← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

64494: AngelMary

Click on a word for lexical analysis
Click on a red-colored coordinate for comments and/or translations of the line

00 ܣܽܘܓܼܝܬܵܐ ܕܥܲܠ ܥܼܝܪܵܐ ܘܡܲܪܝܲܡ
01 ܚܲܝܠܸܗ ܕܲܐܒܵܐ ܕܲܢܚܸܬ ܫܪܵܐ ܒܥܽܘܒܵܐ ܒܬܽܘܠܵܐ ܕܚܽܘܒܸܗ ܥܨܵܝܗܝ݁ ܗܒ ܠܼܝ ܦܽܘܡܵܐ ܕܸܐܡܲܠܠܼܝܘܗܝ ܠܫܲܪܒܵܟ ܪܲܒܵܐ ܕܠܵܐ ܡܸܬܕܪܸܟ܀
02 ܒܲܪ ܥܲܬܼܝܪܵܐ ܕܚܽܘܒܸܗ ܨܒܵܐ ܘܲܫܪܵܐ ܒܟܲܪܣܵܐ ܕܡܸܣܟܼܢ̄ܬܵܐ݁ ܗܒ ܠܼܝ ܩܵܠܵܐ ܐܵܦ ܡܸܠܬܵܐ ܕܟܲܕ ܬܵܗܲܪ ܐ̄ܢܵܐ ܐܸܡܲܠܠܵܟ܀
03 ܙܥܽܘܪ ܗ̄ܽܘ ܦܽܘܡܵܐ ܕܲܢܡܲܠܠܵܟ ܐܵܦ ܠܸܫܵܢܵܐ ܕܲܢܦܲܫܩܵܟ݁ ܘܲܡܚܼܝܠ ܩܵܠܵܐ ܐܵܦ ܡܸܠܬܵܐ ܕܢܸܬܢܘ݁ܢ ܫܽܘܦܪܵܟ ܨܒܼܝ ܘܼܐܡܪܵܟ܀
04 ܗܒ ܠܼܝ ܐܸܩܪܽܘܒ ܡܵܪܵܐ ܕܟܽܠ ܟܲܕ ܕܵܚܸܠ ܐ̄ܢܵܐ ܨܹܝܕ ܡܲܫܩܠܸܗ݀ ܕܪܹܝܫܵܐ ܕܥܼܝܪܸ̈ܐ ܟܲܕ ܣܲܒܪܵܗ݀ ܠܸܐܡܵܐ ܛܠܼܝܬܵܐ ܥܲܠ ܡܸܐܬܝܵܟ܀
05 ܐܵܘ ܦܵܪ̈ܽܘܫܸܐ ܬܲܘ ܨܽܘܬܘ ܫܡܲܥܘ ܫܲܪܒܵܐ ܕܟܽܠܸܗ ܬܸܗܪܵܐ ܡܠܸܐ݁ ܘܲܙܡܲܪܘ ܫܽܘܒܚܵܐ ܠܗܲܘ ܕܸܐܬܪܟܸܢ ܕܢܲܚܸܐ ܠܵܐܕܵܡ ܕܲܚܛܵܐ ܘܡܼܝܬ܀
06 ܐܲܒܵܐ ܒܪ̈ܲܚܡܲܘܗܝ ܠܝܲܠܕܸܗ ܪܡܲܙ ܕܢܸܚܽܘܬ ܢܸܦܪܽܘܩ ܠܲܓܒܼܝܠܬܸܗ݀ ܘܲܠܓܲܒܪܼܐܸܝܠ ܥܼܝܪܵܐ ܦܩܲܕ ܕܢܲܬܩܸܢ ܐܽܘܪܚܵܐ ܩܕܵܡ ܡܲܚܬܸܗ܀
07 ܨܹܝܕ ܒܲܪ̄ܬ ܕܲܘܼܝܕ ܪ̈ܲܚܡܸܐ ܕܢܲܚܘ ܕܗܼܝ ܬܸܗܘܸܐ ܗ̄ܘܵܬ ܐܸܡܵܐ ܠܗܲܘ݁ ܕܲܐܘܠܸܕ ܠܵܐܕܵܡ ܘܲܠܥܵܠܡܵܐ ܘܲܩܕܵܡ ܫܸܡܫܵܐ ܐܼܝܬܲܘܗܝ ܫܡܸܗ܀
08 ܕܵܠ ܨܸܒܝܵܢܵܐ ܕܠܵܐ ܡܸܬܕܪܸܟ ܘܲܠܡܲܠܲܐܟܵܐ ܩܪܵܐ ܘܲܐܦܩܸܗ܂ ܡܸܢ ܓܲܘ ܣܸܕܪܸ̈ܐ ܘܫܲܠܚܸܗ ܠܟܵܐ ܠܘܵܬ ܒܬܽܘܠܬܵܐ ܕܟܼܝܬܵܐ ܕܲܢܣܲܒܪܼܝܗ݀܀
09 ܫܩܲܠ ܐܸܓܲܪܬܵܐ ܕܲܡܚܲܬܡܵܐ ܒܐ̄ܪܵܙܵܐ ܕܲܟܣܸܐ ܡܸܢ ܥܵܠܡܸ̈ܐ݁ ܘܲܡܠܵܗ݀ ܫܠܵܡܵܐ ܠܲܥܠܲܝܡܬܵܐ ܘܣܲܒܪܵܐ ܛܵܒܵܐ ܠܟܽܠ ܥܵܠܡܸ̈ܐ܀
10 ܛܵܣ ܢܽܘܪܵܢܵܐ ܘܲܢܚܸܬ ܡܛܵܐ ܠܲܡܓܲܙܲܝܬܵܐ ܘܥܽܘܬܪܵܐ ܡܠܵܗ݀݁ ܫܠܵܡܵܐ ܝܲܗ̄ܒ ܠܵܗ݀ ܐܵܦ ܣܲܒܪܵܗ݀ ܡܸܛܽܠ ܒܲܛܢܵܗ݀ ܡܲܬܗܲܪ ܠܟܽܠ܀
11 ܥܼܝܪܵܐ ̈ ܐܵܡܲܪ ܥܼܝܪܵܐ ܠܲܒܬܽܘܠܬܵܐ ܫܠܵܡܵܐ ܥܲܡܸܟܝ ܐܸܡܸܗ ܕܡܵܪܝ݁ ܡܒܲܪܲܟܬܵܐ ܐܲܢ̄ܬܝ ܐܵܘ ܥܠܲܝܡܬܵܐ ܘܲܡܒܲܪܲܟ ܗ̄ܽܘ ܦܼܐܪܵܐ ܕܒܸܟܝ܀
12 ܡܲܪܝܲܡ ̈ ܐܵܡܪܵܐ ܡܲܪܝܲܡ ܡܲܢ ܐܲܢ̄ܬ ܡܵܪܝ ܘܡܲܢܽܘ ܗܵܢܵܐ ܕܲܡܡܲܠܠܲܬ݁ ܪܲܚܼܝܩ ܗ̄ܽܘ ܡܸܢܝ ܡܵܢ ܕܵܐܡܪܲܬ ܘܡܵܢܲܘ ܚܲܝܠܸܗ ܠܵܐ ܝܵܕܥܵܢ܀
13 ܥܼܝܪܵܐ ̈ ܒܪܼܝܟܬܵܐ ܕܢܸܫܸ̈ܐ ܒܸܟܝ ܐܸܨܛܒܼܝ ܪܵܡܵܐ ܕܢܸܫܪܸܐ ܠܵܐ ܬܸܕܚܠܼܝܢ݁ ܕܒܸܟܝ ܛܲܝܒܽܘܬܵܐ ܐܸܬܪܲܟܢܲܬ ܕܬܸܐܫܽܘܕ ܪ̈ܲܚܡܸܐ ܥܲܠ ܥܵܠܡܵܐ܀
14 ܡܲܪܝܲܡ ̈ ܒܵܥܝܵܐ ܐ̄ܢܵܐ ܡܵܪܝ ܠܵܐ ܬܲܪܗܒܲܢܝ ܓܽܘܡܪܸ̈ܐ ܠܒܼܝܫ ܐܲܢ̄ܬ ܠܵܐ ܬܲܘܩܕܲܢܝ݁ ܢܽܘܟܪܵܝܵܐ ܗ̄ܘ ܠܼܝ ܡܵܢ ܕܵܐܡܪܲܬ ܘܕܲܐܕܪܸܟ ܚܲܝܠܸܗ ܠܵܐ ܡܸܫܟܚܵܢ܀
15 ܥܼܝܪܵܐ ̈ ܓܠܵܐ ܠܼܝ ܐܲܒܵܐ ܘܲܓܠܼܝܬ ܠܸܟܝ ܐ̄ܪܵܙܵܐ ܕܲܗܘܵܐ ܒܲܝܢܵܬܗܘ݁ܢ݁ ܒܸܝܬ ܠܸܗ ܠܲܒܪܸܗ ܟܲܕ ܫܲܕܪܲܢܝ ܕܡܸܢܸܟܝ ܕܵܢܲܚ ܥܲܠ ܥܵܠܡܸ̈ܐ܀
16 ܡܲܪܝܲܡ ̈ ܓܲܘܙܲܠܬܵܐ ܐܲܢ̄ܬ ܠܵܐ ܬܕܲܚܠܲܢܝ ܓܽܘܡܪܵܐ ܥܛܼܝܦ ܐܲܢ̄ܬ ܠܵܐ ܬܣܲܪܕܲܢܝ݁ ܐܵܘ ܢܽܘܪܵܢܵܐ ܠܡܵܢ ܐܲܫܪܵܟ ܕܟܽܠ ܚܲܕ̈ܬܵܬܵܐ ܡܲܠܸܠܬ ܠܼܝ܀
17 ܥܼܝܪܵܐ ̈ ܕܽܘܡܵܪܵܐ ܗ̄ܘ ܒܸܟܝ ܐܸܢ ܡܲܗܦܟܲܬܝ ܕܬܲܫܪܼܝܢ ܣܒܲܪܬܵܐ ܕܲܐܝܬܼܝܬ ܠܸܟܝ݁ ܡܸܛܽܠ ܒܲܛܢܸܗ ܕܲܡܪܲܝܡܵܐ ܕܲܨܒܵܐ ܕܢܸܫܪܸܐ ܒܓܲܘ ܡܲܪܒܥܸܟܝ܀
18 ܡܲܪܝܲܡ ̈ ܕܵܚܠܵܐ ܐ̄ܢܵܐ ܡܵܪܝ ܕܸܐܩܲܒܠܵܟ ܕܵܐܦ ܐܸܡܝ ܚܲܘܵܐ ܟܲܕ ܩܲܒܠܲܬ܂ ܠܚܸܘܝܵܐ ܕܡܲܠܸܠ ܐܲܝܟ ܪܵܚܡܵܐ ܡܸܢ ܬܸܫܒܽܘܚܬܵܗ݀ ܐܸܣܬܲܕܩܲܬ܀
19 ܥܼܝܪܵܐ ̈ ܗܲܘ ܡܲܛܥܵܝܽܘ ܐܲܛܥܼܝ ܒܪܲܬܝ ܒܸܐܡܸܟܝ ܚܲܘܵܐ ܟܲܕ ܣܲܒܪܵܗ݀݁ ܠܲܘ ܡܲܛܥܵܝܽܘ ܐܲܛܥܼܝܬ ܒܸܟܝ ܕܡܸܢ ܫܽܘܪܵܝܵܐ ܐܸܫܬܲܕܪܸܬ܀
20 ܡܲܪܝܲܡ ̈ ܗܵܢܵܐ ܫܲܪܒܵܐ ܕܲܡܡܲܠܠܲܬ ܥܣܸܩ ܗ̄ܽܘ ܣܲܓܼܝ ܠܵܐ ܬܸܥܕܠܲܢܝ݁ ܕܠܵܐ ܡܸܢ ܒܬܽܘܠܬܵܐ ܒܪܵܐ ܡܸܬܚܙܸܐ ܘܠܵܐ ܡܸܢ ܦܼܐܪܵܐ ܐܲܠܵܗܬܵܐ܀
21 ܥܼܝܪܵܐ ̈ ܘܲܥܕܵܐ ܝܲܗ̄ܒ ܠܼܝ ܐܲܒܵܐ ܠܟܵܐ ܕܲܐܝܬܸܐ ܫܠܵܡܵܐ ܘܸܐܣܲܒܪܸܟܝ݁ ܕܲܒܪܸܗ ܕܵܢܲܚ ܡܸܢ ܡܲܪܒܥܸܟܝ ܠܽܘܩܒܲܠ ܗܵܕܸܐ ܠܵܐ ܬܸܗܦܟܼܝܢ܀
22 ܡܲܪܝܲܡ ̈ ܘܲܥܕܵܟ ܫܲܦܼܝܪ ܐܵܦ ܡܸܐܬܝܵܟ ܐܸܠܽܘ ܟܝܵܢܵܐ ܠܵܐ ܡܙܼܝܥ ܠܼܝ݁ ܘܗܽܘ ܡܦܲܠܸܓ ܠܼܝ ܥܲܠ ܡܸܐܬܝܵܟ ܕܲܐܝܟܲܢ ܦܼܐܪܵܐ ܒܲܒܬܽܘܠܬܵܐ܀
23 ܥܼܝܪܵܐ ̈ ܙܵܝܥܼܝܢ ܣܸܕܪܸ̈ܐ ܡܸܢ ܡܸܠܬܸܗ ܘܡܸܚܕܵܐ ܕܦܵܩܸܕ ܠܵܐ ܡܲܗܦܟܼܝܢ݁ ܘܲܐܢ̄ܬܝ ܐܲܝܟܲܢܵܐ ܠܵܐ ܕܵܚܠܲܬܝ ܬܥܲܩܒܼܝܢ ܡܸܕܸܡ ܕܲܐܒܵܐ ܨܒܵܐ܀
24 ܡܲܪܝܲܡ ̈ ܙܵܥܸܬ ܠܼܝ ܡܵܪܝ ܘܸܐܣܬܲܪܕܸܬ ܘܟܲܕ ܕܵܚܠܵܐ ܐ̄ܢܵܐ ܠܵܐ ܡܲܫܪܵܢ݁ ܕܵܐܦ ܗܽܘ ܟܝܵܢܵܐ ܡܨܸܐ ܡܦܼܝܣ ܠܼܝ ܕܲܒܬܽܘ̈ܠܵܬܵܐ ܠܵܐ ܝܵܠܕ̈ܵܢ܀
25 ܥܼܝܪܵܐ ̈ ܚܽܘܒܸܗ ܕܲܐܒܵܐ ܗܵܟܲܢ ܨܒܵܐ ܕܒܲܒܬܽܘܠܽܘܬܸܟܝ ܬܼܐܠܕܼܝܢ ܒܪܵܐ݁ ܘܙܵܕܸܩ ܕܬܸܫܠܼܝܢ ܐܵܦ ܬܲܫܪܼܝܢ ܕܨܸܒܝܵܢ ܐܲܒܵܐ ܠܵܐ ܡܸܬܥܨܸܐ܀
26 ܡܲܪܝܲܡ ̈ ܚܸܙܘܵܟ ܝܲܩܼܝܪ ܘܫܲܪܒܵܟ ܕܚܼܝܠ ܘܫܲܠܗܸܒܼܝܬܵܟ ܡܸܬܓܲܘܙܠܵܐ݁ ܩܢܽܘܡܸܗ ܕܡܵܪܵܟ ܠܵܐ ܡܸܬܒܨܸܐ ܘܕܲܐܫܲܪ ܗܵܕܸܐ ܥܲܣܩܵܐ ܗ̄ܝ ܠܼܝ܀
27 ܥܼܝܪܵܐ ̈ ܛܸܒܵܐ ܛܵܒܵܐ ܐܲܝܬܼܝܬ ܠܸܟܝ ܕܬܼܐܠܕܼܝܢ ܡܵܪܸܟܝ ܚܲܘܼܝܬ ܠܸܟܝ݁ ܛܠܼܝܬܵܐ ܐܲܘܕܵܝ ܠܗܲܘ ܕܲܐܫܘܝܸܟܝ ܕܬܸܗܘܼܝܢ ܐܸܡܸܗ ܟܲܕ ܗܽܘ ܒܪܸܟܝ܀
28 ܡܲܪܝܲܡ ̈ ܛܠܼܝܬܵܐ ܐܸܢܵܐ ܘܠܵܐ ܡܸܫܟܚܵܢ ܠܓܲܒܪܵܐ ܕܢܽܘܪܵܐ ܐܸܩܲܒܠܼܝܘܗܝ݁ ܕܲܟܣܸܐ ܗ̄ܘ ܫܲܪܒܵܐ ܕܲܡܡܲܠܠܲܬ ܘܲܡܣܲܒܪܲܬ ܠܼܝ ܕܸܐܩܲܒܠܼܝܘܗܝ܀
29 ܥܼܝܪܵܐ ̈ ܝܲܘܡܵܢ ܣܲܒܪܵܐ ܠܵܐܕܵܡ ܗܘܵܐ ܕܒܸܟܝ ܐܸܬܪܲܥܼܝ ܡܵܪܵܐ ܕܟܽܠ݁ ܕܢܸܚܽܘܬ ܢܸܫܪܼܝܘܗܝ ܘܲܢܚܲܪܪܼܝܘܗܝ ܩܲܒܸܠ ܡܸ̈ܠܲܝ ܟܲܕ ܡܲܘܕܝܵܐ ܐܢ̄ܬܝ܀
30 ܡܲܪܝܲܡ ̈ ܝܲܘܡܵܢ ܬܸܡܗܸܬ ܘܸܐܬܕܲܡܪܸܬ ܒܟܽܠܗܸܝܢ ܗܵܠܸܝܢ ܕܸܐܡܲܪܬ ܠܼܝ݁ ܘܕܵܚܠܵܐ ܐ̄ܢܵܐ ܡܵܪܝ ܕܸܐܩܲܒܠܵܟ ܕܕܲܠܡܵܐ ܢܸܟܠܵܐ ܒܓܲܘ ܡܸܠܬܵܟ܀
31 ܥܼܝܪܵܐ ̈ ܟܲܕ ܐܸܫܬܲܠܚܸܬ ܕܸܐܣܲܒܪܵܟ ܫܠܵܡܸܗ ܫܸܡܥܸܬ ܘܲܐܝܬܼܝܬ ܠܸܟܝ݁ ܫܲܪܼܝܪ ܗ̄ܽܘ ܡܵܪܝ ܕܗܵܟܲܢ ܨܒܵܐ ܕܡܸܢܸܟܝ ܢܸܕܢܲܚ ܥܲܠ ܥܵܠܡܸ̈ܐ܀
32 ܡܲܪܝܲܡ ̈ ܟܽܠܗܸܝܢ ܡܸܠܲܝ̈ܟ ܠܼܝ ܡܲܬܗܪ̈ܵܢ ܡܦܼܝܣܵܐ ܐ̄ܢܵܐ ܡܵܪ ܠܵܐ ܬܸܥܕܠܲܢܝ݁ ܕܠܵܐ ܒܲܒܬܽܘܠܬܵܐ ܒܪܵܐ ܡܸܬܚܙܸܐ ܘܒܼܝ ܙܽܘܘܵܓܵܐ ܠܵܐ ܦܓܼܝܥ ܠܸܗ܀
33 ܥܼܝܪܵܐ ̈ ܠܘܵܬܸܟܝ ܐܵܬܸܐ ܠܵܐ ܬܸܕܚܠܼܝܢ ܒܥܽܘܒܸܟܝ ܫܵܪܸܐ ܠܵܐ ܬܥܲܩܒܼܝܢ݁ ܡܲܠܝܲܬ ܛܽܘ̈ܒܸܐ ܫܽܘܒܚܵܐ ܙܡܲܪܝ ܠܗܲܘ ܕܲܫܦܲܪ ܠܸܗ ܕܒܸܟܝ ܢܸܬܚܙܸܐ܀
34 ܡܲܪܝܲܡ ̈ ܠܼܝ ܡܵܪܝ ܓܲܒܪܵܐ ܠܵܐ ܚܟܼܝܡ ܠܼܝ ܘܲܒܙܽܘܘܵܓܵܐ ܠܵܐ ܦܓܼܝܥ ܠܼܝ݁ ܐܲܝܟܲܢ ܬܸܗܘܸܐ ܐܲܝܟ ܕܵܐܡܪܲܬ ܕܲܕܠܵܐ ܢܸܩܦܵܐ ܢܸܗܘܸܐ ܒܪܵܐ܀
35 ܥܼܝܪܵܐ ̈ ܡܸܢ ܨܹܝܕ ܐܲܒܵܐ ܐܸܫܬܲܕܪܸܬ ܕܲܐܝܬܸܐ ܣܒܲܪܬܸܗ ܕܚܽܘܒܸܗ ܥܨܵܝܗܝ݁ ܕܲܒܪܸܗ ܢܸܫܪܸܐ ܒܓܲܘ ܡܲܪܒܥܸܟܝ ܘܪܽܘܚܵܐ ܕܩܽܘܕܫܵܐ ܫܵܪܸܐ ܥܠܲܝܟܝ܀
36 ܡܲܪܝܲܡ ̈ ܡܵܕܸܝܢ ܥܼܝܪܵܐ ̈ ܠܵܐ ܡܲܗܦܟܵܢ ܐܸܢ ܪܽܘܚ ܩܽܘܕܫܵܐ ܐܵܬܸܐ ܠܘܵܬܝ݁ ܐܲܡܬܸܗ ܐܸܢܵܐ ܘܫܲܠܼܝܛ ܠܸܗ ܢܸܗܘܸܐ ܠܼܝ ܡܵܪܝ ܐܲܝܟ ܡܸܠܬܵܟ܀
37 ܥܼܝܪܵܐ ̈ ܢܸܬܬܪܼܝܡ ܪܹܝܫܸܟܝ ܐܵܘ ܥܠܲܝܡܬܵܐ ܢܸܚܕܸܐ ܠܸܒܸܟܝ ܐܵܘ ܒܬܽܘܠܬܵܐ݁ ܫܡܲܝܵܐ ܕܬܲܪܬܸܝܢ ܒܸܟܝ ܬܸܬܦܨܲܚܝ ܐܲܪܥܵܐ ܕܒܲܒܪܸܟܝ ܡܸܫܬܲܝܢܵܐ܀
38 ܡܲܪܝܲܡ ̈ ܢܸܬܬܪܼܝܡ ܪܹܝܫܝ ܡܵܪܝ ܐܲܝܟ ܕܵܐܡܪܲܬ ܘܲܐܘܕܸܐ ܠܲܫܡܸܗ ܟܲܕ ܚܵܕܝܵܢ݁ ܕܸܐܢ ܐܲܢ̄ܬ ܥܲܒܕܸܗ ܗܵܟܲܢ ܦܐܸܝܬ ܠܡܲܢ ܕܵܡܸܐ ܗܽܘ ܐܸܢ ܝܵܕܥܲܬ܀
39 ܥܼܝܪܵܐ ̈ ܣܸܕܪܼ̈ܝܢ ܗܵܕܸܐ ܠܵܐ ܡܸܬܡܨܸܝܢ ܕܲܢܚܽܘܪܽܘܢ ܒܸܗ ܕܣܲܓܼܝ ܕܚܼܝܠ݁ ܒܓܲܘ ܓܲܘܙܲܠܬܵܐ ܕܲܐܒܽܘܗܝ ܟܣܸܐ ܘܟܸܢ̈ܫܸܐ ܡܸܢܸܗ ܡܸܣܬܲܪܕܼܝܢ܀
40 ܡܲܪܝܲܡ ̈ ܣܲܓܼܝ ܗܵܫܵܐ ܐܲܙܼܝܥܬܵܢܝ ܘܸܐܢ ܓܲܘܙܲܠܬܵܐ ܗ̄ܘ ܐܲܝܟ ܡܸܠܬܵܟ݁ ܥܽܘܒܝ ܕܼܝܠܝ ܐܲܝܟܲܢ ܠܵܐ ܡܸܬܢܟܸܐ ܒܫܲܠܗܸܒܼܝܬܵܐ ܕܒܸܗ ܫܲܪܝܵܐ܀
41 ܥܼܝܪܵܐ ̈ ܥܽܘܒܸܟܝ ܕܼܝܠܸܟܝ ܩܽܘܕܫܵܐ ܡܠܸܐ ܘܒܲܐܠܵܗܽܘܬܵܐ ܟܣܼܝܬܵܐ ܚܬܼܝܡ݁ ܘܲܐܬܪܵܐ ܕܩܲܕܼܝܫ ܣܲܓܼܝ ܪܚܼܝܡ ܥܲܠ ܐܲܠܵܗܵܐ ܕܒܸܗ ܢܸܬܚܙܸܐ܀
42 ܡܲܪܝܲܡ ̈ ܥܼܝܪܵܐ ̈ ܓܠܼܝ ܠܼܝ ܠܡܵܢ ܟܲܝ ܫܦܲܪ ܠܡܵܪܵܟ ܕܢܸܫܪܸܐ ܒܡܸܣܟܼܢ̄ܬܵܐ݁ ܕܗܵܐ ܒܢ̈ܵܬ ܡܲܠܟܸ̈ܐ ܡܠܸܐ ܥܵܠܡܵܐ ܘܒܼܝ ܠܡܵܢܵܐ ܨܒܵܐ ܕܲܡܓܲܙܝܵܢ܀
43 ܥܼܝܪܵܐ ̈ ܦܫܼܝܩ ܗ̄ܘܵܐ ܕܢܸܫܪܸܐ ܒܥܲܬܼܝܪܬܵܐ ܘܡܸܣܟܼܢܽܘܬܸܟܝ ܕܼܝܠܸܟܝ ܪܚܸܡ݁ ܕܲܠܡܸܣܟܼܢܸ̈ܐ ܚܲܒܪܵܐ ܢܗܸܐ ܘܢܲܥܬܲܪ ܐܢܘ݁ܢ ܡܵܐ ܕܡܸܬܓܠܸܐ܀
44 ܡܲܪܝܲܡ ̈ ܦܲܫܸܩ ܠܼܝ ܡܵܪܝ ܐܸܢ ܝܵܕܥܲܬ ܠܸܐܡܲܬܝ ܨܵܒܸܐ ܕܢܼܐܬܸܐ ܠܘܵܬܝ݁ ܕܸܐܢ ܐܲܝܟ ܢܽܘܪܵܐ ܠܼܝ ܡܸܬܚܙܸܐ ܡܵܐ ܕܫܵܪܸܐ ܒܼܝ ܐܲܝܟ ܕܵܐܡܪܲܬ܀
45 ܥܼܝܪܵܐ ̈ ܨܒܵܐ ܠܸܗ ܘܸܐܬܵܐ ܘܗܵܐ ܒܸܟܝ ܫܪܸܐ ܘܲܕܠܵܐ ܢܙܼܝܥܸܟܝ ܠܵܐ ܪܓܸܫܬܝ ܒܸܗ݀ ܠܵܐ ܡܲܡܪܲܚ ܐ̄ܢܵܐ ܐܸܚܽܘܪ ܒܸܟܝ ܡܲܠܝܲܬ ܢܽܘܪܵܐ ܕܠܵܐ ܡܲܘܩܕܵܐ܀
46 ܡܲܪܝܲܡ ̈ ܨܵܒܝܵܐ ܐ̄ܢܵܐ ܡܵܪܝ ܕܸܐܫܲܐܠܵܟ ܬܽܘܒ ܦܲܫܸܩ ܠܼܝ ܥܝܵܕ̈ܲܘܗܝ ܕܒܸܪܝ݁ ܕܲܫܪܵܐ ܠܸܗ ܒܼܝ ܘܠܵܐ ܝܵܕܥܵܢ ܡܵܢ ܐܸܥܒܸܕ ܠܸܗ ܕܠܵܐ ܢܸܬܬܫܼܝܛ܀
47 ܥܼܝܪܵܐ ̈ ܩܲܕܼܝܫ ܩܲܕܼܝܫ ܩܲܕܼܝܫ ܩܥܵܝ ܕܵܐܦ ܠܸܓܝܘ݁̈ܢܼܝܢ ܠܵܐ ܡܲܘ̈ܣܦܵܢ݁ ܕܸܐܠܵܐ ܩܲܕܼܝܫ ܠܵܐ ܐܼܝܬ ܠܲܢ ܕܢܼܐܡܲܪ ܒܲܠܚܽܘܕ ܡܸܛܽܠ ܒܪܸܟܝ܀
48 ܡܲܪܝܲܡ ̈ ܩܲܕܼܝܫ ܘܲܫܒܼܝܚ ܘܲܒܪܼܝܟ ܫܡܸܗ ܕܲܒܡܽܘܟܵܟܵܐ ܚܵܪ ܕܲܐܡܬܸܗ݀ ܡܸܟܼܝܠ ܛܽܘܒܵܐ ܠܼܝ ܢܸܬܠ̈ܵܢ ܟܽܠ ܫܲܪ̈ܒܵܬܵܐ ܕܲܒܥܵܠܡܵܐ܀
49 ܥܼܝܪܵܐ ̈ ܪܲܘܡܵܐ ܘܥܽܘܡܩܵܐ ܠܸܗ ܢܪܲܡܪܡܘ݁ܢ ܥܼܝܪܸ̈ܐ ܘܐ̄ܢܵܫ̈ܵܐ ܠܸܗ ܢܫܲܒܚܽܘܢ݁ ܕܲܢܚܸܬ ܘܲܫܪܵܐ ܒܲܒܬܽܘܠܬܵܐ ܕܲܢܚܲܕܸܬ ܟܽܠ ܡܵܪܵܐ ܕܟܽܠ܀
50 ܡܲܪܝܲܡ ̈ ܪܲܒ ܗ̄ܽܘ ܚܢܵܢܸܗ ܘܠܵܐ ܡܸܬܬܟܼܝܠ ܘܲܒܣܸܦ̈ܘܵܬܵܐ ܠܵܐ ܡܸܬܡܢܸܐ܂ ܕܠܵܐ ܐܵܚܕܵܐ ܠܸܗ ܫܡܲܝܵܐ ܠܥܸܠ ܗܵܐ ܣܸܦܩܲܬ ܠܸܗ ܟܲܪܣܵܐ ܠܬܲܚܬ܀
51 ܫܡܲܝܵܐ ܘܲܐܪܥܵܐ ܠܸܗ ܢܒܲܪܟܽܘܢ ܐܵܦ ܡܲܠܲܐܟܵܐ ܘܲܒܬܽܘܠܬܵܐ݁ ܘܐ̄ܢܵܫ̈ܵܐ ܟܽܠܗܘ݁ܢ ܠܸܗ ܢܩܲܕܫܽܘܢ ܕܲܢܚܸܬ ܒܚܽܘܒܸܗ ܘܐ̄ܢܵܫܵܐ ܗܘܵܐ܀
52 ܫܡܲܝܵܐ ܘܥܼܝܪܸ̈ܐ ܢܲܘܕܽܘܢ ܠܥܸܠ ܘܬܸܚܕܸܐ ܐܲܪܥܵܐ ܒܲܒܬܽܘܠܬܵܐ݁ ܘܓܲܒܸ̈ܐ ܬܪ̈ܲܝܗܘ݁ܢ ܟܲܕ ܪܵܘܙܼܝܢ ܢܸܬܠܽܘܢ ܫܽܘܒܚܵܐ ܠܒܲܪ ܡܵܪܗܘ݁ܢ܀
53 ܬܪ̈ܲܝܗܘ݁ܢ ܓܲܒܸ̈ܐ ܢܸܬܚܲܠܛܽܘܢ ܥܼܝܪܸ̈ܐ ܘܐ̄ܢܵܫܵܐ ܘܲܢܫܲܒܚܽܘܢ݁ ܠܲܒܪܵܐ ܕܫܲܝܸܢ ܒܲܝܢܵܬܗܘ݁ܢ ܕܲܪܓܼܝܙܼܝܢ ܗ̄ܘܲܘ ܘܲܡܕܲܠܚܼܝܢ܀
54 ܬܲܘܕܼܝ ܠܵܟ ܡܵܪܝ ܡܸܢ ܟܽܠܗܘ݁ܢ ܥܵܠܡ̈ܲܝ ܢܽܘܪܵܐ ܕܠܵܐ ܡܸܬܚܙܸܝܢ݁ ܘܡܸܢ ܟܽܠ ܦܽܘ̈ܡܼܝܢ ܕܲܒܥܵܠܡܵܐ ܬܸܙܡܲܪ ܐܲܪܥܵܐ ܠܵܟ ܬܸܫܒ̈ܚܵܢ܀