The Comprehensive Aramaic Lexicon

082:277	ܐܸܢ ܠܲܡ ܐܲܢ̄ܬ ܗ̄ܽܘ ܒܪܵܐ ܕܲܐܠܵܗܵܐ ܐܵܡܲܪ ܗ̄ܘܵܐ ܠܸܗ܃
082:278	ܐܵܟܸܠܩܲܪܨܵܐ ܥܒܸܕ ܡܸܢ ܟܼܐܦܸ̈ܐ ܠܲܚܡܵܐ ܘܲܐܟܽܘܠ܀
082:279	ܘܠܽܘܩܒܲܠ ܪܲܘܡܸܗ ܕܲܡܢܲܣܝܵܢܵܐ ܦܲܢܝܼ ܡܵܪܲܢ܃
082:280	ܘܲܒܡܲܟܝܼܟܽܘܬ ܪܽܘܚܵܐ ܡܲܠܸܠ ܟܲܕ ܐܵܡܲܪ ܠܸܗ܀
082:281	ܠܵܐ ܗ̄ܘܵܐ ܒܠܲܚܡܵܐ ܘܡܲܝ̈ܵܐ ܒܲܠܚܽܘܕ ܚܵܝܸܐ ܐ̄ܢܵܫܵܐ܃
082:282	ܐܸܠܵܐ ܒܡܸܠܲܬ ܦܽܘܡܸܗ ܕܡܵܪܝܵܐ ܚܵܝܸܐ ܟܽܠܢܵܫ܀
082:283	ܡܸܠܬܸܗ ܕܡܵܪܝܵܐ ܚܲܝܸ̈ܐ ܐܝܼܬܸܝܗ݀ ܠܲܒܢܲܝܢܵܫܵܐ܃
082:284	ܘܠܵܐ ܗ̄ܘܵܐ ܒܠܲܚܡܵܐ ܘܡܲܝ̈ܵܐ ܚܵܝܸܐ ܐܲܝܟ ܕܵܐܡܲܪ ܐܲܢ̄ܬ܀
082:285	ܒܪܵܐ ܚܲܟܝܼܡܵܐ ܙܲܝܢܵܐ ܐܲܦܸܩ ܡܸܢ ܒܸܝܬ ܐܲܒܽܘܗ̄ܝ܃
082:286	ܕܒܸܗ ܢܸܐܪܽܘܥ ܗ̄ܘܵܐ ܠܵܐܟܸܠܩܲܪܨܵܐ ܕܲܐܩܪܸܒ ܥܲܡܸܗ܀
082:287	ܫܵܛܸܗ ܠܟܲܦܢܵܐ ܘܠܵܐ ܨܒܵܐ ܕܢܸܥܒܸܕ ܐܵܬܵܐ ܬܲܡܵܢ܃
082:288	ܘܫܵܛ ܪܵܡܽܘܬܵܐ ܘܠܵܐ ܨܒܵܐ ܢܚܲܘܸܐ ܕܒܲܪ ܐܲܠܵܗܵܐ ܗ̄ܘ܀
082:289	ܘܫܵܛ ܠܝܼܕܲܥܬܵܐ ܘܲܐܝܟ ܠܵܐ ܝܲܕܥܸܗ ܠܲܒܥܸܠܕܲܪܵܐ܃
082:290	ܡܡܲܠܸܠ ܗ̄ܘܵܐ ܠܸܗ ܟܲܕ ܡܸܬܢܲܣܸܐ ܒܡܲܟܝܼܟܽܘܬܵܐ܀
082:291	ܘܬܵܢܸܐ ܠܩܽܘܒܠܸܗ ܟܬܵܒܵܐ ܕܡܽܘܫܸܐ ܕܡܸܠܬܸܗ ܕܡܵܪܝܵܐ܃
082:292	ܝܵܗܒܵܐ ܚܲܝܸ̈ܐ ܘܲܕܠܵܐ ܠܲܚܡܵܐ ܡܨܸܐ ܚܵܝܸܐ ܐ̄ܢܵܫ܀
082:293	ܘܲܒܠܲܥ ܒܝܼܫܵܐ ܒܓܸܐܪܵܐ ܕܲܢܦܲܩ ܡܸܢ ܒܸܝܬ ܙܲܝܢܸܗ܃
082:294	ܕܲܐܒܵܐ ܟܲܣܝܵܐ ܒܡܲܟܝܼܟܽܘܬܸܗ ܕܝܼܚܝܼܕܵܝܵܐ܀
082:295	ܘܬܽܘܒ ܐܸܬܡܲܪܡܲܪ ܕܲܒܢܸܣܝܵܢܵܐ ܢܸܬܢܸܐ ܕܲܪܵܐ܃
082:296	ܘܲܠܙܵܟܽܘܬܵܐ ܡܸܬܪܲܓܪܲܓ ܗ̄ܘܵܐ ܒܡܲܪܵܚܽܘܬܸܗ܀
082:297	ܘܕܲܒܪܸܗ ܠܡܵܪܲܢ ܘܲܐܩܝܼܡܸܗ ܗ̄ܘܵܐ ܠܥܸܠ ܡܸܢ ܟܸܢܦܵܐ܃
082:298	ܕܗܲܝܟܲܠ ܩܽܘܕܫܵܐ ܕܢܸܥܒܸܕ ܬܲܡܵܢ ܕܲܪܵܐ ܕܲܬܪܸܝܢ܀
082:299	ܗܵܪܟܵܐ ܫܸܡܥܵܐ ܠܥܸܠ ܡܸܢ ܫܸܡܥܵܐ ܗܲܘ ܕܲܥܝܵܕܵܐ܃
082:300	ܒܵܥܝܵܐ ܢܲܦܫܵܐ ܘܟܸܢ ܡܸܣܬܲܟܠܵܐ ܠܲܕܡܸܬܐܲܡܪ̈ܵܢ܀
082:301	ܠܓܲܘ ܡܸܢܵܟ ܨܽܘܬ ܪܽܘܚܵܢܵܐܝܼܬ ܐܸܢ ܨܵܐܸܬ ܐܲܢ̄ܬ܃
082:302	ܠܵܐ ܠܒܲܪ ܢܸܗܘܸܐ ܦܵܢܸܐ ܚܝܵܪܵܟ ܡܵܐ ܕܫܵܡܲܥ ܐܲܢ̄ܬ܀
082:303	ܟܬܝܼܒ ܗܵܟܲܢܵܐ ܕܕܲܒܪܸܗ ܠܝܸܫܽܘܥ ܐܵܟܸܠܩܲܪܨܵܐ܃
082:304	ܘܲܐܩܝܼܡܸܗ ܗ̄ܘܵܐ ܠܥܸܠ ܡܸܢ ܟܸܢܦܸܗ ܕܗܲܝܟܲܠ ܩܽܘܕܫܵܐ܀
082:305	ܘܵܐܠܨܵܐ ܗܵܪܟܵܐ ܥܲܠ ܣܽܘ̈ܟܵܠܸܐ ܪ̈ܽܘܚܵܢܵܝܸܐ܃
082:306	ܘܥܲܠ ܪܸܥܝܵܢܵܐ ܕܗܲܝܡܵܢܽܘܬܵܐ ܕܲܡܠܸܐ ܬܸܗܪܵܐ܀
082:307	ܕܢܸܒܥܸܐ ܗܲܘܢܵܐ ܕܲܐܝܟܲܢ ܐܸܫܟܲܚ ܐܵܟܸܠܩܲܪܨܵܐ܃
082:308	ܕܢܸܕܒܲܪ ܢܲܝܬܸܐ ܠܒܲܪ ܐܲܠܵܗܵܐ ܠܗܲܝܟܲܠ ܩܽܘܕܫܵܐ܀
082:309	ܐܲܝܟܲܢ ܕܲܒܪܸܗ ܐܲܝܟ ܓܲܢ̄ܒܵܪܵܐ ܠܲܐܝܢܵܐ ܕܲܡܚܝܼܠ܃
082:310	ܚܵܣ ܬܸܬܡܲܠܲܠ ܕܲܡܚܝܼܠ ܡܸܡܬܽܘܡ ܒܪܵܐ ܕܲܐܠܵܗܵܐ܀
082:311	ܐܲܝܟܲܢ ܕܲܒܪܸܗ ܟܲܕ ܠܵܐ ܒܵܥܸܐ ܕܢܼܐܙܲܠ ܥܲܡܸܗ܃
082:312	ܚܵܣ ܐܵܦ ܗܵܕܸܐ ܬܸܣܲܩ ܡܸܡܬܽܘܡ ܥܲܠ ܪܸܥܝܵܢܵܐ܀
082:313	ܘܲܐܝܟܲܢ ܕܲܒܪܸܗ ܠܗܲܘ ܓܲܢ̄ܒܵܪܵܐ ܕܥܵܠܡܸ̈ܐ ܡܵܪܲܢ܃
082:314	ܘܥܲܠ ܐܲܩܝܼܡܸܗ ܠܥܸܠ ܡܸܢ ܟܸܢܦܵܐ ܕܗܲܝܟܲܠܩܽܘܕܫܵܐ܀
082:315	ܐܵܟܸܠܩܲܪܨܵܐ ܥܒܲܕ ܗ̄ܘܵܐ ܕܲܪܵܐ ܗܲܘ ܩܲܕܡܵܝܵܐ܃
082:316	ܘܚܵܒ ܗ̄ܘܵܐ ܒܕܲܪܵܐ ܘܬܽܘܒ ܢܸܬܟܲܬܲܫ ܡܸܬܪܲܓܪܲܓ ܗ̄ܘܵܐ܀
082:317	ܘܲܐܠܨܲܬ̤ ܗ̄ܘܵܬ̤ ܠܸܗ ܢܸܥܒܸܕ ܥܲܡܸܗ ܕܲܪܵܐ ܕܲܬܪܸܝܢ܃
082:318	ܘܲܕܠܵܐ ܥܸܠܬܵܐ ܠܵܐ ܐܝܼܬ ܦܽܘܪܣܵܐ ܕܢܸܗܘܸܐ ܕܲܪܵܐ܀
082:319	ܠܕܲܪܵܐ ܩܲܕܡܵܐ ܟܲܦܢܵܐ ܗܘܵܐ ܠܸܗ ܥܸܠܬܵܐ ܢܸܗܘܸܐ܃
082:320	ܡܸܛܽܠ ܟܲܦܢܸܗ ܕܒܲܪ ܐܲܠܵܗܵܐ ܢܲܣܝܸܗ ܒܝܼܫܵܐ܀
082:321	ܘܲܥܒܲܕ ܕܲܪܵܐ ܘܸܐܫܬܲܪܝܲܬ̤ ܗ̄ܘܵܬ̤ ܥܸܠܬܵܐ ܕܲܗܘܵܬܹ܃
082:322	ܘܥܸܠܬܵܐ ܐ̄ܚܪܼܬܵܐ ܠܕܲܪܵܐ ܕܲܬܪܸܝܢ ܡܸܬܒܲܥܝܵܐ ܗ̄ܘܵܬܹ܀
082:323	ܘܡܲܕܒܪܵܐ ܕܬܲܡܵܢ ܡܸܬܢܲܣܸܐ ܗ̄ܘܵܐ ܒܪܵܐ ܕܲܐܠܵܗܵܐ܃
082:324	ܠܵܐ ܐܝܼܬ ܗ̄ܘܵܐ ܒܸܗ ܥܸܠܬܵܐ ܕܝܵܗܒܵܐ ܠܕܲܪܵܐ ܐܝܼܕܵܐ܀
082:325	ܡܸܬܡܲܪܡܲܪ ܗ̄ܘܵܐ ܐܵܟܸܠܩܲܪܨܵܐ ܘܡܸܬܚܲܫܲܒ ܗ̄ܘܵܐ܃
082:326	ܕܡܲܢ ܕܹܝܢ ܝܲܗ̄ܒ ܠܝܼ ܥܽܘܡܩܵܐ ܗܵܪܟܵܐ ܐܲܘ ܚܲܒܵܪܵܐ܀
082:327	ܘܲܡܓܲܪܸܓ ܗ̄ܘܝܼܬ ܘܲܡܫܲܕܸܠ ܠܸܗ ܕܢܸܫܕܸܐ ܢܲܦܫܸܗ܃