← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63404: JSBhom 8: on the baptism of Jesus in the Jordan

Click on a word for lexical analysis
Click on a red-colored coordinate for comments and/or translations of the line

▲ earlier lines

008:0314 ܕܲܦܠܝܼܓܵܐܝܼܬ݂ ܐܸܚܬ݁ܽܘܡ ܡܲܝ̈ܵܐ ܕܲܐܢܼܬ݁ ܥܲܡ ܪܽܘܚܲܐ ܐܢܼܬ܀
008:0315 ܐܲܒ݂ܵܐ ܒܝܲܠܕܸܗ ܘܲܒ݂ܪܵܐ ܒܲܐܒ݂ܽܘܗܝ ܐܝܼܬ݂ܲܘܗܝ ܟܽܠܸܗ܃
008:0316 ܘܪܽܘܚܵܐ ܕܡܸܢܸܗ ܚܲܕ݂ ܐܽܘܚܕܵܢܵܐ ܕܠܵܐ ܒܽܘܠܒܵܠܵܐ܀
008:0317 ܘܲܐܝܟܲܢ ܐܸܢܵܐ ܕܲܘܝܵܐ ܡܚܝܼܠܵܐ ܐܸܣܥܽܘܪ ܗܵܕܸܐ܃
008:0318 ܘܲܐܪܡܸܐ ܣܸܕ݂ܩܵܐ ܒܗܵܝ ܐܲܘܝܽܘܬ݂ܵܐ ܕܠܵܐ ܡܸܬ݂ܦܲܠܓܵܐ܀
008:0319 ܥܒܲܪ ܝܽܘܚܲܢܵܢ ܡܸܢ ܫܽܘ̈ܐܵܠܸܐ ܘܲܗܘܝܼ ܒܫܸܠܝܵܐ܃
008:0320 ܒܥܵܬ݂ܵܐ ܗܵܪܟܵܐ ܠܵܐ ܬܸܗܘܸܐ ܠܵܟ݂ ܡܸܛܽܠ ܗܵܠܸܝܢ܀
008:0321 ܠܲܘ ܕܲܬ݂ܩܲܕܫܲܢܝ ܡܲܥܡܽܘܕ݂ܝܼܬ݂ܵܐ ܐܸܬܝܼܬ݂ ܨܸܐܕܸܝܗ݀܃
008:0322 ܐܵܦ ܠܵܐ ܐܵܠ݁ܨܵܐ ܕܬܼܐܡܲܪ ܡܸܕܸܡ ܡܵܐ ܕܥܵܡܸܕ݂ ܐܼܢܵܐ܀
008:0323 ܫܲܬ݁ܝܼܩܵܐܝܼܬ݂ ܬܵܐ ܣܝܼܡ ܒܲܠܚܽܘܕ݂ ܐܝܼܕ݂ܵܟ݂ ܥܲܠ ܪܝܼܫܝ܃
008:0324 ܘܗܵܕܸܐ ܕܲܐܒ݂ܵܐ ܗܼܝ ܡܵܢܵܐ ܢܼܐܡܲܪ ܡܸܛܽܠ ܝܲܠܕܸܗ܀
008:0325 ܦܫܽܘܛ ܝܲܡܝܼܢܵܟ݂ ܕܲܐܫܝܼܠܵܐܝܼܬ݂ ܬܼܐܬܸܐ ܨܸܐܕܲܝ܃
008:0326 ܘܲܕ݂ܠܵܐ ܡܸܠܬ݂ܵܟ݂ ܪܽܘܚܵܐ ܣܵܗܕܵܐ ܥܲܠ ܫܲܪܝܼܪܵܐ܀
008:0327 ܘܟܲܕ݂ ܒܲܪ ܥܲܩܪܸ̈ܐ ܗܘ̤ܵܐ ܒܲܪܬܝܼܬ݂ܵܐ ܡܸܛܽܠ ܗܵܠܸܝܢ܃
008:0328 ܗܵܝܕܸܝܢ ܫܲܒ݂ܩܸܗ ܠܲܒ݂ܪܵܐ ܕܢܸܥܡܲܕ݂ ܐܲܝܟ݂ ܨܸܒ݂ܝܵܢܸܗ܀
008:0329 ܩܪܸܒ݂ ܟܲܕ݂ ܪܵܥܸܠ ܣܓܸܕ݂ ܟܲܕ݂ ܡܲܘܕܸܐ ܡܛܵܝܗܝ ܟܲܕ݂ ܪܵܐܸܬ݂܃
008:0330 ܙܵܥ ܘܸܐܬ݂ܒܲܠܗܝܼ ܘܣܲܡܟܸܗ ܚܲܝܠܵܐ ܕܠܵܐ ܢܲܘܦܸܐ ܠܸܗ܀
008:0331 ܐܼܬܵܐ ܩܲܕܝܼܫܵܐ ܘܲܡܛܵܐ ܠܡܲܝ̈ܵܐ ܕܢܸܚܽܘܬ݂ ܢܸܥܡܲܕ݂܃
008:0332 ܘܣܸܦܲܬ̤ ܢܽܘܪܸܗ ܒܲܝܢܵܬ݂ ܓܲܠ̈ܠܸܐ ܘܫܸܓܪܲܬ̤ ܐܸܢܽܘܢ܀
008:0333 ܕܵܨ ܗܼܘܵܐ ܢܲܗܪܵܐ ܒܥܽܘܒܵܐ ܕܲܟ݂ܝܵܐ ܕܡܲܥܡܽܘܕ݂ܝܼܬ݂ܵܐ܃
008:0334 ܐܲܝܟ݂ ܝܽܘܚܲܢܵܢ ܡܸܢ ܐܸܠܝܼܫܒܲܥ ܠܽܘܩܒܲܠ ܡܵܪܸܗ܀
008:0335 ܐܸܬ݂ܓܲܘܙܲܠܘ ܗܼܘܵܐ ܡܲܝ̈ܵܐ ܒܒܲܪ̈ܩܸܐ ܕܫܲܠܗܸܒ݂ܝܼܬ݂ܵܐ܃
008:0336 ܕܢܽܘܪܵܐ ܚܲܝܬܵܐ ܐܼܬܲܬ̤ ܠܲܥܡܵܕ݂ܵܐ ܕܲܒ݂ܗܽܘܢ ܬܸܣܚܸܐ܀
008:0337 ܡܲܘܩܕܲܬ݂ ܥܵܠܡܸ̈ܐ ܫܕ݂ܵܬ̤ ܓܲܘܙܲܠܬܵܗ݀ ܥܲܠ ܡܲܒ݁ܽܘܥܵܐ܃
008:0338 ܘܪܸܬ݂ܚܵܐ ܕܡܸܢܵܗ݀ ܫܲܓܪܸܗ ܠܢܲܗܪܵܐ ܒܩܲܕܝܼܫܽܘܬ݂ܵܐ܀
008:0339 ܐܸܬ݂ܡܲܙܲܓܘ ܗܼܘܲܘ ܡܲܝ̈ܵܐ ܫܚܝܼ̈ܡܸܐ ܒܙܲܠܓܲܝ̈ ܩܽܘܕ݂ܫܵܐ܃
008:0340 ܕܡܸܢ ܩܲܕܝܼܫܵܐ ܚܢܵܢܵܐ ܢܦܲܩ ܗܼܘܵܐ ܘܲܫܓܲܪ ܐܸܢܽܘܢ܀
008:0341 ܓܡܽܘܪܬܵܐ ܕܢܽܘܪܵܐ ܢܸܚܬܲܬ̤ ܕܬܸܣܚܸܐ ܒܲܝܢܵܬ݂ ܫܸܦ̈ܥܸܐ܃
008:0342 ܘܙܸܠܚܲܬ̤ ܬܲܡܵܢ ܝܵܩܽܘܕ݂ܽܘܬ݂ܵܐ ܕܩܲܕܝܼܫܽܘܬ݂ܵܗ݀܀
008:0343 ܐܼܬܲܬ̤ ܓܲܘܙܲܠܬܵܐ ܘܫܸܩܠܲܬ̤ ܢܲܚ̈ܬܸܐ ܕܲܠܒ݂ܝܼܫܵܐ ܗܼܘܵܬ݂܃
008:0344 ܘܢܸܚܬܲܬ̤ ܕܬܲܪܡܸܐ ܢܽܘܪܵܐ ܒܡܲܝ̈ܵܐ ܕܡܲܥܡܽܘܕ݂ܝܼܬ݂ܵܐ܀
008:0345 ܬܗܲܪܘ ܥܸܠܵܝܸ̈ܐ ܒܗܵܝ ܡܲܣܚܽܘܬ݂ܵܐ ܕܫܲܠܗܸܒ݂ܝܼܬ݂ܵܐ܃
008:0346 ܟܲܕ݂ ܡܸܬ݂ܦܲܪܦܲܥ ܓܽܘܫܡܵܗ݀ ܙܲܗܝܵܐ ܢܩܲܕܸܫ ܡܲܝ̈ܵܐ܀
008:0347 ܐܸܬ݂ܚܲܠܲܛܘ ܗܼܘܲܘ ܫܸܦ̈ܥܸܐ ܕܡܲܝ̈ܵܐ ܥܲܡ ܙܲܠܝܼ̈ܩܸܐ܃
008:0348 ܘܐܸܬ݂ܢܲܒ݂ܪܲܫ ܗܼܘܵܐ ܢܲܗܪܵܐ ܒܙܝܼܘܵܐ ܕܲܫܪܸܐ ܗܼܘܵܐ ܒܸܗ܀
008:0349 ܐܸܬ݂ܢܲܩܫܲܬ̤ ܗܼܘܵܬ݂ ܩܽܘܒ݁ܬ݂ܵܐ ܕܓܲܠ̈ܠܸܐ ܡܸܢ ܪ̈ܵܕܲܝܵܐ܃
008:0350 ܘܚܲܕ݂ܪܽܘܗ݀ ܒܲܪ̈ܩܸܐ ܕܫܲܠܗܸܒ݂ܝܼܬ݂ܵܐ ܡܸܢ ܟܽܠ ܓܲܒ̈ܝܼܢ܀
008:0351 ܢܦܲܠ ܗܼܘܵܐ ܬܸܡܗܵܐ ܥܲܠ ܒܸܪ̈ܝܵܬ݂ܵܐ ܘܬܸܗܪܵܐ ܪܲܒܵܐ܃
008:0352 ܟܲܕ݂ ܓܲܘܙܲܠܬܵܐ ܢܵܚܬܵܐ ܕܬܸܥܡܲܕ݂ ܡܸܢ ܝܽܘܚܲܢܵܢ܀
008:0353 ܚܲܡ ܘܸܐܫܬܲܠܗܲܒ݂ ܐܵܐܲܪ ܟܽܠܸܗ ܩܲܕܝܼܫܵܐܝܼܬ݂܃
008:0354 ܕܒܲܪ ܩܲܕܝܼܫܵܐ ܢܚܸܬ݂ ܠܲܥܡܵܕ݂ܵܐ ܟܲܕ݂ ܠܵܐ ܚܲܣܝܼܪ܀
008:0355 ܐܸܫܬܲܓܪܲܬ̤ ܗܼܘܵܬ݂ ܪܽܘܚܵܐ ܒܢܽܘܪܵܐ ܥܲܙܝܼܙܵܐܝܼܬ݂܃
008:0356 ܕܲܒ݂ܙܲܗܝܽܘܬ݂ܵܐ ܬܩܲܒ݁ܠܸܗ ܠܚܲܬ݂ܢܵܐ ܡܸܢ ܓܲܘ ܡܲܝ̈ܵܐ܀
008:0357 ܐܸܬ݂ܓܲܘܙܲܠ ܗܼܘܵܐ ܫܽܘܒ݂ܚܵܐ ܦܲܐܝܵܐ ܡܸܢ ܟܽܠ ܦܸܢ̈ܝܵܢ܃
008:0358 ܘܲܥܒܲܕ݂ ܙܲܘܚܵܐ ܠܒܲܪ ܡܲܠܟ݁ܽܘܬ݂ܵܐ ܝܲܩܝܼܪܵܐܝܼܬ݂܀
008:0359 ܛܵܣ ܡܸܢ ܣܲܘ̈ܦܸܐ ܥܢܵܢܸ̈ܐ ܕܢܽܘܗܪܵܐ ܩܵܡ ܗܼܘܲܝ̈ ܬܲܡܵܢ܃
008:0360 ܕܢܸܗܘܸܐ ܓܢܽܘܢܵܐ ܠܚܲܬ݂ܢܵܐ ܫܒ݂ܝܼܚܵܐ ܕܲܢܚܸܬ݂ ܢܸܥܡܲܕ܀
008:0361 ܢܦܲܩ ܥܲܪ̈ܦܸܠܸܐ ܐܲܝܟ݂ ܫܽܘ̈ܫܸܦܸܐ ܕܒܸܝܬ݂ ܡܲܠܟ݁ܽܘܬ݂ܵܐ܃
008:0362 ܕܡܵܐ ܕܲܣܚܵܐ ܗܼܘܵܐ ܗܲܘ ܒܲܪ ܡܲܠܟܵܐ ܒܗܸܝܢ ܢܸܬ݂ܩܲܒܲܠ܀
008:0363 ܦܫܲܛ ܗܼܘܵܐ ܐܲܒ݂ܵܐ ܡܵܐܢܸ̈ܐ ܓܒܲܝ̈ܵܐ ܠܥܸܠ ܡܸܢ ܐܵܐܲܪ܃
008:0364 ܙܝܼܘܵܐ ܘܫܽܘܒ݂ܚܵܐ ܘܒܲܪ̈ܩܸܐ ܕܬܸܗܪܵܐ ܐܵܦ ܥܲܪ̈ܦܸܠܸܐ܀

▼ later lines