← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63404: JSBhom 8: on the baptism of Jesus in the Jordan

Click on a word for lexical analysis
Click on a red-colored coordinate for comments and/or translations of the line

▲ earlier lines

008:0036 ܫܡܝܼܥ ܗܼܽܘ ܠܝܼ ܓܹܝܪ ܡܼܐܡܪܸܗ ܕܫܲܪܒܵܟ݂ ܗܵܐ ܡܸܢ ܢܽܘܓܪܵܐ܀
008:0037 ܐܲܢܼܬ݁ ܐܲܬ݂ܟܸܠܬܲܢܝ ܥܲܠ ܦܽܘܢܵܝܵܐ ܒܲܢܒ݂ܝܼܽܘܬ݂ܵܟ݂܃
008:0038 ܬܵܐ ܚܙܝܼ ܕܲܠܡܵܐ ܡܛܵܐ ܠܸܗ ܙܲܒ݂ܢܵܐ ܕܥܵܐܠܵܐ ܐܼܢܵܐ ܒܸܗ܀
008:0039 ܚܙܝܼ ܡܵܐ ܛܸܒܸܗ ܕܗܵܢܵܐ ܕܡܲܟ݂ܪܸܙ ܝܲܩܝܼܪ̈ܵܬ݂ܵܐ܃
008:0040 ܟܲܕ݂ ܗܽܘ ܩܢܽܘܡܸܗ ܡܸܣܟܝܼܢܽܘܬ݂ܵܐ ܡܸܬ݂ܚܲܙܝܵܐ ܒܸܗ܀
008:0041 ܡܣܲܪܲܩ ܚܸܙܘܸܗ ܘܥܲܬ݁ܝܼܪ ܩܵܠܵܐ ܕܟ݂ܵܪܽܘܙܽܘܬܸܗ܃
008:0042 ܒܨܝܼܪ ܐܸܣܟܝܼܡܸܗ ܘܪܲܒܵܐ ܡܸܠܬܸܗ ܒܸܐܕܢܲܝ̈ ܟܽܠܢܵܫ܀
008:0043 ܠܲܘ ܒܲܡܫܽܘܚܬܸܗ ܡܡܲܠܸܠ ܓܲܒ݂ܪܵܐ ܡܸܢ ܕܲܚܙܝܼܬܸܗ܃
008:0044 ܘܠܲܘ ܐܲܟ݂ܘܵܬܸܗ ܒܨܝܼܪ ܫܽܘܘܕܵܝܵܐ ܕܙܵܪܲܥ ܒܸܐܕ݂ܢܲܝ̈܀
008:0045 ܡܲܘܪܸܒ݂ ܡܸܠܬܸܗ ܟܲܕ݂ ܗܽܘ ܠܲܓܡܵܪ ܠܵܐ ܩܢܸܐ ܡܸܕܸܡ܃
008:0046 ܦܵܗܸܐ ܒܚܽܘܪܒܵܐ ܘܲܡܣܲܒܲܪ ܠܝܼ ܡܲܠܟ݁ܽܘܬ݂ ܪܲܘܡܵܐ܀
008:0047 ܐܼܡܲܪ ܠܝܼ ܢܒܝܼܵܐ ܐܸܢ ܫܲܪܝܼܪ ܗܼܽܘ ܐܸܫܡܲܥ ܡܸܠܲܘܗ̈ܝ܃
008:0048 ܘܸܐܢ ܠܵܐ ܫܲܪܝܼܪ ܠܵܐ ܐܸܛܥܸܐ ܒܸܗ ܐܲܝܟ݂ ܕܲܒ݂ܫܲܪܟܵܐ܀
008:0049 ܡܵܪܵܟ݂ ܐܵܬܸܐ ܘܲܡܛܲܝܒܵܐ ܐܼܢܵܐ ܐܸܥܽܘܠ ܩܽܘܕ݂ܡܲܘܗܝ܃
008:0050 ܫܪܵܪܵܐ ܓܠܝܼ ܠܝܼ ܠܵܐ ܬܸܫܪܲܟ݂ ܠܵܟ݂ ܨܸܝܕ݂ ܥܸܕ݂ܠܵܝܵܐ܀
008:0051 ܩܪܸܒ݂ ܐܸܫܲܥܝܵܐ ܕܢܲܠܦܝܼܗ݀ ܠܥܼܕܬܵܐ ܥܲܠ ܝܽܘܚܲܢܵܢ܃
008:0052 ܕܒܲܪ ܐܼܪܵܙܸܗ ܗܼܽܘ ܕܚܲܬ݂ܢܵܐ ܡܵܪܸܟ݂ܝ ܩܲܒܸ݁ܠܝ ܡܸܠܲܘܗ̈ܝ܀
008:0053 ܗܵܢܲܘ ܩܵܠܵܐ ܕܩܵܪܸܐ ܒܡܲܕ݂ܒܪܵܐ ܩܕ݂ܵܡ ܒܲܪ ܡܲܠܟܵܐ܃
008:0054 ܦܲܢܲܘ ܦܲܢܲܘ ܐܽܘܪܚܵܐ ܠܡܵܪܝܵܐ ܒܗܲܝܡܵܢܽܘܬ݂ܵܐ܀
008:0055 ܙܸܠܝ ܚܽܘܬ݂ܝ ܘܲܣܚܵܝ ܠܵܐ ܬܸܫܬܲܐܠܝܼܢ ܡܸܢ ܟܵܪܽܘܙܵܐ܃
008:0056 ܥܲܪܡܵܐ ܡܫܲܦܸܐ ܕܢܲܬ݂ܩܸܢ ܐܽܘܪܚܵܐ ܠܡܲܠܟܵܐ ܕܵܐܬܸܐ܀
008:0057 ܩܸܪܒܲܬ̤ ܥܼܕܬܵܐ ܟܲܠܲܬ݂ ܡܲܠܟܵܐ ܨܸܝܕ݂ ܝܽܘܚܲܢܵܢ܃
008:0058 ܘܫܲܪܝܼ ܡܲܣܚܸܐ ܡܚܲܠܸܠ ܡܵܪܸܩ ܘܡܩܲܕܸܫ ܠܵܗ݀܀
008:0059 ܗ݂ܘܵܐ ܠܵܗ݀ ܡܗܲܝܡܢܵܐ ܘܲܠܐܝܼ ܒܨܸܒ݂ܬܵܗ݀ ܟܡܵܐ ܕܲܡܨܸܐ ܗܼܘܵܐ܃
008:0060 ܐܲܠܸܦ ܚܲܟ݁ܡܵܗ݀ ܕܬܸܬ݂ܟܲܘܲܢ ܗܼܘܵܬ݂ ܕܲܒ݂ܠܝܼܠܵܐ ܗܼܘܵܬ݂܀
008:0061 ܫܸܡܥܲܬ̤ ܩܵܠܸܗ ܘܸܐܬ݂ܪܲܡܝܲܬ̤ ܗܼܘܵܬ݂ ܒܵܬܲܪ ܡܸܠܲܘܗ̈ܝ܃
008:0062 ܘܣܸܒ݂ܪܲܬ̤ ܗܼܘܵܬ݂ ܠܵܗ݀ ܕܗܽܘܝܽܘ ܚܲܬ݂ܢܵܐ ܕܲܡܟ݂ܝܼܪܵܐ ܠܸܗ܀
008:0063 ܐܼܚܲܕܬܸܗ ܠܥܲܒ݂ܕܵܐ ܚܲܒ݁ܝܼܒ݂ܵܐܝܼܬ݂ ܐܲܝܟ݂ ܕܲܠܡܵܪܵܐ܃
008:0064 ܒܗܵܝ ܕܲܟ݂ܣܸܐ ܗܼܘܵܐ ܡܫܝܼܚܵܐ ܡܸܢܵܗ݀ ܒܲܝܢܵܬ݂ ܫܲܒ݂̈ܛܸܐ܀
008:0065 ܚܙܵܐ ܫܲܪܝܼܪܵܐ ܕܣܲܒܝܼܟ݂ܵܐ ܒܸܗ ܟܲܠܬ݂ܵܐ ܕܲܡܟܲܪ܃
008:0066 ܘܫܲܪܝܼ ܢܵܦܸܨ ܥܽܘܒܸܗ ܘܩܵܥܸܐ ܕܠܲܘ ܚܲܬ݂ܢܵܐ ܐܼܢܵܐ܀
008:0067 ܕܲܚܩܵܗ݀ ܡܸܢܸܗ ܕܠܵܐ ܬܸܛܥܸܐ ܒܸܗ ܒܲܕ݂ ܥܲܒ݂ܕܵܐ ܗܼܘܵܐ܃
008:0068 ܘܲܬ݂ܠܵܗ݀ ܕܬܸܗܘܸܐ ܒܣܲܒ݂ܪܸܗ ܕܚܲܬ݂ܢܵܐ ܟܲܕ݂ ܡܲܒ݂ܥܲܕ݂ ܗܼܘܵܐ܀
008:0069 ܡܲܟܸ݁ܟ݂ ܢܲܦ݂ܫܸܗ ܕܠܵܐ ܫܵܘܸܐ ܐܼܢܵܐ ܘܠܵܐ ܠܲܡܣܵܢܲܘܗ̈ܝ܃
008:0070 ܕܪܝܼܫܵܢܽܘܬ݂ܵܐ ܠܡܵܪܸܗ ܢܸܛܽܘܪ ܐܲܝܟ݂ ܫܲܪܝܼܪܵܐ܀
008:0071 ܚܙܵܗ݀ ܠܲܛܠܝܼܬ݂ܵܐ ܕܫܸܟ݂ܢܲܬ̤ ܥܲܝܢܵܗ݀ ܥܠܲܘܗܝ ܕܲܢܙܝܼܪܵܐ܃
008:0072 ܘܲܐܪܗܸܒ݂ ܦܲܣܩܵܗ݀ ܠܥܸܠܲܬ݂ ܟܸܫܠܵܐ ܡܸܢ ܪܸܥܝܵܢܵܗ݀܀
008:0073 ܐܲܣܪܵܗ݀ ܒܬܸܢܘܲܝ ܬܣܲܟܸܐ ܠܚܲܬ݂ܢܵܐ ܘܒܸܗ ܠܵܐ ܬܸܚܽܘܪ܃
008:0074 ܟܲܕ݂ ܡܲܟܪܸܙ ܠܵܗ݀ ܕܒ݂ܵܬܲܪܝ ܐܵܬܸܐ ܘܩܲܕ݂ܡܵܝ ܗܼܽܘ ܡܸܢܝ܀
008:0075 ܫܲܪܝܲܬ̤ ܚܵܝܪܵܐ ܕܠܸܐܡܲܬܝ ܬܸܚܙܸܝܘܗܝ ܕܵܐܬܸܐ ܨܸܐܕ݂ܝܸܗ݀܃
008:0076 ܟܲܕ݂ ܒܲܥܡܝܼ̈ܕܸܐ ܒܼܐܝܕ݂ܵܐ ܒܼܐܝܕ݂ܵܐ ܡܸܬ݂ܒܲܩܝܵܐ ܗܼܘܵܬ݂܀
008:0077 ܫܵܕ݂ܝܵܐ ܗܼܘܵܬ݂ ܠܵܗ݀ ܥܲܝܢܵܗ݀ ܠܛܲܘܚܵܐ ܥܲܠ ܣܲܓ݁ܝܼ̈ܐܸܐ܃
008:0078 ܕܲܒ݂ܗܽܘܢ ܬܸܚܙܸܐ ܠܚܲܕ݂ ܝܼܚܝܼܕ݂ܵܐ ܕܲܡܟ݂ܝܼܪܵܐ ܠܸܗ܀
008:0079 ܡܵܐ ܕܢܵܚܸܬ݂ ܗܼܘܵܐ ܐܼܢܵܫ ܠܲܥܡܵܕ݂ܵܐ ܚܲܕ݂ܪܽܘܗܝ ܟܸܢ̈ܫܸܐ܃
008:0080 ܕܢܸܬ݂ܒܲܝܢܽܘܢ ܒܸܗ ܕܕܲܠܡܵܐ ܗܽܘܝܽܘ ܡܫܝܼܚܵܐ ܕܵܐܬܸܐ܀
008:0081 ܟܸܢܫܲܬ̤ ܩܵܡܲܬ̤ ܥܼܕܬܵܐ ܒܚܽܘܪܒܵܐ ܨܸܝܕ݂ ܝܽܘܚܲܢܵܢ܃
008:0082 ܟܲܕ݂ ܒܲܚ̈ܕܽܘܓܸܐ ܡܲܨܕܵܐ ܕܬܸܚܙܸܐ ܕܲܐܝܢܲܘ ܚܲܬ݂ܢܵܐ܀
008:0083 ܟܪܲܟ݂ܬܸܗ ܠܢܲܗܪܵܐ ܘܲܫܕ݂ܵܬ̤ ܥܲܝܢܸܝ̈ܗ݀ ܒܲܝܢܵܬ݂ ܫܸܦܥܲܘ̈ܗܝ܃
008:0084 ܕܲܬ݂ܩܲܒ݁ܠܸܗ ܗܼܘܵܬ݂ ܠܲܡܟ݂ܝܼܪ ܩܽܘܫܬܵܐ ܡܸܢ ܓܲܘ ܡܲܝ̈ܵܐ܀
008:0085 ܩܵܝܡܵܐ ܦܐܝܼܬ݂ܵܐ ܘܚܵܝܪܵܐ ܠܚܲܬ݂ܢܵܐ ܕܸܐܡܲܬ݂ܝ ܢܼܐܬܸܐ܃
008:0086 ܕܬܸܥܽܘܠ ܥܲܡܸܗ ܠܥܽܘܒܵܐ ܕܡܲܝ̈ܵܐ ܠܡܸܬ݂ܩܲܕܵܫܽܘ܀

▼ later lines