← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

64494: JesusJohn

Click on a word for lexical analysis
Click on a red-colored coordinate for comments and/or translations of the line

00 ܣܽܘܓܼܝܬܵܐ ܕܥܲܠ ܡܵܪܲܢ ܘܝܽܘܚܲܢܵܢ
01 ܪܸܥܝܵܢܝ ܫܲܩܠܲܢܝ ܨܹܝܕ ܝܽܘܪܕܢܵܢ ܘܲܚܙܼܝܬ ܬܸܗܪܵܐ ܟܲܕ ܐܸܬܓܠܼܝ݁ ܚܲܬܢܵܐ ܫܒܼܝܚܵܐ ܕܲܠܟܲܠܬܵܐ ܚܠܽܘܠܵܐ ܢܸܥܒܸܕ ܘܲܢܩܲܕܫܼܝܗ݀܀
02 ܚܙܼܝܬ ܝܽܘܚܲܢܵܢ ܕܬܸܗܪܵܐ ܡܠܸܐ ܘܟܸܢ̈ܫܸܐ ܚܕܵܪ̈ܲܘܗܝ ܟܲܕ ܩܵܝܡܼܝܢ݁ ܘܚܲܬܢܵܐ ܫܒܼܝܚܵܐ ܟܲܕ ܐܸܬܪܟܸܢ ܨܹܝܕ ܒܲܪ ܥܲܩܪܵܐ ܕܗܽܘ ܢܲܥܡܕܸܗ܀
03 ܒܡܸܠܬܵܐ ܘܩܵܠܵܐ ܪܸܥܝܵܢܝ ܬܡܲܗ ܕܗܵܐ ܝܽܘܚܲܢܵܢ ܩܵܠܵܐ ܗ̄ܘܵܐ݁ ܘܡܵܪܲܢ ܕܲܕܢܲܚ ܐܲܝܟ ܡܸܠܬܵܐ ܕܢܼܐܬܸܐ ܠܓܸܠܝܵܐ ܕܲܓܢܼܝܙ ܗ̄ܘܵܐ܀
04 ܟܲܠܬܵܐ ܡܟܼܝܪܵܐ ܘܠܵܐ ܝܵܕܥܵܐ ܡܲܢܽܘ ܚܲܬܢܵܐ ܕܠܸܗ ܚܵܝܪܵܐ݁ ܚܕܽܘ̈ܓܸܐ ܟܢܼܝܫܼܝܢ ܡܠܸܐ ܡܲܕܒܪܵܐ ܘܲܟܣܸܐ ܡܵܪܲܢ ܒܲܝܢܵܬܗܘ݁ܢ܀
05 ܗܵܝܕܸܝܢ ܚܲܬܢܵܐ ܢܲܦܫܸܗ ܓܠܵܐ ܘܨܹܝܕ ܝܽܘܚܲܢܵܢ ܠܢܲܗܪܵܐ ܩܪܸܒ݁ ܘܙܵܥ ܟܵܪܽܘܙܵܐ ܘܸܐܡܲܪ ܥܠܲܘܗܝ ܗܽܘܝܽܘ ܚܲܬܢܵܐ ܕܠܸܗ ܐܲܟܪܙܸܬ܀
06 ܐ̄ܬܵܐ ܠܲܥܡܵܕܵܐ ܡܲܥܡܸܕ ܟܽܠ ܘܚܲܘܼܝ ܢܲܦܫܸܗ ܥܲܠ ܝܽܘܪܕܢܵܢ݁ ܚܙܵܝܗܝ ܝܽܘܚܲܢܵܢ ܘܼܐܝܕܸܗ ܩܦܲܣ ܟܲܕ ܡܸܬܟܲܫܲܦ ܘܗܵܟܲܢ ܐܸܡܲܪ܀
07 ܝܽܘܚܲܢܵܢ܃ ܐܲܝܟܲܢܵܐ ܡܵܪܝ ܬܸܥܡܲܕ ܐܲܢ̄ܬ ܕܲܐܢ̄ܬ ܒܲܥܡܵܕܵܟ ܡܚܲܣܸܝܬ ܠܟܽܠ݁ ܡܲܥܡܽܘܕܼܝܬܵܐ ܠܵܟ ܚܵܝܪܵܐ ܪܽܘܣ ܒܵܗ݀ ܩܽܘܕܫܵܐ ܘܡܸܫܬܲܡܠܝܵܐ܀
08 ܡܵܪܲܢ܃ ܐܵܡܲܪ ܡܵܪܲܢ ܐܸܢܵܐ ܨܒܼܝܬ ܩܪܽܘܒ ܐܲܥܡܸܕܲܝܢܝ ܕܨܸܒܝܵܢܝ ܢܗܸܐ݁ ܕܬܸܥܨܸܐ ܠܨܸܒܝܵܢܝ ܠܵܐ ܡܸܫܟܚܲܬ ܐܸܥܡܲܕ ܡܸܢܵܟ ܕܗܵܟܲܢ ܨܒܼܝܬ܀
09 ܝܽܘܚܲܢܵܢ܃ ܒܵܥܸܐ ܐ̄ܢܵܐ ܡܵܪܝ ܠܵܐ ܐܸܬܥܨܸܐ ܕܥܲܣܩܵܐ ܗ̄ܝ ܗܵܕܸܐ ܕܵܐܡܪܲܬ ܠܼܝ݁ ܐܸܢܵܐ ܣܢܼܝܩ ܐ̄ܢܵܐ ܕܲܐܢ̄ܬ ܬܲܥܡܕܲܢܝ ܕܲܐܢ̄ܬ ܗ̄ܽܘ ܒܙܽܘܦܵܟ ܡܚܲܘܲܪ ܟܽܠ܀
10 ܡܵܪܲܢ܃ ܒܥܼܝܬ ܘܲܫܦܲܪ ܠܼܝ ܕܗܵܟܲܢ ܢܗܸܐ ܘܲܐܢ̄ܬ ܝܽܘܚܲܢܵܢ ܠܡܵܢ ܡܸܬܚܪܸܝܬ݁ ܫܒܽܘܩ ܟܼܐܢܽܘܬܵܐ ܡܸܫܬܲܡܠܝܵܐ ܘܬܵܐ ܐܲܥܡܸܕܲܝܢܝ ܠܡܵܢ ܩܵܝܡܲܬ܀
11 ܝܽܘܚܲܢܵܢ܃ ܓܸܠܵܐ ܠܢܽܘܪܵܐ ܐܲܝܟܲܢ ܡܨܸܐ ܕܢܸܠܒܽܘܟ ܒܼܐܝ̈ܕܲܘܗܝ ܟܲܕ ܚܲܒܬܵܐ݁ ܐܵܘ ܢܽܘܪܵܢܵܐ ܪܲܚܸܡ ܥܠܲܝ ܘܠܵܐ ܐܸܩܪܽܘܒ ܠܵܟ ܕܥܲܣܩܵܐ ܗ̄ܝ ܠܼܝ܀
12 ܡܵܪܲܢ܃ ܓܠܼܝܬ ܠܵܟ ܨܸܒܝܵܢܝ ܡܵܢ ܕܵܪܫܲܬ ܩܪܽܘܒ ܐܲܥܡܸܕܲܝܢܝ ܘܠܵܐ ܝܵܩܕܲܬ݁ ܓܢܽܘܢܵܐ ܡܛܲܝܲܒ ܠܵܐ ܬܲܗܦܟܲܢܝ ܡܸܢ ܡܸܫܬܽܘܬܵܐ ܕܲܡܛܲܝܒܵܐ܀
13 ܝܽܘܚܲܢܵܢ܃ ܕܵܚܠܼܝܢ ܥܼܝܪܸ̈ܐ ܘܠܵܐ ܡܲܡܪܚܼܝܢ ܕܲܢܚܽܘܪܽܘܢ ܒܵܟ ܕܠܵܐ ܢܲܓܗܪܽܘܢ݁ ܘܸܐܢܵܐ ܐܲܝܟܲܢ ܡܵܪܝ ܐܲܥܡܕܵܟ ܡܚܼܝܠ ܐ̄ܢܵܐ ܐܸܩܪܽܘܒ ܠܵܐ ܬܲܥܕܠܲܢܝ܀
14 ܡܵܪܲܢ܃ ܕܸܚܠܸܬ ܡܵܕܸܝܢ ܠܵܐ ܬܸܬܚܪܸܐ ܠܽܘܩܒܲܠ ܨܸܒܝܵܢܝ ܕܸܐܢܵܐ ܒܥܼܝܬ݁ ܘܡܲܥܡܽܘܕܼܝܬܵܐ ܠܼܝ ܚܵܝܪܵܐ ܫܲܡܠܵܐ ܥܒܵܕܵܐ ܕܠܸܗ ܐܸܬܩܪܼܝܬ܀
15 ܝܽܘܚܲܢܵܢ܃ ܗܵܐ ܐܲܟܪܸܙܬܵܟ ܥܲܠ ܝܽܘܪܕܢܵܢ ܒܸܐܕ̈ܢܲܝ ܥܲܡܵܐ ܕܠܵܐ ܡܸܬܛܦܼܝܣ݁ ܘܸܐܢ ܚܵܙܸܐ ܠܵܟ ܕܡܸܢܝ ܥܵܡܕܲܬ ܡܸܬܦܲܠܲܓ ܠܸܗ ܕܠܲܘ ܡܵܪܝܵܐ ܐܲܢ̄ܬ܀
16 ܡܵܪܲܢ܃ ܗܵܐ ܥܵܡܸܕ ܐ̄ܢܵܐ ܟܲܕ ܚܵܙܸܝܢ ܕܲܐܒܵܐ ܕܫܲܠܚܲܢܝ ܣܵܗܸܕ ܥܠܲܝ݁ ܕܲܒܪܸܗ ܐܸܢܵܐ ܘܒܼܝ ܐܸܨܛܒܼܝ ܢܪܲܥܸܐ ܠܵܐܕܵܡ ܕܲܪܓܼܝܙ ܗ̄ܘܵܐ܀
17 ܝܽܘܚܲܢܵܢ܃ ܘܵܠܸܐ ܠܼܝ ܡܵܪܝ ܕܸܐܕܲܥ ܟܝܵܢܝ ܕܲܓܒܼܝܠܬܵܐ ܐ̄ܢܵܐ ܡܸܢ ܐܵܕܡܬܵܐ݁ ܘܲܐܢ̄ܬ ܓܵܒܽܘܠܵܐ ܡܲܬܩܸܢ ܟܽܠ ܘܸܐܢܵܐ ܒܡܲܝ̈ܵܐ ܠܡܵܢ ܐܲܥܡܕܵܟ܀
18 ܡܵܪܲܢ܃ ܘܵܠܸܐ ܕܬܸܕܲܥ ܕܲܠܡܵܢ ܐܸܬܼܝܬ ܘܡܸܛܽܠ ܡܵܢܵܐ ܒܥܼܝܬ ܕܬܲܥܡܕܲܢܝ݁ ܡܨܲܥܬܵܐ ܗ̄ܝ ܕܽܐܘܪܚܵܐ ܕܲܪܕܼܝܬ ܒܵܗ݀ ܡܲܥܡܽܘܕܼܝܬܵܐ ܠܵܐ ܬܸܛܠܽܘܡ܀
19 ܝܽܘܚܲܢܵܢ܃ ܙܥܽܘܪ ܗ̄ܽܘ ܢܲܗܪܵܐ ܕܸܐܬܲܝܬ ܠܸܗ ܕܬܸܫܪܸܐ ܒܓܲܘܸܗ ܘܗܽܘ ܢܣܲܝܟܵܟ݁ ܫܡܲܝܵܐ ܠܥܽܘܙܵܟ ܠܵܐ ܣܵܦܩܼܝܢ ܡܲܥܡܽܘܕܼܝܬܵܐ ܟܡܵܐ ܬܸܐܚܕܵܟ܀
20 ܡܵܪܲܢ܃ ܙܥܽܘܪܝܵܐ ܗ̄ܝ ܟܲܪܣܵܐ ܡܸܢ ܝܽܘܪܕܢܵܢ ܘܲܨܒܼܝܬ ܘܲܫܪܼܝܬ ܒܲܒܬܽܘܠܬܵܐ݁ ܘܲܐܝܟ ܕܸܐܬܝܲܠܕܸܬ ܡܸܢ ܡܲܪܒܥܵܐ ܐܵܦ ܥܵܡܸܕ ܐ̄ܢܵܐ ܒܓܲܘ ܝܽܘܪܕܢܵܢ܀
21 ܝܽܘܚܲܢܵܢ܃ ܚܲܝ̈ܠܲܘܵܬܵܐ ܗܵܐ ܩܵܝܡܼܝܢ ܣܸܕܪܸ̈ܐ ܕܥܼܝܪܸ̈ܐ ܗܵܐ ܣܵܓܕܼܝܢ܂ ܘܸܐܢ ܩܵܪܸܒ ܐ̄ܢܵܐ ܕܸܐܥܲܡܕܵܟ ܪܵܐܸܬ ܐ̄ܢܵܐ ܠܼܝ ܡܸܢ ܙܲܘܥܬܵܐ܀
22 ܡܵܪܲܢ܃ ܚܲܝ̈ܠܸܐ ܘܟܸܢ̈ܫܸܐ ܠܵܟ ܝܵܗܒܼܝܢ ܟܽܠܗܘ݁ܢ ܛܽܘܒܵܐ ܕܠܼܝ ܡܲܥܡܕܲܬ݁ ܠܗܵܕܸܐ ܓܒܼܝܬܵܟ ܡܸܢ ܡܲܪܒܥܵܐ ܐܲܢ̄ܬ ܠܵܐ ܬܸܕܚܲܠ ܕܸܐܢܵܐ ܨܒܼܝܬ܀
23 ܝܽܘܚܲܢܵܢ܃ ܛܲܝܒܸܬ ܐܽܘܪܚܵܐ ܕܸܐܫܬܲܕܪܸܬ ܡܲܟܪܸܬ ܟܲܠܬܵܐ ܕܸܐܬܦܲܩܕܸܬ݁ ܢܼܐܪܲܒ ܕܸܢܚܵܟ ܥܲܠ ܥܵܠܡܸ̈ܐ ܗܵܫܵܐ ܕܸܐܬܲܝܬ ܘܠܵܐ ܐܲܥܡܕܵܟ܀
24 ܡܵܪܲܢ܃ ܛܽܘܝܵܒܝ ܗܵܢܲܘ ܕܗܵܟܲܢ ܨܒܼܝܬ ܐܸܚܽܘܬ ܐܸܥܡܲܕ ܒܓܲܘ ܝܽܘܪܕܢܵܢ܂ ܘܸܐܚܫܽܘܠ ܙܲܝܢܵܐ ܠܲܕܥܵܡܕܼܝܢ ܘܲܢܚܽܘܪܽܘܢ ܒܼܝ ܘܠܵܐ ܢܸܙܕܟܽܘܢ܀
25 ܝܽܘܚܲܢܵܢ܃ ܝܲܠܕܸܗ ܕܲܐܒܵܐ ܠܡܵܢ ܐܲܥܡܕܵܟ ܕܗܵܐ ܐܲܢ̄ܬ ܒܲܐܒܽܘܟ ܘܲܐܒܽܘܟ ܒܵܟ݁ ܩܽܘܕܫܵܐ ܠܟܽܘܡܪܸ̈ܐ ܐܲܢ̄ܬ ܝܵܗܒܲܬ ܡܲܝ̈ܵܐ ܫܚܼܝ̈ܡܸܐ ܠܡܵܢ ܫܵܐܠܲܬ܀
26 ܡܵܪܲܢ܃ ܝܲܠܕܲܘ̈ܗܝ ܕܵܐܕܵܡ ܠܼܝ ܚܵܝܪܼܝܢ ܕܝܲܠܕܵܐ ܚܲܕܬܵܐ ܐܸܥܒܸܕ ܠܗܘ݁ܢ݁ ܐܽܘܪܚܵܐ ܒܡܲܝ̈ܵܐ ܐܸܕܪܽܘܫ ܠܗܘ݁ܢ ܘܲܕܠܵܐ ܐܸܥܡܲܕ ܠܵܐ ܡܸܫܟܚܵܐ܀
27 ܝܽܘܚܲܢܵܢ܃ ܟܽܘܡܪܸ̈ܐ ܡܸܢܵܟ ܡܸܬܩܲܕܫܼܝܢ ܟܵܗ̈ܢܸܐ ܒܙܽܘܦܵܟ ܡܸܬܚܲܘܪܼܝܢ݁ ܡܫܼܝ̈ܚܸܐ ܘܡܲܠܟܸ̈ܐ ܐܲܢ̄ܬ ܥܵܒܕܲܬ ܡܲܥܡܽܘܕܼܝܬܵܐ ܡܘ݁ܢ ܬܲܘܬܪܵܟ܀
28 ܡܵܪܲܢ܃ ܟܲܠܬܵܐ ܕܡܸܟܪܸܬ ܠܼܝ ܚܵܝܪܵܐ ܐܸܚܽܘܬ ܐܸܥܡܲܕ ܘܸܐܩܲܕܫܼܝܗ݀݁ ܪܵܚܡܵܐ ܕܚܲܬܢܵܐ ܠܵܐ ܬܸܫܬܐܸܠ ܡܸܢ ܡܲܣܚܽܘܬܵܐ ܕܠܼܝ ܚܵܝܪܵܐ܀
29 ܝܽܘܚܲܢܵܢ܃ ܠܵܐ ܡܸܫܟܲܚ ܐ̄ܢܵܐ ܕܲܡܚܼܝܠ ܐ̄ܢܵܐ ܕܲܠܓܲܘܙܲܠܬܵܟ ܒܼܐܝ̈ܕܲܝ ܐܸܚܽܘܕ݁ ܗܵܐ ܠܸܓܝܽܘ̈ܢܲܝܟ ܡܸܫܬܲܠܗ̈ܒܵܢ ܠܚܲܕ ܡܸܢ ܥܼܝܪܸ̈ܐ ܦܩܽܘܕ ܕܢܲܥܡܕܲܢ܀
30 ܡܵܪܲܢ܃ ܠܲܘ ܡܸܢ ܥܼܝܪܸ̈ܐ ܦܲܓܪܝ ܐܸܬܢܣܸܒ ܕܸܐܩܪܸܐ ܠܥܼܝܪܵܐ ܕܗܽܘ ܢܲܥܡܕܲܢܝ݁ ܦܲܓܪܸܗ ܕܵܐܕܵܡ ܗܵܐ ܠܒܼܝܫ ܐ̄ܢܵܐ ܘܲܐܢ̄ܬ ܒܲܪ ܐܵܕܵܡ ܠܼܝ ܡܲܥܡܕܲܬ܀
31 ܝܽܘܚܲܢܵܢ܃ ܡܲܝ̈ܵܐ ܚܙܲܐܘܽܘܟ ܘܲܐܣܓܼܝܘ ܕܚܸܠܘ ܚܙܲܐܘܽܘܟ ܡܲܝ̈ܵܐ ܘܗܵܐ ܪܵܥܠܼܝܢ݁ ܪܵܬ ܠܸܗ ܢܲܗܪܵܐ ܡܸܢ ܙܲܘܥܬܵܟ ܘܸܐܢܵܐ ܡܚܼܝܠܵܐ ܠܡܵܢ ܐܲܥܡܕܵܟ܀
32 ܡܵܪܲܢ܃ ܡܲܝ̈ܵܐ ܒܲܥܡܵܕܝ ܡܸܬܩܲܕܫܼܝܢ ܘܢܽܘܪܵܐ ܘܪܽܘܚܵܐ ܡܸܢܝ ܢܵܣܒܼܝܢ݁ ܘܸܐܠܵܐ ܥܸܡܕܸܬ ܠܵܐ ܐܸܬܓܡܲܪܘ ܕܢܲܦܪܽܘܢ ܝܲܠܕܸ̈ܐ ܕܠܵܐ ܡܵܝܬܼܝܢ܀
33 ܝܽܘܚܲܢܵܢ܃ ܢܽܘܪܵܐ ܠܢܽܘܪܵܟ ܐܸܢ ܩܵܪܒܵܐ ܝܵܩܕܵܐ ܡܸܢܵܗ݀ ܐܲܝܟ ܚܲܒܬܵܐ݁ ܛܽܘܪܵܐ ܕܣܼܝܢܲܝ ܠܵܐ ܣܲܝܒܪܵܟ ܘܸܐܢܵܐ ܡܚܼܝܠܵܐ ܒܡܵܢ ܐܲܥܡܕܵܟ܀
34 ܡܵܪܲܢ܃ ܢܽܘܪܵܐ ܐܸܢܵܐ ܕܡܸܬܓܲܘܙܠܵܐ ܘܡܸܛܽܠ ܐ̄ܢܵܫܵܐ ܥܽܘܠܵܐ ܗ̄ܘܼܝܬ݁ ܒܟܲܪܣܵܐ ܚܲܕܬܵܐ ܕܒܬܽܘܠܬܵܐ ܘܗܵܫܵܐ ܥܡܼܝܕܵܐ ܒܓܲܘ ܝܽܘܪܕܢܵܢ܀
35 ܝܽܘܚܲܢܵܢ܃ ܣܲܓܼܝ ܦܲܐܝܵܐ ܕܲܐܢ̄ܬ ܬܲܥܡܕܲܢܝ ܕܠܵܟ ܐܼܝܬ ܩܽܘܕܫܵܐ ܕܲܬܕܲܟܸܐ ܠܟܽܠ݁ ܒܵܟ ܗ̄ܽܘ ܛܲܡܸ̈ܐܐ ܡܸܬܩܲܕܫܼܝܢ ܘܲܐܢ̄ܬ ܩܲܕܼܝܫܵܐ ܠܡܵܢ ܥܵܡܕܲܬ܀
36 ܡܵܪܲܢ܃ ܣܲܓܼܝ ܙܵܕܸܩ ܕܲܐܢ̄ܬ ܬܲܥܡܕܲܢܝ ܐܲܝܟ ܕܵܐܡܲܪ ܐ̄ܢܵܐ ܘܠܵܐ ܬܸܬܚܪܸܐ݁ ܗܵܐ ܐܲܥܡܸܕܬܵܟ ܒܓܲܘ ܡܲܪܒܥܵܐ ܐܲܥܡܸܕܲܝܢܝ ܐܲܢ̄ܬ ܒܓܲܘ ܝܽܘܪܕܢܵܢ܀
37 ܝܽܘܚܲܢܵܢ܃ ܥܲܒܕܵܐ ܐܸܢܵܐ ܘܲܡܚܼܝܠ ܐ̄ܢܵܐ ܡܚܲܪܲܪ ܟܽܠܵܐ ܪܲܚܸܡ ܥܠܲܝ݁ ܥܲܪ̈ܩܲܝܟ ܕܸܐܫܪܸܐ ܠܵܐ ܐܸܬܡܨܼܝܬ ܠܪܹܝܫܵܟ ܪܵܡܵܐ ܡܲܢ ܐܲܫܘܝܲܢܝ܀
38 ܡܵܪܲܢ܃ ܥܲܒ̈ܕܸܐ ܒܲܥܡܵܕܝ ܡܸܬܚܲܪܪܼܝܢ ܐ̄ܫܛܵܪܸ̈ܐ ܒܲܣܚܵܬܝ ܡܸܬܠܚܸܝܢ݁ ܚܪܽܘܪܸ̈ܐ ܒܡܲܝ̈ܵܐ ܡܸܬܚܲܬܡܼܝܢ ܘܸܐܠܵܐ ܐܸܥܡܲܕ ܒܛܸܠ̈ܝ ܟܽܠܗܸܝܢ܀
39 ܝܽܘܚܲܢܵܢ܃ ܦܪܼܝܣܵܐ ܕܢܽܘܪܵܐ ܐܵܐܲܪ ܛܥܼܝܢ ܘܲܡܣܲܟܸܐ ܠܵܟ ܥܲܠ ܝܽܘܪܕܢܵܢ݁ ܘܸܐܢ ܫܸܠܡܲܬ ܠܵܗ݀ ܘܬܸܥܡܲܕ ܨܒܲܝܬ ܐܲܢ̄ܬ ܠܵܟ ܐܲܥܡܸܕ ܘܫܲܡܠܵܐ ܠܟܽܠ܀
40 ܡܵܪܲܢ܃ ܦܲܐܝܵܐ ܗܵܕܸܐ ܕܲܐܢ̄ܬ ܬܲܥܡܕܲܢܝ ܕܠܵܐ ܐ̄ܢܵܫ ܢܸܛܥܸܐ ܘܢܼܐܡܲܪ ܥܠܲܝ݁ ܕܸܐܠܵܐ ܢܽܘܟܪܵܝ ܡܸܢ ܒܸܝܬ ܐܲܒܵܐ ܠܡܵܢ ܠܸܘܵܝܵܐ ܕܚܸܠ ܢܲܥܡܕܸܗ܀
41 ܝܽܘܚܲܢܵܢ܃ ܨܠܽܘܬܵܐ ܡܵܕܸܝܢ ܡܵܐ ܕܥܵܡܕܲܬ ܐܲܝܟܲܢ ܐܸܚܬܽܘܡ ܥܲܠ ܝܽܘܪܕܢܵܢ݁ ܕܲܐܒܵܐ ܘܪܽܘܚܵܐ ܒܵܟ ܡܸܬܚܙܸܝܢ ܘܲܠܡܲܢ ܐܸܩܪܸܐ ܐܲܝܟ ܟܵܗܢܵܐ܀
42 ܡܵܪܲܢ܃ ܨܠܽܘܬܵܐ ܒܫܸܬܩܵܐ ܡܸܬܚܲܬܡܵܐ ܐܼܝܕܵܟ ܒܲܠܚܽܘܕ ܬܵܐ ܣܼܝܡ ܥܠܲܝ݁ ܘܲܐܒܵܐ ܩܵܥܸܐ ܚܠܵܦ ܟܵܗܢܵܐ ܐܲܝܕܵܐ ܕܦܲܐܝܵܐ ܡܸܛܽܠ ܒܪܸܗ܀
43 ܝܽܘܚܲܢܵܢ܃ ܩܪ̈ܲܝܵܐ ܟܽܠܗܘ݁ܢ ܗܵܐ ܩܵܝܡܼܝܢ ܙܡܼܝ̈ܢܲܝܟ ܚܲܬܢܵܐ ܗܵܐ ܣܵܗܕܼܝܢ݁ ܕܟܽܠܝܽܘܡ ܐܵܡܪܲܬ ܒܲܝܢܵܬܗܘ݁ܢ ܕܩܵܠܵܐ ܐܸܢܵܐ ܘܠܲܘ ܡܸܠܬܵܐ܀
44 ܡܵܪܲܢ܃ ܩܵܠܵܐ ܕܩܵܪܸܐ ܒܓܲܘ ܡܲܕܒܪܵܐ ܫܲܡܠܵܐ ܥܒܵܕܵܐ ܕܸܐܬܲܝܬ ܠܸܗ݀ ܕܢܸܪܥܲܡ ܚܽܘܪܒܵܐ ܕܲܢܦܲܩܬ ܠܸܗ ܒܫܲܝܢܵܐ ܪܲܒܵܐ ܕܲܐܟܪܸܙܬ ܒܸܗ܀
45 ܝܽܘܚܲܢܵܢ܃ ܪܒܵܒܬܵܐ ܕܥܼܝܪܸ̈ܐ ܠܸܐܕ̈ܢܲܝ ܐ̄ܬܵܬ ܕܗܵܐ ܫܵܡܲܥ ܐ̄ܢܵܐ ܡܸܢ ܒܸܝܬ ܐܲܒܵܐ݁ ܚܲܝ̈ܠܲܘܵܬܵܐ ܕܲܡܝܲܒܒܼܝܢ ܒܕܸܢܚܵܟ ܚܲܬܢܵܐ ܚܝܲܘ ܥܵܠܡܸ̈ܐ܀
46 ܡܵܪܲܢ܃ ܪܗܼܝܒ ܥܸܕܵܢܵܐ ܘܠܼܝ ܚܵܝܪܼܝܢ ܚܕܽܘ̈ܓܸܐ ܕܢܸܚܙܽܘܢ ܡܘ݁ܢ ܡܸܣܬܥܲܪ݁ ܬܵܐ ܐܲܥܡܸܕܲܝܢܝ ܕܲܢܩܲܠܣܽܘܢ ܠܩܵܠܸܗ ܕܲܐܒܵܐ ܡܵܐ ܕܡܸܫܬܡܲܥ܀
47 ܝܽܘܚܲܢܵܢ܃ ܫܵܡܲܥ ܐ̄ܢܵܐ ܡܵܪܝ ܐܲܝܟ ܡܸܠܬܵܟ ܬܵܐ ܠܲܥܡܵܕܵܐ ܕܚܽܘܒܵܟ ܥܨܵܟ݁ ܣܵܓܸܕ ܥܲܦܪܵܐ ܕܠܲܐܝܟܵܐ ܡܛܵܐ ܕܥܲܠ ܓܵܒܽܘܠܸܗ ܐܼܝܕܸܗ ܢܣܼܝܡ܀
48 ܫܠܸܝܢ ܗ̄ܘܲܘ ܣܸܕܪܸ̈ܐ ܟܲܕ ܩܵܝܡܼܝܢ ܘܲܢܚܸܬ ܚܲܬܢܵܐ ܠܓܲܘ ܝܽܘܪܕܢܵܢ݁ ܥܡܲܕ ܩܲܕܼܝܫܵܐ ܘܡܸܚܕܵܐ ܣܠܸܩ ܘܲܐܙܠܸܓ ܢܽܘܗܪܸܗ ܥܲܠ ܥܵܠܡܸ̈ܐ܀
49 ܬܲܪ̈ܥܸܐ ܕܪܲܘܡܵܐ ܦܬܼܝܚܼܝܢ ܠܥܸܠ ܘܩܵܠܸܗ ܕܲܐܒܵܐ ܟܲܕ ܡܸܫܬܡܲܥ݁ ܕܗܵܢܲܘ ܚܲܒܼܝܒܝ ܕܒܸܗ ܐܸܨܛܒܼܝܬ ܟܽܠܟܽܘܢ ܥܲܡ̈ܡܸܐ ܠܸܗ ܬܲܘ ܣܓܽܘܕܘ܀
50 ܬܗܲܪܘ ܚܲܙܵܝܸ̈ܐ ܟܲܕ ܩܵܝܡܼܝܢ ܒܪܽܘܚܵܐ ܕܢܸܚܬܲܬ ܕܬܸܣܗܲܕ ܥܠܲܘܗܝ݁ ܬܲܘܕܼܝ ܠܕܸܢܚܵܟ ܡܲܦܨܲܚ ܟܽܠ ܕܲܒܓܸܠܝܵܢܸܗ ܢܗܲܪܘ ܥܵܠܡܸ̈ܐ܀