← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63404: JSBhom 82: on Our Lord's fight with Satan

Click on a word for lexical analysis
Click on a red-colored coordinate for comments and/or translations of the line

▲ earlier lines

082:159 ܐܲܪܒܥܝܼܢ ܝܲܘ̈ܡܝܼܢ ܣܕܲܪ ܢܸܣܝܽܘ̈ܢܲܘܗ̄ܝ ܐܵܟܸܠܩܲܪܨܵܐ܃
082:160 ܟܲܕ ܡܥܝܼܪ ܗ̄ܘܵܐ ܩܪ̈ܵܒܸܐ ܟܣܲܝ̈ܵܐ ܥܲܠ ܦܵܪܽܘܩܵܐ܀ 343
082:161 ܒܥܵܐ ܕܲܒܚܸܠܡܸ̈ܐ ܘܲܒܣܽܘܪ̈ܵܕܸܐ ܕܠܲܝ̈ܠܲܘܵܬܵܐ܃
082:162 ܢܲܩܪܸܒ ܥܲܡܸܗ ܘܠܲܝܬ ܗ̄ܘܵܐ ܐܲܬܪܵܐ ܠܕܲܓܵܠܽܘܬܸܗ܀
082:163 ܐܸܬܦܲܪܲܣ ܗ̄ܘܵܐ ܕܲܒܚܽܘ̈ܫܵܒܸܐ ܒܝܼ̈ܫܸܐ ܢܲܪܡܸܝܘܗ̄ܝ܃
082:164 ܘܠܵܐ ܡܩܲܒܸܠ ܗ̄ܘܵܐ ܠܸܩܛܸܗ ܛܲܡܵܐܐ ܕܩܲܕܝܼܫܵܐ ܗ̄ܘܵܐ܀
082:165 ܠܵܐ ܡܸܫܟܲܚ ܗ̄ܘܵܐ ܢܫܲܕܠܸܗ ܒܛܽܘܥܝܲܝ ܕܲܪ̈ܓܝܼܓܵܬܵܐ܃
082:166 ܕܠܵܐ ܐܝܼܬ ܗ̄ܘܵܐ ܒܸܗ ܚܛܝܼܬܵܐ ܕܪܵܓܵܐ ܝܲܬܝܼܪ̈ܵܬܵܐ܀
082:167 ܟܡܵܐ ܐܸܢ ܐܲܣܓܝܼ ܘܸܐܬܬܲܚܬܝܼ ܗ̄ܘܵܐ ܒܪܵܐ ܕܲܐܠܵܗܵܐ܃
082:168 ܘܠܵܐ ܐܸܬܬܲܚܬܝܼ ܐܸܠܵܐ ܥܕܲܡܵܐ ܠܪܲܘܡܸܗ ܕܵܐܕܵܡ܀
082:169 ܠܡܽܘܫܚܲܬ ܐܵܕܵܡ ܥܲܕܠܵܐ ܢܸܐܟܽܘܠ ܡܸܢ ܐܝܼܠܵܢܵܐ܃
082:170 ܢܚܸܬ ܒܲܪ ܚܲܝܵܐ ܕܢܲܚܸܐ ܠܵܐܕܵܡ ܕܲܚܛܵܐ ܘܸܐܒܲܕ܀
082:171 ܘܲܩܪܸܒ ܨܸܐܕܲܘܗ̄ܝ ܐܵܟܸܠܩܲܪܨܵܐ ܕܢܸܥܒܸܕ ܕܲܪܵܐ܃
082:172 ܘܠܲܝܬ ܗ̄ܘܵܐ ܚܛܝܼܬܵܐ ܕܗܝܼ ܗܘܵܬ̤ ܥܸܠܬܵܐ ܕܢܸܦܸܠ ܐܵܕܵܡ܀
082:173 ܝܼܚܝܼܕܵܝܵܐ ܟܲܕ ܡܸܢ ܡܲܪܝܲܡ ܐܸܬܕܲܡܝܼ ܠܲܢ܃
082:174 ܚܛܝܼܬܵܐ ܠܲܓܡܵܪ ܠܵܐ ܩܸܪܒܲܬ̤ ܠܸܗ ܕܝܼܚܝܼܕܵܝܵܐ ܗ̄ܘ܀
082:175 ܣܛܲܪ ܡܸܢ ܚܛܝܼܬܵܐ ܐܸܬܕܲܡܝܼ ܠܲܢ ܟܲܕ ܐܸܬܕܲܡܝܼ܃
082:176 ܘܲܒܡܲܦܽܘܠܬܵܐ ܠܵܐ ܐܸܬܕܲܡܝܼ ܠܲܕܒܸܝܬ ܐܵܕܵܡ܀
082:177 ܗܽܘ ܣܵܛܵܢܵܐ ܕܠܵܐ ܡܸܨܥܵܝܵܐ ܐܲܩܪܸܒ ܥܲܡܸܗ܃
082:178 ܕܠܲܝܬ ܗ̄ܘܵܐ ܚܲܘܵܐ ܠܵܐ ܐ̄ܬܵܐ ܚܸܘܝܵܐ ܐܲܝܟ ܩܲܕܡܵܝܵܐ܀
082:179 ܐܲܦܝܼ̈ܢ ܒܲܐܦܝܼ̈ܢ ܠܽܘܩܒܲܠ ܡܲܠܟܵܐ ܢܦܲܩ ܡܵܪܽܘܕܵܐ܃
082:180 ܕܗܽܘ ܢܸܬܟܲܬܲܫ ܥܲܠ ܕܲܩܫܸܐ ܗ̄ܘܵܐ ܩܪܵܒܵܐ ܡܸܢܸܗ܀
082:181 ܘܠܵܐ ܫܲܕܲܪ ܗ̄ܘܵܐ ܚܸܘܝܵܐ ܠܘܵܬܸܗ ܕܠܲܝܬ ܗ̄ܘܵܐ ܚܲܘܵܐ܃
082:182 ܘܗܽܘ ܒܲܩܢܽܘܡܸܗ ܢܲܣܝܸܗ ܠܲܒܪܵܐ ܕܠܵܐ ܡܸܨܥܵܝܵܐ܀
082:183 ܘܲܐܪܒܥܝܼܢ ܝܲܘ̈ܡܝܼܢ ܐܸܬܦܲܪܲܣ ܗ̄ܘܵܐ ܘܠܵܐ ܐܸܫܟܲܚ ܗ̄ܘܵܐ܃
082:184 ܥܸܠܬܵܐ ܕܝܵܗܒܵܐ ܐܝܼܕܵܐ ܠܢܸܟܠܸܗ ܨܹܝܕ ܦܵܪܽܘܩܵܐ܀
082:185 ܠܵܐ ܒܫܽܘ̈ܓܵܫܸܐ ܘܠܵܐ ܒܕܽܘ̈ܚܵܠܸܐ ܘܠܵܐ ܒܣܽܘܪ̈ܵܕܸܐ܃
082:186 ܘܠܵܐ ܒܚܽܘ̈ܫܵܒܸܐ ܘܠܵܐ ܒܚܸܙܘ̈ܵܢܸܐ ܕܕܲܓܵܠܽܘܬܵܐ܀
082:187 ܘܠܵܐ ܟܲܕ ܣܵܕܲܪ ܫܪܲܓܪ̈ܵܓܝܵܬܸܗ ܒܠܲܝ̈ܠܲܘܵܬܵܐ܃
082:188 ܘܠܵܐ ܒܼܐܝ̈ܡܵܡܸܐ ܟܲܕ ܡܸܬܚܲܫܲܚ ܒܲܕܚܝܼ̈ܠܵܬܵܐ܀
082:189 ܫܓܝܼܫ ܗ̄ܘܵܐ ܒܝܼܫܵܐ ܘܲܒܥܸܠܕܲܪܸܗ ܐܵܕܵܡܵܣ ܗ̄ܘܵܐ܃
082:190 ܟܹܐܦܵܐ ܕܠܵܐ ܐܝܼܬ ܡܸܕܸܡ ܕܡܲܟܸܐ ܠܫܲܪܝܼܪܽܘܬܵܗ݀܀
082:191 ܐܲܪܒܥܝܼܢ ܝܲܘ̈ܡܝܼܢ ܪܽܘܚܵܢܵܐܝܼܬ ܐܲܩܪܸܒ ܥܲܡܸܗ܃
082:192 ܘܲܒܟܽܠ ܦܽܘܪ̈ܣܝܼܢ ܥܠܲܘܗ̄ܝ ܦܵܢܝܵܐ ܗ̄ܘܵܬ̤ ܚܲܝܵܒܽܘܬܵܐ܀
082:193 ܘܲܒܫܽܘܠܵܡܵܐ ܕܲܐܪܒܥܝܼܢ ܝܲܘ̈ܡܝܼܢ ܟܦܸܢ ܗ̄ܘܵܐ ܡܵܪܲܢ܃
082:194 ܘܲܗܘܵܐ ܐܲܬܪܵܐ ܠܵܐܟܸܠܩܲܪܨܵܐ ܕܲܢܢܲܣܸܐ ܗ̄ܘܵܐ܀
082:195 ܟܦܸܢ ܗ̄ܘܵܐ ܡܫܝܼܚܵܐ ܡܕܲܒܪܵܢܵܐܝܼܬ ܘܲܟܝܵܢܵܐܝܼܬ܃
082:196 ܠܬܲܪ̈ܬܲܝܗܸܝܢ ܓܹܝܪ ܐܝܼܬ ܗ̄ܘܵܐ ܥܸܠܬܵܐ ܒܝܼܚܝܼܕܵܝܵܐ܀
082:197 ܡܕܲܒܪܵܢܵܐܝܼܬ ܥܲܠ ܕܲܐܠܵܗܵܐ ܗ̄ܘ ܥܲܡ ܝܵܠܽܘܕܸܗ܃
082:198 ܘܲܟܝܵܢܵܐܝܼܬ ܥܲܠ ܕܸܐܬܓܲܫܲܡ ܡܸܢ ܒܲܪ̄ܬ ܐܵܕܵܡ܀
082:199 ܟܦܸܢ ܐܲܝܟ ܕܲܟܦܸܢ ܒܽܐܘܪܚܵܐ ܕܪܵܡܵܐ ܗ̄ܝ ܡܸܢ ܦܽܘܫܵܩܵܐ܃
082:200 ܘܠܲܡܢܲܣܝܵܢܵܐ ܗܘܵܬ̤ ܠܸܗ ܥܸܠܬܵܐ ܢܥܝܼܪ ܐܲܓܽܘܢܵܐ܀
082:201 ܘܲܩܪܸܒ ܨܸܐܕܲܘܗ̄ܝ ܐܲܝܟ ܝܵܨܽܘܦܵܐ ܘܲܐܝܟ ܓܵܫܽܘܫܵܐ܃
082:202 ܘܲܐܝܟ ܡܵܠܽܘܟܵܐ ܕܲܡܥܲܕܪܵܢܵܐ ܗ̄ܘ ܕܲܐܝܢܵܐ ܕܲܓܡܝܼܪ܀
082:203 ܫܲܪܝܼ ܕܢܼܐܡܲܪ ܕܸܐܢܗܽܘ ܕܲܐܢ̄ܬ ܗ̄ܽܘ ܒܪܵܐ ܕܲܐܠܵܗܵܐ܃
082:204 ܐ̄ܡܲܪ ܡܸܢ ܟܼܐܦܸ̈ܐ ܢܸܗܘܸܐ ܠܲܚܡܵܐ ܘܬܲܪܣܵܐ ܢܲܦܫܵܟ܀
082:205 ܚܙܵܐ ܣܵܛܵܢܵܐ ܕܒܵܥܸܐ ܠܲܚܡܵܐ ܐܲܝܢܵܐ ܕܲܟܦܸܢ܃
082:206 ܘܲܒܗܵܝ ܥܸܠܬܵܐ ܕܝܵܗܒܵܐ ܐܝܼܕܵܐ ܡܢܲܣܸܐ ܗ̄ܘܵܐ ܠܸܗ܀
082:207 ܘܠܲܘ ܐܲܝܟ ܣܵܢܐܵܐ ܘܲܒܥܸܠܕܲܪܵܐ ܚܲܘܝܼ ܢܲܦܫܸܗ܃
082:208 ܐܸܠܵܐ ܪܵܚܡܵܐ ܘܲܫܩܝܼܠ ܛܲܥܢܵܐ ܕܫܲܦܝܼܪ̈ܵܬܵܐ܀
082:209 ܐܲܝܟ ܡܲܠܲܐܟܸ̈ܐ ܡܵܐ ܕܡܸܫܬܲܕܪܝܼܢ ܨܹܝܕ ܩܲܕܝܼ̈ܫܸܐ܃

▼ later lines