_6	ܕܢܲܥܪܸܩ ܐܸܢܽܘܢ ܡܸܢ ܗܲܘ ܛܽܘܥܝܲܝ ܕܲܐܚܝܼܕܝܼܢ ܗ̄ܘܲܘ܀
00439_7	ܡܥܵܩ ܗ̄ܘܵܐ ܥܠܲܝܗܽܘܢ ܥܲܠ ܕܲܚܢܝܼܩܝܼܢ ܒܲܦܬܲܟܪܽܘܬܵܐ܃
00439_8	ܘܡܸܬܦܲܪܲܣ ܗ̄ܘܵܐ ܕܵܐܦ ܟܲܕ ܥܵܨܸܐ ܢܲܚܸܐ ܐܸܢܽܘܢ܀
00439_9	ܥܸܠܬܵܐ ܕܲܐܘܩܸܕ ܬܲܪܬܸܝܢ ܓܽܘ̈ܕܝܼܢ ܟܽܠܵܗ݀ ܗܵܕܵܐ ܗ̄ܝ܃