← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63404: JSBhom 8: on the baptism of Jesus in the Jordan

Click on a word for lexical analysis
Click on a red-colored coordinate for comments and/or translations of the line

▲ earlier lines

008:0381 ܐܸܠܽܘ ܪܽܘܚܵܐ ܠܵܐ ܢܸܚܬܲܬ̤ ܗܼܘܵܬ݂ ܥܲܠ ܫܲܪܝܼܪܵܐ܃
008:0382 ܡܲܢ ܝܵܕܲܥ ܗܼܘܵܐ ܐܲܝܟܵܐ ܫܵܟܸܢ ܩܵܠܸܗ ܕܲܐܒ݂ܵܐ܀
008:0383 ܥܲܡܵܗ݀ ܕܡܸܠܬ݂ܵܐ ܗܵܝ ܕܸܐܙܕܲܥܩܲܬ̤ ܡܸܢ ܥܸܠܵܝܵܐ܃
008:0384 ܐܲܝܟ݂ ܕܲܒ݂ܨܸܒ݂ܥܵܐ ܚܲܘܝܲܬ̤ ܪܽܘܚܵܐ ܕܗܵܢܲܘ ܡܲܠܟܵܐ܀
008:0385 ܐܸܠܽܘ ܥܠܲܘܗܝ ܓܹܝܪ ܠܵܐ ܩܲܘܝܲܬ̤ ܗܼܘܵܬ݂ ܝܼܕ݂ܝܼܥܵܐܝܼܬ݂܃
008:0386 ܦܵܗܸܐ ܗܼܘܵܐ ܠܸܗ ܩܵܠܵܐ ܒܟܸܢܫܸ̈ܐ ܥܲܠ ܣܲܓܝܼ̈ܐܸܐ܀
008:0387 ܗܵܐ ܫܵܡܥܝܼܢ ܗܼܘܲܘ ܩܵܠܵܐ ܕܵܐܡܲܪ ܗܵܢܲܘ ܚܲܒܝܼܒ݂܃
008:0388 ܘܲܡܫܲܐܠܝܼܢ ܗܼܘܲܘ ܟܲܕ݂ ܡܸܬ݂ܦܲܠܓܝܼܢ ܕܥܲܠ ܡܲܢ ܐܸܡܲܪ܀
008:0389 ܢܸܚܬܲܬ̤ ܪܽܘܚܵܐ ܕܲܥܠܲܘܗܝ ܬܸܫܟܲܢ ܩܲܕܝܼܫܵܐܝܼܬ݂܃
008:0390 ܠܲܘ ܓܹܝܪ ܩܽܘܕ݂ܫܵܐ ܚܲܣܝܼܪ ܗܼܘܵܐ ܠܸܗ ܘܸܐܫܬܲܡܠܝܼ ܒܸܗ܀
008:0391 ܐܵܦ ܢܵܡܽܘܣܵܐ ܠܲܬ݂ܪܸܝܢ ܣܵܗ̈ܕܝܼܢ ܩܵܪܸܐ ܨܸܐܕ݂ܲܘܗܝ܃
008:0392 ܕܠܵܐ ܡܸܬ݂ܩܲܒܲܠ ܚܲܕ݂ ܒܲܠܚܽܘܕ݂ܲܘܗܝ ܟܲܕ݂ ܫܲܪܝܼܪܲܐ ܗܼܘ܀
008:0393 ܐܲܒ݂ܵܐ ܘܪܽܘܚܵܐ ܫܲܘܝܲܬ݂ ܐܲܣܗܸܕ݂ܘ ܥܲܠ ܝܼܚܝܼܕ݂ܵܐ܃
008:0394 ܕܢܵܡܽܘܣܵܐܝܼܬ݂ ܢܸܬ݁ܠܽܘܢ ܙܸܕ݂ܩܵܐ ܠܚܲܕ݂ ܫܲܪܝܼܪܵܐ܀
008:0395 ܩܵܠܸܗ ܕܲܐܒ݂ܵܐ ܘܪܽܘܚܵܐ ܕܩܽܘܕ݂ܫܵܐ ܢܚܸܬ݂ܘ ܫܲܘܝܵܐܝܼܬ݂܃
008:0396 ܕܲܠܣܵܗܕܽܘܬ݂ܗܽܘܢ ܐܼܢܵܫ ܠܵܐ ܢܲܣܠܸܐ ܡܵܐ ܕܸܐܬ݂ܚܲܙܝܲܬ̤܀
008:0397 ܩܵܠܸܗ ܕܲܐܒ݂ܵܐ ܣܕܲܩ ܠܲܫܡܲܝܵܐ ܘܲܢܦܲܩ ܡܸܢܵܗ݀܃
008:0398 ܘܩܵܡ ܥܲܠ ܢܲܗܪܵܐ ܝܲܡܵܐ ܕܢܽܘܗܪܵܐ ܕܠܵܐ ܡܸܣܬܲܝܲܟ݂܀
008:0399 ܫܸܩܠܲܬ̤ ܘܸܐܬܵܬ̤ ܪܽܘܚܵܐ ܒܓܸܦܸܝ̈ܗ݀ ܫܽܘܒ݂ܚܵܐ ܪܲܒܵܐ܃
008:0400 ܘܛܵܦ ܗܼܘܵܐ ܚܽܘܪܒܵܐ ܒܙܝܼܘܵܐ ܕܲܫܦܲܥ ܡܸܢ ܥܵܠܵܝܵܐ܀
008:0401 ܬܸܗܪܲܬ̤ ܥܼܕܬܵܐ ܟܲܠܲܬ݂ ܢܽܘܗܪܵܐ ܒܚܲܬ݂ܢܵܐ ܡܲܠܟܵܐ܃
008:0402 ܕܲܒ݂ܡܲܣܚܽܘܬܸܗ ܪܲܘܡܵܐ ܘܥܽܘܡܩܵܐ ܐܸܫܬܲܝܲܢܘ ܗܼܘܲܘ܀
008:0403 ܚܙܵܬܸܗ ܠܢܲܗܪܵܐ ܕܪܵܥܠܝܼܢ ܫܸܦܥܲܘ̈ܗܝ ܘܲܫܓܝܼܪ ܟܽܠܸܗ܃
008:0404 ܘܫܸܡܥܲܬ̤ ܩܵܠܸܗ ܕܲܐܒ݂ܵܐ ܕܡܲܙܥܸܩ ܥܲܠ ܚܲܒܝܼܒܸܗ܀
008:0405 ܫܲܕܪܲܬ̤ ܘܲܩܪܵܬ݂ ܠܗܲܘ݁ ܟܸܢܵܪܵܐ ܕܪܽܘܚܵܐ ܕܲܘܝܼܕ݂܃
008:0406 ܕܢܼܐܬܸܐ ܢܸܙܡܲܪ ܩ̈ܵܠܸܐ ܕܚܵܫܚܝܼܢ ܠܸܗ ܠܲܚܠܽܘܠܵܐ܀
008:0407 ܬܵܐ ܒܲܪ ܐܝܼܫܲܝ ܘܲܐܝܬܵܐ ܥܲܡܵܟ݂ ܠܲܙܡܝܼܪ̈ܵܬ݂ܵܟ݂܃
008:0408 ܕܲܒ݂ܡܸܫܬܽܘܬܸܗ ܕܡܵܪܵܟ݂ ܘܲܒ݂ܪܵܟ݂ ܢܸܚܕܸܐ ܝܲܘܡܵܢ܀
008:0409 ܡܪܽܘܩ ܢܸܥ̈ܡܵܬ݂ܵܟ ܘܲܡܬ݂ܽܘܚ ܡܸܢܸ̈ܐ ܕܲܒ݂ܩܝܼܬ݂ܵܪܵܟ݂܃
008:0410 ܘܲܐܪܡܵܐ ܩ̈ܵܠܸܐ ܕܲܡܚܲܕܸܝܢ ܠܝܼ ܡܦܲܫܩܵܢܵܐܝܼܬ݂܀
008:0411 ܠܵܐ ܬܡܲܠܸܠ ܠܝܼ ܪܸܡܙܵܢܵܐܝܼܬ݂ ܟܲܕ݂ ܙܵܡܲܪ ܐܲܢܼܬ݁܃
008:0412 ܐܲܕ݂ܢܲܚ ܡܸܠܬ݂ܵܟ݂ ܘܲܒ݂ܩܝܼ̈ܢܵܬ݂ܵܟ݂ ܩܽܘܫܬܵܐ ܢܸܪܥܲܡ܀
008:0413 ܓܠܝܼ ܦܲܫܸܩ ܠܝܼ ܡܸܛܽܠ ܡܵܢܵܐ ܪܵܥܸܠ ܢܲܗܪܵܐ܃
008:0414 ܘܲܐܝܢܵܐ ܚܲܝܠܵܐ ܥܨܵܝܗܝ ܠܲܬ݂ܗܽܘܡܵܐ ܘܙܵܥ ܘܸܐܬ݂ܒܲܠܗܝܼ܀
008:0415 ܡܵܢܲܘ ܩܵܠܵܐ ܕܗܵܐ ܡܸܢ ܪܲܘܡܵܐ ܠܥܽܘܡܩܵܐ ܢܵܚܸܬ݂܃
008:0416 ܘܲܠܡܽܘܢ ܗܵܠܸܝܢ ܒܲܪ̈ܩܸܐ ܣܒ݂ܝܼ̈ܣܸܐ ܕܫܲܓܪܽܘܗܝ ܠܵܐܐܲܪ܀
008:0417 ܐܲܪܡܝܼ ܕܲܘܝܼܕ݂ ܩ̈ܵܠܸܐ ܕܫܽܘܒ݂ܚܵܐ ܠܽܘܩܒܲܠ ܚܲܬ݂ܢܵܐ܃
008:0418 ܕܗܽܘ ܣܽܘܥܪܵܢܵܐ ܠܥܼܕܬܵܐ ܢܦܲܫܸܩ ܐܲܝܟ݂ ܕܼܐܝܬ݂ܲܘܗܝ ܗܼܘܵܐ܀
008:0419 ܠܵܟ݂ ܐܲܠܵܗܵܐ ܚܙܲܐܽܘܟ ܡܲܝ̈ܵܐ ܚܙܲܐܽܘܟ݂ ܘܲܕ݂ܚܸܠܘ܃
008:0420 ܐܵܦ ܬܗܽܘ̈ܡܸܐ ܙܵܥܘ ܘܲܪܙܲܦ ܡܲܝ̈ܵܐ ܥܢܵܢܸ̈ܐ ܕܵܐܐܲܪ܀
008:0421 ܟܽܠܸܗ ܟܝܵܢܵܐ ܕܡܲܝ̈ܵܐ ܐܲܪܓܸܫܘ ܕܲܣܥܲܪܬ݁ ܐܸܢܽܘܢ܃
008:0422 ܝܲܡ̈ܡܸܐ ܬܗܽܘ̈ܡܸܐ ܢܲܗܪ̈ܲܘܵܬ݂ܵܐ ܡܥܝܼ̈ܢܸܐ ܘܵܐܓ̈ܡܸܐ܀
008:0423 ܚܒܲܨܘ ܠܲܚܕ݂ܵܕܸ̈ܐ ܠܡܸܬ݂ܒܲܪܵܟ݂ܽܘ ܡܸܢ ܕܽܘܪ̈ܟܵܬ݂ܵܟ݂܃
008:0424 ܕܲܐܪܗܸܒ݂ ܐܸܢܽܘܢ ܕܸܢܚܵܟ݂ ܪܲܒܵܐ ܕܲܗܘܵܐ ܥܠܲܝܗܽܘܢ܀
008:0425 ܕܪܲܟ݂ܬ݁ ܥܲܠ ܝܽܘܪܕܢܵܢ ܐܲܝܟ݂ ܕܥܲܠ ܪܝܼܫܵܐ ܕܟ݂ܽܠܗܽܘܢ ܝܲܡ̈ܡܸܐ܃
008:0426 ܘܙܵܥ ܡܸܢ ܚܲܝܠܵܟ݂ ܥܸܩ̈ܒܲܝ ܬܗܽܘܡܸ̈ܐ ܘܲܕ݂ܡܵܡ̈ܽܘܠܸܐ܀
008:0427 ܟܽܠܸܗ ܟܝܵܢܵܐ ܕܡܲܝ̈ܵܐ ܐܸܬ݁ܬ݁ܙܝܼܥ ܡܸܢ ܪܽܘܚܵܦܵܟ݂܃
008:0428 ܕܲܠܚܽܘܣܵܝܵܐ ܠܟ݂ܽܠܗܽܘܢ ܐܲܫܘܝܼܬ݁ ܒܡܲܥܡܽܘܕ݂ܝܼܬ݂ܵܟ݂܀
008:0429 ܡܲܝ̈ܵܐ ܕܝܲܡܡܸ̈ܐ ܟܲܕ݂ ܪܲܚܝܼܩܝܼܢ ܠܵܐ ܪܲܚܝܼܩܝܼܢ܃
008:0430 ܕܚܲܝܠܸܗ ܕܩܽܘܕ݂ܫܵܟ݂ ܕܵܠ ܟܲܣܝܵܐܝܼܬ݂ ܘܲܣܥܲܪ ܐܸܢܽܘܢ܀
008:0431 ܡܸܛܽܠ ܗܵܢܵܐ ܚܙܲܐܽܘܟ݂ ܡܲܝ̈ܵܐ ܚܙܲܐܽܘܟ݂ ܘܲܕ݂ܚܸܠܘ܃

▼ later lines