The Comprehensive Aramaic Lexicon

126:122	ܘܲܒܠܽܘ̈ܚܫܵܬܵܐ ܠܵܐ ܬܸܬܢܲܓܕܽܘܢ ܨܹܝܕ ܚܲܪ̈ܵܫܸܐ܀
126:123	ܠܵܐ ܒܽܘܗܵܠܵܐ ܂ ܂ ܂ ܐܸܠܵܐ ܙܟܲܝܬܽܘܢ܀
126:124	ܐܵܦ ܠܵܐ ܬܸܣܩܽܘܢ ܥܲܡ ܙܲܟܘܪܸ̈ܐ ܕܠܵܐ ܐܲܡܠܸܟܬܽܘܢ܃
126:125	ܠܵܐ ܬܸܫܬܲܕܽܘܢ ܨܹܝܕ ܕܸܡ̈ܘܵܬܵܐ ܕܡܝܼ̈ܬܸܐ ܕܲܫܟܸܒܘ܀
126:126	ܠܵܐ ܬܚܲܘܽܘܢ ܠܸܗ ܛܸܠܵܢ̈ܝܵܬܵܐ ܠܲܐܝܢܵܐ ܕܨܵܒܸܐ܃
126:127	ܠܵܐ ܬܽܘܒ ܬܢܲܨܪܽܘܢ ܐܵܦܠܵܐ ܬܢܲܗܡܽܘܢ ܕܲܓܵܠܵܐܝܼܬ܀
126:128	ܕܲܒܓܲܠܝ̈ܵܬܵܐ ܡܸܫܬܲܠܛܝܼܢ ܚ̄ܢܲܢ ܐܸܢ ܗܽܘ ܕܢܸܙܟܸܐ܃
126:129	ܠܵܐ ܬܸܣܬܲܢܩܽܘܢ ܥܲܠ ܛܸܠ̈ܵܠܸܐ ܕܕܸܡ̈ܘܵܢ ܕܸܡ̈ܘܵܢ܀
126:130	ܕܲܐܦܝܼ̈ܢ ܒܲܐܦܝܼ̈ܢ ܓܲܒܲܢ ‍{‍ܡܡܲܠܸܝܢ‍}‍‍<‍ܡܡܲܠܠܝܼܢ‍>‍ ܡܵܐ ܕܲܙܟܲܝܢܲܢ܃
126:131	ܗܵܪܟܵܐ ܗ̄ܘ ܕܲܪܵܐ ܕܟܽܠܵܗ݀ ܐܲܪܥܵܐ ܠܸܗ ܐܸܬܟܲܫܲܪܘ܀
126:132	ܚܕܵܐ ܠܬܲܪܬܸܝܢ ܗ̄ܝܼ ܕܲܐܘ ܐܲܡܠܸܟܢܲܢ ܐܲܘ ܐܲܚܦܲܪܢܲܢ܃
126:133	ܐܸܢ ܗܽܘ ܕܢܸܙܟܸܝܢ ܠܲܘ ܡܸܕܸܡ ܗ̄ܽܘ ܕܲܙܟܝܼܬ ܠܵܐܕܵܡ܀
126:134	ܘܸܐܢܗܽܘ ܕܸܐܙܟܸܝܘܗ̄ܝ ܟܸܢ ܐܸܫܬܲܒܗܲܪ ܥܲܠ ܙܵܟܽܘܬܵܐ܃
126:135	ܠܕܲܪܵܐ ܐ̄ܚܪܼܢܵܐ ܢܛܝܼܪ ܠܸܗ ܟܠܝܼܠܵܐ ܠܟܽܠ ܐܲܬܠܝܼܛܵܐ܀
126:136	ܒܗܵܢܵܐ ܗ̄ܘ ܫܵܩܸܠ ܐܲܝܢܵܐ ܕܙܵܟܸܐ ܘܡܸܬܟܲܠܲܠ ܒܸܗ܃
126:137	ܗܵܐ ܚܠܵܦ ܥܵܠܡܵܐ ܗܲܘ ܕܲܙܟܝܼܬܸܗ ܐܸܬܵܐ ܕܢܲܩܪܸܒ܀
126:138	ܘܪܸܓܠܵܐ ܕܬܸܥܫܲܬ̤ ܡܸܢ ܬܲܟܬܽܘܫܵܐ ܨܵܒܸܐ ܕܲܢܩܝܼܡ܃
126:139	ܥܝܵܪܬܸܗ ܕܵܐܕܵܡ ܒܵܥܸܐ ܕܢܸܬܒܲܥ ܕܲܩܛܲܠܬܸܗ ܗ̄ܘܝܼܬ܀
126:140	ܘܸܐܢ ܙܵܟܸܐ ܠܝܼ ܒܥܵܐܦܵܐ ܦܵܪܲܥ ܟܽܠ ܕܲܐܣܒܸܠܬܸܗ܃
126:141	ܚܠܵܦ ܐܲܬܠܝܼܛܵܐ ܕܦܲܫܚܸܬ ܘܲܫܕܝܼܬ ܗܵܐ ܡܸܬܟܲܬܲܫ܀
126:142	ܕܲܪܵܐ ܡܚܲܕܸܬ ܕܲܠܚܲܝܵܒܵܐ ܟܠܝܼܠܵܐ ܢܸܬܸܠ܃
126:143	ܕܢܲܗܦܸܟ ܙܵܟܽܘܬܝ ܐܲܥܝܼܪ ܗܸܪܬܵܐ ܠܡܸܬܟܲܬܵܫܽܘ܀
126:144	ܘܲܕܢܲܗܸܠ ܒܝܼ ܒܓܲܘ ܬܲܟܬܽܘܫܵܐ ܡܸܬܓܲܪܸܐ ܥܲܡܝ܃
126:145	ܠܲܘܐܽܘܢܝ ܣܸܕܪ̈ܲܝ ܕܲܟܢܝܼܫܵܐܝܼܬ ܢܸܐܪܽܘܥ ܕܲܪܸܗ܀
126:146	ܬܲܘ ܢܸܗܘܸܐ ܚܲܕ ܕܲܫܟܝܼܚܝܼܢ ܒܸܗ ܪܸܒܽܘ ܚܲܝ̈ܠܝܼܢ܃

126:147	ܘܒܲܨܡܝܼܕܽܘܬܵܐ ܢܸܗܘܸܐ ܒܕܲܪܵܐ ܓܲܢ̄ܒܵܪܵܐܝܼܬ܀

126:148	ܩܪܸܒ ܛܲܪܟܵܢܵܐ ܐܲܪܡܝܼ ܐܝܼܕܸܗ ܥܲܠ ܐܲܬܠܝܼܛܵܐ܃
126:149	ܢܲܣܝܼ ܚܲܝܠܸܗ ܒܣܲܒܪܵܐ ܣܦܝܼܩܵܐ ܕܥܲܠ ܙܵܟܽܘܬܵܐ܀
126:150	ܐܲܘܫܸܛ ܓܲܫܸܗ ܘܸܐܚܲܕ ܠܲܒܟܸܗ ܘܲܕܚܸܠ ܫܲܒܩܸܗ܃
126:151	ܦܢܵܐ ܕܠܵܐ ܢܲܩܪܸܒ ܘܲܗܦܲܟ ܓܵܙܸܡ ܥܲܠ ܬܲܟܬܽܘܫܵܐ܀
126:152	ܩܵܡ ܢܵܛܲܪ ܠܸܗ ܕܢܸܗܘܸܐ ܦܸܠܥܵܐ ܠܲܢܟܝܼܠܽܘܬܸܗ܃
126:153	ܕܒܲܐܬܪܵܐ ܕܡܸܫܟܲܚ ܢܲܩܪܸܒ ܥܲܡܸܗ ܒܽܐܘܡܵܢܽܘܬܸܗ܀
126:154	ܡܸܬܦܲܪܬܲܟ ܗ̄ܘܵܐ ܒܝܼܫܵܐ ܒܕܲܪܵܐ ܕܲܪܡܸܐ ܗ̄ܘܵܐ ܒܸܗ܃
126:155	ܕܲܐܝܕܵܐ ܢܸܣܥܽܘܪ ܠܵܐ ܝܵܕܲܥ ܗ̄ܘܵܐ ܒܲܕܩܵܢܸܛ ܗ̄ܘܵܐ܀
126:156	ܥܲܠ ܚܽܘ̈ܫܵܒܸܐ ܕܚܝܼ̈ܠܸܐ ܕܟܽܠܝܽܘܡ ܡܸܬܝܲܒܲܠ ܗ̄ܘܵܐ܃
126:157	ܘܲܒܬܸܢܵܢܵܐ ܕܡܸܢ ܡܲܪܢܝܼܬܸܗ ܡܸܬܥܲܘܲܪ ܗ̄ܘܵܐ܀
126:158	ܒܓ̈ܲܠܠܸܐ ܙܩܝܼ̈ܦܸܐ ܕܡܸܢ ܪܸܥܝܵܢܸܗ ܡܸܬܢܲܓܲܕ ܗ̄ܘܵܐ܃
126:159	ܕܢܲܩܪܸܒ ܕܵܚܸܠ ܘܲܕܠܵܐ ܢܲܩܪܸܒ ܡܸܣܬܲܪܲܕ ܗ̄ܘܵܐ܀
126:160	ܕܲܫܡܝܼܥ ܗ̄ܘܵܐ ܠܸܗ ܕܒܲܪ ܐܲܠܵܗܵܐ ܗ̄ܘ ܛܵܒ ܩܵܢܸܛ ܗ̄ܘܵܐ܃
126:161	ܘܲܕܓܲܫ ܦܲܓܪܸܗ ܘܲܠܒܲܟ ܓܽܘܫܡܸܗ ܡܸܬܠܲܒܲܒ ܗ̄ܘܵܐ܀
126:162	ܥܲܠ ܐ̄ܢܵܫܽܘܬܵܐ ܕܡܸܬܚܲܙܝܵܐ ܗ̄ܘܵܬ̤ ܡܸܬܓܲܙܲܡ ܗ̄ܘܵܐ܃
126:163	ܘܲܕܓܲܢܝܵܐ ܗ̄ܘܵܬ̤ ܐܲܠܵܗܽܘܬܵܐ ܡܸܬܓܲܪܸܐ ܗ̄ܘܵܐ܀
126:164	ܒܕܲܪܵܐ ܕܩܸܢܛܵܐ ܐܲܪܒܥܝܼܢ ܝܲܘ̈ܡܝܼܢ ܡܸܬܦܲܫܲܚ ܗ̄ܘܵܐ܃
126:165	ܘܲܕܚܵܐܸܒ ܗ̄ܘܵܐ ܐܲܘ ܐܸܢ ܙܵܟܸܐ ܠܵܐ ܝܵܕܲܥ ܗ̄ܘܵܐ܀
126:166	ܚܙܵܝܗ̄ܝ ܠܲܡܫܝܼܚܵܐ ܕܲܠܒܝܼܟ ܨܲܘܡܵܐ ܒܫܽܘܪܵܝ ܕܲܪܸܗ܃
126:167	ܘܸܐܫܟܲܚ ܥܸܠܬܵܐ ܕܡܸܢܵܗ݀ ܢܼܐܠܲܦ ܥܲܠ ܐܲܬܠܝܼܛܵܐ܀
126:168	ܘܫܲܪܝܼ ܚܵܐܲܪ ܟܲܕ ܡܸܬܚܲܫܲܒ ܒܲܨܢܝܼܥܽܘܬܸܗ܃
126:169	ܕܸܐܠܵܐ ܟܵܦܸܐ ܗܵܕܸܐ ܕܓܸܫܸܬ ܠܲܘ ܐ̄ܢܵܫܽܘܬܵܐ ܗ̄ܝ܀
126:170	ܐܸܢܕܸܝܢ ܦܲܓܪܵܐ ܗ̄ܘ ܡܲܡܚܸܠ ܗ̄ܽܘ ܠܸܗ ܨܲܘܡܵܐ ܒܢܽܘܓܪܸܗ܃
126:171	ܠܵܐ ܬܸܡܐܲܢ ܠܝܼ ܐܲܓܲܪ ܘܸܐܚܙܸܐ ܡܵܢܵܐ ܓܵܕܸܫ܀
126:172	ܐܲܬܠܝܼܛ ܥܲܘܠܵܐ ܬܠܵܝܗ̄ܝ ܗ̄ܘܵܐ ܒܣܲܒܪܵܐ ܠܕܲܪܵܐ ܕܲܥܒܲܕ܃