← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

64494: AngelZachariah

Click on a word for lexical analysis
Click on a red-colored coordinate for comments and/or translations of the line

00 ܣܽܘܓܼܝܬܵܐ ܕܥܲܠ ܙܟܲܪܝܵܐ ܘܥܼܝܪܵܐ
02 ܘܟܲܕ ܥܲܠ ܙܟܲܪܝܵܐ ܩܕܵܡ ܡܵܪܝܵܐ ܐܲܝܟ ܕܲܢܫܲܠܸܡ ܬܸܫܡܸܫܬܸܗ݀ ܘܲܢܣܼܝܡ ܒܸܣ̈ܡܸܐ ܥܲܠ ܡܲܕܒܚܵܐ ܘܡܸܢ ܚܽܘܣܝܵܐ ܢܵܣܸܒ ܗ̄ܘܵܐ܀
03 ܒܗܲܘ ܥܸܕܵܢܵܐ ܙܟܲܪܝܵܐ ܚܙܵܐ ܡܲܠܲܐܟ ܡܵܪܝܵܐ ܕܠܸܗ ܐܸܬܓܠܼܝ݁ ܡܸܢ ܝܲܡܼܝܢ ܡܲܕܒܚܵܐ ܕܒܸܣ̈ܡܸܐ ܘܡܸܢ ܕܸܚܠܬܸܗ ܐܸܬܬܙܼܝܥ ܗ̄ܘܵܐ܀
04 ܒܙܼܝܘܵܐ ܪܲܒܵܐ ܘܲܡܫܲܒܚܵܐ ܚܙܵܝܗܝ ܟܲܕ ܩܵܐܸܡ ܘܸܐܬܬܙܼܝܥ ܗ̄ܘܵܐ݁ ܩܪܸܒ ܪܽܘܚܵܢܵܐ ܘܠܲܒܒܸܗ ܗ̄ܘܵܐ ܒܩܵܠܵܐ ܢܼܝܚܵܐ ܘܡܲܟܼܝܟܵܐ܀
05 ܥܼܝܪܵܐ ̈ ܠܵܐ ܠܲܡ ܬܸܕܚܲܠ ܐܵܘ ܙܟܲܪܝܵܐ ܕܥܸܠܬܵܐ ܗ̄ܝ ܛܵܒܬܵܐ ܕܠܵܟ ܐܸܬܵܬ݁ ܨܠܽܘܬܵܟ ܐܸܬܬܢܼܝܚ ܒܵܗ݀ ܡܵܪܝܵܐ ܘܫܲܠܚܲܢܝ ܨܸܐܕܲܝܟ ܕܸܐܣܲܒܪܵܟ܀
06 ܚܠܵܦ ܕܲܫܦܲܪܬܽܘܢ ܩܕܵܡ ܡܵܪܝܵܐ ܐܲܢ̄ܬ ܥܲܡ ܐܲܢ̄ܬܬܵܟ ܐܸܠܼܝܫܒܲܥ݁ ܗܵܐ ܒܵܛܢܵܐ ܘܝܵܠܕܵܐ ܠܵܟ ܒܪܵܐ ܕܲܐܢ̄ܬ ܘܣܲܓܼܝܸ̈ܐܐ ܢܸܚܕܽܘܢ ܒܸܗ܀
07 ܚܲܡܪܵܐ ܘܫܲܟܪܵܐ ܠܵܐ ܢܸܫܬܸܐ ܘܲܢܙܼܝܪ ܗ̄ܽܘ ܕܡܵܪܝܵܐ ܢܸܬܩܪܸܐ݁ ܘܪܽܘܚܵܐ ܕܩܽܘܕܫܵܐ ܒܓܲܘ ܡܲܪܒܥܵܐ ܢܸܡܠܸܝܘܗܝ ܡܵܪܝܵܐ ܘܲܢܩܲܕܫܼܝܘܗܝ܀
08 ܝܽܘܚܲܢܵܢ ܓܹܝܪ ܢܸܗܘܸܐ ܫܡܸܗ ܕܦܼܐܪܵܐ ܕܝܵܠܕܵܐ ܐܸܠܼܝܫܒܲܥ݁ ܢܫܲܦܸܐ ܐܽܘܪܚܵܐ ܩܕܵܡ ܡܵܪܝܵܐ ܘܲܐܝܟ ܐܼܝܙܓܲܕܵܐ ܩܕܵܡܲܘܗܝ ܢܕܽܘܨ܀
09 ܗܵܠܸܝܢ ܡܸ̈ܠܸܐ ܙܟܲܪܝܵܐ ܫܡܲܥ ܡܸܢ ܡܲܠܲܐܟܵܐ ܠܘܵܬ ܡܲܕܒܚܵܐ݁ ܘܸܐܬܦܲܠܲܓ ܗ̄ܘܵܐ ܥܲܠ ܡܸܐܬܝܸܗ ܘܠܵܐ ܗܲܝܡܸܢ ܗ̄ܘܵܐ ܒܲܣܒܲܪܬܸܗ܀
10 ܙܟܲܪܝܵܐ ̈ ܐܲܝܟܲܢ ܡܵܪܝ ܗܵܕܸܐ ܗܵܘܝܵܐ ܕܢܸܗܘܸܐ ܝܲܠܕܵܐ ܠܸܐܠܼܝܫܒܲܥ݁ ܕܼܐܝܬܸܝܗ݀ ܣܵܒܬܵܐ ܘܲܥܩܲܪܬܵܐ ܘܸܐܢܵܐ ܣܵܒܵܐ ܐܲܝܟ ܕܡܸܬܚܙܸܐ܀
11 ܥܼܝܪܵܐ ̈ ܐܵܡܲܪ ܥܼܝܪܵܐ ܙܟܲܪܝܵܐ ܫܡܲܥ ܘܩܲܒܸܠ ܣܒܲܪܬܵܐ ܕܩܲܒܸܠܬ ܡܸܢܝ݁ ܠܵܐ ܓܹܝܪ ܥܲܛܠܵܐ ܩܕܵܡ ܡܵܪܝܵܐ ܕܬܼܐܠܲܕ ܣܵܒܬܵܐ ܘܲܥܩܲܪܬܵܐ܀
12 ܙܟܲܪܝܵܐ ̈ ܒܲܐܪܥܵܐ ܢܕܲܡܼܝܗ݀ ܐܵܦ ܠܲܐܢ̄ܬܬܵܐ ܕܸܐܢ ܡܸܙܕܲܪܥܵܐ ܐܵܦ ܡܲܘܥܝܵܐ݁ ܕܗܵܝ ܕܟܽܠ ܟܽܠܸܗ ܠܵܐ ܐܲܘܥܝܲܬ ܦܣܼܝܩ ܗ̄ܽܘ ܣܲܒܪܵܗ݀ ܘܠܵܐ ܡܲܘܥܝܵܐ܀
13 ܥܼܝܪܵܐ ̈ ܒܲܐܝܕܵܐ ܦܠܼܝܓܲܬ ܘܠܵܐ ܡܲܫܪܲܬ ܘܲܠܡܵܢ ܥܲܣܩܵܐ ܕܲܬܗܲܝܡܢܲܢܝ݁ ܡܲܛܝܵܐ ܗ̄ܝ ܓܹܝܪ ܒܼܐܝ̈ܕܲܝ ܡܵܪܝܵܐ ܕܡܸܢ ܠܵܐ ܡܸܕܸܡ ܡܸܕܸܡ ܢܩܼܝܡ܀
14 ܙܟܲܪܝܵܐ ̈ ܓܲܠܝܵܐ ܗ̄ܝ ܗܵܕܸܐ ܘܠܵܐ ܡܲܨܝܵܐ ܘܢܲܗܼܝܪܵܐ ܥܠܲܝ ܐܲܝܟ ܫܸܡܫܵܐ݁ ܗܵܝ ܕܟܲܕ ܥܠܲܝܡܬܵܐ ܗ̄ܝ ܠܵܐ ܝܸܠܕܲܬ ܐܲܝܟܲܢ ܒܣܲܝܒܽܘܬܵܗ݀ ܝܵܠܕܵܐ܀
15 ܥܼܝܪܵܐ ̈ ܓܠܼܝܬ ܠܵܟ ܐ̄ܪܵܙܵܐ ܕܡܵܪܝܵܐ ܦܩܲܕ ܘܗܵܐ ܐܲܠܸܦܬܵܟ ܠܵܐ ܬܸܬܚܪܸܐ݁ ܘܸܐܢ ܬܽܘܒ ܬܸܬܚܪܸܐ ܘܠܵܐ ܬܗܲܝܡܢܲܢܝ ܕܚܲܠ ܡܸܢ ܕܼܝܢܸܗ ܕܲܡܫܲܕܪܵܢܝ܀
16 ܙܟܲܪܝܵܐ ̈ ܕܽܘܡܵܪܵܐ ܗ̄ܘ ܓܹܝܪ ܕܸܐܗܲܝܡܢܵܟ ܒܫܲܪܒܵܐ ܗܵܢܵܐ ܕܠܼܝ ܐܵܡܪܲܬ݁ ܕܼܐܝܠܵܢܵܐ ܕܡܸܢ ܟܲܕܽܘ ܨܒܵܐ ܕܢܸܬܸܠ ܦܼܐܪܵܐ ܠܵܐ ܡܲܨܝܵܐ܀
17 ܥܼܝܪܵܐ ̈ ܕܲܥ ܐܵܘ ܙܟܲܪܝܵܐ ܕܲܟܡܵܐ ܛܥܲܝܬ ܘܠܵܐ ܡܸܬܒܲܝܢܲܬ ܕܲܐܝܠܸܝܢ ܗܘ̈ܲܝ݁ ܣܲܒ ܠܵܟ ܣܸܦܪܸ̈ܐ ܘܲܩܪܼܝ ܒܗܘ݁ܢ ܟܡܵܐ ܬܡܼܝ̈ܗܵܬܵܐ ܥܒܲܕ ܡܵܪܝܵܐ܀
18 ܙܟܲܪܝܵܐ ̈ ܗܵܕܸܐ ܓܲܠܝܵܐ ܗ̄ܝ ܕܡܵܪܝܵܐ ܡܨܸܐ ܘܫܲܪܼܝܪܵܐ ܠܼܝ ܕܵܐܦ ܐܸܬܥܒܸܕ݁ ܒܗܲܘ ܓܹܝܪ ܙܲܒܢܵܐ ܐܵܠܨ̈ܵܢ ܗ̄ܘ̈ܲܝ ܡܸܛܽܠ ܗܵܕܸܐ ܥܒܲܕ ܡܵܪܝܵܐ܀
19 ܥܼܝܪܵܐ ̈ ܗܵܠܸܝܢ ܝܵܕܥܲܬ ܕܡܵܪܝܵܐ ܥܒܲܕ ܘܡܸܛܽܠ ܕܵܐܠܨ̈ܵܢ ܗ̄ܘ̈ܲܝ ܐܸܬܥ̈ܒܸܕܝ݁ ܐܵܦ ܗܵܫܵܐ ܓܹܝܪ ܥܲܠ ܕܵܐܠܨܵܐ ܒܵܛܢܵܐ ܘܝܵܠܕܵܐ ܐܸܠܼܝܫܒܲܥ܀
20 ܙܟܲܪܝܵܐ ̈ ܘܸܐܢ ܒܩܲܕܡܵܝܬܵܐ ܗܵܠܸܝܢ ܗܘ̈ܲܝ ܡܸܛܽܠ ܕܲܫܒܲܪ ܗ̄ܘܵܐ ܥܵܠܡܵܐ݁ ܗܵܫܵܐ ܕܡܸܢ ܟܲܕܽܘ ܐܸܬܓܡܲܪ ܥܲܠ ܬܸܕܡܽܘܪܬܵܐ ܠܡܵܢ ܐܵܠܨܵܐ܀
21 ܥܼܝܪܵܐ ̈ ܘܸܐܠܽܘܠܵܐ ܣܢܼܝܩ ܗ̄ܘܵܐ ܥܵܠܡܵܐ ܐܵܦ ܥܲܠ ܗܵܕܸܐ ܟܲܕ ܗܵܘܝܵܐ݁ ܠܵܐ ܡܫܲܕܲܪ ܗ̄ܘܵܐ ܠܼܝ ܡܵܪܝܵܐ ܠܟܵܐ ܘܠܵܐ ܐܵܠܨܵܐ ܗ̄ܘܵܬ ܐܸܣܲܒܪܵܟ܀
22 ܙܟܲܪܝܵܐ ̈ ܙܲܒܢܵܐ ܕܲܚܨܵܕܵܐ ܗܵܐ ܗܘܵܐ ܕܼܝܠܝ ܘܥܲܡ ܐܲܢ̄ܬܬܵܐ ܐܸܠܼܝܫܒܲܥ݁ ܘܙܲܪܥܵܐ ܕܲܙܪܲܥ ܥܲܡ ܐܸܕܪܵܐ ܠܲܝܬ ܒܸܗ ܚܸܫܚܽܘ ܘܠܵܐ ܡܸܬܒܥܸܐ܀
23 ܥܼܝܪܵܐ ̈ ܙܲܒܢܵܐ ܕܲܚܨܵܕܵܐ ܗܵܐ ܗܘܵܐ ܐܲܝܟ ܕܵܐܡܲܪ ܐܲܢ̄ܬ ܒܲܬܪܼܝܨܽܘܬܵܐ݁ ܚܵܙܸܝܬ ܦܼܐܪܵܐ ܠܸܐܠܼܝܫܒܲܥ ܘܡܸܬܕܲܡܲܪ ܐܲܢ̄ܬ ܟܲܕ ܗܵܘܸܐ܀
24 ܙܟܲܪܝܵܐ ̈ ܚܵܙܸܐ ܐ̄ܢܵܐ ܠܵܟ ܕܲܡܫܲܒܚܲܬ ܘܡܸܢ ܐܲܪ̈ܥܵܢܸܐ ܙܼܝܘܵܟ ܫܒܼܝܚ݁ ܟܡܵܐ ܐܸܢ ܪܲܒ ܐܲܢ̄ܬ ܘܲܡܫܲܒܚܲܬ ܡܸܠܬܵܟ ܥܲܣܩܵܐ ܕܸܐܩܲܒܠܼܝܘܗܝ܀
25 ܥܼܝܪܵܐ ̈ ܚܙܼܝ ܐܵܘ ܙܟܲܪܝܵܐ ܘܫܲܦܼܝܪ ܒܩܼܝ ܚܽܘܪ ܒܲܐܒܪܵܗܵܡ ܕܡܸܢܸܗ ܗܘܲܝܬ݁ ܗܽܘ ܓܹܝܪ ܣܵܒܵܐ ܐܵܦ ܐܲܢ̄ܬܬܸܗ ܥܩܲܪܬܵܐ ܗ̄ܘܵܬ ܘܗܵܐ ܝܸܠܕܲܬ܀
26 ܙܟܲܪܝܵܐ ̈ ܛܵܒ ܢܲܗܼܝܪܵܐ ܠܼܝ ܡܸܠܬܵܟ ܥܲܠ ܐܲܒܪܵܗܵܡ ܕܸܐܡܲܪܬ ܠܼܝ݁ ܬܲܡܵܢ ܡܸܢ ܐܵܠܨ̈ܵܬܵܐ ܗܘܵܬ ܕܥܲܡܸܗ ܒܙܲܪܥܸܗ ܢܸܬܒܲܪܟܽܘܢ܀
27 ܥܼܝܪܵܐ ̈ ܛܥܲܝܬ ܐܵܘ ܙܟܲܪܝܵܐ ܗܵܐ ܠܵܐ ܬܦܽܘܫ ܟܡܵܐ ܐܸܢ ܬܸܓܡܲܪ ܡܸܬܒܐܸܫ ܠܵܟ݁ ܦܲܩܵܚ ܗܽܘ ܠܵܟ ܕܲܡܗܲܝܡܢܲܬ ܕܬܸܬܸܠ ܫܽܘܒܚܵܐ ܠܲܡܫܲܕܪܵܢܝ܀
28 ܙܟܲܪܝܵܐ ̈ ܝܵܕܲܥ ܟܲܣ̈ܝܵܬܵܐ ܗ̄ܘ ܡܵܪܝܵܐ ܘܟܽܠ ܚܽܘ̈ܫܵܒܸܐ ܩܕܵܡܲܘܗܝ ܓܠܸܝܢ݁ ܐܸܢܗܽܘ ܕܲܒܦܽܘܡܝ ܐܸܩܲܒܠܵܟ ܠܸܒܝ ܠܵܐ ܨܵܒܸܐ ܕܢܸܬܛܦܼܝܣ ܠܵܟ܀
29 ܥܼܝܪܵܐ ̈ ܝܲܘܡܵܐ ܗܵܢܵܐ ܠܟܽܘܢ ܛܵܒ ܫܒܼܝܚ ܡܸܢ ܝܲܘ̈ܡܲܝ ܫܲܢ̄ܬܵܐ ܟܽܠܗܘ݁ܢ݁ ܗܵܟܲܢ ܢܸܗܘܸܐ ܡܥܲܠܲܝ ܒܪܵܟ ܡܸܢ ܝܼܠܼܝ̈ܕܲܝ ܢܸܫܸ̈ܐ ܟܽܠܗܘ݁ܢ܀
30 ܙܟܲܪܝܵܐ ̈ ܟܡܵܐ ܐܸܢ ܬܼܐܡܲܪ ܘܲܬܦܼܝܣܲܢܝ ܡܸܠܲܝ̈ܟ ܠܚܽܘܫܵܒܝ ܠܵܐ ܩܵܪ̈ܒܵܢ݁ ܒܬܲܪܬܸܝܢ ܡܡܲܚܝܵܐ ܐܸܠܼܝܫܒܲܥ ܒܣܲܝܒܽܘܬܵܐ ܘܥܲܩܪܽܘܬܵܐ ܐܲܟܚܕܵܐ܀
31 ܥܼܝܪܵܐ ̈ ܟܲܕ ܐܵܦ ܣܲܪܵܐ ܐܸܣܬܲܒܪܲܬ ܗܵܠܸܝܢ ܬܲܪܬܸܝܢ ܡܛܲܝ̈ ܥܠܸܝܗ݀݁ ܣܲܝܒܽܘܬܵܐ ܘܥܲܩܪܽܘܬܵܐ ܐܲܟܚܕܵܐ ܘܕܲܨܒܵܐ ܡܵܪܝܵܐ ܝܸܠܕܲܬ ܒܪܵܐ܀
32 ܙܟܲܪܝܵܐ ̈ ܠܘܲܝ ܕܹܝܢ ܐܵܘ ܡܵܪܝ ܚܽܘܫܵܒܝ ܨܒܵܐ ܘܲܦܠܼܝܓܽܘܬܵܐ ܐܸܬܥܲܩܪܲܬ݁ ܓܲܠܝܵܐ ܗ̄ܝ ܠܼܝ ܓܹܝܪ ܕܡܵܪܝܵܐ ܡܨܸܐ ܘܕܲܐܫܲܪ ܡܸܠܬܵܟ ܥܲܣܩܵܐ ܗ̄ܝ ܠܼܝ܀
33 ܥܼܝܪܵܐ ̈ ܠܘܲܝ ܕܹܝܢ ܙܟܲܪܝܵܐ ܠܵܐ ܐܸܬܚܪܼܝܬ ܟܡܵܐ ܙܵܕܸܩ ܠܵܟ ܕܲܬܛܦܼܝܣ ܠܼܝ݁ ܐܸܫܲܥܝܵܐ ܐܸܬܢܲܒܼܝ ܥܲܠ ܒܪܵܟ ܡܸܢ ܩܕܵܡ ܙܲܒܢܵܐ ܐܲܝܟ ܕܸܐܬܦܩܸܕ܀
34 ܙܟܲܪܝܵܐ ̈ ܡܵܢܵܐ ܐܼܝܬܲܝ ܒܗܵܢ ܥܵܠܡܵܐ ܕܲܐܘܠܸܕ ܦܼܐܪܵܐ ܕܲܡܠܼܝܟ ܥܠܲܘܗܝ݁ ܟܡܵܐ ܐܸܢ ܬܲܠܦܲܢܝ ܠܵܐ ܐܸܬܛܦܼܝܣ ܥܲܠ ܕܝܵܕܲܥ ܐ̄ܢܵܐ ܕܠܵܐ ܗܵܘܝܵܐ܀
35 ܥܼܝܪܵܐ ̈ ܡܲܠܲܐܟܵܐ ܕܹܝܢ ܗܵܘܸܐ ܒܪܵܟ ܩܕܵܡ ܦܲܪܨܽܘܦܸܗ ܕܲܡܪܲܝܡܵܐ݁ ܢܫܲܦܸܐ ܐܽܘܪܚܵܐ ܩܕܵܡ ܡܵܪܝܵܐ ܘܢܸܩܥܸܐ ܘܢܼܐܡܲܪ ܕܬܽܘܒܘ ܐܸܬܦܢܲܘ܀
36 ܙܟܲܪܝܵܐ ̈ ܣܸܠܩܸܬ ܠܗܲܝܟܠܵܐ ܕܸܐܫܦܲܪ ܠܡܵܪܝ ܘܸܐܣܼܝܡ ܒܸܣ̈ܡܸܐ ܩܕܵܡ ܡܲܕܒܚܸܗ݀ ܘܠܵܐ ܝܵܕܲܥ ܗ̄ܘܼܝܬ ܕܲܒܗܲܝܟܠܵܐ ܗܵܠܸܝܢ ܐܸܫܡܲܥ ܕܪ̈ܲܘܪܒܵܢ ܡܸܢܝ܀
37 ܥܼܝܪܵܐ ̈ ܣܒܲܪܬܵܐ ܚܕܲܬܵܐ ܐܸܣܲܒܪܵܟ ܟܒܲܪ ܢܸܬܩܲܒ̈ܠܵܢ ܡܸ̈ܠܲܝ ܥܠܲܝܟ݁ ܐܸܢܵܐ ܐܼܝܬܲܝ ܓܲܒܪܼܐܸܝܠ ܕܲܡܫܲܡܸܫ ܐ̄ܢܵܐ ܩܕܵܡ ܡܵܪܝܵܐ܀
38 ܥܼܝܪܵܐ ̈ ܥܲܕܠܵܐ ܐܸܬܛܦܼܝܣܬ ܠܡܵܢ ܕܸܐܡܪܸܬ ܘܠܵܐ ܫܪ̈ܲܝ ܡܸ̈ܠܲܝ ܒܓܲܘ ܡܲܕܥܵܟ݁ ܬܸܗܘܸܐ ܫܲܬܼܝܩ ܐܵܦ ܚܪܸܫ ܥܕܲܡܵܐ ܕܗܵܘ̈ܝܵܢ ܒܲܥܒܵܕܵܐ܀
39 ܥܼܝܪܵܐ ̈ ܥܕܲܡܵܐ ܕܝܵܠܕܵܐ ܐܸܠܼܝܫܒܲܥ ܘܡܸܬܓܡܲܪ ܛܲܠܝܵܐ ܕܡܸܢܵܗ݀ ܗܘܵܐ݁ ܐܲܣܼܝܪ ܦܽܘܡܵܟ ܡܸܢ ܡܲܡܠܠܵܐ ܘܬܲܪ̈ܥܸܐ ܕܸܐܕ̈ܢܲܝܟ ܕܠܵܐ ܢܸܫܡ̈ܥܵܢ܀
40 ܥܼܝܪܵܐ ̈ ܦܽܘܡܵܟ ܒܗܲܘ ܙܲܒܢܵܐ ܢܸܫܬܪܸܐ ܟܲܕ ܗܵܠܸܝܢ ܕܲܫܡܲܥܬ ܢܸܗܘ̈ܝܵܢ݁ ܘܬܲܪ̈ܥܸܐ ܕܸܐܕ̈ܢܲܝܟ ܢܸܬܦܲܬܚܽܘܢ ܥܲܡ ܠܸܫܵܢܵܟ ܡܵܐ ܕܸܐܫܬܪܼܝ܀
41 ܦܲܚܸܡ ܥܼܝܪܵܐ ܠܲܣܒܲܪܬܸܗ ܘܲܐܣܪܵܗ݀ ܘܫܲܒܩܵܗ݀ ܒܓܲܘ ܗܲܝܟܠܵܐ݁ ܘܥܲܡܵܐ ܟܽܠܸܗ ܬܲܡܼܝܗ ܗ̄ܘܵܐ ܥܲܠ ܬܲܘܚܲܪܬܸܗ ܕܲܒܗܲܝܟܠܵܐ܀
42 ܨܗܸܐ ܗ̄ܘܵܐ ܟܸܢܫܵܐ ܘܲܠܗܼܝܩ ܗ̄ܘܵܐ ܕܢܸܦܽܘܩ ܙܟܲܪܝܵܐ ܡܸܢ ܗܲܝܟܠܵܐ݁ ܘܟܲܕ ܢܦܲܩ ܘܲܚܙܲܐܽܘܗܝ ܕܲܚܪܸܫ ܪܵܡܸܙ ܗ̄ܘܵܐ ܠܗܘ݁ܢ ܕܚܸܙܘܵܐ ܚܙܵܐ܀
43 ܨܸܗܝܽܘܢ ܟܽܠܵܗ݀ ܐܸܬܕܲܡܪܲܬ ܒܟܵܗܢܵܐ ܘܟܼܐܢܵܐ ܕܡܵܢܵܐ ܗܘܵܝܗܝ݁ ܘܸܐܣܬܲܟܲܠܘ ܗ̄ܘܲܘ ܕܚܸܙܘܵܐ ܚܙܵܐ ܘܡܵܢܵܐ ܗ̄ܘ ܕܲܚܙܵܐ ܠܵܐ ܝܵܕܥܼܝܢ܀
44 ܩܵܡܘ ܗ̄ܘܲܘ ܟܽܠܗܘ݁ܢ ܟܲܕ ܚܵܝܪܼܝܢ ܘܲܠܒܼܝܒ ܙܟܲܪܝܵܐ ܒܲܝܢܵܬܗܘ݁ܢ݁ ܘܲܒܨܸܒ̈ܥܵܬܸܗ ܚܲܘܼܝ ܠܗܘ݁ܢ ܚܸܙܘܵܐ ܕܚܼܝܠܵܐ ܕܠܸܗ ܐܸܬܚܙܼܝ܀
45 ܪܲܒ ܗ̄ܽܘ ܫܲܪܒܵܐ ܕܲܫܡܲܥ ܗ̄ܘܵܐ ܡܸܢ ܡܲܠܲܐܟܵܐ ܕܠܸܗ ܐܸܬܚܙܼܝ݁ ܘܕܲܢܡܲܠܠܸܗ ܗ̄ܘܵܐ ܠܵܐ ܐܸܬܡܨܼܝ ܘܠܵܐ ܝܵܕܲܥ ܕܢܸܪܡܽܘܙ ܘܲܢܒܲܕܩܼܝܘܗܝ܀
46 ܫܲܐܠܽܘܗܝ ܟܽܠܗܘ݁ܢ ܘܠܵܐ ܫܡܲܥ ܗ̄ܘܵܐ ܕܲܚܪܸܫ ܗ̄ܘܵܐ ܠܸܗ ܡܸܢ ܡܲܡܠܠܵܐ݁ ܪܡܲܙܘ ܠܸܗ ܕܢܼܐܡܲܪ ܡܵܢܵܐ ܚܙܵܐ ܟܲܕ ܠܵܐ ܐܸܫܟܲܚ ܕܲܢܡܲܠܸܠ܀
47 ܬܸܗܪܵܐ ܒܗܵܠܸܝܢ ܐܲܚܼܝܕ ܗ̄ܘܵܐ ܒܲܝܢܵܬ ܥܸܒܪ̈ܵܝܸܐ ܟܽܠܗܘ݁ܢ݁ ܘܟܲܕ ܝܵܬܒܼܝܢ ܗ̄ܘܲܘ ܘܟܲܕ ܩܵܝܡܼܝܢ ܒܗܵܢܵܐ ܫܲܪܒܵܐ ܗܵܪܓܼܝܢ ܗ̄ܘܲܘ܀
48 ܬܲܡܼܝܗܼܝܢ ܗ̄ܘܲܘ ܘܡܸܬܕܲܡܪܼܝܢ ܘܚܲܕ ܥܲܡ ܚܲܒܪܸܗ ܐܵܡܪܼܝܢ ܗ̄ܘܲܘ݁ ܕܲܐܝܟܲܢܵܐ ܟܲܝ ܢܸܗܘܸܐ ܒܪܸܗ ܕܗܵܠܸܝܢ ܟܽܠܗܸܝܢ ܒܒܲܛܢܸܗ ܗܘ̈ܲܝ܀