← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

64494: SinnerSatan1

Click on a word for lexical analysis
Click on a red-colored coordinate for comments and/or translations of the line

00 ܣܽܘܓܼܝܬܵܐ ܕܥܲܠ ܚܲܛܵܝܬܵܐ ܘܣܵܛܵܢܵܐ
01 ܫܵܒܸܩ ܚܲܘ̈ܒܸܐ ܠܲܐܪܥܵܐ ܢܚܸܬ ܘܡܸܢ ܒܲܪ̄ܬ ܕܲܘܼܝܕ ܦܲܓܪܵܐ ܠܒܸܫ܂ ܪ̈ܲܚܡܸܐ ܢܲܓܕܽܘܗܝ ܘܚܽܘܒܸܗ ܥܨܵܝܗܝ ܘܸܐܬܵܐ ܠܝܲܠܕܵܐ ܡܵܪܵܐ ܕܟܽܠ܀
02 ܐܵܣܝܵܐ ܕܪ̈ܲܚܡܸܐ ܗܽܘ ܐܸܬܪܟܸܢ ܘܨܹܝܕ ܚܲܛܵܝܸ̈ܐ ܐܽܘܪܚܸܗ ܬܪܲܨ܂ ܘܡܲܟܼܝܟܽܘܬܵܐ ܚܲܘܼܝ ܠܗܘ݁ܢ ܕܢܼܐܬܽܘܢ ܨܸܐܕܲܘܗܝ ܕܠܵܐ ܕܸܚܠܬܵܐ܀
03 ܟܼܐܒܸ̈ܐ ܕܦܲܓܪܵܐ ܒܪ̈ܲܚܡܲܘܗܝ ܥܨܲܒ ܘܡܽܘ̈ܡܸܐ ܕܢܲܦܫܵܐ ܒܩܽܘܕܫܸܗ ܡܪܲܩ܂ ܚܲܝܸ̈ܐ ܘܡܼܝ̈ܬܸܐ ܒܚܽܘܒܸܗ ܣܥܲܪ ܕܒܲܪ ܐܲܠܵܗܵܐ ܗ̄ܘ ܘܡܵܪܵܐ ܕܟܽܠ܀
04 ܦܓܲܥܘ ܒܸܗ ܣܡܲܝ̈ܵܐ ܘܢܽܘܗܪܵܐ ܚܙܲܘ ܡܫܲܪܝܵܐ ܕܲܚܙܵܝܗܝ ܥܲܪܣܸܗ ܛܥܸܢ܂ ܚܓܼܝܪܸ̈ܐ ܫܘܲܪܘ ܗ̄ܘܲܘ ܐܲܝܟ ܐܲܝ̈ܠ‍{‍ܢ‍}‍ܸܐ ܘܥܲܠܘ ܗ̄ܘܲܘ ܥܲܡܸܗ ܠܓܲܘ ܗܲܝܟܠܵܐ܀
05 ܠܙܲܟܲܝ ܨܵܕܸܗ ܡܸܢ ܬܼܐܬܵܐ ܘܠܲܒܢ̈ܲܝ ܙܲܒܕܲܝ ܡܸܢ ܣܦܼܝܢ̄ܬܵܐ܂ ܠܥܸܠ ܡܸܢ ܒܼܐܪܵܐ ܠܫܵܡܪܵܝܬܵܐ ܘܡܸܢ ܒܸܝܬ ܫܸܡܥܽܘܢ ܠܚܲܛܵܝܬܵܐ܀
06 ܫܸܡܥܲܬ ܛܸܒܸܗ ܚܲܛܵܝܬܵܐ ܕܲܒܫܵܪܽܘܬܸܗ ܕܫܸܡܥܽܘܢ ܓܢܵܐ܂ ܘܸܐܡܪܲܬ ܒܠܸܒܵܗ݀ ܕܸܐܢ ܐܵܙܵܠ̄ܢܝ ܗܽܘ ܫܵܒܸܩ ܠܼܝ ܟܽܠ ܚܲܘ̈ܒܲܝ܀
07 ܠܣܵܛܵܢܵܐ ܡܵܪܝ ܐܸܢ ܡܸܬܠܒܸܟ ܘܚܵܙܸܐ ܠܡܲܠܟܵܐ ܠܵܐ ܡܸܬܩܛܸܠ܂ ܘܸܐܢܵܐ ܕܲܚܙܼܝܬ ܦܲܪܨܽܘܦܸܗ ܕܲܡܠܸܟ ܡܲܠܟܸ̈ܐ ܠܵܐ ܡܵܝܬܵܢܝ܀
08 ܚܙܵܐ ܣܵܛܵܢܵܐ ܘܼܝܕܲܥ ܠܵܗ݀ ܕܠܲܬܝܵܒܽܘܬܵܐ ܡܸܬܩܲܪܒܵܐ܂ ܘܲܒܨܸܢ̈ܥܵܬܸܗ ܨܸܐܕܸܝܗ݀ ܩܪܸܒ ܘܫܲܪܼܝ ܕܗܵܟܲܢ ܢܼܐܡܲܪ ܠܵܗ݀܀
09 ܣܵܛܵܢܵܐ܃ ܐ̄ܡܲܪܝ ܠܼܝ ܛܠܼܝܬܵܐ ܠܡܘ݁ܢ ܒܵܟܝܲܬܝ ܕܲܠܡܵܐ ܪܓܼܝܙܼܝܢ ܪ̈ܵܚܡܲܝܟܝ ܥܠܲܝܟܝ܂ ܐܸܢܵܐ ܠܘܵܬܗܘ݁ܢ ܐܵܙܸܠ ܐ̄ܢܵܐ ܡܪܲܥܸܐ ܐ̄ܢܵܐ ܠܗܘ݁ܢ ܠܡܵܢ ܒܵܟܝܲܬܝ܀
10 ܚܲܛܵܝܬܵܐ܃ ܐܸܢܵܐ ܠܝܸܫܽܘܥ ܗ̄ܽܘ ܪܵܚܡܵܢܝ ܕܣܲܓܼܝ ܚܵܕܸܐ ܒܲܕܬܵܝܒܵܢ܂ ܒܵܟ ܕܹܝܢ ܓܥܼܝܪ ܒܵܟ ܘܲܒܪ̈ܵܚܡܲܝܟ ܕܕܲܓܵܠܵܐ ܐܲܢ̄ܬ ܐܲܟܘܵܬܗܘ݁ܢ܀
11 ܣܵܛܵܢܵܐ܃ ܐܸܢܵܐ ܒܚܽܘܒܵܐ ܐܸܡܪܸܬ ܠܸܟܝ ܘܡܲܚܸܒ ܐ̄ܢܵܐ ܠܸܟܝ ܘܲܐܢ̄ܬܝ ܝܵܕܥܲܬܝ܂ ܚܠܵܦ ܛܵܒ̈ܵܬܵܐ ܕܥܸܒܕܸܬ ܠܸܟܝ ܗܵܐ ܡܨܲܥܪܵܐ ܐܲܢ̄ܬܝ ܠܼܝ ܘܲܠܪ̈ܵܚܡܲܝ܀
12 ܚܲܛܵܝܬܵܐ܃ ܐܸܢܵܐ ܒܲܫܪܵܪܵܐ ܟܸܦܪܸܬ ܒܵܟ ܘܡܸܢ ܛܵܒ̈ܵܬܵܟ ܠܵܐ ܒܵܥܝܵܢܝ܂ ܛܽܘܒܲܘܗܝ ܠܲܐܝܢܵܐ ܕܲܣܢܸܐ ܐܲܢ̄ܬ ܠܸܗ ܕܪܵܚܡܵܐ ܗܵܘܸܐ ܕܲܡܪܲܝܡܵܐ܀
13 ܣܵܛܵܢܵܐ܃ ܐܸܢ ܫܵܡܥܲܬܝ ܠܼܝ ܠܵܐ ܐܵܙܲܠ̄ܬܝ ܘܲܠܗܲܘ ܓܲܒܪܵܐ ܠܵܐ ܫܵܚܩܲܬܝ܂ ܕܐ̄ܢܵܫ̈ܵܐ ܚܼܐܪܸ̈ܐ ܥܲܡܸܗ ܓܢܸܝܢ ܘܸܐܢܗܽܘ ܕܚܵܙܸܐ ܠܸܟܝ ܡܸܬܬܦܼܝܪ܀
14 ܚܲܛܵܝܬܵܐ܃ ܐܸܢܵܐ ܠܡܸܠܲܝ̈ܟ ܠܵܐ ܫܵܡܥܵܢܝ ܕܣܲܓܼܝ ܣܵܢܸܝܬ ܠܲܕܬܵܝܒܼܝܢ܂ ܥܕܲܡܵܐ ܠܝܲܘܡܵܢ ܕܼܝܠܵܟ ܗ̄ܘܼܝܬ ܘܝܲܘܡܵܢ ܕܒܲܪ ܡܲܪܝܲܡ ܗܵܘܝܵܢܝ܀
15 ܣܵܛܵܢܵܐ܃ ܒܲܪ ܥܲܙܼܝܙܵܐ ܗ̄ܘ ܘܸܐܢ ܐܵܙܲܠ̄ܬܝ ܠܵܐ ܡܩܲܒܸܠ ܠܸܟܝ ܐܲܝܟ ܕܸܐܡܪܸܬ܂ ܡܲܠܝܲܬܝ ܠܵܗ݀ ܟܼܝܠܬܸܟܝ ܘܲܐܫܦܲܥܬܝ ܡܸܟܼܝܠ ܫܽܘܒܩܵܢܵܐ ܠܲܝܬ ܠܼܟܝ܀
16 ܚܲܛܵܝܬܵܐ܃ ܒܲܪ ܐܲܠܵܗܵܐ ܗ̄ܘ ܘܠܵܐ ܡܸܬܬܦܼܝܪ ܕܣܲܓܼܝ ܚܵܕܸܐ ܒܲܕܬܵܝܒܼܝܢ܂ ܠܲܐܒܽܘܗܝ ܕܵܡܸܐ ܕܪ̈ܲܚܡܸܐ ܡܠܸܐ ܕܣܲܓܼܝ ܚܵܕܸܐ ܒܲܕܬܵܝܒܼܝܢ܀
17 ܣܵܛܵܢܵܐ܃ ܓܽܘܚܟܵܐ ܗܵܘܝܲܬܝ ܒܓܲܘ ܥܵܠܡܵܐ ܕܠܵܐ ܡܩܲܒܸܠ ܠܸܟܝ ܐܲܝܟ ܕܸܐܡܪܸܬ܂ ܕܲܒܣܽܘܥܪ̈ܵܢܲܝܟܝ ܓܵܥܲܪ ܒܸܟܝ ܘܗܵܘܝܲܬܝ ܓܽܘܚܟܵܐ ܡܵܐ ܕܦܵܢܝܲܬ܀
18 ܚܲܛܵܝܬܵܐ܃ ܓܽܘܚܟܵܐ ܐܸܗܘܸܐ ܒܓܲܘ ܥܵܠܡܵܐ ܐܸܢ ܫܵܡܥܵܐ ܐ̄ܢܵܐ ܠܡܘ݁ܢ ܕܵܐܡܪܲܬ܂ ܚܢܵܢܸܗ ܪܲܒ ܗ̄ܽܘ ܡܸܢ ܥܵܠܡܵܐ ܘܣܲܟܠܽܘܬܝ ܙܥܽܘܪܝܵܐ ܗ̄ܝ ܕܢܸܫܒܩܲܢܝ܀
19 ܣܵܛܵܢܵܐ܃ ܕܲܝܵܢܵܐ ܗ̄ܘ ܓܹܝܪ ܘܠܵܐ ܡܸܨܛܠܸܐ ܕܼܝܢܵܐ ܟܼܐܢܵܐ ܓܵܙܲܪ ܥܠܲܝܟܝ܂ ܫܽܘܚܕܵܐ ܕܢܸܣܲܒ ܠܵܐ ܡܸܬܛܦܼܝܣ ܘܸܐܢܗܽܘ ܕܵܐܙܲܠ̄ܬܝ ܡܸܬܚܲܝܒܲܬܝ܀
20 ܚܲܛܵܝܬܵܐ܃ ܕܲܝܵܢܵܐ ܗ̄ܘ ܓܹܝܪ ܘܠܵܐ ܡܸܨܛܠܸܐ ܘܲܠܚܲܛܵܝܸ̈ܐ ܬܲܪܥܸܗ ܦܬܼܝܚ܂ ܘܸܐܢ ܚܵܝܵܐ ܐ̄ܢܵܐ ܘܸܐܢ ܡܵܝܬܵܢܝ ܪܸ̈ܓܠܲܘܗܝ ܝܲܘܡܵܢܵܐ ܡܢܲܫܩܵܢܝ܀
21 ܣܵܛܵܢܵܐ܃ ܗܽܘ ܩܲܕܼܝܫܵܐ ܘܲܐܢ̄ܬ ܛܲܡܐܬܵܐ ܒܪܽܘܚܵܐ ܕܦܽܘܡܸܟܝ ܗܽܘ ܡܦܼܝܣ ܠܸܟܝ܂ ܐܲܢ̄ܬܝ ܒܲܚܛܵܗܸ̈ܐ ܗܵܐ ܡܦܲܠܦܠܲܬܝ ܘܨܹܝܕ ܩܲܕܼܝܫܵܐ ܠܡܘ݁ܢ ܐܵܙܲܠ̄ܬܝ܀
22 ܚܲܛܵܝܬܵܐ܃ ܗܽܘ ܩܲܕܼܝܫܵܐ ܘܲܡܫܲܒܚܵܐ ܘܒܼܝܫܬܵܐ ܥܲܡܸܗ ܠܵܐ ܥܵܡܪܵܐ܂ ܘܲܕܛܲܡܐܵܐ ܐ̄ܢܵܐ ܗܵܐ ܐܵܙܵܠ̄ܢܝ ܨܹܝܕ ܩܲܕܼܝܫܵܐ ܕܲܢܩܲܕܫܲܢܝ܀
23 ܣܵܛܵܢܵܐ܃ ܘܵܝܠܸܟܝ ܛܠܼܝܬܵܐ ܐܸܢ ܐܵܙܲܠ̄ܬܝ ܕܲܕܠܵܐ ܪ̈ܲܚܡܸܐ ܡܸܬܢܲܓܕܲܬܝ܂ ܬܪܸܥܣܲܪ ܬܲܠܡܼܝ̈ܕܸܐ ܐܼܝܬ ܠܸܗ ܘܟܽܠܗܘ݁ܢ ܠܚܼܝܡܼܝܢ ܠܸܟܝ ܢܸܩܛܠܽܘܢ܀
24 ܚܲܛܵܝܬܵܐ܃ ܘܵܝܵܐ ܟܽܠܸܗ ܠܵܟ ܝܼܗܼܝܒ ܕܣܲܓܼܝ ܣܵܢܸܝܬ ܠܲܕܬܵܝܒܼܝܢ܂ ܬܪܸܥܣܲܪ ܬܲܠܡܼܝ̈ܕܸܐ ܐܼܝܬ ܠܸܗ ܘܗܸܢܽܘܢ ܡܦܼܝܣܼܝܢ ܠܪܲܒܗܘ݁ܢ ܥܠܲܝ܀
25 ܣܵܛܵܢܵܐ܃ ܙܵܢܼܝܬܵܐ ܐܲܢ̄ܬܝ ܐܸܢ ܝܵܕܥܲܬܝ ܨܹܝܕ ܗܲܘ ܕܲܟܝܵܐ ܠܡܘ݁ܢ ܐܵܙܲܠ̄ܬܝ܂ ܐܲܪܲܐ ܛܠܼܝܬܵܐ ܗܵܐ ܫܵܢܝܲܬܝ ܘܡܵܢܵܐ ܐܵܡܪܵܐ ܐܲܢ̄ܬܝ ܠܵܐ ܝܵܕܥܲܬܝ܀
26 ܚܲܛܵܝܬܵܐ܃ ܙܵܢܼܝܬܵܐ ܐ̄ܢܵܐ ܘܛܵܒ ܝܵܕܥܵܢܝ ܐܲܝܟ ܗܵܝ ܪܵܚܵܒ ܕܸܐܙܕܲܕܩܲܬ܂ ܘܝܸܫܽܘܥ ܒܲܪ ܢܽܘܢ ܦܲܪܩܵܗ݀ ܠܗܵܝ ܘܡܵܪܲܢ ܝܸܫܽܘܥ ܦܵܪܸܩ ܠܼܝ܀
27 ܣܵܛܵܢܵܐ܃ ܚܵܙܸܐ ܐ̄ܢܵܐ ܠܸܟܝ ܕܲܫܢܲܝܬܝ ܠܸܟܝ ܘܡܵܢܵܐ ܐܵܡܪܲܬܝ ܠܵܐ ܝܵܕܥܲܬܝ܂ ܟܬܵܒܵܐ ܡܸܡܬܽܘܡ ܠܵܐ ܩܪܸܐ ܠܸܟܝ ܘܡܲܡܠܠܵܐ ܕܲܟܬܵܒܸ̈ܐ ܐܵܡܪܲܬܝ܀
28 ܚܲܛܵܝܬܵܐ܃ ܚܵܙܝܵܐ ܐ̄ܢܵܐ ܠܵܟ ܕܒܵܗܬܲܬ ܠܵܟ ܕܲܒܪܵܐ ܚܲܝܵܐ ܗܽܘ ܢܚܲܝܒܵܟ܂ ܥܕܲܡܵܐ ܠܝܲܘܡܵܢ ܕܼܝܠܵܟ ܗ̄ܘܼܝܬ ܟܦܼܝܪ ܒܵܟ ܡܸܟܼܝܠ ܘܲܒܪ̈ܵܚܡܲܝܟ܀
29 ܣܵܛܵܢܵܐ܃ ܛܽܘܒܲܝܟܝ ܛܠܼܝܬܵܐ ܐܸܢ ܦܵܝܫܲܬܝ ܘܨܹܝܕ ܒܲܪ ܡܲܪܝܲܡ ܠܵܐ ܐܵܙܲܠ̄ܬܝ܂ ܕܲܟܒܲܪ ܠܚܼܝܡ ܠܸܟܝ ܘܠܵܐ ܝܵܕܥܲܬܝ ܘܡܸܚܕܵܐ ܕܚܵܙܸܐ ܠܸܟܝ ܡܸܬܬܦܼܝܪ܀
30 ܚܲܛܵܝܬܵܐ܃ ܛܽܘܒܲܝ ܝܲܘܡܵܢ ܐܸܢ ܐܵܙܵܠ̄ܢܝ ܘܨܹܝܕ ܒܲܪ ܡܲܪܝܲܡ ܡܸܬܩܲܪܒܵܢ܂ ܦܲܩܵܚ ܗ̄ܽܘ ܠܼܝ ܕܗܽܘ ܢܸܩܛܠܲܢܝ ܘܲܐܓܗܸܐ ܡܸܢܵܟ ܕܠܵܟ ܣܵܢܝܵܢܝ܀
31 ܣܵܛܵܢܵܐ܃ ܝܲܘܢܵܐ ܦܐܼܝܬܵܐ ܡܵܢܵܐ ܗܘܵܟܝ ܘܡܲܢܽܘ ܫܲܕܠܸܟܝ ܘܲܡܪܲܕܬܝ ܥܠܲܝ܂ ܢܽܘܓܪܵܐ ܐܼܝܬ ܠܸܟܝ ܕܥܵܡܪܲܬ ܥܲܡܝ ܘܲܐܝܟ ܚܵܙܸܐ ܐ̄ܢܵܐ ܕܓܸܦܵܐ ܫܩܲܠܬܝ܀
32 ܚܲܛܵܝܬܵܐ܃ ܝܲܘܢܵܐ ܐܸܢܵܐ ܬܲܡܼܝܡܬܵܐ ܘܡܸܢ ܒܸܝܬ ܛܸܦܪ̈ܲܝܟ ܐܸܬܦܲܠܛܸܬ܂ ܢܸܫܪܵܐ ܡܫܼܝܚܵܐ ܗܽܘ ܐܲܥܕܼܝܢܝ ܘܲܬܚܸܝܬ ܟܸܢ̈ܦܲܘܗܝ ܐܸܣܬܲܬܪܸܬ܀
33 ܣܵܛܵܢܵܐ܃ ܟܪܽܘܡܬܵܢܼܝܬܵܐ ܘܙܲܠܼܝܠܬܵܐ ܘܐ̄ܢܵܫ̈ܵܐ ܦܲܚ̈ܙܸܐ ܠܸܟܝ ܪܵܚܡܼܝܢ܂ ܫܠܲܕܵܐ ܐܼܝܬܲܝܟܝ ܕܡܸܬܛܲܢܦܵܐ ܘܨܹܝܕ ܩܲܕܼܝܫܵܐ ܠܡܘ݁ܢ ܐܵܙܲܠ̄ܬܝ܀
34 ܚܲܛܵܝܬܵܐ܃ ܟܪܽܘܡܬܵܢܼܝܬܵܐ ܘܙܲܠܼܝܠܬܵܐ ܘܐ̄ܢܵܫ̈ܵܐ ܦܲܚ̈ܙܸܐ ܠܼܝ ܪܵܚܡܼܝܢ܂ ܚܲܬܢܵܐ ܡܫܼܝܚܵܐ ܡܲܟܪܲܢܝ ܠܸܗ ܘܥܲܒܕܲܢܝ ܥܲܡܸܗ ܩܲܕܼܝܫܬܵܐ܀
35 ܣܵܛܵܢܵܐ܃ ܠܫܽܘܩܵܐ ܟܽܠܝܽܘܡ ܗܘܲܝܬܝ ܢܵܦܩܵܐ ܘܓܲܒܪܸ̈ܐ ܒܲܩܛܼܝܪܵܐ ܡܫܲܥܒܕܲܬܝ܂ ܪ̈ܵܚܡܸܐ ܐܼܝܬ ܠܸܟܝ ܕܠܵܐ ܡܸܬܡܢܸܝܢ ܘܨܹܝܕ ܒܲܪ ܡܲܪܝܲܡ ܠܵܐ ܬܼܐܙܼܠ̄ܝܢ܀
36 ܚܲܛܵܝܬܵܐ܃ ܠܫܽܘ̈ܩܸܐ ܟܽܠܝܽܘܡ ܗ̄ܘܼܝܬ ܢܵܦܩܵܐ ܘܲܠܝܲܘܡܵܢ ܠܒܸܝܬ ܫܸܡܥܽܘܢ ܐܵܙܵܠ̄ܢܝ܂ ܠܵܟ ܣܵܢܝܵܐ ܐ̄ܢܵܐ ܘܲܠܪ̈ܵܚܡܲܝܟ ܘܲܠܝܸܫܽܘܥ ܒܲܠܚܽܘܕ ܪܵܚܡܵܢܝ܀
37 ܣܵܛܵܢܵܐ܃ ܡܵܪܸܟܝ ܐܸܢܵܐ ܘܠܼܝ ܡܫܲܥܒܕܲܬܝ ܘܡܸܛܽܠ ܡܵܢܵܐ ܥܠܲܝ ܡܵܪܕܲܬܝ܂ ܢܽܘܓܪܵܐ ܐܼܝܬ ܠܸܟܝ ܕܥܲܡܝ ܦܵܠܚܲܬܝ ܘܟܲܕ ܠܵܐ ܣܢܼܝܬܸܟܝ ܣܵܢܝܲܬܝ ܠܼܝ܀
38 ܚܲܛܵܝܬܵܐ܃ ܡܵܪܵܐ ܗܘܲܝܬ ܠܼܝ ܘܡܸܪܕܸܬ ܠܼܝ ܘܵܝ ܠܗܘ݁ܢ ܠܲܐܝܠܸܝܢ ܕܠܵܟ ܦܵܠܚܼܝܢ܂ ܠܒܲܪ ܐܲܠܵܗܵܐ ܡܸܫܬܲܥܒܕܵܢܝ ܘܩܲܠܼܝܠ ܢܼܝܪܸܗ ܠܲܕܬܵܝܒܼܝܢ܀
39 ܣܵܛܵܢܵܐ܃ ܢܵܦܸܩ ܛܸܒܵܐ ܒܓܲܘ ܥܵܠܡܵܐ ܒܵܐܬܵܐ ܕܪܽܘܓܙܵܐ ܕܒܸܟܝ ܗܵܘܝܵܐ܂ ܕܲܐܟܘܵܬܸܟܝ ܬܽܘܒ ܠܵܐ ܡܲܡܪܚܼܝܢ ܛܲܡ̈ܐܸܐ ܕܨܸܐܕܲܘܗܝ ܡܸܬܩܲܪܒܼܝܢ܀
40 ܚܲܛܵܝܬܵܐ܃ ܢܵܦܸܩ ܛܸܒܵܐ ܒܓܲܘ ܥܵܠܡܵܐ ܕܒܲܪ ܐܲܠܵܗܵܐ ܚܲܘ̈ܒܲܝ ܫܵܒܸܩ܂ ܕܲܗܘܲܘ ܩܵܪܒܼܝܢ ܘܠܵܐ ܕܵܚܠܼܝܢ ܚܲܛܵܝܸ̈ܐ ܠܸܗ ܡܵܐ ܕܬܵܝܒܼܝܢ܀
41 ܣܵܛܵܢܵܐ܃ ܣܲܥܪܸܟܝ ܕܟܽܠܝܽܘܡ ܡܨܲܒܬܵܐ ܗ̄ܘܲܝܬܝ ܒܡܸܫܚܵܐ ܛܲܪܩܵܐ ܕܪܼܝܚܸܗ ܦܐܸܐ܂ ܚܵܙܸܐ ܐ̄ܢܵܐ ܠܸܗ ܕܥܲܦܪܵܐ ܡܠܸܐ ܒܲܕܡܽܘܬ ܐ̄ܢܵܫܵܐ ܕܝܲܠܕܸܗ ܩܒܲܪ܀
42 ܚܲܛܵܝܬܵܐ܃ ܣܲܥܪܵܐ ܕܟܽܠܝܽܘܡ ܡܨܲܒܬܵܐ ܗ̄ܘܼܝܬ ܘܐ̄ܢܵܫ̈ܵܐ ܠܓܼܗܲܢܵܐ ܨܵܐܸܕ ܗ̄ܘܵܐ܂ ܥܲܦܪܵܐ ܝܲܘܡܵܢ ܥܠܲܘܗܝ ܒܵܕܪܵܢܝ ܘܸܐܢܵܐ ܠܲܩܢܽܘܡܝ ܨܵܝܕܵܢܝ ܒܸܗ܀
43 ܣܵܛܵܢܵܐ܃ ܥܲܝ̈ܢܲܝܟܝ ܕܟܽܘܚܠܵܐ ܡܲܠ̈ܝܵܢ ܗ̄ܘ̈ܲܝ ܘܐ̄ܢܵܫ̈ܵܐ ܒܫܽܘܦܪܸܟܝ ܡܸܬܕܲܡܪܼܝܢ܂ ܚܵܙܸܐ ܐ̄ܢܵܐ ܠܗܸܝܢ ܟܲܕ ܫܵܚ̈ܠܵܢ ܕܸܡ̈ܥܸܐ ܝܲܘܡܵܢ ܘܠܵܐ ܫܵܠ̈ܝܵܢ܀
44 ܚܲܛܵܝܬܵܐ܃ ܥܲܝ̈ܢܲܝ ܦܲܚܸ̈ܐ ܥܵܒ̈ܕܵܢ ܗ̄ܘ̈ܲܝ ܘܲܠܬܲܡܼܝ̈ܡܸܐ ܨܵܝ̈ܕܵܢ ܗ̄ܘ̈ܲܝ܂ ܫܽܘܚܕܵܐ ܛܥܼܝ̈ܢܵܢ ܕܲܢܩܲܪ̈ܒܵܢ ܠܒܲܪ ܐܲܠܵܗܵܐ ܕܢܸܫܒܽܘܩ ܠܗܸܝܢ܀
45 ܣܵܛܵܢܵܐ܃ ܦܽܘܡܸܟܝ ܕܟܽܠܝܽܘܡ ܙܵܡܲܪ ܗ̄ܘܵܐ ܘܐ̄ܢܵܫ̈ܵܐ ܒܫܽܘ̈ܩܸܐ ܡܲܬܗܲܪ ܗ̄ܘܵܐ܂ ܗܵܐ ܚܵܙܸܐ ܐ̄ܢܵܐ ܕܒܸܟܝܵܐ ܡܠܸܐ ܘܲܨܠܲܘ̈ܵܬܵܐ ܒܸܗ ܥܵܛܪ̈ܵܢ܀
46 ܚܲܛܵܝܬܵܐ܃ ܦܽܘܡܵܐ ܕܟܽܠܝܽܘܡ ܙܵܡܲܪ ܗ̄ܘܵܐ ܒܸܟܝܵܐ ܙܵܕܸܩ ܗ̄ܽܘ ܕܢܸܬܡܠܸܐ܂ ܘܲܚܠܵܦ ܓܽܘܚܟܵܐ ܕܓܵܚܸܟ ܗ̄ܘܵܐ ܢܙܲܡܲܪ ܫܽܘܒܚܵܐ ܠܲܡܪܲܝܡܵܐ܀
47 ܣܵܛܵܢܵܐ܃ ܨܹܝܕ ܒܲܣܵܡܵܐ ܡܘ݁ܢ ܐܵܙܲܠ̄ܬܝ ܘܗܵܕ ܫܵܛܼܝܦܬܵܐ ܡܸܛܽܠ ܡܵܢ܂ ܕܲܠܡܵܐ ܪ̈ܵܚܡܲܝܟܝ ܨܹܝܕܲܝܟܝ ܐܸܬܲܘ ܘܥܲܡܗܘ݁ܢ ܨܵܒܝܲܬܝ ܕܬܸܬܒܲܣܡܼܝܢ܀
48 ܚܲܛܵܝܬܵܐ܃ ܨܹܝܕ ܚܲܢܵܢܵܐ ܗܵܐ ܐܵܙܵܠ̄ܢܝ ܘܗܵܕ ܫܵܛܼܝܦܬܵܐ ܥܠܲܝ ܫܵܩܠܵܢܝ܂ ܠܪܹܝܫܵܐ ܕܚܲܝܸ̈ܐ ܠܸܗ ܡܵܫܚܵܢܝ ܘܫܵܒܸܩ ܚܲܘ̈ܒܲܝ ܘܟܸܢ ܐܵܬܝܵܢܝ܀
49 ܣܵܛܵܢܵܐ܃ ܩܛܼܝܪܸܗ ܕܝܸܫܽܘܥ ܠܵܐ ܕܲܒܪܸܟܝ ܕܗܽܘ ܩܲܕܼܝܫܵܐ ܗ̄ܘ ܒܲܟܝܵܢܸܗ܂ ܘܡܸܕܸܡ ܕܲܛܡܲܐܐ ܪܲܚܼܝܩ ܗ̄ܽܘ ܡܸܢ ܗܲܘ ܟܼܐܢܵܐ ܠܵܐ ܬܸܫܬܲܓܫܼܝܢ܀
50 ܚܲܛܵܝܬܵܐ܃ ܩܛܼܝܪܸܗ ܕܨܸܒܝܵܢܝ ܗܽܘ ܕܲܒܪܲܢܝ ܘܢܸܦܠܸܬ ܒܥܽܘܡܩܵܐ ܕܟܽܠ ܒܼܝ̈ܫܵܢ܂ ܨܹܝܕ ܩܲܕܼܝܫܵܐ ܡܸܬܩܲܪܒܵܢܝ ܕܲܒܝܲܕ ܙܽܘܦܸܗ ܡܕܲܟܸܐ ܠܸܗ܀
51 ܣܵܛܵܢܵܐ܃ ܪܲܒ ܗ̄ܽܘ ܓܽܘܢܚܵܐ ܕܲܗܘܵܐ ܥܠܲܝܟܝ ܐܸܢ ܨܸܒܝܵܢܸܟܝ ܡܸܫܬܠܸܡ܂ ܕܲܐܢ̄ܬܝ ܙܵܢܼܝܬܵܐ ܡܸܬܩܲܕܫܲܬܝ ܘܸܐܢܵܐ ܓܽܘܚܟܵܐ ܒܥܵܠܡܵܐ ܗܘܼܝܬ܀
52 ܚܲܛܵܝܬܵܐ܃ ܪܲܒ ܗ̄ܽܘ ܚܢܵܢܸܗ ܕܲܡܪܲܝܡܵܐ ܘܲܠܚܲܛܵܝܸ̈ܐ ܨܒܵܐ ܕܢܼܐܚܽܘܢ܂ ܘܢܽܘܪܵܐ ܢܛܼܝܪܵܐ ܠܵܟ ܒܼܝܫܵܐ ܘܸܐܢܵܐ ܒܲܥܕܸܢ ܡܸܬܒܲܣܡܵܢܝ܀
53 ܚܲܛܵܝܬܵܐ܃ ܫܡܲܝܵܐ ܘܲܐܪܥܵܐ ܢܸܒܟܽܘܢ ܥܠܲܝ ܐܸܢܗܽܘ ܕܠܲܦܝܵܣܵܟ ܫܵܡܥܵܢܝ܂ ܟܲܕ ܐܼܝܬ ܗ̄ܽܘ ܠܼܝ ܣܲܒܪܵܐ ܥܠܲܘܗܝ ܕܵܐܙܵܠ̄ܢܝ ܨܸܐܕܲܘܗܝ ܐܵܦ ܚܵܕܝܵܢܝ܀
54 ܫܸܩܠܲܬ ܡܸܫܚܵܐ ܒܫܵܛܼܝܦܬܵܐ ܘܲܠܘܵܬ ܡܵܪܵܗ݀ ܒܚܽܘܒܵܐ ܪܕܵܬ܂ ܘܲܠܫܵܛܼܝܦܬܵܐ ܥܠܲܘܗܝ ܢܸܣܟܲܬ ܘܗܸܦܟܲܬ ܬܼܐܬܸܐ ܟܲܕ ܚܵܕܝܵܐ܀
55 ܒܲܪ ܐܲܠܵܗܵܐ ܬܲܪܥܵܐ ܦܬܲܚ ܘܲܠܚܲܛܵܝܬܵܐ ܚܲܘ̈ܒܸܝܗ݀ ܫܒܲܩ܂ ܫܒܽܘܩ ܠܲܢ ܚܲܘ̈ܒܲܝܢ ܐܲܝܟ ܕܲܠܗܵܝ ܕܲܚܛܲܝܢܲܢ ܠܵܟ ܛܵܒ ܡܸܢ ܗܵܝ܀
56 ܘܲܐܝܟ ܕܸܐܬܚܲܣܝܲܬ ܚܲܛܵܝܬܵܐ ܕܪܸ̈ܓܠܲܝܟ ܒܸܝܬ ܫܸܡܥܽܘܢ ܢܸܫܩܲܬ܂ ܚܲܣܵܐ ܠܥܹܕܬܵܟ ܕܗܵܐ ܐܵܟܠܵܐ ܦܲܓܪܵܟ ܘܲܕܡܵܟ ܡܸܢ ܡܲܕܒܚܵܐ܀