← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63404: JSBhom 8: on the baptism of Jesus in the Jordan

Click on a word for lexical analysis
Click on a red-colored coordinate for comments and/or translations of the line

▲ earlier lines

008:0166 ܗܵܢܵܐ ܫܵܩܸܠ ܚܛܝܼܬܸܗ ܕܥܵܠܡܵܐ ܒܲܕ݂ܒ݂ܝܼܚܽܘܬܸܗ܀
008:0167 ܥܲܠ ܗܵܐ ܗܵܢܵܐ ܡܲܬ݂ܟܸܠ ܗܼܘܝܼܬ݂ ܠܸܟ݂ܝ ܗܵܐ ܡܸܢ ܢܽܘܓܪܵܐ܃
008:0168 ܒܲܫܡܸܗ ܕܗܵܢܵܐ ܡܲܘܬܸܒ݂ ܗܼܘܝܼܬ݂ ܠܸܟ݂ܝ ܕܲܬ݂ܣܲܟܸܝܢ ܠܸܗ܀
008:0169 ܠܗܵܢܵܐ ܢܛܲܪܬܸܟ݂ܝ ܒܲܙܗܝܼܪܽܘܬ݂ܵܐ ܐܲܝܟ݂ ܫܲܪܝܼܪܵܐ܃
008:0170 ܐܲܘܕܵܝ ܠܸܗ ܡܸܢܝ ܕܠܵܐ ܫܒܲܩܬܸܟ݂ܝ ܗܼܘܝܼܬ݂ ܕܬܸܬ݂ܓܲܢܒܝܼܢ ܒܝܼ܀
008:0171 ܘܟܲܕ݂ ܡܸܬ݂ܚܲܟܡܵܐ ܟܲܠܲܬ݂ ܡܲܠܟܵܐ ܡܸܢ ܝܽܘܚܲܢܵܢ܃
008:0172 ܗܵܐ ܛܪܵܓܽܘܕ݂ܵܐ ܕܪܽܘܚܵܐ ܕܲܘܝܼܕ݂ ܩܪܸܒ݂ ܙܵܡܲܪ ܠܵܗ݀܀
008:0173 ܫܡܲܥܝ ܒܲܪܬ݂ܝ ܘܲܚܙܵܝ ܘܲܨܠܵܝ ܐܸܕ݂ܢܸܟ݂ܝ ܠܲܫܒ݂ܝܼ̈ܚܵܬ݂ܵܐ܃
008:0174 ܘܲܛܥܵܝ ܥܲܡܸܟ݂ܝ ܘܠܲܕ݂ܒܸܝܬ݂ ܐܲܒ݂ܽܘܟ݂ܝ ܕܲܦܠܝܼ̈ܓܸܐ ܐܼܢܽܘܢ܀
008:0175 ܐܝܼܢ ܒܲܫܪܵܪܵܐ ܗܽܘܝܽܘ ܡܵܪܸܟ݂ܝ ܩܪܽܘܒ݂ܝ ܘܲܣܓܽܘܕ݂ܝ ܠܸܗ܃
008:0176 ܠܵܐ ܬܸܬ݂ܦܲܠܓܝܼܢ ܥܲܠ ܦܵܪܽܘܩܵܐ ܕܸܐܬܵܐ ܠܘܵܬܸܟ݂ܝ܀
008:0177 ܝܸܠܦܲܬ̤ ܥܼܕܬܵܐ ܡܸܢ ܝܽܘܚܲܢܵܢ ܐܵܦ ܡܸܢ ܕܲܘܝܼܕ݂܃
008:0178 ܘܐܸܫܬܲܪܪܲܬ̤ ܗܼܘܵܬ݂ ܕܗܽܘܝܽܘ ܚܲܬ݂ܢܵܐ ܕܠܸܗ ܐܸܬ݂ܡܲܟ݂ܪܲܬ̤܀
008:0179 ܩܸܪܒܲܬ̤ ܩܵܡܲܬ̤ ܕܬܸܚܙܸܐ ܕܲܐܝܟܲܢ ܥܵܡܸܕ݂ ܐܵܦ ܗܽܘ܃
008:0180 ܕܡܵܐ ܕܲܣܠܸܩ ܗܼܘܵܐ ܡܸܢ ܓܲܘ ܡܲܝ̈ܵܐ ܬܸܦܸܠ ܩܽܘܕ݂ܡܲܘܗܝ܀
008:0181 ܩܪܸܒ݂ ܗܼܘܵܐ ܡܫܝܼܚܵܐ ܨܸܝܕ݂ ܝܽܘܚܲܢܵܢ ܕܢܸܥܡܲܕ݂ ܡܸܢܸܗ܃
008:0182 ܚܙܵܝܗܝ ܝܽܘܚܲܢܵܢ ܘܲܬ݂ܟܲܣ ܐܝܼܕܸܗ ܡܸܢ ܢܽܘܪܵܢܵܐ܀
008:0183 ܐܲܪܟܸ݁ܢ ܪܝܼܫܸܗ ܩܕ݂ܵܡܲܘܗܝ ܕܲܒ݂ܪܵܐ ܟܲܕ݂ ܐܵܡܲܪ ܠܸܗ܃
008:0184 ܕܠܝܼ ܘܵܠܸܐ ܠܝܼ ܕܡܸܢܵܟ݂ ܐܸܥܡܲܕ݂ ܕܩܲܕܝܼܫܵܐ ܐܲܢܼܬ݁܀
008:0185 ܠܵܟ݂ ܚܵܐܲܪ ܗܼܘܝܼܬ݂ ܕܲܐܓܥܸܠ ܗܼܘܝܼܬ݂ ܠܵܟ݂ ܡܲܥܡܽܘܕ݂ܝܼܬ݂ܵܐ܃
008:0186 ܗܵܐ ܠܵܟ݂ ܓܲܙܵܟ݂ ܘܲܐܪܦܵܢܝ ܡܸܟܝܼܠ ܐܸܢܽܘܚ ܩܲܠܝܼܠ܀
008:0187 ܕܽܘܟ݁ܬ݂ܲܐ ܗܼܘ ܢܸܛܪܸܬ݂ ܠܲܘ ܓܹܝܪ ܕܝܼܠܝ ܗܼܝܼ ܪܝܼܫܵܢܽܘܬ݂ܵܐ܃
008:0188 ܩܽܘܡ ܥܲܠ ܕܲܪܓܵܟ݂ ܠܵܐ ܫܲܠܝܼܛ ܐܼܢܵܐ ܥܲܠ ܐܽܘܚܕܵܢܵܟ݂܀
008:0189 ܠܲܘ ܫܽܘܠܛܵܢܵܐ ܫܵܩܸܠ ܡܲܠܟܵܐ ܡܸܢ ܚܵܕ݂ܽܘܪܵܐ܃
008:0190 ܡܸܢܸܗ ܕܬ݂ܵܓܵܐ ܢܵܦܩܝܼܢ ܛܸܟ̈ܣܸܐ ܕܟ݂ܽܠ ܫܽܘܠܛܵܢ̈ܝܼܢ܀
008:0191 ܡܵܢܵܐ ܐܝܼܬ݂ ܠܵܗ݀ ܠܡܲܥܡܽܘܕ݂ܝܼܬ݂ܵܐ ܕܠܲܘ ܕܝܼܠܵܟ݂ ܗܼܽܘ܃
008:0192 ܘܡܽܘܢ ܚܲܣܝܼܪ ܠܵܟ݂ ܕܬܸܚܽܘܬ݂ ܬܸܣܲܒ݂ ܡܸܢ ܓܲܘ ܡܲܝ̈ܵܐ܀
008:0193 ܐܸܢ ܚܽܘܣܵܝܵܐ ܡܸܢܵܟ݂ ܪܵܕܸܐ ܠܲܒ݂ܢܲܝܢܵܫܵܐ܃
008:0194 ܘܸܐܢ ܫܽܘܒ݂ܩܵܢܵܐ ܕܝܼܠܵܟ݂ ܗܼܽܘ ܬ݂ܽܘܒ݂ ܫܽܘܒ݂ܩܵܢ ܚܲܘ̈ܒܸܐ܀
008:0195 ܐܸܢ ܟܽܘܡܪܽܘܬ݂ܵܐ ܒܵܟ݂ ܗܼܝܼ ܟܽܠܵܗ݀ ܕܪܲܒ݁ ܟܽܘܡܪܸ̈ܐ ܐܲܢܼܬ݁܃
008:0196 ܘܸܐܢ ܡܲܠܟ݁ܽܘܬ݂ܵܐ ܐܲܢܼܬ݁ ܗܼܽܘ ܩܵܛܲܪ ܬܵܓܸ̈ܐ ܠܡܲܠܟܸ̈ܐ܀
008:0197 ܩܲܕܝܼܫܽܘܬ݂ܵܐ ܡܸܢܵܟ݂ ܪܵܕ݂ܝܵܐ ܠܲܒ݂ܢܲܝܢܵܫܵܐ܃
008:0198 ܘܸܐܢ ܟܵܗܢܽܘܬ݂ܵܐ ܗܵܐ ܒܝܲܡܝܼܢܵܟ݂ ܥܵܠܡܵܐ ܩܵܐܸܡ܀
008:0199 ܘܟܲܕ݂ ܡܲܠܝܽܘܬ݂ܵܐ ܕܲܐܠܵܗܽܘܬ݂ܵܐ ܗܵܐ ܨܸܐܕܲܝܟ݂ ܗܼܝܼ܃
008:0200 ܡܵܢܵܐ ܐܝܼܬ݂ ܠܸܗ ܠܢܲܗܪܵܐ ܙܥܽܘܪܵܐ ܕܲܢܫܲܡܠܸܐ ܒܵܟ݂܀
008:0201 ܐܵܡܲܪ ܡܵܪܲܢ ܠܵܐ ܚܲܣܝܼܪ ܐܼܢܵܐ ܐܸܠܵܐ ܒܲܚܕ݂ܵܐ܃
008:0202 ܫܟܵܚܬܸܗ ܕܵܐܕܵܡ ܕܲܐܒܝܼܕ݂ܵܐ ܡܸܢܝ ܡܸܬ݂ܒܲܥܝܵܐ ܠܝܼ܀
008:0203 ܐܲܪܦܵܢܝ ܐܸܚܽܘܬ݂ ܐܸܒ݂ܥܸܐ ܠܵܐܕ݂ܵܡ ܨܲܠܡܵܐ ܦܲܐܝܵܐ܃
008:0204 ܘܡܵܐ ܕܸܐܫܟܲܚܬܸܗ ܨܸܒ݂ܝܵܢܝ ܟܽܠܸܗ ܐܸܫܬܲܡܠܝܼ ܠܸܗ܀
008:0205 ܒܥܵܬ݂ܵܐ ܪܲܒ݁ܬ݂ܵܐ ܗܘ̤ܵܬ݂ ܠܝܼ ܒܫܲܪܒܸܗ ܘܥܲܠܗܵܝ ܐܸܬܝܼܬ݂܃
008:0206 ܘܸܐܢ ܠܲܐܒܝܼܕ݂ܵܐ ܠܵܐ ܡܸܫܟܲܚ ܐܼܢܵܐ ܚܲܣܝܼܪܽܘܬ݂ܵܐ ܗܼܝ܀
008:0207 ܗܵܕܸܐ ܒܲܠܚܽܘܕ݂ ܚܲܣܝܼܪܵܐ ܠܝܼ ܫܟ݂ܵܚܬܸܗ ܕܨܸܐܕܲܝ܃
008:0208 ܕܸܐܩܢܸܐ ܠܵܐܕ݂ܵܡ ܕܲܨܒ݂ܵܐ ܕܢܼܐܒܲܕ݂ ܒܼܐܝ̈ܕܲܝ ܒܝܼܫܵܐ܀
008:0209 ܒܗܵܕܸܐ ܫܟ݂ܵܚܬܵܐ ܐܵܬܸܐ ܨܸܒ݂ܝܵܢܝ ܠܲܓܡܝܼܪܽܘܬ݂ܵܐ܃
008:0210 ܕܚܲܣܝܼܪ ܗܼܽܘ ܠܝܼ ܐܵܕܵܡ ܕܢܸܥܽܘܠ ܥܲܠ ܝܵܪܬܽܘܬܸܗ܀
008:0211 ܫܒ݂ܽܘܩܲܝܢܝ ܡܵܕܸܝܢ ܐܸܚܽܘܬ݂ ܐܸܡܪܽܘܩ ܨܲܠܡܵܐ ܕܲܐܫܚܸܬ݂܃
008:0212 ܕܠܵܐ ܚܲܣܝܼܪܵܐ ܢܸܗܘܸܐ ܐܵܦ ܗܽܘ ܡܵܐ ܕܲܟ݂ܠܲܝܬܵܢܝ܀
008:0213 ܗܵܝ ܛܲܝܒ݁ܽܘܬ݂ܵܐ ܕܲܩܪܵܬܲܢܝ ܗܼܘܵܬ݂ ܐܼܬܸܐ ܠܝܲܠܕܵܐ܃
008:0214 ܗܝܼ ܬܽܘܒ݂ ܟܲܕ݂ ܗܝܼ ܩܪܵܬܲܢܝ ܕܼܐܬܸܐ ܐܵܦ ܠܲܥܡܵܕ݂ܵܐ܀
008:0215 ܚܢܵܢܵܐ ܪܲܒܵܐ ܢܲܓܕܲܢܝ ܐܸܚܽܘܬ݂ ܐܸܗܘܸܐ ܥܽܘܠܵܐ܃
008:0216 ܗܽܘܝܽܘ ܗܵܢܵܐ ܕܢܲܓܕܲܢܝ ܐܸܚܽܘܬ݂ ܐܸܗܘܸܐ ܥܡܝܼܕ݂ܵܐ܀

▼ later lines