← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63404: JSBhom 82: on Our Lord's fight with Satan

Click on a word for lexical analysis
Click on a red-colored coordinate for comments and/or translations of the line

▲ earlier lines

082:052 ܘܡܸܛܽܠܗܵܢܵܐ ܣܒܲܠ ܢܸܣܝܽܘܢܸܗ ܕܵܐܟܸܠܩܲܪܨܵܐ܀
082:053 ܥܲܠ ܕܲܢܦܲܠ ܗ̄ܘܵܐ ܒܕܲܪܵܐ ܐܵܕܵܡ ܟܲܕ ܐܸܬܢܲܣܝܼ܃
082:054 ܐܸܬܚܲܕܲܬ ܗ̄ܘܵܐ ܕܲܪܵܐ ܕܲܢܚܽܘܒ ܐܵܟܸܠܩܲܪܨܵܐ܀
082:055 ܕܚܵܒ ܗ̄ܘܵܐ ܐܵܕܵܡ ܘܲܐܠܸܦ ܠܲܒܢܲܘ̈ܗ̄ܝ ܚܲܝܵܒܽܘܬܵܐ܃
082:056 ܒܲܪ ܐܲܠܵܗܵܐ ܐܲܠܸܦ ܐܸܢܽܘܢ ܕܲܐܝܟܲܢ ܢܸܙܟܽܘܢ܀
082:057 ܘܡܸܛܽܠܗܵܢܵܐ ܢܚܸܬ ܗ̄ܘܵܐ ܠܕܲܪܵܐ ܗܲܘ ܙܵܟܸܐ ܟܽܠ܃
082:058 ܕܢܸܗܘܸܐ ܕܡܽܘܬܵܐ ܠܟܽܠܡܲܢ ܕܵܐܟܸܦ ܥܲܠ ܙܵܟܽܘܬܵܐ܀
082:059 ܘܚܲܘܝܼ ܠܐ̄ܢܵܫܵܐ ܕܲܐܝܟܲܢ ܢܸܙܟܽܘܢ ܠܲܒܥܸܠܕܲܪܵܐ܃
082:060 ܘܡܸܛܽܠܗܵܢܵܐ ܒܦܲܓܪܵܐ ܕܐ̄ܢܵܫܵܐ ܥܒܲܕ ܐܲܓܽܘܢܵܐ܀
082:061 ܐܸܬܓܲܫܲܡ ܓܹܝܪ ܡܸܢܸܗ ܕܓܸܢܣܵܐ ܕܲܒܢܲܝܢܵܫܵܐ܃
082:062 ܘܲܗܘܵܐ ܐ̄ܢܵܫܵܐ ܕܲܐܝܟ ܒܲܪܢܵܫܵܐ ܩܪܵܒܵܐ ܢܸܥܒܸܕ܀
082:063 ܐ̄ܢܵܫܵܝܵܐ ܗ̄ܘܵܐ ܕܲܪܸܗ ܕܡܵܪܲܢ ܕܥܲܡ ܣܵܛܵܢܵܐ܃
082:064 ܠܵܐ ܐ̄ܢܵܫ ܢܼܐܡܲܪ ܕܲܐܠܵܗܵܐܝܼܬ ܐܸܬܟܲܬܲܫ ܗ̄ܘܵܐ܀
082:065 ܐܸܠܽܘ ܐܲܩܪܸܒ ܒܲܐܠܵܗܽܘܬܸܗ ܐܲܝܟ ܕܲܡܨܸܐ ܗ̄ܘܵܐ܃
082:066 ܡܲܢ ܣܵܕܲܪ ܗ̄ܘܵܐ ܩܪܵܒܵܐ ܠܩܽܘܒܠܸܗ ܡܸܢ ܒܸܪ̈ܝܵܬܸܗ܀
082:067 ܦܲܓܪܸܗ ܕܲܒܪܵܐ ܐܲܛܥܝܼ ܠܒܝܼܫܵܐ ܘܠܵܐ ܝܲܕܥܸܗ ܗ̄ܘܵܐ܃
082:068 ܕܸܐܠܽܘ ܝܲܕܥܸܗ ܕܲܪܵܐ ܥܲܡܸܗ ܠܵܐ ܥܵܒܸܕ ܗ̄ܘܵܐ܀
082:069 ܐܵܦ ܗܽܘ ܡܵܪܲܢ ܐܸܬܡܲܟܲܟ ܠܸܗ ܠܲܒܥܸܠܕܲܪܵܐ܃
082:070 ܘܒܲܡܚܝܼܠܽܘܬܵܐ ܨܒܵܐ ܢܸܬܟܲܬܲܫ ܥܲܡ ܡܵܪܽܘܕܵܐ܀
082:071 ܘܡܸܛܽܠ ܕܲܚܙܵܝܗ̄ܝ ܐܲܝܟ ܒܲܪܢܵܫܵܐ ܣܒܲܪ ܣܵܛܵܢܵܐ܃
082:072 ܕܠܲܘ ܐܲܠܵܗܵܐ ܗ̄ܘ ܐܸܠܵܐ ܐ̄ܢܵܫܵܐ ܟܢܵܬܸܗ ܕܵܐܕܵܡ܀
082:073 ܘܒܲܪ ܐܲܠܵܗܵܐ ܣܕܲܪ ܗ̄ܘܵܐ ܒܕܲܪܵܐ ܦܲܓܪܵܢܽܘܬܸܗ܃
082:074 ܘܲܐܓܢܝܼ ܡܸܢܸܗ ܚܲܝܠܵܐ ܪܲܒܵܐ ܕܲܐܠܵܗܽܘܬܸܗ܀
082:075 ܘܟܲܕ ܠܵܐ ܝܵܕܲܥ ܡܲܢܽܘ ܘܒܲܪ ܡܲܢ ܐܲܩܪܸܒ ܥܲܡܸܗ܃
082:076 ܕܸܐܠܽܘ ܝܲܕܥܸܗ ܥܵܪܸܩ ܗ̄ܘܵܐ ܠܸܗ ܘܠܵܐ ܡܲܩܪܸܒ ܗ̄ܘܵܐ܀
082:077 ܐܸܠܵܐ ܡܸܛܽܠ ܕܸܐܬܵܐ ܡܸܠܬܵܐ ܘܲܗܘܵܐ ܦܲܓܪܵܐ܃
082:078 ܦܲܓܪܵܐ ܕܲܫܩܲܠ ܐܲܛܥܝܼ ܠܒܝܼܫܵܐ ܕܲܐܩܪܸܒ ܥܲܡܸܗ܀
082:079 ܠܓܸܢܣܵܐ ܕܚܵܒ ܗ̄ܘܵܐ ܒܥܵܐ ܕܲܢܙܲܟܸܐ ܒܲܪ ܐܲܠܵܗܵܐ܃
082:080 ܘܡܸܛܽܠܗܵܢܵܐ ܦܲܓܪܵܢܵܐܝܼܬ ܡܸܬܟܲܬܲܫ ܗ̄ܘܵܐ܀
082:081 ܘܲܠܒܲܟ ܨܲܘܡܵܐ ܒܫܽܘܪܵܝ ܕܲܪܸܗ ܕܗܲܘ ܐܲܓܽܘܢܵܐ܃
082:082 ܘܡܸܛܽܠ ܕܲܚܙܵܐ ܕܲܒܡܸܐܟܽܘܠܬܵܐ ܚܵܒ ܗ̄ܘܵܐ ܐܵܕܵܡ܀
082:083 ܢܚܸܬ ܓܲܢ̄ܒܵܪܵܐ ܠܲܒܫܵܗ݀ ܠܟܽܠܵܗ݀ ܡܲܟܝܼܟܽܘܬܵܐ܃
082:084 ܘܸܐܬܢܲܚܲܬ ܗ̄ܘܵܐ ܥܕܲܡܵܐ ܠܣܵܟܵܗ݀ ܕܬܲܚܬܵܝܽܘܬܵܐ܀
082:085 ܘܲܥܒܲܕ ܕܲܪܵܐ ܥܲܡ ܢܵܛܽܘܪܸܗ ܕܠܼܠܝܵܐ ܘܲܙܟܵܝܗ̄ܝ܃
082:086 ܠܵܐ ܒܲܩܛܝܼܪܵܐ ܘܠܵܐ ܒܫܽܘܠܛܵܢܵܐ ܕܲܐܠܵܗܽܘܬܸܗ܀
082:087 ܐܸܠܵܐ ܠܡܽܘܫܚܲܬ ܐ̄ܢܵܫܵܐ ܢܚܸܬ ܗ̄ܘܵܐ ܟܲܕ ܡܲܩܪܸܒ ܗ̄ܘܵܐ܃
082:088 ܕܡܸܢ ܒܲܪ̄ܬ ܐ̄ܢܵܫܵܐ ܐܸܬܓܲܫܲܡ ܗ̄ܘܵܐ ܘܩܵܡ ܒܲܐܓܽܘܢܵܐ܀
082:089 ܘܫܲܪܝܼ ܒܨܲܘܡܵܐ ܕܲܠܠܲܥܒܽܘܬܵܐ ܘܵܐܣܽܘܛܽܘܬܵܐ܃
082:090 ܘܪܸܓܲܬ ܟܲܪܣܵܐ ܕܲܒܢܲܝܢܵܫܵܐ ܒܨܲܘܡܸܗ ܢܸܒܣܽܘܪ܀
082:091 ܘܲܢܚܲܘܸܐ ܠܲܢ ܒܲܐܝܢܵܐ ܙܲܝܢܵܐ ܡܨܸܐ ܙܵܟܸܐ ܐ̄ܢܵܫ܃
082:092 ܠܲܪ̈ܓܝܼܓܵܬܵܐ ܕܝܵܠܕ̈ܵܢ ܡܲܘܬܵܐ ܠܲܕܒܸܝܬ ܐܵܕܵܡ܀
082:093 ܘܠܽܘܩܒܲܠ ܪܸܓܬܵܐ ܕܗܵܝ ܡܸܐܟܽܘܠܬܵܐ ܕܸܐܟܲܠ ܐܵܕܵܡ܃
082:094 ܥܵܢܘܵܝܽܘܬܵܐ ܣܕܲܪ ܗ̄ܘܵܐ ܢܩܲܦܚܝܼܗ݀ ܙܲܕܝܼܩܵܐܝܼܬ܀
082:095 ܒܝܲܕ ܡܸܐܟܽܘܠܬܵܐ ܕܦܼܐܪܵܐ ܚܵܒܲܬ̤ ܚܲܘܵܐ ܘܵܐܕܵܡ܃
082:096 ܘܡܸܛܽܠ ܗܵܢܵܐ ܒܨܲܘܡܵܐ ܫܲܪܝܼ ܒܪܵܐ ܕܲܐܠܵܗܵܐ܀
082:097 ܐܲܪܒܥܝܼܢ ܝܲܘ̈ܡܝܼܢ ܨܵܡ ܐܲܝܟ ܡܽܘܫܸܐ ܘܲܐܝܟ ܐܸܠܝܼܵܐ܃
082:098 ܢܗܲܠܸܟ ܒܽܐܘܪܚܵܐ ܗܵܝ ܕܲܕܪܲܫܘ ܠܸܗ ܢܒܝܼܸ̈ܐ ܕܲܐܒܽܘܗ̄ܝ܀
082:099 ܩܲܕܸܡܘ ܕܵܩܽܘܗ̄ܝ ܒܲܢܒܝܼܽܘܬܵܐ ܚܵܙܝܲܬ ܐ̄ܪ̈ܵܙܸܐ܃
082:100 ܘܲܒܨܲܘ̈ܡܲܝܗܽܘܢ ܨܵܪܘ ܗ̄ܘܲܘ ܨܲܘܡܸܗ ܕܲܢܕܲܡܽܘܢ ܒܸܗ܀
082:101 ܫܲܪܝܼ ܒܨܲܘܡܵܐ ܘܙܵܥ ܐܲܪܟܽܘܢܸܗ ܕܥܵܠܡܵܐ ܡܸܢܸܗ܃
082:102 ܘܲܣܕܲܪ ܕܲܪܵܐ ܕܢܸܐܪܽܘܥ ܩܼܐܪܣܵܐ ܓܲܢ̄ܒܵܪܵܐܝܼܬ܀

▼ later lines