← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63404: JSBhom 8: on the baptism of Jesus in the Jordan

Click on a word for lexical analysis
Click on a red-colored coordinate for comments and/or translations of the line

▲ earlier lines

008:0127 ܟܲܕ݂ ܡܲܣܚܽܘܬ݂ܵܐ ܗܘܵܬ݂ ܠܲܚ̈ܕ݂ܽܘܓܸܐ ܘܡܸܪܩܲܬ̤ ܐܸܢܽܘܢ܃
008:0128 ܘܢܲܚ̈ܬܸܐ ܕܪܽܘܚܵܐ ܠܵܐ ܠܒ݂ܝܼܫܝܼܢ ܗܼܘܲܘ ܡܸܢ ܓܲܘ ܡܲܝ̈ܵܐ܀
008:0129 ܘܟܲܕ݂ ܩܵܝܡܝܼܢ ܗܼܘܲܘ ܒܲܫܠܝܼܚܽܘܬ݂ܵܐ ܟܽܠܗܽܘܢ ܥܲܡܡܸ̈ܐ܃
008:0130 ܘܲܡܣܲܟܸ݁ܝܢ ܗܼܘܲܘ ܠܚܲܬ݂ܢܵܐ ܕܢܼܐܬܸܐ ܘܢܲܠܒܸ݁ܫ ܐܸܢܽܘܢ܀
008:0131 ܘܟܲܕ݂ ܐܸܬ݁ܬ݁ܫܝܼܓܲܬ̤ ܨܵܐܬ݂ܵܗ݀ ܕܟܲܠܬ݂ܵܐ ܒܡܲܝ̈ܵܐ ܘܣܸܠܩܲܬ̤܃
008:0132 ܘܲܠܚܸܘܵܪܸ̈ܐ ܕܢܲܝܬܸܐ ܚܲܬ݂ܢܵܐ ܚܵܐܲܪ ܟܽܠܢܵܫ܀
008:0133 ܘܟܲܕ݂ ܚܲܣܝܼܪܵܐ ܡܲܥܡܽܘܕ݂ܝܼܬ݂ܵܐ ܡܸܢ ܚܽܘܣܵܝܵܐ܃
008:0134 ܘܪܽܘܚܵܐ ܕܩܽܘܕ݂ܫܵܐ ܐܼܢܵܫ ܡܸܢ ܡܲܝ̈ܵܐ ܠܵܐ ܩܲܒܸ݁ܠ ܗܼܘܵܐ܀
008:0135 ܘܟܲܕ݂ ܡܸܫܬ݁ܽܘܬ݂ܵܐ ܟܽܠܵܗ݀ ܚܵܝܪܵܐ ܠܚܲܬ݂ܢܵܐ ܕܲܐܝܟܲܘ܃
008:0136 ܢܦܲܩ ܒܲܪ ܡܲܠܟܵܐ ܡܸܢ ܓܲܘ ܟܸܢܫܸ̈ܐ ܕܢܼܐܬܸܐ ܠܢܲܗܪܵܐ܀
008:0137 ܘܟܲܕ݂ ܗܽܘ ܪܲܚܝܼܩ ܡܲܥܡܽܘܕܝܼܬ݂ܵܐ ܠܩܽܘܒ݂ܠܸܗ ܪܸܬ݂ܚܲܬ̤܃
008:0138 ܘܲܫܦܲܥ ܢܲܗܪܵܐ ܘܲܐܟ݂ܪܸܙ ܥܠܲܘܗܝ ܫܲܬ݁ܝܼܩܵܐܝܼܬ݂܀
008:0139 ܢܦܲܩ ܗܼܘܵܐ ܡܸܢܸܗ ܪܽܘܚܵܐ ܕܩܽܘܕ݂ܫܵܐ ܘܩܵܡ ܥܲܠ ܡܲܝ̈ܵܐ܃
008:0140 ܘܫܸܓܪܲܬ̤ ܐܸܢܽܘܢ ܚܲܡܝܼܡܽܘܬ݂ܵܐ ܕܥܲܙܝܼܙܽܘܬܸܗ܀
008:0141 ܣܸܦܲܬ̤ ܢܽܘܪܸܗ ܒܲܝܢܵܬ݂ ܫܸܦܥܸ̈ܐ ܥܲܕ݂ܠܵܐ ܢܸܚܽܘܬ݂܃
008:0142 ܘܕ݂ܵܨ ܗܼܘܵܐ ܢܲܗܪܵܐ ܒܪܸܬ݂ܚܵܐ ܪܲܒܵܐ ܕܫܲܠܗܸܒ݂ܝܼܬ݂ܵܐ܀
008:0143 ܣܸܘܚܲܬ̤ ܗܼܘܵܬ݂ ܠܸܗ ܡܲܥܡܽܘܕ݂ܝܼܬ݂ܵܐ ܕܸܐܬ̤ܵܐ ܨܸܐܕܸܝܗ݀܃
008:0144 ܐܲܝܟ݂ ܗܵܝ ܩܲܪܢܵܐ ܕܲܡܫܝܼܚܽܘܬ݂ܵܐ ܠܽܘܩܒܲܠ ܕܲܘܝܼܕ݂܀
008:0145 ܠܲܘ ܕܲܬ݂ܩܲܕܫܸܗ ܪܸܬ݂ܚܲܬ̤ ܠܽܐܘܪܥܸܗ ܕܩܲܕܝܼܫܵܐ ܗܼܘܵܐ܃
008:0146 ܕܥܽܘܒܵܗ݀ ܕܝܼܠܵܗ݀ ܢܸܬ݂ܩܲܕܲܫ ܒܸܗ ܚܲܒܸ݁ܒ݂ܬܸܗ ܗܼܘܵܬ݂܀
008:0147 ܪܸܘܙܲܬ̤ ܗܼܘܵܬ݂ ܒܸܗ ܕܓܵܡܽܘܪܵܗ݀ ܗܼܘܵܐ ܘܲܡܚܲܬ݁ܡܵܢܵܗ݀܃
008:0148 ܘܦܸܪܣܲܬ̤ ܟܸܢܦܵܗ݀ ܕܩܽܘܕ݂ܫܸܗ ܕܲܒ݂ܪܵܐ ܢܸܬ݂ܩܲܒܲܠ ܒܵܗ݀܀
008:0149 ܚܙܵܐ ܝܽܘܚܲܢܵܢ ܠܢܲܗܪܵܐ ܕܪܵܬܲܚ ܘܗܵܦܟܝܼܢ ܫܸܦܥܲܘ̈ܗܝ܃
008:0150 ܘܝܼܕܲܥ ܗܼܘܵܐ ܠܸܗ ܕܗܲܘ ܩܲܕܝܼܫܵܐ ܐܼܬܵܐ ܠܲܥܡܵܕ݂ܵܐ܀
008:0151 ܩܦܲܣ ܗܼܘܵܐ ܐܝܼܕܸܗ ܕܠܵܐ ܢܲܥܡܸܕ݂ ܗܼܘܵܐ ܠܲܐܝܠܸܝܢ ܕܵܐܬܸܝܢ܃
008:0152 ܕܢܸܬ݁ܬ݁ܓܝܼܠ ܘܲܢܩܽܘܡ ܚܲܬ݂ܢܵܐ ܡܫܝܼܚܵܐ ܗܽܘ ܒܲܠܚܽܘܕ݂ܲܘܗܝ܀
008:0153 ܙܥܲܩ ܗܼܘܵܐ ܒܟܸܢܫܸ̈ܐ ܘܲܐܥܪܸܩ ܐܸܢܽܘܢ ܡܸܢ ܨܸܝܕ݂ ܢܲܗܪܵܐ܃
008:0154 ܕܢܸܕܲܥ ܟܽܠܢܵܫ ܕܥܲܠ ܡܲܢ ܪܸܬ݂ܚܲܬ̤ ܡܲܥܡܽܘܕ݂ܝܼܬ݂ܵܐ܀
008:0155 ܪܲܒ݂ܛܵܗ݀ ܠܥܵܢ̈ܵܐ ܕܬܸܕ݂ܚܽܘܩ ܢܲܦ݂ܫܵܗ݀ ܡܸܢ ܡܲܒ݁ܽܘܥܵܐ܃
008:0156 ܕܢܸܦܪܽܘܫ ܢܸܦܽܘܩ ܐܸܡܪܵܐ ܕܕܸܒ݂ܚܵܐ ܡܸܢ ܡܲܪܥܝܼܬ݂ܵܐ܀
008:0157 ܪܡܲܙ ܠܲܚ̈ܕ݂ܽܘܓܸܐ ܘܝܲܗܼܒ݂ܘ ܠܸܗ ܐܲܬ݂ܪܵܐ ܒܲܝܢܵܬ݂ ܟܸܢܫܸ̈ܐ܃
008:0158 ܕܢܸܬ݂ܚܲܘܸܐ ܗܼܘܵܐ ܚܲܬ݂ܢܵܐ ܒܫܽܘܒ݂ܚܵܐ ܠܟ݂ܽܠܗܽܘܢ ܥܲܡ̈ܡܸܐ܀
008:0159 ܥܪܲܩܘ ܗܼܘܲܘ ܟܸܢܫܸ̈ܐ ܕܲܟ݂ܪܝܼܟ݂ܝܼܢ ܠܵܗ݀ ܠܡܲܥܡܽܘܕ݂ܝܼܬ݂ܵܐ܃
008:0160 ܘܩܵܡ ܒܲܠܚܽܘܕ݂ܲܘܗܝ ܒܲܪ ܡܲܠܟ݁ܽܘܬ݂ܵܐ ܝܼܚܝܼܕ݂ܵܐܝܼܬ݂܀
008:0161 ܪܗܸܛ ܫܲܪܝܼܪܵܐ ܢܣܲܒ݁ܪܝܼܗ݀ ܠܚܼܐܪܬ݂ܵܐ ܥܲܠ ܦܵܪܽܘܩܵܐ܃
008:0162 ܩܪܵܗ݀ ܠܲܟ݂ܢܝܼܟ݂ܬܵܐ ܕܲܢܚܲܘܸܐ ܠܵܗ݀ ܕܗܽܘܝܽܘ ܡܵܪܵܗ݀܀
008:0163 ܠܗܵܢܵܐ ܚܲܬ݂ܢܵܐ ܡܟܲܪܬܸܟ݂ܝ ܥܼܕܬܵܐ ܡܸܢ ܫܽܘܪܵܝܵܐ܃
008:0164 ܒܣܲܒ݂ܪܸܗ ܕܗܵܢܵܐ ܬܵܠܸܐ ܗܼܘܝܼܬ݂ ܠܸܟ݂ܝ ܡܸܢ ܟܲܕ݂ ܐܸܬܝܼܬ݂܀
008:0165 ܗܵܢܲܘ ܐܸܡܪܵܐ ܕܗܽܘ ܠܸܗ ܐܲܝܬܝܼ ܕܢܸܗܘܸܐ ܕܸܒ݂ܚܵܐ܃
008:0166 ܗܵܢܵܐ ܫܵܩܸܠ ܚܛܝܼܬܸܗ ܕܥܵܠܡܵܐ ܒܲܕ݂ܒ݂ܝܼܚܽܘܬܸܗ܀
008:0167 ܥܲܠ ܗܵܐ ܗܵܢܵܐ ܡܲܬ݂ܟܸܠ ܗܼܘܝܼܬ݂ ܠܸܟ݂ܝ ܗܵܐ ܡܸܢ ܢܽܘܓܪܵܐ܃
008:0168 ܒܲܫܡܸܗ ܕܗܵܢܵܐ ܡܲܘܬܸܒ݂ ܗܼܘܝܼܬ݂ ܠܸܟ݂ܝ ܕܲܬ݂ܣܲܟܸܝܢ ܠܸܗ܀
008:0169 ܠܗܵܢܵܐ ܢܛܲܪܬܸܟ݂ܝ ܒܲܙܗܝܼܪܽܘܬ݂ܵܐ ܐܲܝܟ݂ ܫܲܪܝܼܪܵܐ܃
008:0170 ܐܲܘܕܵܝ ܠܸܗ ܡܸܢܝ ܕܠܵܐ ܫܒܲܩܬܸܟ݂ܝ ܗܼܘܝܼܬ݂ ܕܬܸܬ݂ܓܲܢܒܝܼܢ ܒܝܼ܀
008:0171 ܘܟܲܕ݂ ܡܸܬ݂ܚܲܟܡܵܐ ܟܲܠܲܬ݂ ܡܲܠܟܵܐ ܡܸܢ ܝܽܘܚܲܢܵܢ܃
008:0172 ܗܵܐ ܛܪܵܓܽܘܕ݂ܵܐ ܕܪܽܘܚܵܐ ܕܲܘܝܼܕ݂ ܩܪܸܒ݂ ܙܵܡܲܪ ܠܵܗ݀܀
008:0173 ܫܡܲܥܝ ܒܲܪܬ݂ܝ ܘܲܚܙܵܝ ܘܲܨܠܵܝ ܐܸܕ݂ܢܸܟ݂ܝ ܠܲܫܒ݂ܝܼ̈ܚܵܬ݂ܵܐ܃
008:0174 ܘܲܛܥܵܝ ܥܲܡܸܟ݂ܝ ܘܠܲܕ݂ܒܸܝܬ݂ ܐܲܒ݂ܽܘܟ݂ܝ ܕܲܦܠܝܼ̈ܓܸܐ ܐܼܢܽܘܢ܀
008:0175 ܐܝܼܢ ܒܲܫܪܵܪܵܐ ܗܽܘܝܽܘ ܡܵܪܸܟ݂ܝ ܩܪܽܘܒ݂ܝ ܘܲܣܓܽܘܕ݂ܝ ܠܸܗ܃
008:0176 ܠܵܐ ܬܸܬ݂ܦܲܠܓܝܼܢ ܥܲܠ ܦܵܪܽܘܩܵܐ ܕܸܐܬܵܐ ܠܘܵܬܸܟ݂ܝ܀
008:0177 ܝܸܠܦܲܬ̤ ܥܼܕܬܵܐ ܡܸܢ ܝܽܘܚܲܢܵܢ ܐܵܦ ܡܸܢ ܕܲܘܝܼܕ݂܃

▼ later lines