The Comprehensive Aramaic Lexicon

126:392	ܐܵܦܠܵܐ ܗܵܫܵܐ ܢܦܲܩ ܡܸܢ ܡܽܘܫܸܐ ܡܵܪܸܐ ܢܒܝܼܸ̈ܐ܃
126:393	ܕܠܵܐ ܢܸܗܘܸܐ ܗ̄ܘܵܐ ܐܲܬܪܵܐ ܕܬܸܥܽܘܠ ܢܽܘܟܪܵܝܽܘܬܵܐ܀
126:394	ܡܵܪܸܐ ܚܕܲܬܵܐ ܡܸܢ ܥܲܬܝܼܩܬܵܐ ܡܸܬܚܲܫܲܚ ܗ̄ܘܵܐ܃
126:395	ܕܲܢܚܲܘܸܐ ܗ̄ܘܵܐ ܕܲܒܬܲܪ̈ܬܲܝܗܸܝܢ ܡܸܬܡܲܠܲܠ ܗ̄ܘܵܐ܀
126:396	ܗܵܝܕܸܝܢ ܫܲܢܝܼ ܐܵܟܸܠܩܲܪܨܵܐ ܡܸܢ ܦܵܪܽܘܩܲܢ܃
126:397	ܘܗܵܐ ܡܲܠܲܐܟܸ̈ܐ ܩܪܸܒܘ ܐܸܬܟܲܪܟܽܘܗ̄ܝ ܠܲܡܫܲܡܵܫܽܘ܀
126:398	ܙܟܵܐ ܐܲܬܠܝܼܛܵܐ ܘܡܸܢ ܚܲܙܵܝܸ̈ܐ ܩܥܵܬܵܐ ܣܸܠܩܲܬܹ܃
126:399	ܟܲܕ ܝܵܗܒܝܼܢ ܠܸܗ ܟܠܝܼܠ ܩܽܘ̈ܠܵܣܸܐ ܠܗܲܘ ܕܸܐܬܢܲܨܲܚ܀
126:400	ܟܢܝܼܫܝܼܢ ܗ̄ܘܲܘ ܓܹܝܪ ܟܸܢ̈ܫܲܝ ܥܝܼܪܸ̈ܐ ܒܕܲܪ̈ܓܲܝ ܪܲܘܡܵܐ܃
126:401	ܕܢܸܚܙܽܘܢ ܕܲܪܵܐ ܕܲܚܠܵܦ ܥܵܠܡܵܐ ܡܫܝܼܚܵܐ ܥܵܒܸܕ܀
126:402	ܚܒܲܨܘ ܗ̄ܘܲܘ ܓܲܒܸ̈ܐ ܘܲܛܥܲܢܘ ܣܲܘ̈‍{‍ܦ‍}‍‍<‍ܟ‍>‍ܸܐ ܠܲܫܡܲܝ̈ܵܢܸܐ/ܠܡܫܒܚܘ/܃
126:403	ܕܲܡܕܝܼܩܝܼܢ ܗ̄ܘܲܘ ܥܲܠ ܚܸܙܘ̈ܵܢܸܐ ܕܡܸܬܥܲܒܕܝܼܢ ܗ̄ܘܲܘ܀
126:404	ܪܸܥܡܲܬ̤ ܕܵܪܬܵܐ ܗܵܝ ܕܲܫܡܲܝܵܐ ܒܚܲܝ̈ܠܲܘܵܬܵܐ܃
126:405	ܕܲܟܢܲܫܘ ܢܸܚܙܽܘܢ ܐܲܬܠܝܼܛܽܘܬܵܐ ܕܲܒܓܲܘ ܥܽܘܡܩܵܐ܀
126:406	ܩܵܡܘ ܪ̈ܽܘܚܵܢܸܐ ܒܡܸܕܝܵܪ̈ܲܝܗܽܘܢ ܟܲܕ ܬܲܗܝܼܪܝܼܢ܃
126:407	ܬܸܓܡ̈ܲܝ ܢܽܘܪܵܐ ܥܲܡ ܠܸܓܝܽܘ̈ܢܸܐ ܕܫܲܠܗܸܒܝܼܬܵܐ܀
126:408	ܩܵܝܡܝܼܢ ܟܸܢ̈ܫܸܐ ܒܗܝܼܠܝܼܢ ܣܸܕܪܸ̈ܐ ܘܲܫܠܸܝܢ ܛܸܟ̈ܣܸܐ܃
126:409	ܕܢܸܚܙܽܘܢ ܟܽܠܗܽܘܢ ܕܲܐܝܟܲܢ ܫܵܩܸܠ ܕܲܪܵܐ ܣܵܟܸܗ܀
126:410	ܫܠܸܡ ܬܲܟܬܽܘܫܵܐ ܘܚܵܒ ܣܵܛܵܢܵܐ ܘܲܙܟܵܐ ܡܫܝܼܚܵܐ܃
126:411	ܘܲܩܥܲܘ ܟܽܠܗܽܘܢ ܬܸܓ̈ܡܸܐ ܫܽܘܒܚܵܐ ܠܲܒܪܵܐ ܕܲܢܨܲܚ܀
126:412	ܚܕܝܼܘ ܪ̈ܽܘܚܵܢܸܐ ܒܗܵܝ ܙܵܟܽܘܬܵܐ ܕܲܚܙܲܘ ܕܲܗܘܵܬܹ܃
126:413	ܪܥܸܡܘ ܟܸܢ̈ܫܲܝܗܽܘܢ ܥܲܠ ܛܲܝܒܽܘܬܵܐ ܕܸܐܣܬܲܥܪܲܬ̤ ܗ̄ܘܵܬܹ܀
126:414	ܡܥܵܩܝܼܢ ܗ̄ܘܲܘ ܓܹܝܪ ܡܸܛܽܠ ܐܵܕܵܡ ܥܲܠ ܕܸܐܬܚܲܝܲܒ܃
126:415	ܘܲܚܕܝܼܘ ܕܲܗܦܲܟ ܘܲܙܟܵܐ ܒܡܵܪܲܢ ܘܲܦܢܵܐ ܠܚܲܝܸ̈ܐ܀
126:416	ܥܪܲܩ ܚܲܝܵܒܵܐ ܡܸܢ ܙܲܟܵܝܵܐ ܕܲܣܚܲܦ ܬܵܓܸܗ܃
126:417	ܘܩܵܡ ܗ̄ܘܵܐ ܪܲܡܝܵܐ ܕܸܐܬܥܲܕܲܪ ܗ̄ܘܵܐ ܒܲܒܪܵܐ ܕܚܵܢܸܗ܀
126:418	ܩܪܸܒܘ ܡܲܠܲܐܟܸ̈ܐ ܠܲܡܫܲܡܵܫܽܘ ܒܵܬܲܪ ܗܵܠܸܝܢ܃
126:419	ܠܗܲܘ ܕܸܐܬܬܲܚܬܝܼ ܘܥܲܠܝܼ ܠܥܲܒܕܸܗ ܡܸܢ ܐܲܓܽܘܢܵܐ܀
126:420	ܘܲܟܒܲܪ ܗܵܠܸܝܢ ܡܸܬܐܲܡܪ̈ܵܢ ܗ̄ܘ̈ܲܝ ܡܸܢ ܡܲܠܲܐܟܸ̈ܐ܃
126:421	ܒܗܵܝ ܬܸܫܡܸܫܬܵܐ ܕܩܵܝܡܝܼܢ ܗ̄ܘܲܘ ܒܵܗ݀ ܩܕܵܡ ܙܲܟܵܝܵܐ܀
126:422	ܒܪܝܼܟ ܫܵܠܽܘܚܵܟ ܕܲܥܨܵܝܗ̄ܝ ܚܽܘܒܸܗ ܘܫܲܠܚܵܟ ܠܲܐܪܥܵܐ܃
126:423	ܕܒܵܟ ܬܸܬܒܲܪܲܟ ܥܲܠ ܕܸܐܬܬܠܝܼܛܲܬ̤ ܡܸܛܽܠ ܐܵܕܵܡ܀
126:424	ܫܠܵܡܵܐ ܒܪܲܘܡܵܐ ܘܫܲܝܢܵܐ ܒܲܐܪܥܵܐ ܥܲܠ ܬܲܚ̈ܬܵܝܸܐ܃
126:425	ܕܒܵܟ ܐܸܫܬܲܝܲܢܘ ܓܲܒܸ̈ܐ ܬܪ̈ܲܝܗܽܘܢ ܕܲܦܠܝܼܓܝܼܢ ܗ̄ܘܲܘ܀
126:426	ܒܙܵܟܽܘܬܵܟ ܡܵܪܝ ܩܵܡ ܚܲܝܵܒܵܐ ܗܲܘ ܕܲܢܦܲܠ ܗ̄ܘܵܐ܃
126:427	ܘܲܗܘܵܐ ܚܲܒܪܵܐ ܠܥܝܼܪܸ̈ܐ ܕܲܥܕܸܢ ܕܸܐܬܦܲܢܝܼ ܠܵܗ݀܀
126:428	ܬܸܗܪܵܐ ܗ̄ܘ ܕܲܪܵܟ ܕܟܲܕ ܙܲܟܵܝܵܐ ܐܢ̄ܬ ܡܸܬܟܲܬܲܫ ܗ̄ܘܲܝܬ܃
126:429	ܒܦܲܪܨܽܘܦ ܥܲܒܕܵܟ ܗܲܘ ܚܲܝܵܒܵܐ ܕܲܙܟܵܐ ܒܕܝܼܠܵܟ܀
126:430	ܟܣܝܼܬ ܒܲܡܪ̈ܲܘܡܸܐ ܘܛܽܘܗܡܲܢ ܟܽܠܸܗ ܠܵܐ ܚܵܙܸܐ ܠܵܟ܃
126:431	ܘܲܒܓܲܘ ܥܽܘܡܩܵܐ ܐܲܝܟ ܐܲܬܠܝܼܛܵܐ ܡܸܬܟܲܬܲܫ ܗ̄ܘܲܝܬ܀
126:432	ܒܪܲܘܡܵܐ ܟܲܣܝܵܐ ܒܥܽܘܡܩܵܐ ܓܲܠܝܵܐ ܘܠܵܐ ܡܸܬܕܲܪܟܲܬ܃
126:433	ܠܥܸܠ ܥܲܙܝܼܙܵܐ ܠܬܲܚܬ ܡܲܟܝܼܟܵܐ ܬܸܗܪܵܐ ܒܟܽܠܗܸܝܢ܀
126:434	ܥܲܠ ܡܲܪܟܲܒܬܵܐ ܕܪܲܘܡܵܐ ܫܒܝܼܚ ܐܲܢ̄ܬ ܘܠܵܐ ܡܸܬܕܲܪܟܲܬ܃
126:435	ܘܒܲܐܪܥܵܐ ܕܲܨܒܲܝܬ ܕܲܪܵܐ ܦܓܲܥ ܒܵܟ ܡܸܢ ܡܵܪܽܘܕܵܐ܀
126:436	ܫܲܡܸܫܘ ܥܝܼܪܸ̈ܐ ܠܗܲܘ ܕܸܐܬܢܲܣܝܼ ܡܸܢ ܐܲܓܽܘܢܵܐ܃
126:437	ܕܲܢܥܲܕܲܪ ܗ̄ܘܵܐ ܠܡܸܬܢܲܣ̈ܝܵܢܸܐ ܒܲܐܓܽܘ̈ܢܲܝܗܽܘܢ܀
126:438	ܩܪܸܒܘ ܡܲܠܲܐܟܸ̈ܐ ܘܲܐܘܫܸܛܘ ܗ̄ܘܲܘ ܠܸܗ ܟܠܝܼܠ ܩܽܘ̈ܠܵܣܸܐ܃
126:439	ܕܟܲܕ ܙܲܟܵܝܵܐ ܗ̄ܘ ܕܲܪܵܐ ܥܒܲܕ ܗ̄ܘܵܐ ܕܲܢܙܲܟܸܐ ܠܲܢ܀
126:440	ܒܪܵܐ ܕܟܼܐܢܵܐܝܼܬ ܐܸܫܬܲܡܲܫ ܗ̄ܘܵܐ ܡܸܢ ܡܲܠܲܐܟܸ̈ܐ܃
126:441	ܢܼܐܬܸܐ ܠܫܲܦܠܽܘܬܝ ܟܠܝܼܠ ܛܲܝܒܽܘܬܵܟ ܡܸܢ ܡܲܘܗܲܒܬܵܟ܀