The Comprehensive Aramaic Lexicon

018:091	ܠܟܸܘܵܢ ܘܟ݂ܵܡܽܘܫ ܘܲܠܐܲܫܝܼܡܵܐ ܒܓܸܠܝܵܐ ܣܸܓ݂ܕܲܬ̤܃
018:092	ܘܲܠܐܲܠܵܗܸ̈ܐ ܕܟ݂ܽܠܗܽܘܢ ܥܲܡ̈ܡܸܐ ܚܲܓܸ̈ܐ ܥܸܒ݂ܕܲܬ̤܀
018:093	ܒܲܩ̈ܢܵܝܵܬ݂ܵܐ ܡܸܨܪ̈ܵܝܵܬ݂ܵܐ ܒܲܛܝܼܠܵܐ ܗ̄ܘܵܬ݂܃
018:094	ܘܠܵܐ ܣܦܝܼܩܵܐ ܗ̄ܘܵܬ݂ ܕܬܸܙܡܲܪ ܫܽܘܒ݂ܚܵܐ ܥܲܡ ܬܲܠܡܝܼ̈ܕܸܐ܀
018:095	ܕܸܒ݂̈ܚܸܐ ܠܫܼ̈ܐܕܸܐ ܥܲܠܝܼܠܵܐ ܗ̄ܘܵܬ݂ ܠܲܡܛܲܝܵܒ݂ܽܘ܃
018:096	ܘܠܵܐ ܢܸܦܩܲܬ̤ ܗ̄ܘܵܬ݂ ܬܸܛܥܲܢ ܣܲܘ̈ܟܸܐ ܥܲܡ ܝܲܠܽܘ̈ܕܸܐ܀
018:097	ܛܠܵܝܸ̈ܐ ܡܒܲܪܟ݂ܝܼܢ ܘܲܡܫܲܒܚܝܼܢ ܠܸܗ ܠܡܲܠܟܵܐ ܕܸܐܬ݂ܵܐ܃
018:098	ܘܣܵܒ݂ܬ݂ܵܐ ܕܨܲܠܡܸܝ̈ܗ݀ ܡܵܪܩܵܐ ܦܬܲܟ݂ܪܸ̈ܝܗ݀ ܬܚܲܕܸܬ݂ ܐܸܢܽܘܢ܀
018:099	ܢܒ݂ܝܼܸ̈ܐ ܛܵܪܦܝܼܢ ܬܲܪ̈ܥܸܝܗ݀ ܪ̈ܵܡܸܐ ܘܲܡܥܝܼܪܝܼܢ ܠܵܗ݀܃
018:100	ܘܗܝܼ ܕܲܡܝܼܟ݂ܵܐ ܒܪܸܚܡܲܬ݂ ܚܲܒ݂ܪܸ̈ܐ ܕܣܲܓܝܼܐܝܼܢ ܠܵܗ݀܀
018:101	ܕܽܘܨܝ ܒܲܪ̄ܬ݂ ܨܸܗܝܽܘܢ ܘܠܵܐ ܕܵܨܲܬ̤ ܗ̄ܘܵܬ݂ ܚܲܒ݂ܪܲܬ݂ ܥܸܓ݂̈ܠܸܐ܃
018:102	ܕܲܡܥܵܩܵܐ ܗ̄ܘܵܬ݂ ܥܲܠ ܕܸܐܬ݂ܵܐ ܠܸܗ ܝܵܪܬܸܗ ܕܲܐܒ݂ܵܐ܀
018:103	ܝܸܕ݂ܥܲܬ݂̤ ܗ̄ܘ݂ܵܬ݂ ܠܸܗ ܕܲܡܦܲܪܣܸܐ ܠܵܗ݀ ܘܲܣܢܵܬܸܗ ܗ̄ܘܵܬ݂܃
018:104	ܘܲܕܢܸܫܬܲܒܲܚ ܡܸܢ ܝܲܠܽܘ̈ܕܸܐ ܠܵܐ ܪܲܥܝܵܐ ܗ̄ܘܵܬ݂܀
018:105	ܒܠܸܒܵܗ݀ ܚܣܵܡܵܐ ܘܚܸܪܫܲܬ̤݂ ܫܸܬ݂ܩܲܬ̤݂ ܡܸܢ ܬܸܫܒܽܘܚܬܵܐ܃
018:106	ܘܠܲܡܫܲܒ̈ܚܵܢܸܐ ܬܫܲܬܸܩ ܐܸܢܽܘܢ ܝܲܨܝܼܦܵܐ ܗ̄ܘܵܬ݂܀
018:107	ܠܵܐ ܣܸܦܩܲܬ̤݂ ܗ̄ܘܵܬ݂ ܕܠܵܐ ܨܵܒܝܵܐ ܗ̄ܘܵܬ݂ ܠܲܡܫܲܒܵܚܽܘ܃
018:108	ܘܲܚܦܝܼܛܵܐ ܗ̄ܘܵܬ݂ ܬܫܲܠܸܐ ܫܽܘܒ݂ܚܵܐ ܐܵܦ ܕܲܐ̄ܚܪ̈ܵܢܸܐ܀
018:109	ܡܫܲܒܚܝܼܢ ܗܵܠܸܝܢ ܘܲܪܓܝܼܙܵܐ ܗܝܼ ܡܸܢ ܩܵܠܲܝ̈ܗܽܘܢ܃
018:110	ܘܓ݂ܵܙܡܵܐ ܕܢܸܫܠܽܘܢ ܡܸܢ ܬܸܫܒܽܘܚܬܵܐ ܘܠܵܐ ܫܵܠܸܝܢ ܗ̄ܘܲܘ܀
018:111	ܩܥܵܐ ܐܸܫܲܥܝܵܐ ܐܸܬܬܥܝܼܪܝ ܐܸܬܬܥܝܼܪܝ ܘܲܠܒܲܫܝ ܥܽܘܫܢܵܐ܃
018:112	ܘܲܩܥܵܐ ܙܟܲܪܝܵܐ ܕܽܘܨܝ ܛܵܒ݂ ܘܲܚܕܵܝ ܕܸܐܬܵܐ ܡܲܠܟܸܟ݂ܝ܀
018:113	ܩܥܲܘ ܝܲܠܽܘ̈ܕܸܐ ܒܪܝܼܟ݂ ܗ̄ܽܘ ܕܸܐܬܵܐ ܒܲܫܡܸܗ ܕܡܵܪܝܵܐ܃
018:114	ܘܲܪܥܸܡ ܫܽܘܒ݂ܚܵܐ ܒܽܐܘܪܚܸܗ ܕܡܲܠܟܵܐ ܥܲܬܝܼܪܵܐܝܼܬ݂܀
018:115	ܥܸܒ݂ܪܵܝܬܵܐ ܕܹܝܢ ܠܵܐ ܨܵܒ݂ܝܵܐ ܗ̄ܘܵܬ݂ ܬܸܫܡܲܥ ܐܸܢܽܘܢ܃
018:116	ܠܵܐ ܠܸܐܫܲܥܝܵܐ ܘܠܵܐ ܠܲܙܟܲܪܝܵܐ ܘܠܵܐ ܠܝܲܠܽܘܕܸ̈ܐ܀
018:117	ܠܵܐ ܨܵܝܬܵܐ ܗ̄ܘܵܬ݂ ܠܵܐ ܠܲܢܒ݂̈ܝܼܸܐ ܘܠܵܐ ܠܲܛܠܵܝܸ̈ܐ܃
018:118	ܘܲܡܥܵܩܵܐ ܗ̄ܘܵܬ݂ ܘܲܪܓ݂ܝܼܙܵܐ ܗ̄ܘܵܬ݂ ܡܸܢ ܩܵܠܲܝ̈ܗܽܘܢ܀
018:119	ܕܢܸܫܠܽܘܢ ܡܸܫܠܵܐ ܝܸܨܦܲܬ̤݂ ܣܲܓܝܼ ܒܚܲܨܝܼܦܽܘܬ݂ܵܗ݀܃
018:120	ܘܲܒ݂ܥܵܬ̤݂ ܦܽܘܪܣܵܐ ܕܒ݂ܟ݂̤ܽܠ ܥܸܠ̈ܠܵܢ ܬܫܲܬܸܩ ܐܸܢܽܘܢ܀
018:121	ܡܫܲܒܚܵܢܸ̈ܐ ܕܹܝܢ ܠܵܐ ܫܵܠܸܝܢ ܗ̄ܘܲܘ ܡܸܢ ܬܸܫܒܽܘܚܬܵܐ܃
018:122	ܕܩܽܘܫܬܵܐ ܓܲܠܝܵܐ ܐܲܙܝܼܥ ܐܸܢܽܘܢ ܠܲܡܫܲܒܵܚܽܘ܀
018:123	ܬܸܕܡܽܘܪܬܵܐ ܗ̄ܘܵܬ݂ ܐܽܘܪܚܸܗ ܕܲܒ݂ܪܵܐ ܠܲܕܦܵܪܽܘܫܝܼܢ܃
018:124	ܘܲܙܥܽܘܪ ܗ̄ܽܘ ܠܸܗ ܫܽܘܒ݂ܚܵܐ ܕܥܵܠܡܸ̈ܐ ܘܥܵܡܽܘܪ̈ܲܝܗܽܘܢ܀
018:125	ܒܬܸܗܪܵܐ ܪܲܒܵܐ ܩܵܡ ܗ̄ܘܲܝ̈ ܓܽܘ̈ܕܸܐ ܕܒܸܝܬ݂ ܡܝܼܟ݂ܵܐܸܝܠ܃
018:126	ܕܲܚܙܲܝ̈ ܠܲܒ݂ܪܵܐ ܕܲܪܟ݂ܝܼܒ݂ ܥܝܼܠܵܐ ܒܫܽܘ̈ܩܲܝ ܨܸܗܝܽܘܢ܀
018:127	ܚܵܪܘ ܥܸܠܵܝܸ̈ܐ ܘܲܚܙܲܐܽܘܗܝ ܗ̄ܘܲܘ ܠܝܼܚܝܼܕܵܝܵܐ܃
018:128	ܕܡܲܟܝܼܟ݂ ܘܲܫܠܸܐ ܒܲܝܢܵܬ݂ ܟܸܢܫܸ̈ܐ ܕܲܐܪ̈ܥܵܢܵܝܸܐ܀
018:129	ܘܙܵܥܘ ܢܽܘܪ̈ܵܢܸܐ ܕܕܲܠܡܵܐ ܢܚܸܬ݂ ܠܸܗ ܡܸܢ ܡܲܪܟܲܒ݂ܬ݂ܵܐ܃
018:130	ܘܲܨܠܲܘ ܟܽܠܗܽܘܢ ܕܲܢܚܽܘܪܽܘܢ ܒܸܗ ܐܸܢ ܬܲܡܵܢ ܗ̄ܽܘ܀
018:131	ܘܲܚܙܲܐܽܘܗܝ ܗ̄ܘܲܘ ܒܟ݂ܽܘܪܣܝܵܐ ܓܲܐܝܵܐ ܒܲܐܬ݂ܪܸܗ ܪܵܡܵܐ܃
018:132	ܘܲܚܙܲܐܽܘܗܝ ܬܽܘܒ݂ ܕܗܽܘܝܽܘ ܕܲܪܟ݂ܝܼܒ݂ ܒܲܪ ܐܲܬܵܢܵܐ܀
018:133	ܬܗܲܪܘ ܡܲܠܲܐܟܸ̈ܐ ܟܲܕ ܚܵܝܪܝܼܢ ܒܸܗ ܒܲܬ݂ܪܸܝܢ ܓܲܒܝܼ̈ܢ܃
018:134	ܒܪܲܘܡܵܐ ܘܥܽܘܡܩܵܐ ܠܵܐ ܗ̄ܘܵܐ ܬܪܸܝܢ ܗ̄ܘܵܐ ܐܸܠܵܐ ܐܸܢ ܚܲܕ܀
018:135	ܚܵܝܪܝܼܢ ܗ̄ܘܲܘ ܒܸܗ ܕܟ݂ܽܘܪܣܝܵܐ ܡܸܢܸܗ ܠܵܐ ܐܸܣܬܲܦܲܩ܃
018:136	ܘܚܵܙܸܝܢ ܗ̄ܘܲܘ ܠܸܗ ܒܲܝܢܵܬ݂ ܗܵܠܸܝܢ ܕܽܐܘܫܲܥܢܲܝ̈ܗܽܘܢ܀
018:137	ܪܟ݂ܝܼܒ݂ ܗ̄ܘܵܐ ܟܪ̈ܽܘܒܸܐ ܘܲܪܟ݂ܝܼܒ݂ ܥܝܼܠܵܐ ܘܕܽܘܡܵܪܵܐ ܗ̄ܘܵܐ܃
018:138	ܕܲܫܪܸܐ ܒܪܲܘܡܵܐ ܘܪܵܕܸܐ ܒܥܽܘܡܩܵܐ ܘܠܵܐ ܡܸܬ݂ܦܲܠܲܓ݂܀
018:139	ܒܸܝܬ݂ ܥܸܠܵܝܸ̈ܐ ܡܟ݂ܝܼܟ݂ܝܼܢ ܒܲܪ̈ܩܸܐ ܕܢܽܘܪܵܐ ܒܽܐܘܪܚܸܗ܃
018:140	ܘܨܹܝܕ ܬܲܚܬܵܝܸ̈ܐ ܒܣܲܘ̈ܟܸܐ ܕܕܸܩ̈ܠܸܐ ܡܸܬ݂ܝܲܩܲܪ ܗ̄ܘܵܐ܀
018:141	ܟܪ̈ܽܘܒܸܐ ܙܵܝܥܝܼܢ ܕܲܢܒܲܪܟ݂ܽܘܢܵܝܗܝ ܒܲܐܬ݂ܪܸܗ ܪܵܡܵܐ܃