The Comprehensive Aramaic Lexicon

126:057	ܘܥܲܠ ܕܸܐܬܝܲܥܲܢ ܐܵܕܵܡ ܒܲܥܕܸܢ ܥܲܠ ܐܝܼܠܵܢܵܐ܃
126:058	ܨܒܵܐ ܦܵܪܽܘܩܲܢ ܕܲܠܝܲܥܢܽܘܬܵܐ ܒܨܲܘܡܸܗ ܢܸܒܣܽܘܪ܀
126:059	ܘܕܲܒܡܸܐܟܽܘܠܬܵܐ ܗܘܵܬ̤ ܠܲܚܛܝܼܬܵܐ ܡܲܥܠܵܢܽܘܬܵܐ܃
126:060	ܒܥܵܢܘܵܝܽܘܬܵܐ ܙܟܵܗ݀ ܐܵܦ ܪܲܕܦܵܗ݀ ܡܸܢ ܐ̄ܢܵܫܽܘܬܵܐ܀
126:061	ܡܸܢ ܗܵܐ ܡܸܟܵܐ ܫܲܪܝܼ ܗ̄ܘܵܐ ܒܸܗ ܚܠܝܼܨܵܐ ܒܕܲܪܸܗ܃
126:062	ܕܲܒܗܵܝ ܕܲܙܟܵܐ ܒܵܗ݀ ܢܸܬܚܲܝܲܒ ܒܲܪ ܐܲܒܕܵܢܵܐ܀
126:063	ܐܵܦ ܙܵܕܸܩ ܗ̄ܘܵܐ ܕܒܵܗ݀ ܒܲܡܚܽܘܬܵܐ ܕܲܡܚܵܐ ܢܸܒܠܲܥ܃
126:064	ܘܲܒܗܲܘ ܩܸܛܠܵܐ ܕܲܩܛܲܠ ܢܡܽܘܬ ܩܵܛܸܠ ܐ̄ܢܵܫܵܐ܀
126:065	ܚܙܵܐ ܒܥܸܠܕܲܪܵܐ ܠܲܐܬܠܝܼܛ ܩܽܘܫܬܵܐ ܕܩܵܡ ܒܲܐܓܽܘܢܵܐ܃
126:066	ܘܸܐܬܛܲܝܲܒ ܗ̄ܘܵܐ ܠܡܸܬܟܲܬܵܫܽܘ ܚܲܣܝܼܢܵܐܝܼܬ܀
126:067	ܣܲܒܪܵܐ ܘܩܸܢܛܵܐ ܐܝܼܬ ܗ̄ܘܵܐ ܠܒܝܼܫܵܐ ܟܲܕ ܫܲܪܝܼ ܗ̄ܘܵܐ܃
126:068	ܘܟܲܕ ܕܵܚܸܠ ܗ̄ܘܵܐ ܡܸܬܠܲܒܲܒ ܗ̄ܘܵܐ ܥܲܠ ܬܲܟܬܽܘܫܵܐ܀
126:069	ܡܵܐ ܕܲܡܚܵܝܗ̄ܝ ܗ̄ܘܵܐ ܪܝܼܚܵܐ ܕܦܲܓܪܵܐ ܚܒܲܨ ܥܲܠ ܕܲܪܵܐ܃
126:070	ܩܪܸܒ ܢܸܬܟܲܬܲܫ ܬܲܟܣܸܗ ܩܸܢܛܵܐ ܕܲܐܠܵܗܽܘܬܵܐ܀
126:071	ܒܠܝܼܥܝܼܢ ܗ̄ܘܲܘ ܠܸܗ ܓܸܐܪܸ̈ܐ ܠܒܝܼܫܵܐ ܩܕܵܡ ܬܲܟܬܽܘܫܵܐ܃
126:072	ܘܓܽܘܡܕܵܢܵܐܝܼܬ ܡܸܬܥܲܙܸܐ ܗ̄ܘܵܐ ܕܢܸܐܪܽܘܥ ܕܲܪܵܐ܀
126:073	ܫܡܝܼܥܝܼܢ ܗ̄ܘܲܘ ܠܸܗ ܥܝܼܪܸ̈ܐ ܕܣܲܒܲܪܘ ܥܲܠ ܡܲܘܠܵܕܸܗ܃
126:074	ܘܡܸܬܒܲܝܲܢ ܗ̄ܘܵܐ ܐܵܦ ܒܲܡܓܽܘ̈ܫܸܐ ܘܩܽܘܪ̈ܒܵܢܲܝܗܽܘܢ܀
126:075	ܫܡܝܼܥ ܗ̄ܘܵܐ ܠܸܗ ܬܽܘܒ ܩܵܠܸܗ ܕܲܐܒܵܐ ܗܲܘ ܕܥܲܠ ܢܲܗܪܵܐ܃
126:076	ܘܒܵܬܲܪ ܗܵܠܸܝܢ ܐܲܝܟ ܡܲܪܵܚܵܐ ܡܸܬܦܲܩܲܪ ܗ̄ܘܵܐ܀
126:077	ܡܵܐ ܕܲܩܪܸܒ ܗ̄ܘܵܐ ܐܲܘܫܸܛ ܐܝܼܕܵܐ ܓܵܫܲܬ ܓܽܘܫܡܵܐ܃
126:078	ܐܸܬܚܲܝܲܠ ܠܸܗ ܕܢܸܥܒܸܕ ܕܲܪܵܐ ܒܲܬܟܝܼܠܽܘܬܵܐ܀
126:079	ܘܲܟܒܲܪ ܐܲܚ̈ܲܝ ܐܲܗܡܝܼ ܗ̄ܘܵܐ ܠܸܗ ܡܸܢ ܟܽܠ ܕܲܪ̈ܝܼܢ܃
126:080	ܕܲܒܗܲܘ ܕܲܪܵܐ ܢܸܬܟܲܬܲܫ ܗ̄ܘܵܐ ܥܲܠ ܙܵܟܽܘܬܵܐ܀
126:081	ܟܲܢܸܫ ܝܲܗ̈ܠܲܘܗ̄ܝ ܨܹܝܕ ܡܲܫܪܝܼܬܸܗ ܘܲܢܩܲܫ ܦܲܣܸܗ܃

126:082	ܩܪܵܐ ܠܸܓܝܽܘ̈ܢܲܘܗ̄ܝ ܘܲܐܩܝܼܡ ܣܸܕܪ̈ܲܘܗ̄ܝ ܘܲܐܟܪܸܟ ܓܽܘ̈ܕܲܘܗ̄ܝ܀

126:083	ܥܲܬܸܕ ܓܲܝ̈ܣܲܘܗ̄ܝ ܙܲܡܸܢ ܬܸܓܡܲܘ̈ܗ̄ܝ ܛܲܝܸܒ ܟܸܢ̈ܫܲܘܗ̄ܝ܃
126:084	ܨܵܒ ܣܝܼ̈ܥܵܬܸܗ ܘܲܡܛܲܘ ܫܸܚܪ̈ܲܘܗ̄ܝ ܡܸܢ ܟܽܠ ܓܲܒ̈ܝܼܢ܀
126:085	ܐ̄ܬܲܘ ܠܼܐܝܵܠܸܗ ܟܽܠܗܽܘܢ ܛܽܘ̈ܠܩܲܘܗ̄ܝ ܡܸܢ ܟܽܠ ܦܸܢ̈ܝܵܢ܃
126:086	ܫܼܐܕܸ̈ܐ ܫܟܝܼܪܸ̈ܐ ܘܕܲܝ̈ܘܸܐ ܠܙܝܼ̈ܙܸܐ ܒܸܐܣܟܼܡܲܝ̈ܗܽܘܢ܀
126:087	ܢܫܲܒ ܗ̄ܘܵܐ ܫܽܘܩܪܵܐ ܘܠܲܒܸܛ ܐܸܢܽܘܢ ܠܲܩܠܲܦ̈ܠܵܦܸܐ܃
126:088	ܕܢܸܐܚܕܽܘܢ ܕܲܪܵܐ ܥܲܡ ܓܲܘܙܲܠܬܵܐ ܠܒܝܼܫܲܬ ܦܲܓܪܵܐ܀
126:089	ܚܛܝܼܬܵܐ ܢܸܦܩܲܬ̤ ܐܲܝܟ ܥܲܠܥܵܠܵܐ ܥܲܠ ܟܽܠ ܣܲܘ̈ܦܝܼܢ܃
126:090	ܕܬܸܟܢܽܘܫ ܚܲܒܬܵܐ ܥܲܠ ܬܲܟܬܽܘܫܵܐ ܕܫܲܠܗܸܒܝܼܬܵܐ܀
126:091	ܐ̄ܬܲܘ ܙܝܼ̈ܙܵܢܸܐ ܟܽܘ̈ܒܸܐ ܘܝܲܥܪܸ̈ܐ ܩܢܲܝ̈ܵܐ ܪ̈ܥܝܼܥܸܐ܃
126:092	ܕܦܲܚܝܼܚܽܘܬܗܽܘܢ ܠܽܘܩܒܲܠ ܢܽܘܪܵܐ ܩܪܵܒܵܐ ܬܸܥܒܸܕ܀
126:093	ܩܪܸܒ ܣܵܛܵܢܵܐ ܕܲܢܠܲܒܸܛ ܗ̄ܘܵܐ ܠܚܲܝ̈ܠܲܘܵܬܸܗ܃
126:094	ܐܲܝܟ ܪܲܒܚܲܝܠܵܐ ܠܣܸܕܪ̈ܲܝ ܚܲܝܠܵܐ ܥܲܠ ܬܲܟܬܽܘܫܵܐ܀
126:095	ܬܲܘ ܚܲܝ̈ܠܲܘܵܬܝ ܡܸܢ ܟܽܠ ܓܲܒ̈ܝܼܢ ܐܲܝܟ ܟܲܫܝܼܪܸ̈ܐ܃
126:096	ܕܲܪܵܐ ܚܲܕܬܵܐ ܦܓܲܥ ܒܝܼ ܝܲܘܡܵܢ ܠܵܐ ܢܲܫܦܸܠ ܒܸܗ܀
126:097	ܐܲܪܦܲܘ ܐܝܼܕܵܐ ܒܟܽܠ ܬܲܟ̈ܬܽܘܫܝܼܢ ܕܲܒܟܽܠ ܦܸܢ̈ܝܵܢ܃
126:098	ܘܲܒܗܵܢܵܐ ܚܲܕ ܬܲܘ ܢܸܬܟܲܫܲܪ ܒܽܐܘܡܵܢܽܘܬܵܐ܀
126:099	ܬܲܘ ܐܸܬܟܲܢܲܫܘ ܐܵܦ ܐܸܬܚܲܟܲܡܘ ܘܲܗܘܲܘ ܚܝܼܨܝܼܢ܃
126:100	ܨܡܽܘܕܘ ܣܝܼܥܲܬܟܽܘܢ ܠܵܐ ܬܸܬܒܲܕܲܪ ܐܲܝܟ ܕܲܡܥܵܕܵܐ܀
126:101	ܣܲܩܘ ܡܸܢ ܦܲܚ̈ܬܸܐ ܘܡܸܢ ܗܲܘ̈ܵܬܸܐ ܘܡܸܢ ܓܲܘ ܢܸܩ̈ܥܸܐ܃
126:102	ܗܵܕܸܐ ܗ̄ܝ ܗܸܪܬܵܐ ܕܟܽܠܵܗ݀ ܬܼܒܸܝܠ ܬܲܘ ܢܸܒܛܲܠ ܒܵܗ݀܀
126:103	ܢܸܗܘܸܐ ܫܸܠܝܵܐ ܒܲܐܪܒܲܥ ܦܸܢ̈ܝܵܢ ܥܲܕ ܙܵܟܸܝܢܲܢ܃
126:104	ܠܵܐ ܬܸܦܟܲܗ݀ ܠܵܗ݀ ܒܓܲܒܵܐ ܐ̄ܚܪܼܢܵܐ ܐܽܘܡܵܢܽܘܬܲܢ܀
126:105	ܐܸܢܗܽܘ ܕܡܲܡܠܸܟ ܫܲܝܢܵܐ ܩܲܠܝܼܠ ܠܵܐ ܬܸܬܟܲܡܪܽܘܢ܃
126:106	ܐܝܼܬ ܗ̄ܽܘ ܠܲܢ ܓܹܝܪ ܙܲܒܢܵܐ ܕܢܸܕܠܽܘܚ ܐܲܝܟ ܨܸܒܝܵܢܲܢ܀
126:107	ܐܸܢܗܽܘ ܕܢܵܝܚܵܐ ܒܪܝܼܬܵܐ ܡܸܢܲܢ ܠܲܘ ܒܸܛܠܵܢܵܐ ܗ̄ܘ܃