The Comprehensive Aramaic Lexicon

00510_2	ܥܕܲܡܵܐ ܕܢܸܗܘܸܐ ܠܵܐ ܡܵܝܽܘܬܵܐ ܒܚܲܝܸ̈ܐ ܕܲܪܚܸܡ܀
00510_3	ܕܲܟܡܵܐ ܫܽܘܦܪ̈ܝܼܢ ܐܝܼܬ ܠܸܐܠܝܼܵܐ ܬܡܝܼܗ ܕܽܘܒܵܪܸ̈ܐ܃
00510_4	ܣܵܦܩܵܐ ܕܬܸܣܗܲܕ ܗܵܝ ܕܵܐܦܠܵܐ ܡܝܼܬ ܡܸܛܽܠ ܫܽܘܦܪ̈ܲܘܗ̄ܝ܀
00510_5	ܗܵܝ ܡܲܪܟܲܒܬܵܐ ܫܓܝܼܪܬܵܐ ܕܢܽܘܪܵܐ ܕܸܐܣܬܲܠܲܩ ܒܵܗ݀܃
00510_6	ܡܚܲܘܝܵܐ ܠܥܵܠܡܵܐ ܕܲܟܡܵܐ ܓܡܝܼܪ ܗ̄ܘܵܐ ܒܫܽܘܦܪܸ̈ܐ ܕܲܠܓܲܘ܀
00510_7	ܢܽܘܪܵܐ ܕܢܸܚܬܲܬ ܒܵܬܪܸܗ ܠܲܐܪܥܵܐ ܕܢܸܬܥܲܠܸܐ ܒܵܗ݀܃
00510_8	ܡܚܲܘܝܵܐ ܕܲܟܡܵܐ ܪܬܲܚ ܗ̄ܘܵܐ ܚܽܘܒܸܗ ܒܚܲܝܸ̈ܐ ܕܲܠܥܸܠ܀
00510_9	ܐܽܘܪܚܸܗ ܕܪܸܗܛܲܬ ܒܲܝܢܵܬ ܓܽܘܡܪܸ̈ܐ ܕܫܲܠܗܸܒܝܼܬܵܐ܃
00511_0	ܡܲܨܝܵܐ ܕܬܲܠܸܦ ܕܢܽܘܪܵܢܵܐ ܗ̄ܘܵܐ ܒܲܥܒܝܼ̈ܕܵܬܸܗ܀
00511_1	ܗܽܘ ܕܹܝܢ ܗܵܢܵܐ ܝܲܡܵܐ ܕܫܽܘܦܪܸ̈ܐ ܓܲܙܵܐ ܕܡܼܐܡܪܸ̈ܐ܃
00511_2	ܣܝܼܡܬܵܐ ܕܫܲܪ̈ܒܸܐ ܪܵܡ ܕܽܘܒܵܪܸ̈ܐ ܫܒܝܼܚ ܣܽܘܥܪ̈ܵܢܸܐ܀
00511_3	ܓܡܝܼܪܵܐ ܕܟܽܠܝܽܘܡ ܚܲܣܝܵܐ ܕܟܽܠܫܵܥ ܬܽܘܒ ܬܵܒܲܥ ܠܝܼ܃
00511_4	ܕܬܽܘܒ ܢܸܬܡܲܠܲܠ ܫܲܪܒܸܗ ܒܬܸܗܪܵܐ ܨܹܝܕ ܫܵܡܽܘ̈ܥܸܐ܀
00511_5	ܘܲܒܡܽܘܢ ܘܲܐܝܟܲܢ ܡܸܬܡܲܠܲܠ ܒܝܼ ܡܼܐܡܪܸܗ ܪܲܒܵܐ܃
00511_6	ܕܲܙܥܽܘܪ ܗ̄ܽܘ ܦܽܘܡܝ ܕܲܢܓܝܼܚ ܫܽܘܦܪ̈ܲܘܗ̄ܝ ܒܸܐܣܟܼܡܲܝ̈ܗܽܘܢ܀
00511_7	ܒܚܽܘܒܵܐ ܕܼܐܝܬܲܘܗ̄ܝ ܐܲܝܟ ܠܸܫܵܢܵܐ ܕܫܲܠܗܸܒܝܼܬܵܐ܃
00511_8	ܢܡܲܠܸܠ ܫܲܪܒܸܗ ܕܵܐܦ ܗܽܘ ܒܢܽܘܪܵܐ ܐܸܬܥܲܠܝܼ ܗ̄ܘܵܐ܀
00511_9	ܐܸܠܽܘ ܚܽܘܒܵܐ ܠܵܐ ܡܓܲܪܸܓ ܠܝܼ ܥܲܠ ܢܸܨܚܸܢܲܘ̈ܗ̄ܝ܃
00512_0	ܙܲܘܥܵܐ ܕܡܼܐܡܪܸܗ ܡܣܲܪܸܕ ܗ̄ܘܵܐ ܠܝܼ ܕܠܵܐ ܐܸܩܪܽܘܒ ܠܸܗ܀
00512_1	ܗܵܟܲܢ ܘܲܠܟܽܘܢ ܚܽܘܒܵܐ ܡܓܲܪܸܓ ܠܲܡܩܲܒܵܠܽܘ܃
00512_2	ܕܒܸܗ ܗ̄ܽܘ ܫܵܡܲܥ ܐܲܝܢܵܐ ܕܫܵܡܲܥ ܦܵܪܽܘܫܵܐܝܼܬ܀
00512_3	ܢܼܐܡܲܪ ܡܸܟܝܼܠ ܥܲܠ ܡܲܣܲܩܬܸܗ ܕܗܲܘ ܫܲܦܝܼܪܵܐ܃
00512_4	ܘܥܲܠ ܡܲܪܟܲܒܬܵܐ ܙܗܝܼܬܵܐ ܕܢܸܚܬܲܬ ܒܵܬܪܸܗ ܠܲܐܪܥܵܐ܀
00512_5	ܥܲܠ ܦܲܓܪܵܢܵܐ ܕܲܫܘܵܐ ܕܢܸܥܡܲܪ ܥܲܡ ܪ̈ܽܘܚܵܢܸܐ܃
00512_6	ܥܲܠ ܥܲܦܪܵܢܵܐ ܕܠܵܐ ܗܦܲܟ ܠܲܐܪܥܵܐ ܕܢܸܗܘܸܐ ܥܲܦܪܵܐ܀

00512_7	ܥܲܠ ܬܲܚܬܵܝܵܐ ܕܲܐܪܡܝܼ ܐܽܘܪܚܸܗ ܨܹܝܕ ܥܸܠܵܝܸ̈ܐ܃

00512_8	ܥܲܠ ܒܲܪ ܓܸܢܣܲܢ ܕܫܲܒܩܲܢ ܘܲܚܠܲܛ ܥܲܡ ܡܲܠܲܐܟܸ̈ܐ܀
00512_9	ܥܲܠ ܕܽܘܡܵܪܵܐ ܕܲܐܚܕܵܗ݀ ܠܲܐܪܥܵܐ ܕܚܲܕ ܡܸܢ ܥܽܘܒܵܗ݀܃
00513_0	ܚܛܲܦܘ ܥܸܠܵܝܸ̈ܐ ܕܢܸܗܘܸܐ ܥܲܡܗܽܘܢ ܒܸܝܬ ܟܸܢܫܲܝ̈ܗܽܘܢ܀
00513_1	ܥܲܠ ܡܲܣܲܩܬܸܗ ܡܲܠܝܲܬ ܫܽܘܦܪܸ̈ܐ ܕܗܲܘ ܢܲܨܝܼܚܵܐ܃
00513_2	ܙܵܥ ܒܝܼ ܡܹܐܡܪܵܐ ܨܹܝܕ ܫܵܡܽܘ̈ܥܸܐ ܠܡܸܬܡܲܠܵܠܽܘ܀
00513_3	ܡܵܕܸܝܢ ܙܵܕܸܩ ܢܸܒܥܸܐ ܥܸܠܬܵܗ݀ ܕܽܐܘܪܚܵܐ ܗܵܕܸܐ܃
00513_4	ܕܲܐܝܟܲܢ ܘܲܠܡܽܘܢ ܘܲܒܡܽܘܢ ܪܸܗܛܲܬ ܡܸܢ ܫܽܘܪܵܝܵܐ܀
00513_5	ܡܲܢ ܕܲܒܛܝܼܠ ܠܸܗ ܥܲܠ ܝܽܘܠܦܵܢܵܐ ܡܠܸܐ ܝܽܘܬܪ̈ܵܢܸܐ܃
00513_6	ܚܲܒܝܼܒܵܐ ܗ̄ܝ ܠܸܗ ܒܥܵܬܵܐ ܕܙܵܥܲܬ ܟܸܢ ܦܽܘܪܫܵܢܵܐ܀
00513_7	ܐܵܠܨܵܐ ܗ̄ܝ ܢܸܒܥܸܐ ܕܒܲܐܝܠܸܝܢ ܚܲܝܸ̈ܐ ܡܛܵܐ ܐܸܠܝܼܵܐ܃
00513_8	ܠܗܵܢܵܐ ܪܲܘܡܵܐ ܕܲܓܡܝܼܪܽܘܬܵܐ ܕܸܐܬܢܲܨܲܚ ܒܸܗ܀
00513_9	ܢܸܣܬܲܟܲܠ ܒܸܗ ܕܲܟܡܵܐ ܪ̈ܲܗܛܸܐ ܕܙܲܕܝܼܩܽܘܬܵܐ܃
00514_0	ܗܘܲܘ ܠܸܗ ܒܥܵܠܡܵܐ ܘܟܸܢ ܐܸܬܡܲܛܝܼ ܠܗܵܝ ܪܲܒܽܘܬܵܐ܀
00514_1	ܠܲܟܡܵܐ ܕܲܪܸ̈ܐ ܟܣܲܝ̈ܵܐ ܢܚܸܬ ܗ̄ܘܵܐ ܘܲܙܟܵܐ ܘܲܣܠܸܩ܃
00514_2	ܘܟܸܢ ܐܸܬܵܐ ܠܸܗ ܗܵܢܵܐ ܟܠܝܼܠܵܐ ܕܚܲܝܸ̈ܐ ܚܲܕ̈ܬܸܐ܀
00514_3	ܟܡܵܐ ܐܵܓܽܘ̈ܢܸܐ ܘܩܼܐܪ̈ܣܸܐ ܦܓܲܥܘ ܒܸܗ ܒܥܵܠܡܵܐ ܒܝܼܫܵܐ܃
00514_4	ܘܗܵܝܕܸܝܢ ܥܲܒܪܸܗ ܠܲܐܬܪܵܐ ܕܡܲܘܬܵܐ ܘܲܐܓܗܝܼ ܡܸܢܸܗ܀
00514_5	ܠܲܟܡܵܐ ܦܲܚܸ̈ܐ ܒܽܐܘܪܚܸܗ ܕܥܵܠܡܵܐ ܚܙܵܐ ܕܲܛܡܝܼܪܝܼܢ܃
00514_6	ܘܲܫܘܲܪ ܐܸܢܽܘܢ ܒܥܲܡܠܵܐ ܪܲܒܵܐ ܘܟܸܢ ܐܸܬܢܲܨܲܚ܀
00514_7	ܟܡܵܐ ܟܝܼܡܽܘ̈ܢܸܐ ܢܲܗܙܽܘܗ݀ ܠܸܐܠܦܸܗ ܒܝܲܡܵܐ ܡܝܼܬܵܐ܃
00514_8	ܘܗܵܝܕܸܝܢ ܡܲܛܝܼ ܠܗܵܢܵܐ ܠܡܼܐܢܵܐ ܕܠܵܐ ܡܵܝܽܘ̈ܬܸܐ܀
00514_9	ܟܡܵܐ ܐܸܬܟܲܬܲܫ ܥܲܡ ܫܲܠܝܼܛܵܐ ܕܢܵܛܲܪ ܐܵܐܲܪ܃
00515_0	ܘܲܟܡܵܐ ܙܵܟ̈ܘܵܢ ܐܸܬܢܲܦܲܩ ܗ̄ܘܵܐ ܘܟܸܢ ܐܸܫܬܲܡܲܗ܀
00515_1	ܟܡܵܐ ܗܸܪ̈ܵܬܵܐ ܕܫܼܐܕܸ̈ܐ ܦܓܲܥ ܒܸܗ ܘܠܵܐ ܝܼܕܝܼ̈ܥܵܢ܃
00515_2	ܘܒܵܬܲܪ ܕܲܙܟܵܐ ܒܟܽܠܗܽܘܢ ܕܲܪܸ̈ܐ ܗܘܵܐ ܢܲܨܝܼܚܵܐ܀