← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63404: JSBhom 8: on the baptism of Jesus in the Jordan

Click on a word for lexical analysis
Click on a red-colored coordinate for comments and/or translations of the line

▲ earlier lines

008:0090 ܕܒܸܗ ܬܸܫܬܲܡܠܸܐ ܡܲܥܡܽܘܕ݂ܝܼܬܸܗ ܕܲܒ݂ܨܝܼܪܵܐ ܗܼܘܵܬ݂܀
008:0091 ܢܵܛܲܪ ܗܼܘܵܐ ܠܸܗ ܠܐܼܪܵܙܵܐ ܕܼܐܝܬ݂ ܗܼܘܵܐ ܒܸܝܬ݂ ܠܸܗ ܠܲܐܒ݂ܵܐ܃
008:0092 ܘܚܵܐܲܪ ܗܼܘܵܐ ܠܵܗ݀ ܠܪܽܘܚܵܐ ܕܬܸܣܗܲܕ݂ ܥܲܠ ܫܲܪܝܼܪܵܐ܀
008:0093 ܟܲܕ݂ ܣܵܐܸܡ ܗܼܘܵܐ ܐܝܼܕܸܗ ܕܢܲܥܡܸܕ݂ ܠܲܐܝܠܸܝܢ ܕܵܐܬܸܝܢ܃
008:0094 ܠܥܸܠ ܚܵܐܲܪ ܗܼܘܵܐ ܡܸܛܽܠ ܬܲܢܘܲܝ ܕܼܐܝܬ݂ ܗܼܘܵܐ ܬܲܡܵܢ܀
008:0095 ܐܲܛܝܼܪ ܥܲܝܢܲܘ̈ܗܝ ܥܲܠ ܣܲܓܝܼܸ̈ܐܐ ܕܼܐܝܬ݂ ܗܼܘܵܐ ܠܘܵܬܸܗ܃
008:0096 ܕܢܸܚܙܸܐ ܐܲܝܢܵܐ ܡܚܲܘܝܵܐ ܪܽܘܚܵܐ ܡܵܐ ܕܸܐܫܬܲܠܚܲܬ̤܀
008:0097 ܚܵܐܲܪ ܗܼܘܵܐ ܠܵܗ݀ ܠܗܵܝ ܦܵܪܲܚܬ݂ܵܐ ܡܵܪܲܬ݂ ܪ̈ܲܘܡܸܐ܃
008:0098 ܕܲܐܝܟܲܢ ܢܵܚܬܵܐ ܘܥܲܠ ܡܲܢ ܫܵܟ݂ܢܵܐ ܕܲܥܠܲܘܗܝ ܬܸܣܗܲܕ݂܀
008:0099 ܡܣܲܟܸ݁ܐ ܗܼܘܵܐ ܠܗܽܘܢ ܠܸܐܒ݂ܪܸ̈ܐ ܙܪ̈ܝܼܙܸܐ ܛܥܝܼ̈ܢܲܝ ܣܲܘ̈ܦܸܐ܃
008:0100 ܕܢܸܚܙܸܐ ܠܡܲܢܽܘ ܡܩܲܒ݁ܠܝܼܢ ܗܼܘܲܘ ܠܸܗ ܡܸܢ ܓܲܘ ܡܲܝ̈ܵܐ܀
008:0101 ܨܗܸܐ ܗܼܘܵܐ ܕܢܸܚܙܸܝܘܗܝ ܠܓܸܦܵܐ ܕܛܵܐܸܣ ܟܲܕ݂ ܠܵܐ ܪܵܐܸܦ܃
008:0102 ܕܡܵܐ ܕܡܸܬ݂ܚܲܘܸܐ ܢܸܗܘܸܐ ܣܵܗܕܵܐ ܥܲܠ ܦܵܪܽܘܩܵܐ܀
008:0103 ܨܵܐܸܬ݂ ܗܼܘܵܐ ܠܵܗ݀ ܠܗܵܝ ܒܲܪܼܬ݂ ܩܵܠܵܐ ܚܠܝܼܡܬܵܐ ܕܲܐܒ݂ܵܐ܃
008:0104 ܕܢܸܫܡܲܥ ܡܸܢܵܗ݀ ܕܥܲܠ ܡܲܢ ܙܵܥܩܵܐ ܕܒܸܪܝ ܗܼܽܘ ܚܲܒܝܼܒ݂ܝ܀
008:0105 ܩܵܝܡܵܐ ܟܲܠܬ݂ܵܐ ܨܸܝܕ݂ ܫܲܪܝܼܪܵܐ ܒܲܪ ܥܲܩܪܽܘܬ݂ܵܐ܃
008:0106 ܘܲܡܣܲܟ݁ܝܵܐ ܠܸܗ ܕܸܐܡܲܬ݂ܝ ܪܵܡܸܙ ܕܗܵܢܲܘ ܚܲܬ݂ܢܵܐ܀
008:0107 ܗܝܼ ܚܵܝܪܵܐ ܒܸܗ ܕܲܢܒܲܕܸܩ ܠܵܗ݀ ܥܲܠ ܦܵܪܽܘܩܵܐ܃
008:0108 ܘܗܽܘ ܡܣܲܟܸ݁ܐ ܠܸܗ ܠܲܐܒ݂ܵܐ ܕܢܸܣܗܲܕ݂ ܥܲܠ ܚܲܒܝܼܒܸܗ܀
008:0109 ܡܵܐ ܕܸܐܬܵܐ ܐܼܢܵܫ ܢܸܚܽܘܬ݂ ܢܸܥܡܲܕ݂ ܚܸܒ݂ܨܲܬ̤ ܨܸܐܕ݂ܲܘܗܝ܃
008:0110 ܕܸܐܢܗܽܘ ܕܚܲܬ݂ܢܲܐ ܗܼܘ ܬܩܲܒ݁ܠܝܼܘܗܝ ܡܸܢܸܗ ܚܲܒܝܼܒ݂ܵܐܝܼܬ݂܀
008:0111 ܐܼܡܲܪ ܗܼܘܵܐ ܠܟܸܢܫܸ̈ܐ ܕܗܵܐ ܒܲܝܢܵܬ݂ܟ݂ܽܘܢ ܩܵܐܸܡ ܚܲܬ݂ܢܵܐ܃
008:0112 ܘܗܵܢܵܐ ܩܵܠܵܐ ܢܽܘܪܵܐ ܒܟܲܠܬ݂ܵܐ ܐܲܣܸܦ ܗܼܘܵܐ ܒܵܗ݀܀
008:0113 ܐܲܟ݂ܪܸܙ ܗܼܘܵܐ ܬܽܘܒ݂ ܕܠܵܐ ܫܵܘܸܐ ܐܼܢܵܐ ܘܠܵܐ ܠܲܡܣܵܢܲܘ̈ܗܝ܃
008:0114 ܘܬ݂ܽܘܒ݂ ܫܲܓܪܵܗ݀ ܗܼܘܵܐ ܒܚܽܘܒܸܗ ܕܝܸܫܽܘܥ ܘܲܒ݂ܓܲܐܝܽܘܬܸܗ܀
008:0115 ܙܸܪܒܲܬ̤ ܩܵܡܲܬ̤ ܟܲܠܲܬ݂ ܢܽܘܗܪܵܐ ܨܸܝܕ݂ ܝܽܘܚܲܢܵܢ܃
008:0116 ܕܡܵܐ ܕܚܲܘܝܼ ܠܵܗ݀ ܕܲܐܝܢܲܘ ܚܲܬ݂ܢܵܐ ܬܸܦܸܠ ܩܽܘܕ݂ܡܲܘܗܝ܀
008:0117 ܥܲܠ ܟܽܠ ܐܲܝܢܵܐ ܕܡܸܬ݂ܝܲܒܲܠ ܗܼܘܵܐ ܕܢܼܐܬܸܐ ܢܸܥܡܲܕ݂܃
008:0118 ܥܕܲܡܵܐ ܕܣܵܠܸܩ ܥܲܝܢܵܗ݀ ܕܟܲܠܬ݂ܵܐ ܥܠܲܘܗܝ ܫܲܕ݂ܝܵܐ ܗܼܘܵܬ܀
008:0119 ܥܡܲܕ݂ܘ ܗܼܘܲܘ ܐܲܠܦܸ̈ܐ ܘܠܲܝܬ݁ ܗܼܘܵܐ ܪܽܘܚܵܐ ܕܢܵܚܬܵܐ ܥܠܲܝܗܽܘܢ܃
008:0120 ܣܚܲܝ̈ ܪܸ̈ܒ݁ܘܵܬ݂ܵܐ ܘܢܲܗܪܵܐ ܩܲܪܝܼܪ ܡܸܢ ܪܽܘܚܵܦܵܐ܀
008:0121 ܢܚܸܬ݂ܘ ܗܼܘܲܘ ܟܸܢܫܸ̈ܐ ܘܡܲܝ̈ܵܐ ܫܚܝܼܡܝܼܢ ܐܲܝܟ݂ ܕܼܐܝܬܲܝܗܽܘܢ܃
008:0122 ܣܠܸܩܘ ܣܲܓ݁ܝܼܸ̈ܐܐ ܘܩܵܠܸܗ ܕܲܐܒ݂ܵܐ ܓܢܝܼܙ ܐܲܟ݂ܘܵܬܸܗ܀
008:0123 ܘܟܲܕ݂ ܐܸܬ݂ܓܲܡܪܲܬ̤ ܟܲܠܬ݂ܵܐ ܒܨܸܒ̈ܬܸܐ ܕܲܬ݂ܝܵܒ݂ܽܘܬ݂ܵܐ܃
008:0124 ܘܲܣܚܵܬ̤ ܣܸܠܩܲܬ̤ ܡܸܢ ܓܲܘ ܡܲܝ̈ܵܐ ܕܡܲܥܡܽܘܕ݂ܝܼܬ݂ܵܐ܀
008:0125 ܘܟܲܕ݂ ܐܸܬ݁ܛܲܝܲܒ݂ ܚܠܽܘܠܵܐ ܟܽܠܸܗ ܥܲܡ ܬܽܘܩܵܢܲܘ̈ܗܝ܃
008:0126 ܘܒܲܠܚܽܘܕ݂ ܚܲܬ݂ܢܵܐ ܟܵܠܸܐ ܕܢܼܐܬܸܐ ܕܢܸܣܥܽܘܪ ܕܝܼܠܸܗ܀
008:0127 ܟܲܕ݂ ܡܲܣܚܽܘܬ݂ܵܐ ܗܘܵܬ݂ ܠܲܚ̈ܕ݂ܽܘܓܸܐ ܘܡܸܪܩܲܬ̤ ܐܸܢܽܘܢ܃
008:0128 ܘܢܲܚ̈ܬܸܐ ܕܪܽܘܚܵܐ ܠܵܐ ܠܒ݂ܝܼܫܝܼܢ ܗܼܘܲܘ ܡܸܢ ܓܲܘ ܡܲܝ̈ܵܐ܀
008:0129 ܘܟܲܕ݂ ܩܵܝܡܝܼܢ ܗܼܘܲܘ ܒܲܫܠܝܼܚܽܘܬ݂ܵܐ ܟܽܠܗܽܘܢ ܥܲܡܡܸ̈ܐ܃
008:0130 ܘܲܡܣܲܟܸ݁ܝܢ ܗܼܘܲܘ ܠܚܲܬ݂ܢܵܐ ܕܢܼܐܬܸܐ ܘܢܲܠܒܸ݁ܫ ܐܸܢܽܘܢ܀
008:0131 ܘܟܲܕ݂ ܐܸܬ݁ܬ݁ܫܝܼܓܲܬ̤ ܨܵܐܬ݂ܵܗ݀ ܕܟܲܠܬ݂ܵܐ ܒܡܲܝ̈ܵܐ ܘܣܸܠܩܲܬ̤܃
008:0132 ܘܲܠܚܸܘܵܪܸ̈ܐ ܕܢܲܝܬܸܐ ܚܲܬ݂ܢܵܐ ܚܵܐܲܪ ܟܽܠܢܵܫ܀
008:0133 ܘܟܲܕ݂ ܚܲܣܝܼܪܵܐ ܡܲܥܡܽܘܕ݂ܝܼܬ݂ܵܐ ܡܸܢ ܚܽܘܣܵܝܵܐ܃
008:0134 ܘܪܽܘܚܵܐ ܕܩܽܘܕ݂ܫܵܐ ܐܼܢܵܫ ܡܸܢ ܡܲܝ̈ܵܐ ܠܵܐ ܩܲܒܸ݁ܠ ܗܼܘܵܐ܀
008:0135 ܘܟܲܕ݂ ܡܸܫܬ݁ܽܘܬ݂ܵܐ ܟܽܠܵܗ݀ ܚܵܝܪܵܐ ܠܚܲܬ݂ܢܵܐ ܕܲܐܝܟܲܘ܃
008:0136 ܢܦܲܩ ܒܲܪ ܡܲܠܟܵܐ ܡܸܢ ܓܲܘ ܟܸܢܫܸ̈ܐ ܕܢܼܐܬܸܐ ܠܢܲܗܪܵܐ܀
008:0137 ܘܟܲܕ݂ ܗܽܘ ܪܲܚܝܼܩ ܡܲܥܡܽܘܕܝܼܬ݂ܵܐ ܠܩܽܘܒ݂ܠܸܗ ܪܸܬ݂ܚܲܬ̤܃
008:0138 ܘܲܫܦܲܥ ܢܲܗܪܵܐ ܘܲܐܟ݂ܪܸܙ ܥܠܲܘܗܝ ܫܲܬ݁ܝܼܩܵܐܝܼܬ݂܀
008:0139 ܢܦܲܩ ܗܼܘܵܐ ܡܸܢܸܗ ܪܽܘܚܵܐ ܕܩܽܘܕ݂ܫܵܐ ܘܩܵܡ ܥܲܠ ܡܲܝ̈ܵܐ܃
008:0140 ܘܫܸܓܪܲܬ̤ ܐܸܢܽܘܢ ܚܲܡܝܼܡܽܘܬ݂ܵܐ ܕܥܲܙܝܼܙܽܘܬܸܗ܀

▼ later lines