The Comprehensive Aramaic Lexicon

126:195	ܕܸܐܠܽܘܠܵܐ ܚܙܵܝܗ̄ܝ ܕܲܠܐܝܼ ܘܲܟܦܸܢ ܠܵܐ ܡܲܩܪܸܒ ܗ̄ܘܵܐ܀
126:196	ܐܸܫܟܲܚ ܠܝܼܛܵܐ ܐܲܬܪܵܐ ܠܢܸܟܠܸܗ ܐܲܝܟ ܕܲܣܒܲܪ ܠܸܗ܃
126:197	ܕܲܠܨܲܝܵܡܵܐ ܒܟܲܦܢܵܐ ܢܸܐܚܽܘܕ ܘܲܢܒܲܙܲܚ ܒܸܗ܀
126:198	ܒܽܐܘܡܵܢܽܘܬܵܐ ܗܵܝ ܕܲܙܟܵܐ ܒܵܗ݀ ܡܸܬܚܲܫܲܚ ܗ̄ܘܵܐ܃
126:199	ܕܲܒܡܸܐܟܽܘܠܬܵܐ ܨܒܵܐ ܗ̄ܘܵܐ ܕܢܲܛܥܸܝܘܗ̄ܝ ܐܲܝܟ ܕܲܠܐܵܕܵܡ܀
126:200	ܠܒܝܼܫ ܗ̄ܘܵܐ ܙܲܝܢܵܐ ܗܲܘ ܕܲܐܩܠܝܼ ܒܸܗ ܥܲܠ ܐ̄ܢܵܫܽܘܬܵܐ܃
126:201	ܕܲܒܬܲܟܬܽܘܫܵܐ ܕܸܐܬܢܲܨܲܚ ܒܸܗ ܢܸܬܟܲܐܲܪ ܗ̄ܘܵܐ܀
126:202	ܡܲܬܚܵܗ݀ ܠܩܸܫܬܸܗ ܗܵܝ ܕܲܢܨܲܚ ܒܵܗ݀ ܥܲܠ ܟܽܠ ܕܵܪ̈ܝܼܢ܃
126:203	ܕܲܒܗܲܘ ܓܸܐܪܵܐ ܕܲܡܚܵܝܗ̄ܝ ܠܵܐܕܵܡ ܢܸܒܠܲܥ ܝܸܫܽܘܥ܀
126:204	ܠܵܐ ܫܲܕܲܪ ܗ̄ܘܵܐ ܚܸܘܝܵܐ ܘܚܲܘܵܐ ܨܹܝܕ ܫܲܪܝܼܪܵܐ܃
126:205	ܕܠܲܘ ܕܼܐܝ̈ܙܓܲܕܸܐ ܗܘܵܐ ܣܽܘܥܪܵܢܵܐ ܕܸܐܬܩܲܪܲܒ ܠܸܗ܀
126:206	ܐܽܘܪܚܵܐ ܪܲܒܬܵܐ ܪܲܡܝܵܐ ܗ̄ܘܵܬ̤ ܠܸܗ ܠܡܲܠܲܐܟ ܥܲܘܠܵܐ܃
126:207	ܘܠܵܐ ܫܐܸܠ ܗ̄ܘܵܐ ܠܸܗ ܐ̄ܚܪܼܢܵܐ ܕܢܼܐܙܲܠ ܥܲܠ ܣܽܘܥܪܵܢܸܗ܀
126:208	ܐ̄ܬܵܐ ܒܲܩܢܽܘܡܸܗ ܠܲܘ ܒܲܐ̄ܚܪܼܢܵܐ ܐܸܬܝܲܒܲܠ ܗ̄ܘܵܐ܃
126:209	ܩܪܸܒ ܨܹܝܕ ܡܵܪܲܢ ܕܲܢܢܲܣܸܝܘܗ̄ܝ ܗ̄ܘܵܐ ܐܲܝܟ ܕܲܠܐܵܕܵܡ܀
126:210	ܐܲܪܡܝܼ ܫܲܪܒܵܐ ܕܠܵܐ ܐ̄ܢܵܫ ܬܲܒܥܸܗ ܕܲܢܡܲܠܸܠ ܗ̄ܘܵܐ܃
126:211	ܫܲܪܝܼ ܡܸܢ ܗܵܝ ܕܲܡܥܵܕ ܗ̄ܘܵܐ ܒܵܗ݀ ܕܲܢܢܲܣܸܐ ܗ̄ܘܵܐ܀
126:212	ܒܪܝܼܫ ܬܸܫܥܝܼܬܵܐ ܠܽܘܩܒܲܠ ܢܲܦܫܸܗ ܡܲܠܸܠ ܣܲܟܠܵܐ܃
126:213	ܘܓܸܐܪܵܐ ܩܲܕܡܵܐ ܨܸܐܕܲܘܗ̄ܝ ܬܲܪܨܸܗ ܕܗܽܘ ܢܸܒܠܲܥ ܒܸܗ܀
126:214	ܫܲܪܝܼ ܕܢܼܐܡܲܪ ܕܸܐܢܗܽܘ ܕܲܐܢ̄ܬ ܗ̄ܽܘ ܒܪܵܐ ܕܲܐܠܵܗܵܐ܃
126:215	ܐ̄ܡܲܪ ܢܸܗܘܸܐ ܠܵܟ ܠܲܚܡܵܐ ܘܲܐܟܽܘܠ ܡܸܛܽܠ ܟܲܦܢܵܟ܀
126:216	ܐܵܘ ܣܵܛܵܢܵܐ ܠܲܘ ܕܝܼܠܵܟ ܗ̄ܝܼ ܕܲܟܦܸܢ ܡܵܪܵܟ܃
126:217	ܡܲܢܽܘ ܣܵܡܵܟ ܕܬܸܗܘܸܐ ܝܵܨܸܦ ܥܲܠ ܡܲܢ ܕܲܟܦܸܢ܀
126:218	ܐܲܝܟܵܐ ܘܸܐܡܲܬܝ ܐܸܬܚܲܙܝܲܬ̤ ܒܵܟ ܛܵܒܽܘܬ ܥܲܝܢܵܐ܃
126:219	ܘܗܵܐ ܡܸܢ ܐܸܡܲܬܝ ܝܵܨܽܘܦܵܐ ܐܲܢ̄ܬ ܥܲܠ ܨܲܝܵܡܸ̈ܐ܀

126:220	ܪܲܚܡܵܢܵܐ ܐܲܢ̄ܬ ܐܲܘ ܕܲܡ ܚܲܪܡܵܐ ܘܩܵܛܸܠ ܐ̄ܢܵܫܵܐ܃

126:221	ܚܲܝܽܘܣܬܵܢܵܐ ܐܲܘ ܚܲܣܵܡܵܐ ܚܒܲܪ ܙܼܐܦܵܢܸ̈ܐ܀
126:222	ܠܡܲܢܽܘ ܬܲܪܣܝܼܬ ܡܸܢ ܟܽܠ ܕܲܗܘܲܘ ܒܲܐܟܝܼܦܽܘܬܵܟ܃
126:223	ܕܲܠܡܵܐ ܠܵܐܕܵܡ ܗܲܘ ܕܲܚܣܲܠܬܵܝܗ̄ܝ ܡܸܢ ܓܸܐܘ̈ܵܬܸܗ܀
126:224	ܡܵܢ ܐܵܠܨܵܐ ܠܵܟ ܕܢܸܐܟܽܘܠ ܝܸܫܽܘܥ ܝܲܬܝܼܪ ܡܸܢ ܟܽܠ܃
126:225	ܘܲܐܝܕܵܐ ܗ̄ܝ ܥܸܠܬܵܐ ܕܲܫܩܵܠ ܛܲܥܢܵܟ ܥܲܠ ܟܲܦܢܽܘܬܸܗ܀
126:226	ܦܫܝܼܩܵܐ ܗ̄ܘܵܬ̤ ܠܸܗ ܗܵܕܸܐ ܠܡܵܪܲܢ ܐܸܠܽܘ ܨܒܵܐ ܗ̄ܘܵܐ܃
126:227	ܘܲܕܠܵܐ ܣܲܥܪܵܗ݀ ܕܠܵܐ ܢܸܫܡܲܥ ܗ̄ܘܵܐ ܠܲܒܥܸܠܕܲܪܵܐ܀
126:228	ܣܲܥܪܵܗ݀ ܗ̄ܘܵܐ ܓܹܝܪ ܒܵܬܲܪ ܙܲܒܢܵܐ ܐܲܝܟܵܐ ܕܲܨܒܵܐ܃
126:229	ܘܣܲܒܲܥ ܐܲܠܦܸ̈ܐ ܕܝܲܬܝܼܪ ܢܸܒܗܲܬ ܐܵܟܸܠܩܲܪܨܵܐ܀
126:230	ܕܠܝܼܠ ܗ̄ܘܵܐ ܠܸܗ ܓܹܝܪ ܠܲܡܫܲܚܠܵܦܽܘ ܟܼܐܦܸ̈ܐ ܠܠܲܚܡܵܐ܃
126:231	ܐܲܟܡܵܐ ܕܲܗܦܲܟ ܡܲܝ̈ܵܐ ܠܚܲܡܪܵܐ ܒܵܬܲܪ ܗܵܝܕܸܝܢ܀
126:232	ܘܟܲܕ ܣܵܛܵܢܵܐ ܗܘܵܐ ܦܵܩܽܘܕܵܐ ܠܵܐ ܫܡܲܥ ܡܵܪܲܢ܃
126:233	ܕܵܐܦ ܗܽܘ ܒܝܼܫܵܐ ܡܸܛܽܠ ܗܵܕܸܐ ܗ̄ܘ ܐܸܬܚܲܟܲܡ ܗ̄ܘܵܐ܀
126:234	ܐܸܢ ܠܲܡ ܐܵܡܲܪ ܘܗܵܘ̈ܝܵܢ ܟܼܐܦܸ̈ܐ ܠܲܚܡܵܐ ܒܕܲܒܪܵܐ܃
126:235	ܡܸܫܬܲܥܒܲܕ ܠܸܗ ܬܚܸܝܬ ܫܽܘܠܛܵܢܲܢ ܕܦܽܘܩܕܵܢܝ ܣܵܥܲܪ܀
126:236	ܒܚܲܕ ܡܸܢ ܐܸܣܟܝܼܡ ܢܸܦܩܽܘܕ ܒܲܠܚܽܘܕ ܡܸܬܦܲܪܲܣ ܗ̄ܘܵܐ܃
126:237	ܕܢܲܥܕܸܐ ܗ̄ܘܵܐ ܠܸܗ ܫܲܠܝܼܛܽܘܬܵܐ ܕܠܲܘ ܕܝܼܠܸܗ ܗ̄ܝܼ܀
126:238	ܐܵܘ ܡܵܪܽܘܕܵܐ ܟܢܵܬܸܗ ܕܙܲܡܪܝܼ ܩܵܛܸܠ ܡܵܪܸܗ܃
126:239	ܢܲܦܫܵܟ ܡܲܠܐܸܝܬ ܟܲܕ ܠܵܐ ܙܵܟܸܝܬ ܡܸܢ ܬܲܟܬܽܘܫܵܐ܀
126:240	ܠܲܘ ܐܵܕܵܡ ܗ̄ܽܘ ܕܲܒܝܲܕ ܦܼܐܪܵܐ ܩܛܲܠܬܵܝܗ̄ܝ ܒܲܥܕܸܢ܃
126:241	ܒܲܪ ܐܲܠܵܗܵܐ ܗ̄ܘ ܕܲܠܒܸܫ ܦܲܓܪܵܐ ܘܗܽܘ ܩܵܛܸܠ ܠܵܟ܀
126:242	ܗܵܢܵܐ ܦܲܚܵܐ ܨܠܵܐ ܗ̄ܘܵܐ ܒܝܼܫܵܐ ܠܟܲܦܢܸܗ ܕܡܵܪܲܢ܃
126:243	ܕܲܒܡܸܐܟܽܘܠܬܵܐ ܢܸܫܪܸܐ ܠܨܲܘܡܸܗ ܕܲܐܬܠܝܼܛ ܩܽܘܫܬܵܐ܀
126:244	ܐ̄ܡܲܪ ܠܲܡ ܠܟܼܐܦܸ̈ܐ ܕܢܸܗܘ̈ܝܵܢ ܠܲܚܡܵܐ ܐܸܢ ܒܵܪܽܘܝܵܐ ܐܢ̄ܬ܃
126:245	ܠܡܵܢܵܐ ܟܦܸܢ ܐܲܢ̄ܬ ܣܲܒܲܥ ܢܲܦܫܵܟ ܐܸܢ ܙܵܝܽܘܢܵܐ ܐܢ̄ܬ܀