← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63404: JSBhom 8: on the baptism of Jesus in the Jordan

Click on a word for lexical analysis
Click on a red-colored coordinate for comments and/or translations of the line

▲ earlier lines

008:0343 ܐܼܬܲܬ̤ ܓܲܘܙܲܠܬܵܐ ܘܫܸܩܠܲܬ̤ ܢܲܚ̈ܬܸܐ ܕܲܠܒ݂ܝܼܫܵܐ ܗܼܘܵܬ݂܃
008:0344 ܘܢܸܚܬܲܬ̤ ܕܬܲܪܡܸܐ ܢܽܘܪܵܐ ܒܡܲܝ̈ܵܐ ܕܡܲܥܡܽܘܕ݂ܝܼܬ݂ܵܐ܀
008:0345 ܬܗܲܪܘ ܥܸܠܵܝܸ̈ܐ ܒܗܵܝ ܡܲܣܚܽܘܬ݂ܵܐ ܕܫܲܠܗܸܒ݂ܝܼܬ݂ܵܐ܃
008:0346 ܟܲܕ݂ ܡܸܬ݂ܦܲܪܦܲܥ ܓܽܘܫܡܵܗ݀ ܙܲܗܝܵܐ ܢܩܲܕܸܫ ܡܲܝ̈ܵܐ܀
008:0347 ܐܸܬ݂ܚܲܠܲܛܘ ܗܼܘܲܘ ܫܸܦ̈ܥܸܐ ܕܡܲܝ̈ܵܐ ܥܲܡ ܙܲܠܝܼ̈ܩܸܐ܃
008:0348 ܘܐܸܬ݂ܢܲܒ݂ܪܲܫ ܗܼܘܵܐ ܢܲܗܪܵܐ ܒܙܝܼܘܵܐ ܕܲܫܪܸܐ ܗܼܘܵܐ ܒܸܗ܀
008:0349 ܐܸܬ݂ܢܲܩܫܲܬ̤ ܗܼܘܵܬ݂ ܩܽܘܒ݁ܬ݂ܵܐ ܕܓܲܠ̈ܠܸܐ ܡܸܢ ܪ̈ܵܕܲܝܵܐ܃
008:0350 ܘܚܲܕ݂ܪܽܘܗ݀ ܒܲܪ̈ܩܸܐ ܕܫܲܠܗܸܒ݂ܝܼܬ݂ܵܐ ܡܸܢ ܟܽܠ ܓܲܒ̈ܝܼܢ܀
008:0351 ܢܦܲܠ ܗܼܘܵܐ ܬܸܡܗܵܐ ܥܲܠ ܒܸܪ̈ܝܵܬ݂ܵܐ ܘܬܸܗܪܵܐ ܪܲܒܵܐ܃
008:0352 ܟܲܕ݂ ܓܲܘܙܲܠܬܵܐ ܢܵܚܬܵܐ ܕܬܸܥܡܲܕ݂ ܡܸܢ ܝܽܘܚܲܢܵܢ܀
008:0353 ܚܲܡ ܘܸܐܫܬܲܠܗܲܒ݂ ܐܵܐܲܪ ܟܽܠܸܗ ܩܲܕܝܼܫܵܐܝܼܬ݂܃
008:0354 ܕܒܲܪ ܩܲܕܝܼܫܵܐ ܢܚܸܬ݂ ܠܲܥܡܵܕ݂ܵܐ ܟܲܕ݂ ܠܵܐ ܚܲܣܝܼܪ܀
008:0355 ܐܸܫܬܲܓܪܲܬ̤ ܗܼܘܵܬ݂ ܪܽܘܚܵܐ ܒܢܽܘܪܵܐ ܥܲܙܝܼܙܵܐܝܼܬ݂܃
008:0356 ܕܲܒ݂ܙܲܗܝܽܘܬ݂ܵܐ ܬܩܲܒ݁ܠܸܗ ܠܚܲܬ݂ܢܵܐ ܡܸܢ ܓܲܘ ܡܲܝ̈ܵܐ܀
008:0357 ܐܸܬ݂ܓܲܘܙܲܠ ܗܼܘܵܐ ܫܽܘܒ݂ܚܵܐ ܦܲܐܝܵܐ ܡܸܢ ܟܽܠ ܦܸܢ̈ܝܵܢ܃
008:0358 ܘܲܥܒܲܕ݂ ܙܲܘܚܵܐ ܠܒܲܪ ܡܲܠܟ݁ܽܘܬ݂ܵܐ ܝܲܩܝܼܪܵܐܝܼܬ݂܀
008:0359 ܛܵܣ ܡܸܢ ܣܲܘ̈ܦܸܐ ܥܢܵܢܸ̈ܐ ܕܢܽܘܗܪܵܐ ܩܵܡ ܗܼܘܲܝ̈ ܬܲܡܵܢ܃
008:0360 ܕܢܸܗܘܸܐ ܓܢܽܘܢܵܐ ܠܚܲܬ݂ܢܵܐ ܫܒ݂ܝܼܚܵܐ ܕܲܢܚܸܬ݂ ܢܸܥܡܲܕ܀
008:0361 ܢܦܲܩ ܥܲܪ̈ܦܸܠܸܐ ܐܲܝܟ݂ ܫܽܘ̈ܫܸܦܸܐ ܕܒܸܝܬ݂ ܡܲܠܟ݁ܽܘܬ݂ܵܐ܃
008:0362 ܕܡܵܐ ܕܲܣܚܵܐ ܗܼܘܵܐ ܗܲܘ ܒܲܪ ܡܲܠܟܵܐ ܒܗܸܝܢ ܢܸܬ݂ܩܲܒܲܠ܀
008:0363 ܦܫܲܛ ܗܼܘܵܐ ܐܲܒ݂ܵܐ ܡܵܐܢܸ̈ܐ ܓܒܲܝ̈ܵܐ ܠܥܸܠ ܡܸܢ ܐܵܐܲܪ܃
008:0364 ܙܝܼܘܵܐ ܘܫܽܘܒ݂ܚܵܐ ܘܒܲܪ̈ܩܸܐ ܕܬܸܗܪܵܐ ܐܵܦ ܥܲܪ̈ܦܸܠܸܐ܀
008:0365 ܟܲܪܟܸܗ ܠܢܲܗܪܵܐ ܒܓܲܘ̈ܢܸܐ ܬܡܝܼ̈ܗܸܐ ܕܠܵܐ ܡܸܬ݂ܓܲܫܫܝܼܢ܃
008:0366 ܕܲܢܪܲܡܪܸܡ ܗܼܘܵܐ ܚܠܽܘܠܵܐ ܕܲܒ݂ܪܸܗ ܝܼܚܝܼܕ݂ܵܝܵܐ܀
008:0367 ܨܪܵܗ݀ ܠܲܫܡܲܝܵܐ ܘܲܐܪܝܼܡ ܩܵܠܸܗ ܥܲܙܝܼܙܵܐܝܼܬ݂܃
008:0368 ܕܗܵܐ ܗܵܢܲܘ ܒܸܪܝ ܗܵܢܲܘ ܚܲܒܝܼܒ݂ܝ ܫܲܪܝܼܪܵܐܝܼܬ݂܀
008:0369 ܛܵܣܲܬ̤ ܪܽܘܚܵܐ ܡܸܢ ܨܸܝܕ݂ ܐܲܒ݂ܵܐ ܒܬܸܗܪܵܐ ܪܲܒܵܐ܃
008:0370 ܘܦܸܪܚܲܬ̤ ܢܸܚܬܲܬ̤ ܫܸܟ݂ܢܲܬ̤ ܩܲܘܝܲܬ̤ ܥܲܠ ܚܲܒܝܼܒܸܗ܃
008:0371 ܐܼܬܵܬ̤ ܒܲܕ݂ܡܽܘܬ݂ܵܐ ܕܓܽܘܫܡܵܐ ܕܝܲܘܢܵܐ ܬܲܡܝܼܡܵܐܝܼܬ݂܃
008:0372 ܕܬܸܓܕܽܘܠ ܬܲܡܵܢ ܘܲܬ݂ܣܝܼܡ ܩܸܢܵܗ݀ ܒܡܲܥܡܽܘܕ݂ܝܼܬ݂ܵܐ܀
008:0373 ܠܸܒ݂ܫܲܬ̤ ܛܽܘܦ݂ܣܵܐ ܕܝܲܘܢܵܐ ܒܪܝܼܪܬܵܐ ܡܸܢ ܦܵܪ̈ܚܵܬ݂ܵܐ܃
008:0374 ܘܸܐܬܵܬ̤ ܕܬܸܣܗܲܕ݂ ܥܲܠ ܫܲܪܝܼܪܵܐ ܒܲܦܫܝܼܛܽܘܬ݂ܵܗ݀܀
008:0375 ܠܲܘ ܕܲܬ݂ܩܲܕܫܸܗ ܠܲܒ݂ܪܵܐ ܢܸܚܬܲܬ̤ ܟܲܕ݂ ܐܸܫܬܲܠܚܲܬ̤܃
008:0376 ܕܠܵܐ ܚܲܣܝܼܪ ܗܼܘܵܐ ܡܸܠܬ݂ܵܐ ܣܓܝܼܕ݂ܵܐ ܢܩܲܕܸܫ ܝܵܬܸܗ܀
008:0377 ܠܵܐ ܪܸܣܲܬ̤ ܗܼܘܵܬ݂ ܩܽܘܕ݂ܫܵܐ ܒܡܲܚܬܵܗ݀ ܥܲܠ ܩܲܕܝܼܫܵܐ܃
008:0378 ܡܸܣܗܲܕ݂ ܣܸܗܕܲܬ̤ ܥܲܠ ܦܵܪܽܘܩܵܐ ܟܲܕ݂ ܐܸܬ݂ܚܲܙܝܲܬ̤܀
008:0379 ܗܘܵܬ݂ ܠܸܗ ܪܽܘܚܵܐ ܨܸܒ݂ܥܵܐ ܠܲܐܒ݂ܵܐ ܘܒ݂ܵܗ݀ ܚܲܘܝܼ ܗܼܘܵܐ܃
008:0380 ܕܗܵܢܲܘ ܠܲܡ ܒܸܪܝ ܠܵܐ ܬܸܬ݂ܦܲܠܓܽܘܢ ܥܲܠ ܡܸܐܬ݂ܝܼܬܸܗ܀
008:0381 ܐܸܠܽܘ ܪܽܘܚܵܐ ܠܵܐ ܢܸܚܬܲܬ̤ ܗܼܘܵܬ݂ ܥܲܠ ܫܲܪܝܼܪܵܐ܃
008:0382 ܡܲܢ ܝܵܕܲܥ ܗܼܘܵܐ ܐܲܝܟܵܐ ܫܵܟܸܢ ܩܵܠܸܗ ܕܲܐܒ݂ܵܐ܀
008:0383 ܥܲܡܵܗ݀ ܕܡܸܠܬ݂ܵܐ ܗܵܝ ܕܸܐܙܕܲܥܩܲܬ̤ ܡܸܢ ܥܸܠܵܝܵܐ܃
008:0384 ܐܲܝܟ݂ ܕܲܒ݂ܨܸܒ݂ܥܵܐ ܚܲܘܝܲܬ̤ ܪܽܘܚܵܐ ܕܗܵܢܲܘ ܡܲܠܟܵܐ܀
008:0385 ܐܸܠܽܘ ܥܠܲܘܗܝ ܓܹܝܪ ܠܵܐ ܩܲܘܝܲܬ̤ ܗܼܘܵܬ݂ ܝܼܕ݂ܝܼܥܵܐܝܼܬ݂܃
008:0386 ܦܵܗܸܐ ܗܼܘܵܐ ܠܸܗ ܩܵܠܵܐ ܒܟܸܢܫܸ̈ܐ ܥܲܠ ܣܲܓܝܼ̈ܐܸܐ܀
008:0387 ܗܵܐ ܫܵܡܥܝܼܢ ܗܼܘܲܘ ܩܵܠܵܐ ܕܵܐܡܲܪ ܗܵܢܲܘ ܚܲܒܝܼܒ݂܃
008:0388 ܘܲܡܫܲܐܠܝܼܢ ܗܼܘܲܘ ܟܲܕ݂ ܡܸܬ݂ܦܲܠܓܝܼܢ ܕܥܲܠ ܡܲܢ ܐܸܡܲܪ܀
008:0389 ܢܸܚܬܲܬ̤ ܪܽܘܚܵܐ ܕܲܥܠܲܘܗܝ ܬܸܫܟܲܢ ܩܲܕܝܼܫܵܐܝܼܬ݂܃
008:0390 ܠܲܘ ܓܹܝܪ ܩܽܘܕ݂ܫܵܐ ܚܲܣܝܼܪ ܗܼܘܵܐ ܠܸܗ ܘܸܐܫܬܲܡܠܝܼ ܒܸܗ܀
008:0391 ܐܵܦ ܢܵܡܽܘܣܵܐ ܠܲܬ݂ܪܸܝܢ ܣܵܗ̈ܕܝܼܢ ܩܵܪܸܐ ܨܸܐܕ݂ܲܘܗܝ܃
008:0392 ܕܠܵܐ ܡܸܬ݂ܩܲܒܲܠ ܚܲܕ݂ ܒܲܠܚܽܘܕ݂ܲܘܗܝ ܟܲܕ݂ ܫܲܪܝܼܪܲܐ ܗܼܘ܀
008:0393 ܐܲܒ݂ܵܐ ܘܪܽܘܚܵܐ ܫܲܘܝܲܬ݂ ܐܲܣܗܸܕ݂ܘ ܥܲܠ ܝܼܚܝܼܕ݂ܵܐ܃

▼ later lines