The Comprehensive Aramaic Lexicon

126:253	ܘܠܵܐ ܐܸܬܥܲܙܝܼ ܐܲܝܟ ܕܲܡܨܸܐ ܗ̄ܘܵܐ ܥܲܠ ܬܲܟܬܽܘܫܵܐ܀
126:254	ܒܚܵܠܵܐ ܦܲܟܪܸܗ ܐܲܝܟ ܕܲܠܝܲܡܵܐ ܠܡܵܡܽܘܠ ܥܲܘܠܵܐ܃
126:255	ܕܲܚܠܵܦ ܕܲܪܵܐ ܕܪܵܫܵܐ ܥܲܬܸܕ ܕܢܸܫܬܲܦܲܠ ܒܸܗ܀
126:256	ܫܲܪܝܼ ܕܢܸܬܢܸܐ ܡܸ̈ܠܲܝ ܡܽܘܫܸܐ ܡܵܪܸܗ ܕܡܽܘܫܸܐ܃
126:257	ܕܲܢܚܲܘܸܐ ܗ̄ܘܵܐ ܕܲܒܪܵܐ ܐܝܼܬܲܘܗ̄ܝ ܘܠܲܘ ܢܽܘܟܪܵܝܵܐ܀
126:258	ܠܵܐ ܐܲܝܬܝܼ ܠܸܗ ܙܲܝܢܵܐ ܐ̄ܚܪܼܢܵܐ ܕܢܸܬܟܲܬܲܫ ܒܸܗ܃
126:259	ܐܸܠܵܐ ܒܡܵܐܢܸ̈ܐ ܕܡܸܢ ܒܸܝܬ ܐܲܒܽܘܗ̄ܝ ܡܸܬܚܲܫܲܚ ܗ̄ܘܵܐ܀
126:260	ܒܝܼܫܵܐ ܝܵܩܸܕ ܡܸܢ ܬܲܟܬܽܘܫܵܐ ܕܲܪܡܸܐ ܗ̄ܘܵܐ ܒܸܗ܃
126:261	ܘܡܵܪܲܢ ܬܵܢܸܐ ܡܸ̈ܠܲܝ ܣܵܦܪܵܐ ܘܲܡܒܲܙܲܚ ܒܸܗ܀
126:262	ܟܬܝܼܫ ܥܲܘܵܠܵܐ ܒܗܸܪܬܵܐ ܕܲܐܪܡܝܼ ܟܲܕ ܡܸܬܦܲܩܲܪ܃
126:263	ܘܲܒܪܵܐ ܡܫܝܼܚܵܐ ܬܵܢܸܐ ܟܬܵܒܸ̈ܐ ܪܲܟܝܼܟܵܐܝܼܬ܀
126:264	ܙܩܝܼܦ ܡܵܪܽܘܕܵܐ ܐܲܝܟ ܥܲܠܥܵܠܵܐ ܥܲܠ ܢܸܣܝܽܘܢܵܐ܃
126:265	ܘܝܸܫܽܘܥ ܡܲܟܝܼܟ ܡܲܠܸܦ ܠܵܚܸܫ ܟܲܕ ܠܵܐ ܩܵܥܸܐ܀
126:266	ܟܬܝܼܒ ܗ̄ܽܘ ܐܸܡܲܪ ܕܠܵܐ ܗ̄ܘܵܐ ܒܠܲܚܡܵܐ ܘܡܲܝ̈ܵܐ ܒܲܠܚܽܘܕ܃
126:267	ܫܟܝܼܚܝܼܢ ܚܲܝܸ̈ܐ ܠܲܒܢܲܝܢܵܫܵܐ ܡܸܢ ܐܲܠܵܗܵܐ܀
126:268	ܟܽܠ ܡܸ̈ܠܸܐ ܓܹܝܪ ܕܸܐܡܲܪ ܡܵܪܝܵܐ ܚܲܝܸ̈ܐ ܐܸܢܽܘܢ܃
126:269	ܘܲܕܠܵܐ ܠܲܚܡܵܐ ܡܨܸܐ ܗ̄ܘ ܐ̄ܢܵܫ ܚܵܝܸܐ ܐܸܢ ܦܵܪܽܘܫܵܐ ܗ̄ܘ܀
126:270	ܐܵܦܠܵܐ ܒܠܲܚܡܵܐ ܕܠܲܘ ܡܸܢ ܟܼܐܦܸ̈ܐ ܣܝܼܡܝܼܢ ܚܲܝܸ̈ܐ܃
126:271	ܕܒܲܒܪܵܐ ܡܸܠܬܵܐ ܩܵܐܸܡ ܦܲܓܪܵܐ ܕܗܵܐ ܚܵܙܸܐ ܐܲܢ̄ܬ܀
126:272	ܒܡܸܠܬܵܐ ܕܡܵܪܝܵܐ ܐܝܼܬ ܚܲܝܽܘܬܵܐ ܠܟܽܠܗܽܘܢ ܚܲܝܸ̈ܐ܃
126:273	ܡܸܢ ܝܲܬܝܼܪܽܘ ܐܝܼܬܲܘܗ̄ܝ ܠܲܚܡܵܐ ܘܠܵܐ ܚܵܫܲܚ ܠܝܼ܀
126:274	ܢܦܲܠ ܐܲܬܠܝܼܛܵܐ ܒܕܲܪܵܐ ܩܲܕܡܵܐ ܕܸܐܬܟܲܬܲܫ ܒܸܗ܃
126:275	ܘܸܐܬܬܲܒܲܪܘ ܗ̄ܘܲܘ ܕܪ̈ܵܥܸܐ ܕܼܐܝ̈ܕܲܘܗ̄ܝ ܡܸܢ ܡܲܦܽܘܠܬܵܐ܀
126:276	ܚܙܵܝܗ̄ܝ ܠܲܡܫܝܼܚܵܐ ܕܲܒܩܲܫܝܽܘܬܵܐ ܠܵܐ ܡܸܬܚܲܫܲܚ܃
126:277	ܘܬܽܘܒ ܐܸܬܠܲܒܲܒ ܟܲܕ ܡܸܬܡܲܪܡܲܪ ܥܲܠ ܬܲܟܬܽܘܫܵܐ܀
126:278	ܐܲܘܫܸܛ ܠܲܒܟܸܗ ܟܲܕ ܡܸܫܬܲܥܠܸܐ ܒܓܽܘܡܕܵܢܽܘܬܸܗ܃
126:279	ܕܲܢܛܽܘܣ ܥܲܡܸܗ ܘܢܸܚܙܸܐ ܚܲܝܠܸܗ ܐܸܢ ܐܵܪܲܥ ܠܸܗ܀
126:280	ܦܪܲܚ ܫܲܪܝܼܪܵܐ ܥܲܡ ܕܲܓܵܠܵܐ ܠܲܐܝܟܵܐ ܕܲܨܒܵܐ܃
126:281	ܕܲܒܟܽܠ ܕܲܪ̈ܝܼܢ ܢܸܬܚܲܝܲܒ ܗ̄ܘܵܐ ܥܲܠ ܕܸܐܫܬܲܥܠܝܼ܀
126:282	ܚܵܒ ܗ̄ܘܵܐ ܒܕܲܒܪܵܐ ܘܥܲܠ ܠܸܗ ܠܫܲܝܢܵܐ ܕܢܸܬܟܲܬܲܫ ܒܸܗ܃
126:283	ܚܲܠܸܦ ܐܲܬܪܵܐ ܕܲܠܬܲܟܬܽܘܫܸܗ ܢܦܼܐܫܵܐ ܢܸܗܘܸܐ܀
126:284	ܒܗܸܬ ܗ̄ܘܵܐ ܒܚܽܘܪܒܵܐ ܘܲܬܪܲܨ ܢܼܐܙܲܠ ܠܽܘܩܒܲܠ ܟܲܪܟܵܐ܃
126:285	ܡܛܵܐ ܠܲܡܕܝܼܢ̄ܬܵܐ ܘܡܵܪܲܢ ܥܲܡܸܗ ܒܕܲܪܵܐ ܕܲܬܪܸܝܢ܀
126:286	ܣܠܸܩ ܐܲܩܝܼܡܸܗ ܠܥܸܠ ܡܸܢ ܟܸܢܦܵܐ ܕܗܲܝܟܲܠ ܩܽܘܕܫܵܐ܃
126:287	ܕܲܢܣܲܪܕܸܗ ܗ̄ܘܵܐ ܒܥܽܘܡܩܵܐ ܕܲܚܙܵܐ ܕܲܡܠܸܐ ܩܸܢܛܵܐ܀
126:288	ܐܲܥܝܼܪ ܒܝܼܫܵܐ ܕܪܵܫܵܐ ܕܲܬܪܸܝܢ ܒܲܦܠܝܼܓܽܘܬܸܗ܃
126:289	ܥܲܠ ܕܲܚܙܵܐ ܗ̄ܘܵܐ ܕܲܒܩܲܕܡܵܝܵܐ ܕܪܵܫܵܐ ܚܲܣܢܸܗ܀
126:290	ܨܒܵܐ ܕܲܢܡܲܪܸܐ ܒܗܲܘ ܡܲܠܦܵܢܵܐ ܕܫܲܪܝܼܪ̈ܵܬܵܐ܃
126:291	ܘܲܒܦܸ̈ܠܵܐܬܵܐ ܡܲܠܸܠ ܥܲܡܸܗ ܣܵܢܸܐ ܫܪܵܪܵܐ܀
126:292	ܚܙܵܝܗ̄ܝ ܕܲܒܡܽܘܫܸܐ ܡܸܬܚܲܫܲܚ ܗ̄ܘܵܐ ܒܫܲܪܒܵܐ ܕܲܐܪܡܝܼ܃
126:293	ܘܫܲܪܝܼ ܕܢܸܬܢܸܐ ܗܽܘ ܡܸܢ ܕܲܘܝܼܕ ܠܽܘܩܒܲܠ ܡܵܪܲܢ܀
126:294	ܐܲܪܡܵܐ ܢܲܦܫܵܟ ܡܸܢ ܗܵܐ ܡܸܟܵܐ ܐܸܢܗܽܘ ܕܲܐܢ̄ܬܽܘ܃
126:295	ܒܗܵܕܸܐ ܚܲܘܵܐ ܕܲܡܫܝܼܚܵܐ ܐܲܢ̄ܬ ܐܸܠܵܐ ܬܲܗܲܪ܀
126:296	ܗܵܐ ܟܬܝܼܒ ܗ̄ܽܘ ܓܹܝܪ ܕܲܠܡܲܠܲܐܟܲܘ̈ܗ̄ܝ ܢܦܲܩܸܕ ܥܠܲܝܟ܃
126:297	ܕܲܢܫܲܩܠܽܘܢܵܟ ܒܲܕܪ̈ܵܥܲܝܗܽܘܢ ܠܲܐܝܟܵܐ ܕܬܼܐܙܲܠ܀
126:298	ܐܸܢܗܽܘ ܕܬܸܦܸܠ ܛܵܥܢܝܼܢ ܐ̄ܢܽܘܢ ܠܵܟ ܠܵܐ ܡܲܗܲܪ ܐܲܢ̄ܬ܃
126:299	ܕܲܡܦܲܩܕܝܼܢ ܐ̄ܢܽܘܢ ܠܲܡܢܲܛܵܪܽܘ ܟܽܠ ܐܽܘܪ̈ܚܵܬܵܟ܀
126:300	ܐܸܢ ܡܵܪܵܐ ܐܲܢ̄ܬ ܗܵܐ ܡܲܠܲܐܟܸ̈ܐ ܡܩܝܼܡ ܠܼܐܝܵܠܵܟ܃
126:301	ܘܠܵܐ ܡܸܬܬܲܩܠܵܐ ܒܟܹܐܦܵܐ ܪܸܓܠܵܟ ܐܸܢ ܫܵܘܲܪ ܐܲܢ̄ܬ܀
126:302	ܠܵܐ ܡܸܬܕܲܓܲܠ ܟܽܠ ܡܵܐ ܕܲܟܬܝܼܒ ܒܲܢܒܝܼܽܘܬܵܐ܃
126:303	ܠܵܐ ܬܸܬܦܲܠܲܓ ܦܸܠ ܐܸܢ ܐܲܢ̄ܬ ܗ̄ܽܘ ܒܪܸܗ ܕܲܐܠܵܗܵܐ܀