← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

64494: JesusJerusalem

Click on a word for lexical analysis
Click on a red-colored coordinate for comments and/or translations of the line

00 ܣܽܘܓܼܝܬܵܐ ܕܥܲܠ ܡܵܪܲܢ ܘܲܟܢܽܘܫܬܵܐ
01 ܡܲܠܟܵܐ ܕܪܲܘܡܵܐ ܠܲܐܪܥܵܐ ܢܚܸܬ ܕܢܸܦܪܽܘܩ ܥܹܕܬܸܗ ܡܸܢ ܛܽܘܥܝܲܝ܂ ܥܼܝܠܵܐ ܪܟܼܝܒ ܗ̄ܘܵܐ ܟܲܕ ܥܵܐܸܠ ܠܓܲܘ ܐܽܘܪܼܫܠܸܡ ܨܵܠܽܘܒܬܵܐ܀
02 ܟܲܢܸܫ ܥܲܡ̈ܡܸܐ ܡܸܢ ܣܲܘ̈ܦܸܐ ܘܲܠܛܵܥܲܝ̈ܵܐ ܗܽܘ ܐܲܦܢܼܝ܂ ܘܪܲܡܪܸܡ ܩܲܪܢܵܐ ܕܲܡܟܼܝܪܬܸܗ ܘܗܵܐ ܙܵܡܪܵܐ ܠܸܗ ܬܸܫܒܽܘܚܬܵܐ܀
03 ܡܲܟܼܝܟ ܘܲܪܟܼܝܒ ܥܲܠ ܥܼܝܠܵܐ ܐܲܝܟ ܕܲܙܟܲܪܝܵܐ ܩܲܕܸܡ ܚܙܵܝܗܝ܂ ܘܲܢܦܲܩ ܛܸܒܵܐ ܕܡܲܥܲܠܬܸܗ ܘܲܟܢܲܫܘ ܫܲܒܪܸ̈ܐ ܕܲܢܪܲܡܪܡܘ݁ܢܵܝܗܝ܀
04 ܥܼܝܪܸ̈ܐ ܐܸܬܲܘ ܡܸܢ ܪܲܘܡܵܐ ܘܫܽܘܒܚܵܐ ܚܲܕܬܵܐ ܐܲܠܸܦܘ ܗ̄ܘܲܘ܂ ܘܩܲܒܸܠܘ ܫܲܒܪܸ̈ܐ ܬܸܫܒܽܘܚܬܵܐ ܙܡܼܝܪܬܵܐ ܕܥܼܝܪܸ̈ܐ ܗܲܠܸܠܘ ܒܵܗ݀܀
05 ܙܡܵܪܵܐ ܚܲܠܝܵܐ ܡܸܢ ܪܲܘܡܵܐ ܩܲܒܸܠܘ ܫܲܒܪܸ̈ܐ ܕܪܸܡܙܸܗ ܦܩܲܕ܂ ܘܲܩܥܲܘ ܘܸܐܡܲܪܘ ܐܽܘܫܲܥܢܵܐ ܠܡܲܠܟܵܐ ܕܪܲܘܡܵܐ ܕܠܲܐܪܥܵܐ ܢܚܸܬ܀
06 ܟܸܢ̈ܫܼܝܢ ܟܸܢ̈ܫܼܝܢ ܕܲܥܠܲܝ̈ܡܸܐ ܓܽܘ̈ܕܼܝܢ ܓܽܘ̈ܕܼܝܢ ܡܸܢ ܫܲܒܪܸ̈ܐ܂ ܒܲܦܨܼܝܚܽܘܬܵܐ ܩܵܥܸܝܢ ܗ̄ܘܲܘ ܒܪܼܝܟ ܗ̄ܽܘ ܡܲܠܟܵܐ ܕܥܼܝܠܵܐ ܪܟܸܒ܀
07 ܡܗܲܠܸܟ ܡܵܪܲܢ ܒܸܝܬ ܟܸܢ̈ܫܸܐ ܘܦܵܪܣܼܝܢ ܢܲܚ̈ܬܸܐ ܩܕܵܡ ܐܽܘܪܚܸܗ܂ ܘܵܐܦ ܐܼܝ̈ܠܵܢܸܐ ܫܲܕܲܪܘ ܠܸܗ ܕܵܫ̈ܢܸܐ ܕܫܽܘܒܚܵܐ ܒܣܲܘ̈ܟܲܝܗܘ݁ܢ܀
08 ܚܙܲܘ ܐܼܝ̈ܠܵܢܸܐ ܠܒܵܪܽܘܝܗܘ݁ܢ ܘܟܲܦܘ ܪܹ̈ܝܫܲܝܗܘ݁ܢ ܘܲܣܓܸܕܘ ܠܸܗ܂ ܘܲܒܣܲܘ̈ܟܲܝܗܘ݁ܢ ܫܽܘܒܚܵܐ ܙܡܲܪܘ ܠܕܲܪܟܸܒ ܥܼܝܠܵܐ ܥܲܠ ܕܲܨܒܵܐ܀
09 ܣܲܘ̈ܟܸܐ ܕܙܲܝܬܵܐ ܘܲܕܕܸܩ̈ܠܸܐ ܛܥܸܢܘ ܗ̄ܘܲܘ ܫܲܒܪܸ̈ܐ ܕܽܐܘܪܼܫܠܸܝܡ܂ ܘܟܲܕ ܠܵܐ ܒܵܥܝܵܐ ܓܲܝܵܪܬܵܐ ܫܲܒܪܸ̈ܐ ܗܲܠܸܠܘ ܬܸܫܒܽܘܚܬܸܗ܀
10 ܚܙܵܬܸܗ ܨܸܗܝܽܘܢ ܘܸܐܬܟܲܡܪܲܬ ܣܸܪܒܲܬ ܢܸܦܩܲܬ ܓܲܝܵܪܬܵܐ܂ ܘܫܸܩܠܲܬ ܟܼܐܦܸ̈ܐ ܟܲܕ ܓܵܙܡܵܐ ܕܡܲܢܽܘ ܗܵܢܵܐ ܕܵܐܬܸܐ ܥܠܲܝ܀
11 ܡܲܢܽܘ ܗܵܢܵܐ ܘܡܵܐ ܛܸܒܸܗ ܕܡܸܢ ܛܽܘܪ ܙܲܝ̈ܬܸܐ ܐܵܬܸܐ ܠܘܵܬܝ܂ ܘܟܸܢ̈ܫܸܐ ܕܫܲܒܪܸ̈ܐ ܩܕܵܡ ܡܸܐܬܝܸܗ ܘܡܸܢ ܝܲܠܽܘ̈ܕܸܐ ܡܸܬܪܲܡܪܲܡ܀
12 ܒܢ̈ܵܬ ܐܽܘܪܼܫܠܸܝܡ ܠܽܐܘܪܥܸܗ ܢܦܲܩ̈ܝ ܘܲܒܢ̈ܵܬ ܨܸܗܝܽܘܢ ܫܽܘܒܚܸܗ ܙܡܲܪ̈ܝ܂ ܘܡܸܢ ܟܽܠ ܥܲܡ̈ܡܼܝܢ ܬܸܫܒܽܘܚܬܵܐ ܠܡܲܠܟܵܐ ܪܲܒܵܐ ܕܥܼܝܠܵܐ ܪܟܸܒ܀
13 ܩܸܪܒܲܬ ܨܸܗܝܽܘܢ ܟܲܕ ܣܵܢܝܵܐ ܘܲܠܦܵܪܽܘܩܲܢ ܐܸܡܪܲܬ ܗ̄ܘܵܬ܂ ܕܡܲܢܽܘ ܝܲܗ̄ܒ ܠܵܟ ܫܽܘܠܛܵܢܵܐ ܕܡܸܢ ܝܲܠܽܘ̈ܕܸܐ ܬܸܬܪܲܡܪܲܡ܀
14 ܐܸܢܵܐ ܐܼܝܬܲܝ ܗܵܝ ܟܲܠܬܵܐ ܕܡܽܘܫܸܐ ܐܲܦܸܩ ܡܸܢ ܡܸܨܪܸܝܢ܂ ܘܠܵܐ ܐܲܟܬܸܒ ܠܼܝ ܒܲܪ ܥܲܡܪܲܡ ܕܚܲܬܢܵܐ ܐ̄ܚܪܼܢܵܐ ܡܟܲܪ ܠܼܝ܀
15 ܒܣܸܦܪܸ̈ܐ ܚܲܡܫܵܐ ܕܽܐܘܪܵܝܬܵܐ ܠܲܝܬ ܗ̄ܘܵܐ ܫܲܪܒܵܟ ܘܵܐܦܠܵܐ ܟܬܼܝܒ܂ ܡܲܢܽܘ ܫܲܕܪܵܟ ܕܨܸܐܕܲܝ ܪܗܸܛܬ ܕܠܵܐ ܡܩܲܒܠܵܐ ܐ̄ܢܵܐ ܡܲܥܲܠܬܵܟ܀
16 ܒܡܲܢܢܵܐ ܘܣܲܠܘܲܝ ܐܸܬܦܲܛܡܸܬ ܘܲܒܥܲܡܽܘܕܵܐ ܐܸܬܢܲܗܪܸܬ܂ ܡܸܢ ܛܲܪܵܢܵܐ ܐܸܬܒܲܣܡܸܬ ܘܠܲܝܬ ܗ̄ܘܵܐ ܫܲܪܒܵܟ ܟܲܕ ܡܲܟܪܽܘܢܝ܀
17 ܡܵܪܲܢ܃ ܒܓܲܘ ܐܽܘܪܵܝܬܵܐ ܕܡܽܘܫܸܐ ܟܬܲܒ ܣܼܝܡܼܝܢ ܫܲܪ̈ܒܲܝ ܠܲܕܝܵܕܥܼܝܢ܂ ܕܲܒܪܹܝܫ ܟܬܵܒܸ̈ܐ ܐܸܬܟܬܸܒ ܥܠܲܝ ܕܸܐܚܽܘܬ ܠܲܐܪܥܵܐ ܐܲܝܟ ܨܸܒܝܵܢܝ܀
18 ܟܢܽܘܫܬܵܐ܃ ܓܠܵܐ ܠܼܝ ܡܽܘܫܸܐ ܥܲܠ ܡܵܪܝܵܐ ܘܚܲܘܝܲܢܝ ܫܽܘܒܚܸܗ ܟܲܕ ܦܲܪܩܲܢܝ܂ ܘܠܵܐ ܐܲܟܬܸܒ ܠܼܝ ܕܼܐܝܬ ܠܸܗ ܒܪܵܐ ܠܗܲܘ ܐܲܠܵܗܵܐ ܕܠܸܗ ܡܲܟܪܲܢܝ܀
19 ܡܵܪܲܢ܃ ܓܠܵܐ ܠܸܟܝ ܡܽܘܫܸܐ ܥܲܠ ܡܵܪܝܵܐ ܘܐ̄ܪ̈ܵܙܸܐ ܬܠܵܬܵܐ ܩܕܵܡܲܝܟܝ ܪܫܲܡ܂ ܘܸܐܡܪܸ̈ܐ ܘܥܸܪ̈ܒܸܐ ܕܩܲܪܸܒ ܗ̄ܘܵܐ ܠܡܲܢܽܘ ܪܵܫܡܼܝܢ ܦܲܫܸܩܝ ܠܼܝ܀
20 ܟܢܽܘܫܬܵܐ܃ ܕܸܒ̈ܚܸܐ ܕܝܲܗ̄ܒ ܠܼܝ ܡܸܢ ܣܼܝܢܲܝ ܠܸܗ ܠܲܐܕܽܘܢܲܝ ܡܸܬܩܲܪܒܼܝܢ܂ ܘܟܽܠ ܕܸܒ̈ܚܵܬܵܐ ܕܡܸܬܢܲܣ̈ܟܵܢ ܠܡܵܪܝܵܐ ܨܒܲܐܽܘܬ ܡܸܬܝܲܗ̈ܒܵܢ܀
21 ܡܵܪܲܢ܃ ܕܸܒ̈ܚܲܘܗܝ ܕܡܽܘܫܸܐ ܠܼܝ ܨܵܝܪܼܝܢ ܘܩܲܝܣܵܐ ܕܐ̄ܪܵܙܵܐ ܨܠܼܝܒܵܐ ܪܫܲܡ܂ ܐܸܡܪܵܐ ܕܲܕܒܲܚ ܟܲܕ ܠܵܐ ܚܛܵܐ ܡܫܼܝܚܵܐ ܗ̄ܘ ܕܡܸܬܢܟܸܣ ܚܠܵܦ ܥܵܠܡܵܐ܀
22 ܟܢܽܘܫܬܵܐ܃ ܗܲܠܸܠܘ ܥܲܡ̈ܡܸܐ ܘܲܐܘܕܼܝܘ ܒܸܗ ܠܲܡܕܲܒܪܵܢܵܐ ܕܲܐܡܠܸܟ ܒܼܝ܂ ܘܲܐܢ̄ܬ ܡܵܐ ܛܸܒܵܟ ܕܡܸܢ ܫܲܒܪܸ̈ܐ ܕܵܫ̈ܢܸܐ ܕܫܽܘܒܚܵܐ ܠܲܫܡܵܟ ܫܩܲܠܬ܀
23 ܡܵܪܲܢ܃ ܗܲܠܸܠܘ ܡܲܠܟܲܝ̈ܟܝ ܒܩܼܝ̈ܢܵܬܗܘ݁ܢ ܘܒܲܢܒܼܝܽܘܬܗܘ݁ܢ ܠܼܝ ܪܲܡܪܸܡܘ܂ ܒܡܲܬܠܸܗ ܪܲܒܵܐ ܕܲܫܠܸܝܡܘ݁ܢ ܒܬܽܘܠܬܵܐ ܘܡܵܪܝܵܐ ܡܸܬܢܲܨܪܼܝܢ܀
24 ܟܢܽܘܫܬܵܐ܃ ܗܲܘܬܵܐ ܕܲܫܝܽܘܠ ܦܵܬܚܵܢܝ ܠܵܟ ܐܸܢ ܥܵܐܸܠ ܐܲܢ̄ܬ ܠܓܲܘ ܗܲܝ̈ܟܠܲܝ܂ ܘܲܒܪܹܝܫ ܩܲܝܣܵܐ ܥܲܡ ܒܼܝ̈ܫܸܐ ܨܵܠܒܵܐ ܐ̄ܢܵܐ ܠܵܟ ܕܠܵܐ ܪܚܸܡܬܵܟ܀
25 ܡܵܪܲܢ܃ ܗܵܕܸܐ ܕܵܐܡܪܲܬܝ ܐܵܘ ܟܲܠܬܵܐ ܐܵܦ ܐܸܫܲܥܝܵܐ ܐܲܟܬܸܒ ܥܠܸܝܗ݀܂ ܕܥܲܡ ܥܲܘ̈ܵܠܸܐ ܠܲܡ ܡܸܬܡܢܸܐ ܝܵܪܬܸܗ ܕܲܐܒܵܐ ܕܠܲܐܪܥܵܐ ܢܚܸܬ܀
26 ܟܢܽܘܫܬܵܐ܃ ܗܦܽܘܟ ܥܲܠ ܐܽܘܪܚܵܟ ܕܸܐܬܲܝܬ ܒܵܗ݀ ܕܠܵܐ ܡܸܢ ܟܵܗ̈ܢܲܝ ܡܸܬܩܲܛܠܲܬ܂ ܠܲܝܬ ܠܼܝ ܡܟܼܝܪܵܐ ܕܥܼܝܠܵܐ ܪܟܼܝܒ ܘܸܐܢ ܥܵܐܠܲܬ ܠܼܝ ܨܵܠܒܵܢܝ ܠܵܟ܀
27 ܡܵܪܲܢ܃ ܗܵܢܵܐ ܥܒܵܕܵܐ ܐܽܘܪܼܫܠܸܝܡ ܠܸܗ ܕܵܢܼܝܐܸܝܠ ܩܲܕܸܡ ܪܫܲܡ܂ ܕܢܸܬܩܛܸܠ ܡܫܼܝܚܵܐ ܘܠܵܐ ܐܼܝܬ ܠܵܗ݀ ܦܵܪܩܵܐ ܐ̄ܚܪܼܢܵܐ ܕܲܢܫܲܘܙܒܼܝܗ݀܀
28 ܟܢܽܘܫܬܵܐ܃ ܗܲܝ̈ܟܠܲܝ ܪܵܡܼܝܢ ܘܲܡܨܲܒܬܼܝܢ ܒܨܸܒ̈ܬܸܐ ܕܡܲܠܟܸ̈ܐ ܐܲܝܬܼܝܘ ܠܼܝ܂ ܘܟܵܗ̈ܢܸܐ ܙܵܡܪܼܝܢ ܘܲܡܫܲܒܚܼܝܢ ܠܡܲܠܟܵܐ ܨܒܲܐܽܘܬ ܕܲܒܓܲܘܝ ܫܪܸܐ܀
29 ܡܵܪܲܢ܃ ܗܲܝܟܠܵܐ ܕܫܽܘܒܚܵܐ ܡܲܢܽܘ ܒܢܵܐ ܩܪܼܝ ܒܲܫܠܸܝܡܘ݁ܢ ܘܗܽܘ ܢܲܠܦܸܟܝ܂ ܕܫܲܪܼܝܪܵܐܼܝܬ ܒܓܲܘ ܗܲܝܟܠܸܟܝ ܝܵܬܸܒ ܡܵܪܝܵܐ ܥܲܠ ܐܲܪܥܵܐ܀
30 ܟܢܽܘܫܬܵܐ܃ ܗܸܪܬܵܐ ܩܫܼܝܬܵܐ ܥܵܒܕܲܬ ܥܲܡܝ ܒܵܒܸܝܠ ܡܕܼܝܢ̄ܬܵܐ ܥܲܫܼܝܢܬܵܐ܂ ܘܫܲܒܥܼܝܢ ܫܢܲܝ̈ܵܐ ܢܸܣܒܲܬ ܡܸܢܝ ܬܵܓܸ̈ܐ ܕܡܲܠ̈ܟܲܝ ܐܵܦ ܟܽܘܡܪ̈ܲܝ܀
31 ܡܵܪܲܢ܃ ܗܸܪܲܬ ܒܵܒܸܝܠ ܥܲܠ ܕܲܚܛܲܝܬܝ ܡܸܛܽܠ ܦܸܨܚܵܐ ܕܠܵܐ ܢܟܲܣܬܼܝܘܗܝ܂ ܕܨܽܘܪܬܸܗ ܕܲܒܪܵܐ ܐܸܡܪܵܐ ܗ̄ܘܵܬ ܘܒܲܕܡܸܗ ܝܲܠܕܲܝ̈ܟܝ ܡܸܫܬܲܘܙܒܼܝܢ܀
32 ܟܢܽܘܫܬܵܐ܃ ܘܸܐܢ ܡܸܢ ܒܵܒܸܝܠ ܐܵܬܝܲܬ ܥܠܲܝ ܠܵܐ ܡܩܲܒܠܵܐ ܐ̄ܢܵܐ ܝܽܘܡ ܡܸܐܬܝܵܟ܂ ܕܩܲܢܼܝܛܵܐ ܐ̄ܢܵܐ ܡܸܢ ܠܲܘܛܬܵܐ ܕܕܲܠܡܵܐ ܬܲܡܠܸܟ ܥܲܠ ܝܲܠܕ̈ܲܝ܀
33 ܡܵܪܲܢ܃ ܘܵܠܸܐ ܕܬܸܫܡܥܼܝܢ ܐܵܘ ܟܢܽܘܫܬܵܐ ܠܩܵܠܵܐ ܕܒܸܠܥܲܡ ܐܲܟܬܸܒ ܠܸܟܝ܂ ܕܢܸܕܢܲܚ ܟܲܘܟܒܵܐ ܡܸܢ ܝܲܥܩܽܘܒ ܘܠܲܘ ܡܸܢ ܒܵܒܸܝܠ ܥܲܫܼܝܢܬܵܐ܀
34 ܟܢܽܘܫܬܵܐ܃ ܘܲܪܕܵܐ ܕܟܽܘܡܪ̈ܲܝ ܒܒܵܒܸܝܠ ܚܡܵܐ ܬܵܐܓܵܐ ܕܟܵܗ̈ܢܲܝ ܬܲܡܵܢ ܢܦܲܠ܂ ܘܟܽܠܡܲܢ ܕܵܐܬܸܐ ܕܢܲܡܠܸܟ ܥܠܲܝ ܣܸܦܪܸܗ ܕܡܽܘܫܸܐ ܢܲܘܫܸܛ ܠܼܝ܀
35 ܡܵܪܲܢ܃ ܘܟܽܘܡܪ̈ܲܝܟܝ ܐܸܒܲܕܘ ܥܲܠ ܕܲܚܛܲܘ ܥܒܲܪ ܐܼܝܩܵܪܗܘ݁ܢ ܥܲܠ ܕܲܐܪܫܲܥܘ܂ ܕܲܐܗܡܼܝܘ ܒܕܸܒ̈ܚܸܐ ܕܠܼܝ ܨܼܝܪܼܝܢ ܒܲܕܓܽܘܢ ܩܲܒܸܠܘ ܦܽܘܪܥܵܢܗܘ݁ܢ܀
36 ܟܢܽܘܫܬܵܐ܃ ܘܼܝ̈ܠܸܐ ܕܫܽܘܒܚܵܐ ܬܲܪ̈ܥܲܝ ܫܩܲܠܘ ܨܸܒܬܵܐ ܕܡܽܘܫܸܐ ܐܲܬܩܸܢ ܒܼܝ܂ ܘܫܲܒܬܵܐ ܘܕܸܒ̈ܚܸܐ ܘܪܹܝܫ ܝܲܪ̈ܚܸܐ ܗܽܘ ܐܲܫܠܸܡ ܠܼܝ ܟܲܕ ܡܲܟܪܲܢܝ܀
37 ܡܵܪܲܢ܃ ܘܼܝ̈ܠܸܐ ܕܬܲܪ̈ܥܲܝܟܝ ܠܼܝ ܪ̈ܵܫܡܵܢ ܘܫܲܒܬܵܐ ܘܕܸܒ̈ܚܸܐ ܠܼܝ ܨܵܝܪܼܝܢ܂ ܘܠܲܝܬ ܛܽܘܦܣܵܐ ܒܸܟܝ ܡܸܢ ܕܸܒ̈ܚܸܐ ܕܠܲܘ ܥܲܠ ܡܸܐܬܼܝܬܝ ܡܲܘܕܲܥ ܠܸܟܝ܀
38 ܟܢܽܘܫܬܵܐ܃ ܙܡܼܝܪܬܵܐ ܕܫܽܘܒܚܵܐ ܠܲܒܢ̈ܲܝ ܝܲܗ̄ܒ ܘܵܐܦ ܩܲܪ̈ܢܵܬܵܐ ܕܲܢܝܲܒܸܒܘ܂ ܘܗܵܢܵܐ ܥܼܐܕܵܐ ܕܽܐܘ̈ܫܲܥܢܸܐ ܣܵܡܸܗ ܒܣܸܦܪܵܐ ܕܠܼܝ ܢܸܬܢܛܲܪ܀
39 ܡܵܪܲܢ܃ ܙܡܼܝܪܬܵܐ ܕܫܽܘܒܚܵܐ ܐܵܦ ܣܲܘ̈ܟܸܐ ܠܗܵܢܵܐ ܝܲܘܡܵܐ ܪܵܫܡܼܝܢ ܗ̄ܘܲܘ܂ ܩܪܼܝ ܒܲܢܒܼܝܸ̈ܐ ܠܵܐ ܬܸܬܚܪܼܝܢ ܕܡܸܛܽܠ ܚܲܬܢܵܐ ܟܲܠܬܵܐ ܗܘܲܝܬܝ܀
40 ܟܢܽܘܫܬܵܐ܃ ܙܲܘܚܵܐ ܕܟܽܘܡܪ̈ܲܝ ܡܽܘܫܸܐ ܓܠܲܦ ܛܲܒ̈ܥܸܐ ܛܵܒܸ̈ܐ ܘܲܙܡܵܪ̈ܓܕܸܐ܂ ܘܣܵܡ ܥܲܠ ܟܲܬܦܸܗ ܕܪܹܝܫ ܟܵܗ̈ܢܸܐ ܕܲܒܝܲܕ ܕܸܒܚܸܗ ܚܲܣܼܝ ܥܠܲܝ܀
41 ܡܵܪܲܢ܃ ܙܲܘܚܸܗ ܕܟܵܗܢܵܐ ܒܼܝ ܐܸܬܓܡܲܪ ܠܒܽܘܫܸܗ ܘܨܸܒܬܸܗ ܠܼܝ ܪܵܫܡܼܝܢ܂ ܫܡܵܗܸ̈ܐ ܬܪܸܥܣܲܪ ܕܥܲܠ ܟܲܬܦܸܗ ܫܠܼܝ̈ܚܸܐ ܬܪܸܥܣܲܪ ܨܵܝܪܼܝܢ ܗ̄ܘܲܘ܀
42 ܟܢܽܘܫܬܵܐ܃ ܙܲܠܼܝܠ ܟܸܢܫܵܐ ܕܸܐܬܲܝܬ ܒܸܗ ܛܠܵܝܸ̈ܐ ܘܫܲܒܪܸ̈ܐ ܟܲܕ ܪܵܝܒܼܝܢ܂ ܠܲܝܬ ܠܵܟ ܥܲܡܵܟ ܚܲܟܼܝܡܵܐ ܘܣܵܒܵܐ ܗܕܼܝܪܵܐ ܘܪܹܝܫ ܥܲܡܵܐ܀
43 ܡܵܪܲܢ܃ ܙܲܠܼܝܠ ܟܸܢܫܵܐ ܐܲܝܟ ܕܵܐܡܪܲܬܝ ܘܝܲܩܼܝܪ ܫܽܘܒܚܸܗ ܒܓܲܘ ܣܸܦܪܵܐ܂ ܗܵܝ ܬܸܫܒܽܘܚܬܵܐ ܕܕܲܘܼܝܕ ܪܫܲܡ ܝܲܘܡܵܢ ܬܸܩܢܲܬ ܡܸܢ ܫܲܒܪܸ̈ܐ܀
44 ܟܢܽܘܫܬܵܐ܃ ܙܲܡܸܢܬ ܫܲܒܪܸ̈ܐ ܠܝܽܘܡ ܡܸܐܬܝܵܟ ܘܫܼܝܛ ܗ̄ܽܘ ܘܲܒܣܸܐ ܥܲܡ ܡܲܥܠܵܟ܂ ܟܵܗ̈ܢܸܐ ܘܟܽܘܡܪܸ̈ܐ ܠܵܐ ܪܲܚܡܽܘܟ ܘܲܐܢ̄ܬ ܐܲܝܟܲܢܵܐ ܥܠܲܝ ܡܲܡܠܟܲܬ܀
45 ܡܵܪܲܢ܃ ܙܡܼܝܢܼܝܢ ܫܲܒܪܸ̈ܐ ܡܸܢ ܥܵܠܲܡ ܘܕܲܘܼܝܕ ܣܵܗܸܕ ܒܲܙܡܼܝܪܬܸܗ܂ ܕܡܸܢ ܦܽܘܡ ܥܠܲܝ̈ܡܸܐ ܘܲܛܠܵܝܸ̈ܐ ܢܸܪܥܲܡ ܫܽܘܒܚܵܐ ܠܒܲܪ ܡܲܠܟܵܐ܀
46 ܟܢܽܘܫܬܵܐ܃ ܚܠܽܘܠܵܐ ܥܒܲܕ ܠܼܝ ܒܲܐܫܼܝܡܘ݁ܢ ܟܲܕ ܡܵܟܲܪ ܠܼܝ ܒܲܪ ܥܲܡܪܲܡ܂ ܘܢܲܚ̈ܬܸܐ ܕܫܽܘܒܚܵܐ ܨܲܒܸܬ ܠܼܝ ܟܲܕ ܡܲܠܸܦ ܠܼܝ ܢܵܡܽܘܣܵܐ܀
47 ܡܵܪܲܢ܃ ܚܠܽܘܠܸܟܝ ܟܲܠܬܵܐ ܒܓܲܘ ܡܲܕܒܪܵܐ ܥܸܓܠܵܐ ܣܲܪܚܸܗ ܐܵܦ ܚܲܒܠܸܗ܂ ܠܬܲܘܪܵܐ ܕܕܲܗܒܵܐ ܟܲܕܽܘ ܣܓܸܕܬܝ ܣܓܽܘܕܝ ܠܲܡܟܼܝܪܸܟܝ ܠܡܘ݁ܢ ܛܵܥܝܲܬܝ܀
48 ܟܢܽܘܫܬܵܐ܃ ܚܠܵܦ ܕܸܒ̈ܚܵܬܵܐ ܕܲܦܬܲܟܪܸ̈ܐ ܩܝܵܡܵܐ ܝܲܗ̄ܒ ܗ̄ܘܵܐ ܠܼܝ ܡܵܪܝܵܐ܂ ܕܸܐܗܘܸܐ ܟܲܠܬܸܗ ܚܲܒܼܝܒܬܵܐ ܕܒܵܬܲܪ ܙܲܒܢܵܐ ܢܼܐܬܸܐ ܠܘܵܬܝ܀
49 ܡܵܪܲܢ܃ ܚܽܘܪܝ ܒܸܗ ܒܙܲܒܢܵܐ ܕܲܟܡܵܐ ܪܓܼܝܓ ܘܝܽܘܡ ܡܸܐܬܼܝܬܵܐ ܕܲܟܡܵܐ ܫܒܼܝܚ܂ ܕܸܐܬܵܐ ܚܲܬܢܵܐ ܐܲܝܟ ܕܲܟܬܼܝܒ ܘܲܪܟܸܒ ܥܼܝܠܵܐ ܐܲܝܟ ܕܲܪܫܼܝܡ܀
50 ܟܢܽܘܫܬܵܐ܃ ܚܲܘܵܢܝ ܫܽܘܒܚܵܟ ܐܵܦ ܙܲܘܚܵܟ ܗܲܘ ܕܥܲܠ ܛܽܘܪܵܐ ܡܽܘܫܸܐ ܚܙܵܝܗܝ܂ ܘܲܡܩܲܒܠܵܢܝ ܠܵܟ ܐܵܦ ܡܲܘܕܝܵܢܝ ܕܼܐܝܬ ܗ̄ܽܘ ܚܲܬܢܵܐ ܕܠܸܗ ܡܲܟܪܽܘܢܝ܀
51 ܡܵܪܲܢ܃ ܚܲܘܼܝܬ ܫܽܘܒܚܝ ܗܲܘ ܕܼܐܝܬ ܗ̄ܘܵܐ ܠܼܝ ܥܲܠ ܪܹܝܫ ܛܽܘܪܵܐ ܩܕܵܡ ܝܲܠܕܲܝ̈ܟܝ܂ ܘܲܐܒܵܐ ܕܩܵܥܸܐ ܣܵܗܸܕ ܥܠܲܝ ܕܲܒܪܸܗ ܐܼܝܬܲܝ ܐܲܝܟ ܕܲܐܘܕܼܝ܀
52 ܐܸܙܕܲܟܝܲܬ ܟܢܽܘܫܲܬ ܦܲܩܪܸ̈ܐ ܡܸܢ ܫܪܵܪܸܗ ܕܒܲܪ ܐܲܠܵܗܵܐ܂ ܘܥܲܠ ܗܵܕܸܐ ܟܼܐܦܸ̈ܐ ܫܸܩܠܲܬ ܕܬܸܪܓܽܘܡ ܠܲܒܪܵܐ ܫܲܪܼܝܪܵܐ܀
53 ܥܲܠ ܗ̄ܘܵܐ ܡܵܪܲܢ ܠܓܲܘ ܗܲܝܟܠܸܗ ܒܩ̈ܵܠܸܐ ܕܫܲܒܪܸ̈ܐ ܕܲܡܝܲܒܒܼܝܢ܂ ܘܥܲܡ̈ܡܸܐ ܕܩܵܥܸܝܢ ܟܽܠ ܬܸܫܒ̈ܚܵܢ ܒܩܵܠ ܐܽܘ̈ܫܲܥܢܸܐ ܘܲܡܒܲܪܟܼܝܢ܀
54 ܚܙܵܐ ܗ̄ܘܵܐ ܡܵܪܲܢ ܗܲܝܟܠܸܗ ܕܫܼܝܛ ܠܒܲܪ̄ܬ ܥܸܒܪ̈ܵܝܸܐ ܓܲܝܵܪܬܵܐ܂ ܘܛܲܪܕܵܗ݀ ܘܲܐܦܩܵܗ݀ ܘܥܹܕܬܵܐ ܡܟܲܪ ܘܗܵܐ ܙܵܡܪܵܐ ܠܸܗ ܒܽܐܘ̈ܫܲܥܢܸܐ܀
55 ܛܵܒܵܐ ܕܸܐܬܵܐ ܡܸܢ ܪܲܘܡܵܐ ܐܲܫܦܲܥ ܪ̈ܲܚܡܲܝܟ ܥܲܠ ܥܹܕܬܵܟ܂ ܘܢܲܛܲܪ ܝܲܠܕܸ̈ܝܗ݀ ܡܸܢ ܒܼܝܫܵܐ ܕܒܲܫܡܵܟ ܚܲܝܵܐ ܐܸܬܦܲܪܩܲܬ܀
56 ܛܪܽܘܕ ܡܸܢܝ ܒܼܝܫܵܐ ܕܡܲܩܪܸܒ ܥܲܡܝ ܡܲܠܟܵܐ ܕܸܐܬܵܐ ܡܸܢ ܪܲܘܡܵܐ܂ ܘܲܒܝܲܕ ܚܲܝܠܵܟ ܐܸܫܬܲܘܙܲܒ ܡܸܢ ܨܸܢ̈ܥܵܬܸܗ ܕܲܢܟܼܝܠܵܐ܀
57 ܝܸܫܽܘܥ ܢܽܘܗܪܵܐ ܕܲܐܢܗܲܪ ܗ̄ܘܵܐ ܒܝܲܕ ܙܲܠܼܝ̈ܩܲܘܗܝ ܠܲܒܪܼܝܬܵܐ܂ ܐܲܢܗܲܪ ܪܸܥܝܵܢܝ ܕܸܐܫܲܒܚܵܟ ܒܲܙܡܼܝܪ̈ܵܬܵܐ ܕܪܽܘܚ ܩܽܘܕܫܵܐ܀