The Comprehensive Aramaic Lexicon

008:0481	ܩܝܼܢܬܵܐ ܕܡܸܡܬ݂ܽܘܡ ܒܸܐܕ݂ܢܸ̈ܐ ܕܐܼܢܵܫܵܐ ܠܵܐ ܐܸܙܕܲܪܥܲܬ̤܃
008:0482	ܪܲܥܡܵܐ ܕܚܝܼܠܵܐ ܕܝܼܚܝܼܕ݂ܵܐܝܼܬ݂ ܐܲܫܡܲܥ ܩܵܠܸܗ܀
008:0483	ܠܵܐ ܡܲܠܸܠ ܗܼܘܵܐ ܐܲܝܟ݂ ܗܵܝ ܡܸܠܬ݂ܵܐ ܒܚܲܕ݂ ܡܸܢ ܙܲܒ̈ܢܝܼܢ܃
008:0484	ܕܠܵܐ ܐܝܼܬ݂ ܗܼܘܵܐ ܠܸܗ ܝܲܠܕܵܐ ܐܼܚܪܼܢܵܐ ܒܚܲܕ݂ ܡܸܢ ܓܲܒܝܼ̈ܢ܀
008:0485	ܪܥܸܡ ܬܲܩܝܼܦܵܐ ܢܚܲܒܸܒ݂ ܠܲܒ݂ܪܸܗ ܒܲܝܢܵܬ݂ ܟܸܢܫܸ̈ܐ܃
008:0486	ܕܢܲܘܕܲܥ ܐܸܢܽܘܢ ܕܗܵܢܲܘ ܐܝܼܬ݂ ܠܸܗ ܒܪܵܐ ܫܲܪܝܪܵܐ܀
008:0487	ܪܬܲܚܘ ܗܼܘܲܘ ܪ̈ܲܚܡܸܐ ܕܲܐܒ݂ܵܗܽܘܬ݂ܵܐ ܥܲܠ ܝܼܚܝܼܕ݂ܵܐ܃
008:0488	ܘܢܲܨܲܪܬܸܗ ܗܼܘܵܬ݂ ܕܲܬ݂ܚܲܘܸܐ ܗܼܘܵܬ݂ ܕܲܪܚܽܘܡܵܗ݀ ܗܼܘܵܐ܀
008:0489	ܠܵܐ ܢܸܟ݂ܦܲܬ̤ ܗܼܘܵܬ ܐܲܠܵܗܽܘܬ݂ܵܐ ܪܵܡܲܬ݂ ܡܸܢ ܟܽܠ܃
008:0490	ܕܬܸܚܙܸܐ ܠܲܒ݂ܪܵܗ݀ ܕܲܠܒ݂ܝܼܫ ܦܲܓܪܵܐ ܘܣܵܚܸܐ ܒܡܲܝ̈ܵܐ܀
008:0491	ܠܵܐ ܙܸܥܪܲܬ̤ ܗܼܘܵܬ݂ ܗܵܝ ܪܲܒ݁ܽܘܬ݂ܵܐ ܟܲܕ݂ ܚܲܒܝܼܒ݂ܵܗ݀܃
008:0492	ܢܚܸܬ݂ ܠܲܥܡܵܕ݂ܵܐ ܕܲܠܦܽܘܪܩܵܢܵܐ ܡܸܬ݂ܚܲܫܲܚ ܗܼܘܵܐ܀
008:0493	ܠܲܘ ܡܸܢ ܡܲܝ̈ܵܐ ܡܸܬ݂ܡܲܠܝܵܐ ܗܼܘܵܬ݂ ܚܲܣܝܼܪܽܘܬܸܗ܃
008:0494	ܕܢܸܟ݂ܦܽܘܪ ܐܲܒ݂ܵܐ ܘܠܵܐ ܢܲܘܕܸܐ ܒܸܗ ܡܸܛܽܠ ܕܲܒ݂ܨܝܼܪ܀
008:0495	ܡܫܲܠܡܵܢܵܐ ܗܼܘܵܐ ܥܲܕ݂ܠܵܐ ܢܸܚܽܘܬ݂ ܐܵܦ ܡܸܢ ܕܲܢܚܸܬ݂܃
008:0496	ܘܓܲܠܝܽܘܬ݂ ܐܲܦܸ̈ܐ ܐܝܼܬ݂ ܗܼܘܵܐ ܠܲܐܒ݂ܵܐ ܕܢܲܘܕܸܐ ܒܲܒ݂ܪܸܗ܀
008:0497	ܗܵܕܸܐ ܥܸܠܬ݂ܵܐ ܩܪܵܬܸܗ ܕܢܼܐܬܸܐ ܠܡܲܥܡܽܘܕ݂ܝܼܬ݂ܵܐ܃
008:0498	ܕܼܐܝܕ݂ܵܐ ܕܟ݂ܽܘܡܪܸ̈ܐ ܒܸܗ ܬܸܣܬܲܝܲܟ݂ ܘܡܸܢܸܗ ܬܸܦܽܘܩ܀
008:0499	ܦܲܪܲܬܸܩܸܐ ܝܲܗܼܒ݂ ܗܼܘܵܐ ܐܲܒ݂ܵܐ ܠܡܽܘܫܸܐ ܒܛܽܘܪܵܐ܃
008:0500	ܘܫܲܕܪܸܗ ܠܲܒ݂ܪܸܗ ܕܢܲܣܒܵܗ݀ ܒܡܲܝ̈ܵܐ ܡܸܢ ܝܽܘܚܲܢܵܢ܀
008:0501	ܐܸܬ݂ܝܲܒ݁ܠܲܬ̤ ܗܼܘܵܬ݂ ܥܲܠ ܗܲܘ ܫܲܒ݂ܛܵܐ ܕܲܒ݂̈ܢܲܝ ܠܸܘܝܼ܃
008:0502	ܘܩܵܡ ܗܼܘܵܐ ܓܽܘܪܝܵܐ ܕܒܸܝܬ݂ ܝܼܗܽܘܕ݂ܵܐ ܘܫܲܩܠܵܗ݀ ܡܸܢܸܗ܀
008:0503	ܩܽܘܕ݂ܫܵܐ ܫܦܲܥ ܗܼܘܵܐ ܥܲܠ ܛܽܘܪ ܣܝܼܢܲܝ ܡܸܢ ܥܸܠܵܝܵܐ܃
008:0504	ܘܲܒ݂ܝܽܘܚܲܢܵܢ ܥܲܠ ܦܵܪܽܘܩܲܢ ܐܸܫܬܲܦܲܥ ܗܼܘܵܐ܀
008:0505	ܡܸܢ ܫܽܘܪܵܝܸܗ ܢܣܲܒ݂ ܗܼܘܵܐ ܕܢܸܓܡܽܘܪ ܐܽܘܪܚܸܗ ܡܵܪܲܢ܃
008:0506	ܕܠܵܐ ܢܸܩܲܦ ܗܼܘܵܐ ܫܒ݂ܝܼܠܵܐ ܐܼܚܪܼܢܵܐ ܐܲܝܟ݂ ܢܽܘܟ݂ܪܵܝܵܐ܀
008:0507	ܗܵܝ ܟܽܘܡܪܽܘܬ݂ܵܐ ܕܐܸܬ݂ܝܲܒ݁ܠܲܬ̤ ܗܼܘܵܬ݂ ܡܸܢ ܒܸܝܬ݂ ܐܲܗܪܽܘܢ܃
008:0508	ܗܝܼ ܒܲܫܠܝܼܚܸ̈ܐ ܠܥܵܠܡܵܐ ܢܸܦܩܲܬ̤ ܡܸܢ ܦܵܪܽܘܩܲܢ܀
008:0509	ܠܲܘ ܕܲܒ݂ܨܝܼܪ ܗܼܘܵܐ ܡܸܢ ܟܽܘܡܪܽܘܬ݂ܵܐ ܪܲܒܵܐ ܕܟ݂ܽܘܡܪܸ̈ܐ܃
008:0510	ܥܲܠܗܵܝ ܫܲܩܠܵܗ݀ ܒܡܲܥܡܽܘܕ݂ܝܼܬ݂ܵܐ ܘܗܵܝܕܸܝܢ ܝܲܗܼܒ݂ܵܗ݀܀
008:0511	ܕܠܵܐ ܢܒܲܠܒܸܠ ܗܼܘܵܐ ܫܒ݂ܝܼܠܵܐ ܕܩܽܘܫܬܵܐ ܕܲܕܪܲܫ ܐܲܒ݂ܽܘܗܝ܃
008:0512	ܡܸܢܸܗ ܕܝܼܠܸܗ ܥܒܲܕ݂ ܚܽܘܕܵܬ݂ܵܐ ܠܥܲܬ݁ܝܼ̈ܩܵܬ݂ܵܐ܀
008:0513	ܠܲܘ ܥܲܠ ܕܲܒ݂ܨܝܼܪ ܐܽܘܩܝܼܵܢܽܘܣ ܡܸܢ ܡܲܠܝܽܘܬܸܗ܃
008:0514	ܫܵܕܸܝܢ ܨܸܐܕ݂ܲܘܗܝ ܟܽܠܗܽܘܢ ܬܲܦܸ̈ܐ ܘܢܲܗܪ̈ܲܘܵܬ݂ܵܐ܀
008:0515	ܟܝܵܢܵܐ ܕܡܲܝ̈ܵܐ ܠܝܲܡܵܐ ܪܵܗܸܛ ܟܲܕ݂ ܠܵܐ ܚܲܣܝܼܪ܃
008:0516	ܘܟ݂ܠܸܗ ܝܲܡܵܐ ܠܵܐ ܡܸܬ݂ܝܲܬܲܪ ܡܸܢ ܐܲܝܟ݂ ܕܼܐܝܬ݂ܲܘܗܝ܀
008:0517	ܠܲܘ ܕܲܣܢܝܼܩ ܗܼܘܵܐ ܡܫܝܼܚܵܐ ܩܲܒܸ݁ܠ ܐܝܼܕܸܗ ܕܲܐܗܪܽܘܢ܃
008:0518	ܘܠܲܘ ܕܲܒ݂ܨܝܼܪ ܗܼܘܵܐ ܫܩܲܠ ܡܲܠܟ݁ܽܘܬ݂ܵܐ ܡܸܢ ܒܸܝܬ݂ ܕܲܘܝܼܕ݂܀
008:0519	ܪܕ݂ܵܬ̤ ܡܲܠܟ݁ܽܘܬ݂ܵܐ ܥܲܡ ܟܽܘܡܪܽܘܬ݂ܵܐ ܘܲܥܠܲܘܗܝ ܣܸܡܟܲܬ̤܃
008:0520	ܟܲܕ݂ ܗܽܘ ܐܝܼܬ݂ܲܘܗܝ ܪܲܒܵܐ ܕܟ݂ܽܘܡܪܸ̈ܐ ܘܲܡܠܸܟ݂ ܡܲܠܟܸ̈ܐ܀
008:0521	ܫܸܚܠܲܬ̤ ܘܐܸܬܵܬ̤ ܩܲܕܝܼܫܽܘܬ݂ܵܐ ܘܲܥܠܲܘܗܝ ܢܸܦܠܲܬ̤܃
008:0522	ܐܲܝܟ݂ ܪܲܨܝܼܢܵܐ ܒܝܲܡܵܐ ܡܲܠܝܵܐ ܟܲܕ݂ ܠܵܐ ܚܲܣܝܼܪ܀
008:0523	ܐܼܬܵܬ̤ ܡܲܠܟ݁ܽܘܬ݂ܵܐ ܡܸܢ ܒܸܝܬ݂ ܕܲܘܝܼܕ݂ ܘܐܸܬ݂ܢܲܣܟܲܬ̤ ܒܸܗ܃
008:0524	ܟܲܕ݂ ܡܲܠܟ݁ܽܘܬ݂ܸܗ ܛܵܒ݂ ܡܸܢ ܝܲܡܵܐ ܥܲܬ݁ܝܼܪܵܐ ܗܼܘܵܬ݂܀
008:0525	ܣܠܸܩ ܐܲܝܟ݂ ܕܲܢܚܸܬ݂ ܩܲܕܝܼܫܵܐܝܼܬ݂ ܐܲܝܟܲܢ ܕܼܐܝܬ݂ܲܘܗܝ܃
008:0526	ܘܸܐܬ݂ܩܲܒܲܠ ܗܼܘܵܐ ܒܟܸܢܦܸܗ ܕܩܵܠܵܐ ܡܸܢ ܝܵܠܽܘܕܸܗ܀
008:0527	ܟܪܲܟ݂ܬܸܗ ܪܽܘܚܵܐ ܒܸܐܒ݂ܪܸ̈ܐ ܕܫܽܘܒ݂ܚܵܐ ܠܚܲܬ݂ܢܵܐ ܥܡܝܼܕ݂ܵܐ܃
008:0528	ܘܸܐܫܬܲܪܪܲܬ̤ ܗܼܘܵܬ݂ ܥܼܕܬܵܐ ܕܗܽܘܝܽܘ ܘܢܸܦܠܲܬ̤ ܩܽܘܕ݂ܡܲܘܗܝ܀
008:0529	ܓܡܝܼܪܵܐ ܕܸܐܬܵܐ ܕܲܠܚܲܣܝܼܪܸ̈ܐ ܒܡܲܝ̈ܵܐ ܢܸܓܡܽܘܪ܃
008:0530	ܚܢܵܢܵܟ݂ ܪܲܒܵܐ ܢܸܫܦܲܥ ܡܸܢܵܟ݂ ܥܲܠ ܚܲܣܝܼܪܽܘܬ݂ܝ܀
008:0531	ܒܪܝܼܟ݂ ܗܼܽܘ ܕܸܐܬ̤ܵܐ ܘܡܸܢ ܐܝܼܙܓܲܕܸܗ ܥܡܲܕ݂ ܕܲܫܦܲܪ ܠܸܗ܃