The Comprehensive Aramaic Lexicon

126:234	ܐܸܢ ܠܲܡ ܐܵܡܲܪ ܘܗܵܘ̈ܝܵܢ ܟܼܐܦܸ̈ܐ ܠܲܚܡܵܐ ܒܕܲܒܪܵܐ܃
126:235	ܡܸܫܬܲܥܒܲܕ ܠܸܗ ܬܚܸܝܬ ܫܽܘܠܛܵܢܲܢ ܕܦܽܘܩܕܵܢܝ ܣܵܥܲܪ܀
126:236	ܒܚܲܕ ܡܸܢ ܐܸܣܟܝܼܡ ܢܸܦܩܽܘܕ ܒܲܠܚܽܘܕ ܡܸܬܦܲܪܲܣ ܗ̄ܘܵܐ܃
126:237	ܕܢܲܥܕܸܐ ܗ̄ܘܵܐ ܠܸܗ ܫܲܠܝܼܛܽܘܬܵܐ ܕܠܲܘ ܕܝܼܠܸܗ ܗ̄ܝܼ܀
126:238	ܐܵܘ ܡܵܪܽܘܕܵܐ ܟܢܵܬܸܗ ܕܙܲܡܪܝܼ ܩܵܛܸܠ ܡܵܪܸܗ܃
126:239	ܢܲܦܫܵܟ ܡܲܠܐܸܝܬ ܟܲܕ ܠܵܐ ܙܵܟܸܝܬ ܡܸܢ ܬܲܟܬܽܘܫܵܐ܀
126:240	ܠܲܘ ܐܵܕܵܡ ܗ̄ܽܘ ܕܲܒܝܲܕ ܦܼܐܪܵܐ ܩܛܲܠܬܵܝܗ̄ܝ ܒܲܥܕܸܢ܃
126:241	ܒܲܪ ܐܲܠܵܗܵܐ ܗ̄ܘ ܕܲܠܒܸܫ ܦܲܓܪܵܐ ܘܗܽܘ ܩܵܛܸܠ ܠܵܟ܀
126:242	ܗܵܢܵܐ ܦܲܚܵܐ ܨܠܵܐ ܗ̄ܘܵܐ ܒܝܼܫܵܐ ܠܟܲܦܢܸܗ ܕܡܵܪܲܢ܃
126:243	ܕܲܒܡܸܐܟܽܘܠܬܵܐ ܢܸܫܪܸܐ ܠܨܲܘܡܸܗ ܕܲܐܬܠܝܼܛ ܩܽܘܫܬܵܐ܀
126:244	ܐ̄ܡܲܪ ܠܲܡ ܠܟܼܐܦܸ̈ܐ ܕܢܸܗܘ̈ܝܵܢ ܠܲܚܡܵܐ ܐܸܢ ܒܵܪܽܘܝܵܐ ܐܢ̄ܬ܃
126:245	ܠܡܵܢܵܐ ܟܦܸܢ ܐܲܢ̄ܬ ܣܲܒܲܥ ܢܲܦܫܵܟ ܐܸܢ ܙܵܝܽܘܢܵܐ ܐܢ̄ܬ܀
126:246	ܥܒܸܕ ܠܵܟ ܠܲܚܡܵܐ ܘܚܲܘܵܐ ܚܲܝܠܵܟ ܐܸܢ ܣܵܦܸܩ ܐܲܢ̄ܬ܃
126:247	ܐܸܬܚܲܝܲܠ ܐܲܢ̄ܬ ܡܸܢ ܡܲܘܗܲܒܬܵܟ ܐܸܢ ܝܵܗܽܘܒܵܐ ܐܢ̄ܬ܀
126:248	ܐܲܬܠܝܼܛܵܐ ܕܹܝܢ ܒܵܬܲܪ ܗܵܕܸܐ ܚܲܘܝܼ ܚܲܝܠܸܗ܃
126:249	ܕܟܽܠܵܗ݀ ܐܽܘܪܚܵܐ ܒܡܲܟܝܼܟܽܘܬܵܐ ܐܸܬܵܐ ܕܢܸܣܥܽܘܪ܀
126:250	ܠܒܸܫ ܢܝܼܚܽܘܬܵܐ ܒܓܲܘ ܐܲܓܽܘܢܵܐ ܘܠܵܐ ܐܸܬܚܲܡܲܬ܃
126:251	ܕܒܽܐܘܡܵܢܽܘܬܵܐ ܘܚܸܟܡܵܐ ܢܸܙܟܸܐ ܘܠܵܐ ܒܫܽܘܠܛܵܢܵܐ܀
126:252	ܕܲܪܵܐ ܢܝܼܚܵܐ ܠܒܲܟ ܕܲܢܫܲܗܸܐ ܠܲܒܥܸܠܕܲܪܵܐ܃
126:253	ܘܠܵܐ ܐܸܬܥܲܙܝܼ ܐܲܝܟ ܕܲܡܨܸܐ ܗ̄ܘܵܐ ܥܲܠ ܬܲܟܬܽܘܫܵܐ܀
126:254	ܒܚܵܠܵܐ ܦܲܟܪܸܗ ܐܲܝܟ ܕܲܠܝܲܡܵܐ ܠܡܵܡܽܘܠ ܥܲܘܠܵܐ܃
126:255	ܕܲܚܠܵܦ ܕܲܪܵܐ ܕܪܵܫܵܐ ܥܲܬܸܕ ܕܢܸܫܬܲܦܲܠ ܒܸܗ܀
126:256	ܫܲܪܝܼ ܕܢܸܬܢܸܐ ܡܸ̈ܠܲܝ ܡܽܘܫܸܐ ܡܵܪܸܗ ܕܡܽܘܫܸܐ܃
126:257	ܕܲܢܚܲܘܸܐ ܗ̄ܘܵܐ ܕܲܒܪܵܐ ܐܝܼܬܲܘܗ̄ܝ ܘܠܲܘ ܢܽܘܟܪܵܝܵܐ܀
126:258	ܠܵܐ ܐܲܝܬܝܼ ܠܸܗ ܙܲܝܢܵܐ ܐ̄ܚܪܼܢܵܐ ܕܢܸܬܟܲܬܲܫ ܒܸܗ܃
126:259	ܐܸܠܵܐ ܒܡܵܐܢܸ̈ܐ ܕܡܸܢ ܒܸܝܬ ܐܲܒܽܘܗ̄ܝ ܡܸܬܚܲܫܲܚ ܗ̄ܘܵܐ܀
126:260	ܒܝܼܫܵܐ ܝܵܩܸܕ ܡܸܢ ܬܲܟܬܽܘܫܵܐ ܕܲܪܡܸܐ ܗ̄ܘܵܐ ܒܸܗ܃
126:261	ܘܡܵܪܲܢ ܬܵܢܸܐ ܡܸ̈ܠܲܝ ܣܵܦܪܵܐ ܘܲܡܒܲܙܲܚ ܒܸܗ܀
126:262	ܟܬܝܼܫ ܥܲܘܵܠܵܐ ܒܗܸܪܬܵܐ ܕܲܐܪܡܝܼ ܟܲܕ ܡܸܬܦܲܩܲܪ܃
126:263	ܘܲܒܪܵܐ ܡܫܝܼܚܵܐ ܬܵܢܸܐ ܟܬܵܒܸ̈ܐ ܪܲܟܝܼܟܵܐܝܼܬ܀
126:264	ܙܩܝܼܦ ܡܵܪܽܘܕܵܐ ܐܲܝܟ ܥܲܠܥܵܠܵܐ ܥܲܠ ܢܸܣܝܽܘܢܵܐ܃
126:265	ܘܝܸܫܽܘܥ ܡܲܟܝܼܟ ܡܲܠܸܦ ܠܵܚܸܫ ܟܲܕ ܠܵܐ ܩܵܥܸܐ܀
126:266	ܟܬܝܼܒ ܗ̄ܽܘ ܐܸܡܲܪ ܕܠܵܐ ܗ̄ܘܵܐ ܒܠܲܚܡܵܐ ܘܡܲܝ̈ܵܐ ܒܲܠܚܽܘܕ܃
126:267	ܫܟܝܼܚܝܼܢ ܚܲܝܸ̈ܐ ܠܲܒܢܲܝܢܵܫܵܐ ܡܸܢ ܐܲܠܵܗܵܐ܀
126:268	ܟܽܠ ܡܸ̈ܠܸܐ ܓܹܝܪ ܕܸܐܡܲܪ ܡܵܪܝܵܐ ܚܲܝܸ̈ܐ ܐܸܢܽܘܢ܃
126:269	ܘܲܕܠܵܐ ܠܲܚܡܵܐ ܡܨܸܐ ܗ̄ܘ ܐ̄ܢܵܫ ܚܵܝܸܐ ܐܸܢ ܦܵܪܽܘܫܵܐ ܗ̄ܘ܀
126:270	ܐܵܦܠܵܐ ܒܠܲܚܡܵܐ ܕܠܲܘ ܡܸܢ ܟܼܐܦܸ̈ܐ ܣܝܼܡܝܼܢ ܚܲܝܸ̈ܐ܃
126:271	ܕܒܲܒܪܵܐ ܡܸܠܬܵܐ ܩܵܐܸܡ ܦܲܓܪܵܐ ܕܗܵܐ ܚܵܙܸܐ ܐܲܢ̄ܬ܀
126:272	ܒܡܸܠܬܵܐ ܕܡܵܪܝܵܐ ܐܝܼܬ ܚܲܝܽܘܬܵܐ ܠܟܽܠܗܽܘܢ ܚܲܝܸ̈ܐ܃
126:273	ܡܸܢ ܝܲܬܝܼܪܽܘ ܐܝܼܬܲܘܗ̄ܝ ܠܲܚܡܵܐ ܘܠܵܐ ܚܵܫܲܚ ܠܝܼ܀
126:274	ܢܦܲܠ ܐܲܬܠܝܼܛܵܐ ܒܕܲܪܵܐ ܩܲܕܡܵܐ ܕܸܐܬܟܲܬܲܫ ܒܸܗ܃
126:275	ܘܸܐܬܬܲܒܲܪܘ ܗ̄ܘܲܘ ܕܪ̈ܵܥܸܐ ܕܼܐܝ̈ܕܲܘܗ̄ܝ ܡܸܢ ܡܲܦܽܘܠܬܵܐ܀
126:276	ܚܙܵܝܗ̄ܝ ܠܲܡܫܝܼܚܵܐ ܕܲܒܩܲܫܝܽܘܬܵܐ ܠܵܐ ܡܸܬܚܲܫܲܚ܃
126:277	ܘܬܽܘܒ ܐܸܬܠܲܒܲܒ ܟܲܕ ܡܸܬܡܲܪܡܲܪ ܥܲܠ ܬܲܟܬܽܘܫܵܐ܀
126:278	ܐܲܘܫܸܛ ܠܲܒܟܸܗ ܟܲܕ ܡܸܫܬܲܥܠܸܐ ܒܓܽܘܡܕܵܢܽܘܬܸܗ܃
126:279	ܕܲܢܛܽܘܣ ܥܲܡܸܗ ܘܢܸܚܙܸܐ ܚܲܝܠܸܗ ܐܸܢ ܐܵܪܲܥ ܠܸܗ܀
126:280	ܦܪܲܚ ܫܲܪܝܼܪܵܐ ܥܲܡ ܕܲܓܵܠܵܐ ܠܲܐܝܟܵܐ ܕܲܨܒܵܐ܃
126:281	ܕܲܒܟܽܠ ܕܲܪ̈ܝܼܢ ܢܸܬܚܲܝܲܒ ܗ̄ܘܵܐ ܥܲܠ ܕܸܐܫܬܲܥܠܝܼ܀
126:282	ܚܵܒ ܗ̄ܘܵܐ ܒܕܲܒܪܵܐ ܘܥܲܠ ܠܸܗ ܠܫܲܝܢܵܐ ܕܢܸܬܟܲܬܲܫ ܒܸܗ܃
126:283	ܚܲܠܸܦ ܐܲܬܪܵܐ ܕܲܠܬܲܟܬܽܘܫܸܗ ܢܦܼܐܫܵܐ ܢܸܗܘܸܐ܀
126:284	ܒܗܸܬ ܗ̄ܘܵܐ ܒܚܽܘܪܒܵܐ ܘܲܬܪܲܨ ܢܼܐܙܲܠ ܠܽܘܩܒܲܠ ܟܲܪܟܵܐ܃