← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63404: JSBhom 8: on the baptism of Jesus in the Jordan

Click on a word for lexical analysis
Click on a red-colored coordinate for comments and/or translations of the line

▲ earlier lines

008:0360 ܕܢܸܗܘܸܐ ܓܢܽܘܢܵܐ ܠܚܲܬ݂ܢܵܐ ܫܒ݂ܝܼܚܵܐ ܕܲܢܚܸܬ݂ ܢܸܥܡܲܕ܀
008:0361 ܢܦܲܩ ܥܲܪ̈ܦܸܠܸܐ ܐܲܝܟ݂ ܫܽܘ̈ܫܸܦܸܐ ܕܒܸܝܬ݂ ܡܲܠܟ݁ܽܘܬ݂ܵܐ܃
008:0362 ܕܡܵܐ ܕܲܣܚܵܐ ܗܼܘܵܐ ܗܲܘ ܒܲܪ ܡܲܠܟܵܐ ܒܗܸܝܢ ܢܸܬ݂ܩܲܒܲܠ܀
008:0363 ܦܫܲܛ ܗܼܘܵܐ ܐܲܒ݂ܵܐ ܡܵܐܢܸ̈ܐ ܓܒܲܝ̈ܵܐ ܠܥܸܠ ܡܸܢ ܐܵܐܲܪ܃
008:0364 ܙܝܼܘܵܐ ܘܫܽܘܒ݂ܚܵܐ ܘܒܲܪ̈ܩܸܐ ܕܬܸܗܪܵܐ ܐܵܦ ܥܲܪ̈ܦܸܠܸܐ܀
008:0365 ܟܲܪܟܸܗ ܠܢܲܗܪܵܐ ܒܓܲܘ̈ܢܸܐ ܬܡܝܼ̈ܗܸܐ ܕܠܵܐ ܡܸܬ݂ܓܲܫܫܝܼܢ܃
008:0366 ܕܲܢܪܲܡܪܸܡ ܗܼܘܵܐ ܚܠܽܘܠܵܐ ܕܲܒ݂ܪܸܗ ܝܼܚܝܼܕ݂ܵܝܵܐ܀
008:0367 ܨܪܵܗ݀ ܠܲܫܡܲܝܵܐ ܘܲܐܪܝܼܡ ܩܵܠܸܗ ܥܲܙܝܼܙܵܐܝܼܬ݂܃
008:0368 ܕܗܵܐ ܗܵܢܲܘ ܒܸܪܝ ܗܵܢܲܘ ܚܲܒܝܼܒ݂ܝ ܫܲܪܝܼܪܵܐܝܼܬ݂܀
008:0369 ܛܵܣܲܬ̤ ܪܽܘܚܵܐ ܡܸܢ ܨܸܝܕ݂ ܐܲܒ݂ܵܐ ܒܬܸܗܪܵܐ ܪܲܒܵܐ܃
008:0370 ܘܦܸܪܚܲܬ̤ ܢܸܚܬܲܬ̤ ܫܸܟ݂ܢܲܬ̤ ܩܲܘܝܲܬ̤ ܥܲܠ ܚܲܒܝܼܒܸܗ܃
008:0371 ܐܼܬܵܬ̤ ܒܲܕ݂ܡܽܘܬ݂ܵܐ ܕܓܽܘܫܡܵܐ ܕܝܲܘܢܵܐ ܬܲܡܝܼܡܵܐܝܼܬ݂܃
008:0372 ܕܬܸܓܕܽܘܠ ܬܲܡܵܢ ܘܲܬ݂ܣܝܼܡ ܩܸܢܵܗ݀ ܒܡܲܥܡܽܘܕ݂ܝܼܬ݂ܵܐ܀
008:0373 ܠܸܒ݂ܫܲܬ̤ ܛܽܘܦ݂ܣܵܐ ܕܝܲܘܢܵܐ ܒܪܝܼܪܬܵܐ ܡܸܢ ܦܵܪ̈ܚܵܬ݂ܵܐ܃
008:0374 ܘܸܐܬܵܬ̤ ܕܬܸܣܗܲܕ݂ ܥܲܠ ܫܲܪܝܼܪܵܐ ܒܲܦܫܝܼܛܽܘܬ݂ܵܗ݀܀
008:0375 ܠܲܘ ܕܲܬ݂ܩܲܕܫܸܗ ܠܲܒ݂ܪܵܐ ܢܸܚܬܲܬ̤ ܟܲܕ݂ ܐܸܫܬܲܠܚܲܬ̤܃
008:0376 ܕܠܵܐ ܚܲܣܝܼܪ ܗܼܘܵܐ ܡܸܠܬ݂ܵܐ ܣܓܝܼܕ݂ܵܐ ܢܩܲܕܸܫ ܝܵܬܸܗ܀
008:0377 ܠܵܐ ܪܸܣܲܬ̤ ܗܼܘܵܬ݂ ܩܽܘܕ݂ܫܵܐ ܒܡܲܚܬܵܗ݀ ܥܲܠ ܩܲܕܝܼܫܵܐ܃
008:0378 ܡܸܣܗܲܕ݂ ܣܸܗܕܲܬ̤ ܥܲܠ ܦܵܪܽܘܩܵܐ ܟܲܕ݂ ܐܸܬ݂ܚܲܙܝܲܬ̤܀
008:0379 ܗܘܵܬ݂ ܠܸܗ ܪܽܘܚܵܐ ܨܸܒ݂ܥܵܐ ܠܲܐܒ݂ܵܐ ܘܒ݂ܵܗ݀ ܚܲܘܝܼ ܗܼܘܵܐ܃
008:0380 ܕܗܵܢܲܘ ܠܲܡ ܒܸܪܝ ܠܵܐ ܬܸܬ݂ܦܲܠܓܽܘܢ ܥܲܠ ܡܸܐܬ݂ܝܼܬܸܗ܀
008:0381 ܐܸܠܽܘ ܪܽܘܚܵܐ ܠܵܐ ܢܸܚܬܲܬ̤ ܗܼܘܵܬ݂ ܥܲܠ ܫܲܪܝܼܪܵܐ܃
008:0382 ܡܲܢ ܝܵܕܲܥ ܗܼܘܵܐ ܐܲܝܟܵܐ ܫܵܟܸܢ ܩܵܠܸܗ ܕܲܐܒ݂ܵܐ܀
008:0383 ܥܲܡܵܗ݀ ܕܡܸܠܬ݂ܵܐ ܗܵܝ ܕܸܐܙܕܲܥܩܲܬ̤ ܡܸܢ ܥܸܠܵܝܵܐ܃
008:0384 ܐܲܝܟ݂ ܕܲܒ݂ܨܸܒ݂ܥܵܐ ܚܲܘܝܲܬ̤ ܪܽܘܚܵܐ ܕܗܵܢܲܘ ܡܲܠܟܵܐ܀
008:0385 ܐܸܠܽܘ ܥܠܲܘܗܝ ܓܹܝܪ ܠܵܐ ܩܲܘܝܲܬ̤ ܗܼܘܵܬ݂ ܝܼܕ݂ܝܼܥܵܐܝܼܬ݂܃
008:0386 ܦܵܗܸܐ ܗܼܘܵܐ ܠܸܗ ܩܵܠܵܐ ܒܟܸܢܫܸ̈ܐ ܥܲܠ ܣܲܓܝܼ̈ܐܸܐ܀
008:0387 ܗܵܐ ܫܵܡܥܝܼܢ ܗܼܘܲܘ ܩܵܠܵܐ ܕܵܐܡܲܪ ܗܵܢܲܘ ܚܲܒܝܼܒ݂܃
008:0388 ܘܲܡܫܲܐܠܝܼܢ ܗܼܘܲܘ ܟܲܕ݂ ܡܸܬ݂ܦܲܠܓܝܼܢ ܕܥܲܠ ܡܲܢ ܐܸܡܲܪ܀
008:0389 ܢܸܚܬܲܬ̤ ܪܽܘܚܵܐ ܕܲܥܠܲܘܗܝ ܬܸܫܟܲܢ ܩܲܕܝܼܫܵܐܝܼܬ݂܃
008:0390 ܠܲܘ ܓܹܝܪ ܩܽܘܕ݂ܫܵܐ ܚܲܣܝܼܪ ܗܼܘܵܐ ܠܸܗ ܘܸܐܫܬܲܡܠܝܼ ܒܸܗ܀
008:0391 ܐܵܦ ܢܵܡܽܘܣܵܐ ܠܲܬ݂ܪܸܝܢ ܣܵܗ̈ܕܝܼܢ ܩܵܪܸܐ ܨܸܐܕ݂ܲܘܗܝ܃
008:0392 ܕܠܵܐ ܡܸܬ݂ܩܲܒܲܠ ܚܲܕ݂ ܒܲܠܚܽܘܕ݂ܲܘܗܝ ܟܲܕ݂ ܫܲܪܝܼܪܲܐ ܗܼܘ܀
008:0393 ܐܲܒ݂ܵܐ ܘܪܽܘܚܵܐ ܫܲܘܝܲܬ݂ ܐܲܣܗܸܕ݂ܘ ܥܲܠ ܝܼܚܝܼܕ݂ܵܐ܃
008:0394 ܕܢܵܡܽܘܣܵܐܝܼܬ݂ ܢܸܬ݁ܠܽܘܢ ܙܸܕ݂ܩܵܐ ܠܚܲܕ݂ ܫܲܪܝܼܪܵܐ܀
008:0395 ܩܵܠܸܗ ܕܲܐܒ݂ܵܐ ܘܪܽܘܚܵܐ ܕܩܽܘܕ݂ܫܵܐ ܢܚܸܬ݂ܘ ܫܲܘܝܵܐܝܼܬ݂܃
008:0396 ܕܲܠܣܵܗܕܽܘܬ݂ܗܽܘܢ ܐܼܢܵܫ ܠܵܐ ܢܲܣܠܸܐ ܡܵܐ ܕܸܐܬ݂ܚܲܙܝܲܬ̤܀
008:0397 ܩܵܠܸܗ ܕܲܐܒ݂ܵܐ ܣܕܲܩ ܠܲܫܡܲܝܵܐ ܘܲܢܦܲܩ ܡܸܢܵܗ݀܃
008:0398 ܘܩܵܡ ܥܲܠ ܢܲܗܪܵܐ ܝܲܡܵܐ ܕܢܽܘܗܪܵܐ ܕܠܵܐ ܡܸܣܬܲܝܲܟ݂܀
008:0399 ܫܸܩܠܲܬ̤ ܘܸܐܬܵܬ̤ ܪܽܘܚܵܐ ܒܓܸܦܸܝ̈ܗ݀ ܫܽܘܒ݂ܚܵܐ ܪܲܒܵܐ܃
008:0400 ܘܛܵܦ ܗܼܘܵܐ ܚܽܘܪܒܵܐ ܒܙܝܼܘܵܐ ܕܲܫܦܲܥ ܡܸܢ ܥܵܠܵܝܵܐ܀
008:0401 ܬܸܗܪܲܬ̤ ܥܼܕܬܵܐ ܟܲܠܲܬ݂ ܢܽܘܗܪܵܐ ܒܚܲܬ݂ܢܵܐ ܡܲܠܟܵܐ܃
008:0402 ܕܲܒ݂ܡܲܣܚܽܘܬܸܗ ܪܲܘܡܵܐ ܘܥܽܘܡܩܵܐ ܐܸܫܬܲܝܲܢܘ ܗܼܘܲܘ܀
008:0403 ܚܙܵܬܸܗ ܠܢܲܗܪܵܐ ܕܪܵܥܠܝܼܢ ܫܸܦܥܲܘ̈ܗܝ ܘܲܫܓܝܼܪ ܟܽܠܸܗ܃
008:0404 ܘܫܸܡܥܲܬ̤ ܩܵܠܸܗ ܕܲܐܒ݂ܵܐ ܕܡܲܙܥܸܩ ܥܲܠ ܚܲܒܝܼܒܸܗ܀
008:0405 ܫܲܕܪܲܬ̤ ܘܲܩܪܵܬ݂ ܠܗܲܘ݁ ܟܸܢܵܪܵܐ ܕܪܽܘܚܵܐ ܕܲܘܝܼܕ݂܃
008:0406 ܕܢܼܐܬܸܐ ܢܸܙܡܲܪ ܩ̈ܵܠܸܐ ܕܚܵܫܚܝܼܢ ܠܸܗ ܠܲܚܠܽܘܠܵܐ܀
008:0407 ܬܵܐ ܒܲܪ ܐܝܼܫܲܝ ܘܲܐܝܬܵܐ ܥܲܡܵܟ݂ ܠܲܙܡܝܼܪ̈ܵܬ݂ܵܟ݂܃
008:0408 ܕܲܒ݂ܡܸܫܬܽܘܬܸܗ ܕܡܵܪܵܟ݂ ܘܲܒ݂ܪܵܟ݂ ܢܸܚܕܸܐ ܝܲܘܡܵܢ܀
008:0409 ܡܪܽܘܩ ܢܸܥ̈ܡܵܬ݂ܵܟ ܘܲܡܬ݂ܽܘܚ ܡܸܢܸ̈ܐ ܕܲܒ݂ܩܝܼܬ݂ܵܪܵܟ݂܃
008:0410 ܘܲܐܪܡܵܐ ܩ̈ܵܠܸܐ ܕܲܡܚܲܕܸܝܢ ܠܝܼ ܡܦܲܫܩܵܢܵܐܝܼܬ݂܀

▼ later lines