The Comprehensive Aramaic Lexicon

080	ܘܥܠܘ ܠܡܥܪܬܐ ܗ݀ܝ ܕܗܘ݂ܐ ܒܗ݀ ܡܘܫܐ ܪܝܫܐ ܕܢܒܝ̈ܐ܂ ܘܐܬܟܪܟܘ ܘܣܥܪܘ܆ ܐܦ ܠܣܘܓܐܐ ܕܐܝܚ̈ܝܕܝܐ܇ ܕܥܡܪܝܢ ܗܘܘ ܬܡܢ ܒܗ ܒܛܘܪܐ݁ ‍[‍30‍]‍ ܘܡܢ ܒܬܪ ܝܘܡ̈ܬܐ ܣ̈ܓܝܐܐ ܕܗܘܘ ܬܡܢ܆ ܐܡ݂ܪ ܦܘܠܐ ܠܝܘܚܢܢ܂ ܢܪܕܐ ܐܚܝ ܢܪܕܐ ܠܡܕܝܢܬܐ ܡܒܪܟܬܐ ܐܘܪܗܝ܂ ܗܐ ܓܝܪ ܐܚ̈ܝܢ ܬܪ̈ܥܣܪ ܕܒܡܥܪܬܐ܆ ܫܒܥܐ ܡܢܗܘܢ ܫܟܒܘ ܠܗܘܢ݁܀
081	ܚ݁ܙܝܬ ܓܝܪ ܫܒܘ̈ܩܐ ܬܪ̈ܥܣܪ ܕܝܥܐܝܢ ܒܗ݀ ܒܡܥܪܬܐ܂ ܘܥܠܘ ܠܬܡܢ ܓܒܪ̈ܐ ܒܠܒܘ̈ܫܝܢ ܕܐܝܩܪ܆ ܘܦܣܩܘ ܡܢܗܘܢ ܫܒܥܐ ܫܒܘ̈ܩܝܢ܆ ܘܐܙܠܘ ܢܨܒܘ ܐܢܘܢ ܒܦܪܕܝܣܗ ܕܐܠܗܐ܀
082	ܘܐܡ݂ܪ ܠܗ ܝܘܚܢܢ܂ ܐܝܢ ܐܚܝ ܢܪܕܐ܂ ܡܥܩ ܐܢܐ ܕܝܢ ܕܠܡܐ ܠܦܥܠܘܬܟ ܐܬܕܟ݂ܪܬ܇ ܘܡܛܠ ܗܕܐ ܪܗܝ݂ܒܬ݁܀
083	‍[‍31‍]‍ ܘܗܘ݂ܐ ܕܟܕ ܐܬ݁ܝܢ ܗܘܘ ܒܐܘܪܚܐ ܒܥܕܢܐ ܕܪܡܫܐ܆ ܡ݁ܛܝܘ ܠܛܘܪܐ ܚܕ܂ ܘܒܪܝܫܗ ܐܝܠܢܐ ܪܡܐ܂ ܘܗܐ ܛܠܢܝܬܗ ܕܓܒܪܐ ܕܩܐ݁ܡ ܒܗ ܒܐܝܠܢܐ܂ ܗ݂ܢܘܢ ܕܝܢ ܟܕ ܚܙܐܘܗܝ܆ ܩܥ݁ܝܢ ܗܘܘ ܠܗ ܡܢ ܠܬܚܬ܂ ܒܪܟ ܡܪܝ܂ ܗ݂ܘ ܕܝܢ ܠܐ ܐܬܝܒ ܐܢܘܢ ܦܬܓܡܐ܂ ܘܐܘܣܦ ܕܬܪ̈ܬܝܢ ܙܒ̈ܢܝܢ ܦܘܠܐ ܩܥ݂ܐ ܠܗ ܘܐܡ݁ܪ ܒܡܫܝܚܐ ܗ݀ܘ ܕܪ̈ܚܡܝܢ ܠܗ ܙܕܝ̈ܩܐ܆ ܐܢ ܒܪܢܫܐ ܐܢܬ ܡܠܠ ܥܡܢ܂ ܘܐܢ ܫܐܕܐ ܐܢܬ܂ ܐܬܛ݁ܠܩ ܡܢ ܩܕܡܝܢ܆ ܐܝܟ ܥܘܪܐ ܡܢ ܩܕܡ ܪܘܚܐ݁܀

084	ܟܕ ܫܡ݂ܥ ܕܝܢ ܛܘܒܢܐ ܕܠܥܠ ܫܡܗ ܕܡܫܝܚܐ܆ ܚܕܝ ܚܕܘܬܐ ܪܒܬܐ ܕܛܒ܂ ܡܛܘܠ ܕܚܙܐ ܐܚ̈ܘܗܝ ܕܐܬܘ ܠܘܬܗ݀

085	ܘܐܡ݂ܪ ܠܗܘܢ܂ ܠܐ ܬܕܚܠܘܢ܂ ܒܪܢܫܐ ܐܝܬܝ ܐܟܘܬܟܘܢ݁ ܬܠܡܝܕܗ ܕܡܫܝܚܐ܂ ܘܐܡ݂ܪ ܠܗ ܝܘܚܢܢ܂ ܘܡܛܠ ܡܢܐ ܓܒ݂ܝܬ ܠܟ ܡܪܝ܇ ܕܬܩܘܡ ܒܪܝܫܗ ܕܐܝܠܢܐ܂ ܘܗܐ ܟܡܐ ܠܟ ܫ̈ܢܝܐ ܒܥܡܠܐ ܗܢܐ܂ ܐܡ݁ܪ ܠܗܘܢ܂ ܚܝ̈ܝܟܘܢ ܐܚ̈ܝ܆ ܕܗܐ ܬܠܬܝܢ ܘܚܡܫ ܫ̈ܢܝܢ܇ ܐܝܬ ܠܝ ܕܩܐܡ ܐܢܐ ܒܗܕܐ ܕܘܟܬܐ܂ ܘܠܐ ܐܢܫ ܪܓܝܫ ܒܝ܂ ܐܠܐ ܬܪ̈ܝܢ ܓܒܪ̈ܝܢ ܕܐܬܝܢ ܠܘܬܝ ܡܢ ܥܕܢܐ ܠܥܕܢܐ܆ ܘܡ݁ܝܬܝܢ ܠܝ ܣܝܒܪܬܐ ܕܠܚܡܐ ܘܕܡ̈ܝܐ݁܀
086	ܘܐܦ ܠܝ ܓܝܪ ܐܘܪܚܐ ܩܪܬܢܝ ܗܘܬ܂ ܕܐܥܒܪ ܒܕܘܟܬܐ ܗܕܐ ܐܝܟ ܕܐܦ ܐܢܬܘܢ܂ ܘܚ݁ܙܝܬ ܕܩܐ݁ܡ ܒܪܝܫܗ ܕܐܝܠܢܐ ܗܢܐ܃
087	ܓܒܪܐ ܚܕ ܝܩܝܪ ܣܝܒ̈ܬܐ܆ ܕܩ݁ܪܝܢ ܗܘܘ ܠܗ ܐܒܪܗܡ ܪܝܫܐ ܕܐܒܝ̈ܠܐ܂ ܗܢܐ ܟܕ ܚܙܢܝ܂ ܟܠ݂ܢܝ ܠܘܬܗ ܬܠܬܐ ܝܘܡ̈ܝܢ܂ ܘܡܫܬܥܐ ܗܘܐ ܠܝ ܥܠ ܬܟ̈ܬܘܫܐ܇ ܕܗܘܘ ܠܗ ܥܡ ܪ̈ܘܚܐ ܛܢ̈ܦܬܐ܇ ܘܥܠ ܫܦܝܘܬܐ ܕܩܒ݂ܠܬ ܢܦܫܗ ܡܢ ܐܠܗܐ ܒܬܪ ܬܟܬܘ̈ܫܘܗܝ܂ ܘܡܢ ܒܬܪ ܬܠܬܐ ܝܘܡ̈ܝܢ ܐܫ݂ܠܡ ܪܘܚܗ ܠܐܠܗܐ܂ ܘܐܢܐ ܐܚܬܬܗ ܘܥܦܝܬܗ܂ ܘܡܛܠ ܕܪܓܬ ܢܦܫܝ ܠܫܦܝܘܬܗ݀ ܕܢܦܫܗ܆ ܣܠܩܬ ܘܩܡ݁ܬ ܒܕܘܟܬܗ܂ ܘܗܐ ܡܣܟܐ ܐܢܐ ܠܦܘܪܩܢܗ ܕܐܠܗܐ܂ ܐܠܐ ܒܚܝ̈ܝܟܘܢ ܐܚ̈ܝ ܡܛܠ ܚܘܒܗ ܕܡܪܢ܆ ܟܬܪܘ ܠܘܬܝ ܐܦ ܐܢܬܘܢ ܬܠܬܐ ܝܘܡ̈ܝܢ܆ ܘܬܚܙܘܢ ܬܕܡܘܪܬܐ܂ ܐܠܗܐ ܓܝܪ ܗ݀ܘ ܕܫܕܪܢܝ ܠܘܬ ܛܘܒܢܐ ܐܒܪܗܡ܆ ܗ݂ܘ ܫܕܪ ܐܦ ܠܟܘܢ ܒܙܒܢܐ ܗܢܐ݁܀
088	‍[‍32‍]‍ ܘܗܘ݂ܐ ܡܢ ܒܬܪ ܬܠܬܐ ܝܘܡ̈ܝܢ ܕܟܬܪܢܢ ܠܘܬܗ܆ ܐܫ݂ܠܡ ܪܘܚܗ ܠܐܠܗܐ܂ ܟܕ ܡܦܩ݁ܕ ܠܢ ܘܡܙܗܪ ܠܢ ܘܡܚ݁ܘܐ ܠܢ܇ ܐܝܠܝܢ ܕܥ̈ܬܝܕܢ ܕܢܐ̈ܬܝܢ
089	ܥܠ ܒ̈ܢܝ ܐܢܫܐ݁܀