← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

64494: TwoThieves

Click on a word for lexical analysis
Click on a red-colored coordinate for comments and/or translations of the line

00 ܣܽܘܓܼܝܬܵܐ ܕܥܲܠ ܬܪܸܝܢ ܓܲܝ̈ܵܣܸܐ
01 ܩܵܠ ܓܲܝ̈ܵܣܸܐ ܒܸܐܕ̈ܢܲܝ ܢܦܲܠ ܥܲܠ ܓܵܓܽܘܠܬܵܐ ܟܲܕ ܕܲܪܫܼܝܢ܂ ܢܸܫܡܲܥ ܐܲܚ̈ܲܝ ܡܘ݁ܢ ܕܵܐܡܪܼܝܢ ܒܕܼܝܢܵܐ ܕܬܸܗܪܵܐ ܕܒܸܗ ܩܵܝܡܼܝܢ܀
02 ܙܩܼܝܦܸܗ ܕܡܵܪܲܢ ܒܲܝܢܵܬܗܘ݁ܢ ܕܲܝܵܢܵܐ ܗ̄ܘܵܐ ܕܠܵܐ ܡܸܨܛܠܸܐ܂ ܐܲܝܟ ܡܲܐܣܬܵܐ ܗ̄ܘܵܐ ܕܩܽܘܫܬܵܐ ܬܩܲܠ ܡܸܠܲܝ̈ܗܘ݁ܢ ܟܲܕ ܕܲܪܫܼܝܢ܀
03 ܥܲܡ ܥܲܘ̈ܵܠܸܐ ܟܬܼܝܒ ܕܸܐܬܡܢܼܝ ܘܒܸܝܬ ܓܲܝ̈ܵܣܸܐ ܙܩܼܝܦܸܗ ܩܒܲܥܘ܂ ܘܲܕܪܲܫܘ ܥܠܲܘܗܝ ܟܲܕ ܩܵܝܡܼܝܢ ܒܲܙܩܼܝ̈ܦܲܝܗܘ݁ܢ ܘܒܸܗ ܚܵܝܪܼܝܢ܀
04 ܒܲܪ ܝܲܡܼܝܢܵܐ ܟܠܼܝܠܵܐ ܓܕܲܠ ܘܲܒܒܵܥܽܘܬܵܐ ܠܡܵܪܸܗ ܝܲܗ̄ܒ܂ ܕܚܲܝܠܸܗ ܟܲܣܝܵܐ ܐܲܕܼܝܩ ܚܙܵܐ ܘܟܲܕ ܡܸܬܟܲܫܲܦ ܪ̈ܲܚܡܸܐ ܫܐܸܠ܀
05 ܒܲܪܝܲܡܼܝܢܵܐ܃ ܐܸܬܕܲܟܪܲܝܢܝ ܡܵܪܝ ܒܝܽܘܡ ܡܸܐܬܝܵܟ ܩܥܵܐ ܓܲܝܵܣܵܐ ܠܡܵܪܵܐ ܕܟܽܠ܂ ܒܗܵܝ ܡܲܠܟܽܘܬܵܐ ܕܠܵܐ ܥܵܒܪܵܐ ܐܸܚܙܸܐ ܚܢܵܢܵܟ ܕܠܵܐ ܡܸܬܬܟܼܝܠ܀
06 ܒܲܪܣܸܡܵܠܵܐ܃ ܐܵܡܲܪ ܚܲܒܪܸܗ ܕܩܵܠܸܗ ܫܡܲܥ ܒܲܪ ܣܸܡܵܠܵܐ ܕܥܲܡܸܗ ܙܩܼܝܦ܂ ܕܸܐܢ ܡܲܠܟܽܘܬܵܐ ܠܗܵܢ ܐܼܝܬ ܠܸܗ ܙܩܼܝܦܵܐ ܕܚܸܣܕܵܐ ܠܡܵܢܵܐ ܪܟܼܝܒ܀
07 ܒܲܪܝܲܡܼܝܢܵܐ܃ ܐܸܠܽܘܠܵܐ ܒܥܵܐ ܠܵܐ ܐܸܙܕܩܸܦ ܡܲܠܟܵܐ ܟܲܣܝܵܐ ܗ̄ܘ ܘܥܲܠ ܗܵܝ ܒܥܼܝܬ܂ ܚܢܵܢܵܐ ܡܸܢܸܗ ܡܵܐ ܕܡܸܬܓܠܸܐ ܒܫܽܘܒܚܵܐ ܪܲܒܵܐ ܢܪܲܚܸܡ ܥܠܲܝ܀
08 ܒܲܪܣܸܡܵܠܵܐ܃ ܒܚܲܫܸ̈ܐ ܕܦܲܓܪܵܐ ܠܵܐ ܚܵܝܪܲܬ ܕܗܵܢ ܐܲܟܘܵܬܲܢ ܒܨܸܨܸ̈ܐ ܩܒܼܝܥ܂ ܐܸܢ ܡܲܠܟܽܘܬܵܐ ܕܢܸܬܸܠ ܡܨܸܐ ܢܸܫܪܸܐ ܢܲܦܫܸܗ ܘܲܢܗܲܝܡܢܼܝܘܗܝ܀
09 ܒܲܪܝܲܡܼܝܢܵܐ܃ ܒܫܸܡܫܵܐ ܕܲܚܫܸܟ ܠܵܐ ܚܵܝܪܲܬ ܕܠܲܝܬܲܘܗܝ ܢܽܘܗܪܸܗ ܠܵܐ ܒܵܚܪܲܬ܂ ܣܡܸܐ ܪܸܥܝܵܢܵܟ ܘܠܵܐ ܡܸܫܟܚܲܬ ܕܬܸܚܙܸܐ ܠܡܲܠܟܵܐ ܗܲܘ ܕܸܐܬܟܪܸܙ܀
10 ܒܲܪܣܸܡܵܠܵܐ܃ ܓܲܒܪܵܐ ܗ̄ܘ ܕܲܐܟܘܵܬܝ ܒܩܲܝܣܵܐ ܙܩܼܝܦ ܘܝܲܬܼܝܪ ܡܸܢܲܢ ܚܲܫܸ̈ܐ ܛܥܼܝܢ܂ ܐܸܠܽܘ ܡܲܠܟܵܐ ܗ̄ܘ ܐܲܝܟ ܕܵܐܡܪܲܬ ܟܢܲܫ ܠܸܓܝܽܘ̈ܢܲܘܗܝ ܕܠܵܐ ܢܸܬܬܫܼܝܛ܀
11 ܒܲܪܝܲܡܼܝܢܵܐ܃ ܓܲܒܪܵܐ ܕܲܩܥܵܐ ܘܢܸܦܠܲܬ ܫܝܽܘܠ ܘܒܲܥܛܵܗ݀ ܠܲܐܪܥܵܐ ܘܗܵܐ ܢܵܝܕܵܐ܂ ܚܠܵܦ ܠܸܓܝܽܘ̈ܢܸܐ ܒܪܼܝܬܵܐ ܩܥܵܬ ܕܡܲܠܟܵܐ ܗ̄ܘ ܪܲܒܵܐ ܕܠܵܐ ܡܸܫܬܪܸܐ܀
12 ܒܲܪܣܸܡܵܠܵܐ܃ ܕܼܝܠܵܟ ܪܲܒܵܐ ܗ̄ܝ ܕܠܵܐ ܚܵܝܪܲܬ ܒܲܦܪܲܓܸܠܵܐ ܕܚܲܨܸܗ ܛܥܼܝܢ܂ ܘܕܼܐܝܬ ܠܸܗ ܫܽܘܒܚܵܐ ܗܵܐ ܡܲܟܪܙܲܬ ܘܡܲܢܽܘ ܡܲܫܲܪ ܡܘ݁ܢ ܕܵܐܡܪܲܬ܀
13 ܒܲܪܝܲܡܼܝܢܵܐ܃ ܕܼܝܠܵܟ ܪܲܒܵܐ ܗ̄ܝ ܕܠܵܐ ܚܵܝܪܲܬ ܒܓܽܘ̈ܕܸܐ ܕܡܼܝ̈ܬܸܐ ܕܟܲܦܵܐ ܢܩܲܫܘ܂ ܘܲܢܦܲܩܘ ܠܽܐܘܪܥܸܗ ܡܸܢ ܐܲܬܪܗܘ݁ܢ ܘܲܩܫܸܐ ܠܸܒܵܟ ܘܠܵܐ ܡܸܬܛܦܼܝܣ܀
14 ܒܲܪܣܸܡܵܠܵܐ܃ ܗܵܢܵܐ ܡܲܠܟܵܐ ܕܗܲܝܡܸܢܬ ܒܸܗ ܐܲܝܢܲܘ ܐܲܬܪܸܗ ܕܡܲܡܠܸܟ ܥܠܲܘܗܝ܂ ܘܲܠܡܘ݁ܢ ܗܵܟܲܢ ܡܨܲܥܲܪ ܫܒܼܝܩ ܐܸܢܗܽܘ ܕܡܲܠܟܵܐ ܗ̄ܘ ܐܲܝܟ ܕܵܐܡܪܲܬ܀
15 ܒܲܪܝܲܡܼܝܢܵܐ܃ ܗܵܢܵܐ ܡܲܠܟܵܐ ܕܟܽܠ ܥܵܠܡܼܝ̈ܢ ܡܬܼܝܚ ܫܽܘܠܛܵܢܸܗ ܘܠܵܐ ܡܸܫܬܪܸܐ܂ ܘܡܸܬܟܲܫܲܦ ܐ̄ܢܵܐ ܢܪܲܚܸܡ ܥܠܲܝ ܒܗܵܝ ܡܲܠܟܽܘܬܵܐ ܕܠܵܐ ܥܵܒܪܵܐ܀
16 ܒܲܪܣܸܡܵܠܵܐ܃ ܘܲܥܕܵܟ ܡܵܕܸܝܢ ܐܲܝܟ ܕܵܐܡܪܲܬ ܗܵܐ ܠܦܲܪܕܲܝܣܵܐ ܗ̄ܘ ܐܲܝܟ ܕܲܐܬܟܠܵܟ܂ ܛܥܼܝܢ ܠܲܙܩܼܝܦܵܐ ܘܲܐܝܟܲܢ ܡܨܸܐ ܕܢܸܥܽܘܠ ܠܲܥܕܸܢ ܕܠܸܗ ܚܵܝܪܲܬ܀
17 ܒܲܪܝܲܡܼܝܢܵܐ܃ ܘܲܥܕܵܐ ܕܼܝܠܵܟ ܐܲܝܟ ܕܵܐܡܪܲܬ ܨܹܝܕ ܙܵܩܽܘܦܵܐ ܗ̄ܘ ܥܲܠ ܕܸܐܬܚܪܸܝܬ܂ ܕܲܚܙܲܘ ܚܲܝ̈ܠܸܐ ܘܠܵܐ ܗܲܝܡܢܽܘܗܝ ܒܢ̈ܲܝ ܣܸܡܵܠܵܐ ܕܲܐܢ̄ܬ ܪܹܝܫܗܘ݁ܢ܀
18 ܒܲܪܣܸܡܵܠܵܐ܃ ܙܪܼܝܒ ܒܽܐܘ̈ܠܨܵܢܸܐ ܘܟܼܐܒܸ̈ܐ ܛܥܼܝܢ ܡܙܼܝܓ ܠܸܗ ܚܲܠܵܐ ܘܓܲܒܸܗ ܕܩܼܝܪ܂ ܡܠܸܐ ܟܽܠ ܚܲܫܼܝ̈ܢ ܘܠܵܐ ܡܸܫܟܚܵܐ ܐܸܩܪܸܝܘܗܝ ܡܲܠܟܵܐ ܐܲܝܟ ܕܵܐܡܪܲܬ܀
19 ܒܲܪܝܲܡܼܝܢܵܐ܃ ܙܵܥ̈ܝ ܒܸܪ̈ܝܵܬܵܐ ܘܠܵܐ ܙܵܝܥܲܬ ܪܥܸܠܘ ܐܸܣܛܽܘ̈ܟܣܸܐ ܘܠܵܐ ܪܵܥܠܲܬ܂ ܨܲܪ̈ܝܵܢ ܟܼܐܦܸ̈ܐ ܘܲܡܕܲܓܠܲܬ ܐܲܘܕܵܐ ܘܲܚܝܼܝ ܠܡܘ݁ܢ ܣܵܪܒܲܬ܀
20 ܒܲܪܣܸܡܵܠܵܐ܃ ܚܲܒܪܸ̈ܐ ܗ̄ܘܲܝܢܲܢ ܐܸܡܲܬܝ ܗܘܲܝܬ ܒܲܪ ܡܲܠܟܽܘܬܵܐ ܐܲܝܟ ܕܵܐܡܪܲܬ܂ ܕܡܵܐ ܕܲܩܛܼܝ̈ܠܸܐ ܓܵܥܸܐ ܥܠܲܝܟ ܘܲܠܡܲܠܟܽܘܬܵܐ ܠܵܐ ܡܸܫܬܘܸܝܬ܀
21 ܒܲܪܝܲܡܼܝܢܵܐ܃ ܚܲܒܪܵܟ ܐܸܢܵܐ ܘܲܕܗܲܝܡܢܸܬ ܙܩܼܝܦܵܐ ܦܵܪܸܫ ܒܸܝܬ ܠܼܝ ܘܠܵܟ܂ ܘܲܕܡܸܗ ܙܠܲܚ ܒܼܝ ܘܸܐܬܚܲܠܠܸܬ ܘܚܲܝܸ̈ܐ ܡܠܲܟ ܠܼܝ ܘܛܵܒ ܐܲܫܪܸܬ܀
22 ܒܲܪܣܸܡܵܠܵܐ܃ ܛܥܲܝܬ ܐܵܘ ܓܲܒܪܵܐ ܠܵܐ ܬܸܬܟܸܠ ܕܓܲܒܪܵܐ ܙܩܼܝܦܵܐ ܡܨܸܐ ܕܢܲܥܠܵܟ܂ ܠܗܵܝ ܡܲܠܟܽܘܬܵܐ ܕܠܵܐ ܥܵܒܪܵܐ ܕܸܐܠܽܘ ܡܨܸܐ ܗ̄ܘܵܐ ܠܵܐ ܐܸܙܕܩܸܦ܀
23 ܒܲܪܝܲܡܼܝܢܵܐ܃ ܛܥܲܝܬ ܠܵܐ ܬܲܛܥܸܝܢܝ ܕܠܵܐ ܐܼܝܬ ܠܸܗ ܦܽܘܪܣܵܐ ܐܸܛܥܸܐ ܠܡܘ݁ܢ ܫܵܚܩܲܬ܂ ܩܠܼܝܕܵܐ ܗܘܵܐ ܠܼܝ ܡܸܠܬܸܗ ܕܡܵܪܝ ܕܸܐܦܬܲܚ ܐܸܥܽܘܠ ܠܓܲܢܲܬ ܥܕܸܢ܀
24 ܒܲܪܣܸܡܵܠܵܐ܃ ܝܸܫܽܘܥ ܐ̄ܢܵܫܵܐ ܗ̄ܘ ܕܥܲܡܲܢ ܙܩܼܝܦ ܘܸܐܠܽܘ ܐܸܫܟܲܚ ܢܲܦܫܸܗ ܦܪܲܩ܂ ܘܗܵܢܵܐ ܕܲܦܟܼܝܪ ܐܲܝܟܲܢ ܡܨܸܐ ܢܸܩܪܸܝܟ ܠܲܥܕܸܢ ܐܲܝܟ ܕܵܐܡܪܲܬ܀
25 ܒܲܪܝܲܡܼܝܢܵܐ܃ ܝܸܫܽܘܥ ܕܲܪܟܼܝܒ ܩܲܝܣܵܐ ܠܬܲܚܬ ܗܵܐ ܡܲܪܟܲܒܬܸܗ ܟܕܼܝܢܵܐ ܠܥܸܠ܂ ܡܵܪܸܐ ܟܝܵܢܸ̈ܐ ܗ̄ܘ ܕܸܐܫܬܲܘܕܥܽܘܗܝ ܗܵܐ ܡܸܬܒܲܠܗܼܝܢ ܥܲܠ ܕܸܐܙܕܩܸܦ܀
26 ܒܲܪܣܸܡܵܠܵܐ܃ ܟܠܼܝܠܵܐ ܕܟܽܘ̈ܒܸܐ ܗܵܐ ܣܼܝܡ ܠܸܗ ܕܲܦܢܸܗ ܬܪܼܝܥܵܐ ܘܚܲܫܸ̈ܐ ܡܠܸܐ܂ ܘܲܐܝܢܲܘ ܡܲܠܟܵܐ ܕܗܵܟܲܢ ܫܚܼܝܡ ܡܲܨܥܲܪ ܘܲܫܒܼܝܩ ܡܸܢ ܦܵܠܚܲܘ̈ܗܝ܀
27 ܒܲܪܝܲܡܼܝܢܵܐ܃ ܟܠܼܝܠܸܗ ܕܗܵܢܵܐ ܠܵܐ ܡܸܬܚܙܸܐ ܐܸܠܵܐ ܠܢܲܦܫܵܐ ܦܵܪܽܘܫܬܵܐ܂ ܡܲܢ ܕܹܝܢ ܝܲܗ̄ܒܠܵܟ ܕܲܬܚܽܘܪ ܠܥܸܠ ܘܬܸܚܙܸܐ ܬܵܐܓܸܗ ܕܠܵܐ ܡܸܫܬܪܸܐ܀
28 ܒܲܪܣܸܡܵܠܵܐ܃ ܠܡܲܢ ܡܸܢ ܡܲܠܟܸ̈ܐ ܗܵܕܸܐ ܗܘܵܬ ܕܲܟܠܼܝܠ ܟܽܘ̈ܒܸܐ ܠܸܗ ܢܸܬܬܣܼܝܡ܂ ܘܸܐܡܲܬܝ ܘܲܐܝܟܵܐ ܫܡܼܝܥ ܠܵܟ ܡܬܽܘܡ ܕܗܵܢܵܐ ܬܵܐܓܵܐ ܠܡܲܠܟܵܐ ܢܗܸܐ܀
29 ܒܲܪܝܲܡܼܝܢܵܐ܃ ܠܵܐ ܡܸܫܟܲܚ ܗ̄ܘܵܐ ܐ̄ܢܵܫ ܢܸܥܒܕܼܝܗ݀ ܐܸܠܵܐ ܝܸܫܽܘܥ ܕܡܲܠܟܵܐ ܗ̄ܘ ܕܟܽܠ܂ ܕܟܽܘ̈ܒܸܝܗ݀ ܕܲܐܪܥܵܐ ܒܟܽܘ̈ܒܲܘܗܝ ܥܩܲܪ ܕܢܲܓܗܸܐ ܐܵܕܵܡ ܡܸܢ ܠܲܘܛܬܵܐ܀
30 ܒܲܪܣܸܡܵܠܵܐ܃ ܡܼܝܬܵܐ ܗ̄ܘ ܡܸܟܼܝܠ ܘܗܵܐ ܐܲܫܬܝܸܗ ܠܟܵܣܸܗ ܕܡܲܘܬܵܐ ܐܸܢ ܚܵܝܪܲܬ܂ ܒܲܫܝܽܘܠ ܒܵܐܸܬ ܠܡܘ݁ܢ ܣܵܪܒܲܬ ܕܬܸܗܘܸܐ ܥܲܡܸܗ ܒܓܲܢܲܬ ܥܕܸܢ܀
31 ܒܲܪܝܲܡܼܝܢܵܐ܃ ܡܲܘܬܵܐ ܕܗܵܢܵܐ ܥܩܲܪ ܠܲܫܝܽܘܠ ܘܲܡܣܲܦܸܩ ܠܵܗ݀ ܠܟܲܗܼܝܢܬܵܐ܂ ܣܲܚܦܵܗ݀ ܩܵܠܸܗ ܘܠܵܐ ܩܵܝܡܵܐ ܘܥܲܠ ܗܵܝ ܥܵܐܸܠ ܕܲܢܣܲܪܩܼܝܗ݀܀
32 ܒܲܪܣܸܡܵܠܵܐ܃ ܢܸܫܡܲܥ ܗܵܫܵܐ ܡܘ݁ܢ ܐܵܡܪܼܝܢ ܣܵܦܪ̈ܲܝ ܥܲܡܵܐ ܕܗܵܐ ܡܲܗܠܼܝܢ܂ ܟܽܠ ܐ̄ܢܵܫ ܕܲܡܢܼܝܕ ܪܹܝܫܸܗ ܥܠܲܘܗܝ ܘܲܐܢ̄ܬ ܒܲܠܚܽܘܕܲܝܟ ܐܲܘܕܼܝܬ ܒܸܗ܀
33 ܒܲܪܝܲܡܼܝܢܵܐ܃ ܢܸܫܡܲܥ ܡܵܕܸܝܢ ܐܸܢ ܨܵܝܬܲܬ ܩܵܠܵܐ ܕܫܽܘ̈ܥܸܐ ܕܡܸܬܦܲܩܥܼܝܢ܂ ܘܓܲܪ̈ܡܸܐ ܕܡܼܝ̈ܬܸܐ ܕܡܸܬܟܲܢܫܼܝܢ ܘܥܲܠ ܡܘ݁ܢ ܚܲܒܪܲܢ ܠܵܐ ܡܗܲܝܡܢܲܬ܀
34 ܒܲܪܣܸܡܵܠܵܐ܃ ܣܲܓܼܝ ܚܵܪܸܬ ܘܠܵܐ ܚܙܼܝܬ ܒܸܗ ܐܵܬܵܐ ܕܫܽܘܒܚܵܐ ܐܲܝܟ ܕܵܐܡܪܲܬ܂ ܟܽܠܗܘ݁ܢ ܨܲܥܪܸ̈ܐ ܒܸܗ ܡܸܬܚܙܼܝܢ ܘܲܐܝܟܲܘ ܫܽܘܒܚܵܐ ܕܠܸܗ ܡܲܟܪܙܲܬ܀
35 ܒܲܪܝܲܡܼܝܢܵܐ܃ ܣܲܓܼܝ̈ܵܐܬܵܐ ܐܸܠܽܘ ܒܥܲܝܬ ܡܦܼܝ̈ܣܵܢ ܗ̄ܘ̈ܲܝ ܠܸܗ ܕܲܟܡܵܐ ܫܒܼܝܚ܂ ܕܗܵܐ ܒܸܪ̈ܝܵܬܸܗ ܣܵܗ̈ܕܵܢ ܥܠܲܘܗܝ ܕܡܸܛܽܠ ܚܲܫܸܗ ܢܵܕ̈ܝ ܟܽܠܗܸܝܢ܀
36 ܒܲܪܣܸܡܵܠܵܐ܃ ܥܲܠ ܠܒܸܝܬ ܕܼܝܢܵܐ ܘܥܲܡܲܢ ܒܠܲܥ ܘܒܲܓܙܵܪ ܕܼܝܢܵܐ ܥܲܡܲܢ ܙܩܼܝܦ܂ ܗܵܐ ܦܼܝܠܲܛܽܘܣ ܕܵܢ ܚܲܝܒܸܗ ܘܸܐܠܽܘ ܡܲܠܟܵܐ ܗ̄ܘ ܠܵܐ ܐܲܫܠܡܸܗ܀
37 ܒܲܪܝܲܡܼܝܢܵܐ܃ ܥܸܠܬܵܐ ܕܹܝܢ ܕܲܟܬܼܝܒ ܗ̄ܘܵܐ ܥܠܲܘܗܝ ܗܽܘ ܦܼܝܠܲܛܽܘܣ ܡܲܠܟܵܐ ܩܪܵܝܗܝ܂ ܒܣܵܦܪܸ̈ܐ ܕܲܩܥܲܘ ܐܲܝܟ ܣܵܗ̈ܕܸܐ ܕܟܲܬܒܸܗ ܡܲܠܟܵܐ ܘܲܐܢ̄ܬ ܡܸܬܚܪܸܝܬ܀
38 ܒܲܪܣܸܡܵܠܵܐ܃ ܦܲܓܪܸܗ ܡܦܲܪܣܲܝ ܘܓܽܘܫܡܸܗ ܫܠܼܝܚ ܪܸ̈ܓܠܲܘܗܝ ܘܼܐܝ̈ܕܲܘܗܝ ܗܵܐ ܡܒܲܙ̈ܥܵܢ܂ ܣܵܒܸܠ ܙܲܘ̈ܥܸܐ ܘܲܐܢ̄ܬ ܡܸܬܚܪܸܝܬ ܥܲܠ ܡܲܠܟܽܘܬܵܐ ܟܲܕ ܠܲܝܬ ܠܸܗ܀
39 ܒܲܪܝܲܡܼܝܢܵܐ܃ ܦܸܚܬܵܐ ܗ̄ܘ ܡܸܟܼܝܠ ܒܸܝܬ ܠܼܝ ܘܠܵܟ ܙܩܼܝܦܵܐ ܬܚܽܘܡܵܐ ܗ̄ܘ ܠܵܐ ܬܸܥܒܪܼܝܘܗܝ܂ ܒܲܪ ܣܸܡܵܠܵܐ ܐܲܬܪܵܟ ܩܢܼܝ ܕܕܼܝܠܝ ܝܲܡܼܝܢܵܐ ܐܲܝܟ ܕܲܐܫܪܸܬ܀
40 ܒܲܪܣܸܡܵܠܵܐ܃ ܨܲܠܒܸܗ ܥܲܡܵܐ ܕܕܵܢ ܚܲܝܒܸܗ ܨܠܼܝܒܸܗ ܣܵܗܸܕ ܕܥܲܡܲܢ ܡܬܼܝܚ܂ ܢܸܦܪܽܘܩ ܢܲܦܫܸܗ ܐܵܦ ܠܼܝ ܘܠܵܟ ܘܲܡܗܲܝܡܸܢ ܐ̄ܢܵܐ ܐܲܝܟ ܡܸܠܬܵܟ܀
41 ܒܲܪܝܲܡܼܝܢܵܐ܃ ܨܠܼܝܒܸܗ ܬܵܒܲܪ ܬܲܪ̈ܥܲܝ ܫܝܽܘܠ ܘܲܚܫܸܟ ܫܸܡܫܵܐ ܘܢܵܕܘ ܥܵܠܡܸ̈ܐ܂ ܐܲܦ̈ܲܝ ܬܲܪܥܵܐ ܠܲܬܪܸܝܢ ܣܕܸܩ ܘܣܵܗ̈ܕܵܢ ܗܵܠܸܝܢ ܕܡܵܪܵܐ ܕܟܽܠ܀
42 ܒܲܪܣܸܡܵܠܵܐ܃ ܩܵܠܸܗ ܫܸܡܥܸܬ ܕܒܲܓܸܢ ܩܥܵܐ ܡܸܢ ܒܸܝܬ ܚܲܫܸ̈ܐ ܘܪܽܘܚܸܗ ܫܒܲܩ܂ ܠܵܐ ܡܲܫܲܪ ܐ̄ܢܵܐ ܕܸܐܠܽܘ ܡܨܸܐ ܦܵܫ ܒܲܙܩܼܝܦܵܐ ܐܲܝܟ ܕܵܐܡܪܲܬ܀
43 ܒܲܪܝܲܡܼܝܢܵܐ܃ ܩܵܠܵܐ ܕܙܲܘܥܵܐ ܠܡܘ݁ܢ ܠܵܐ ܫܡܲܥܬ ܘܩܵܠ ܒܸܪ̈ܝܵܬܵܐ ܕܲܡܒܲܓ̈ܢܵܢ܂ ܘܸܐܣ̈ܲܝ ܬܼܐܒܸܝܠ ܗܵܐ ܪ̈ܵܥܠܵܢ ܕܫܸܡܥܲܬ ܩܵܠܸܗ ܘܸܐܬܒܲܠܗܝܲܬ܀
44 ܒܲܪܣܸܡܵܠܵܐ܃ ܪܲܘܒܸܗ ܕܥܲܡܵܐ ܠܵܐ ܫܵܡܥܲܬ ܕܲܐܝܟ ܕܵܐܡܲܪ ܐ̄ܢܵܐ ܗܵܐ ܐܵܡܪܼܝܢ܂ ܕܸܐܢ ܫܲܪܼܝܪ ܗ̄ܽܘ ܘܒܲܪ ܡܵܪܝܵܐ ܢܲܚܸܐ ܢܲܦܫܸܗ ܘܲܢܗܲܝܡܢܼܝܘܗܝ܀
45 ܒܲܪܝܲܡܼܝܢܵܐ܃ ܪܲܘܒܵܐ ܕܡܼܝ̈ܬܸܐ ܚܲܒܪܲܢ ܫܡܲܥ ܕܲܢܦܲܩܘ ܢܼܐܬܽܘܢ ܡܸܢ ܐܲܬܪܗܘ݁ܢ܂ ܘܲܚܙܼܝ ܠܝܸܫܽܘܥ ܕܒܸܗ ܗܲܝܡܢܸܬ ܕܡܲܚܸܐ ܗ̄ܘ ܡܼܝ̈ܬܸܐ ܐܲܝܟ ܕܲܐܟܪܙܸܬ܀
46 ܒܲܪܣܸܡܵܠܵܐ܃ ܫܟܸܒ ܠܸܗ ܡܲܠܟܵܐ ܕܗܲܝܡܸܢܬ ܒܸܗ ܡܲܢ ܡܲܥܸܠ ܠܵܟ ܠܓܲܘ ܓܲܢܬܵܐ܂ ܠܡܘ݁ܢ ܠܵܐ ܕܲܒܪܵܟ ܘܲܦܪܲܚ ܠܥܸܠ ܐܸܠܽܘ ܡܨܸܐ ܗ̄ܘܵܐ ܐܲܝܟ ܕܵܐܡܪܲܬ܀
47 ܒܲܪܝܲܡܼܝܢܵܐ܃ ܫܟܸܒ ܕܲܢܥܼܝܪܼܝܘܗܝ ܠܵܐܕܵܡ ܕܡܼܝܬ ܫܟܼܝ̈ܒܸܐ ܕܲܫܝܽܘܠ ܠܸܗ ܚܵܝܪܼܝܢ܂ ܠܵܐܕܵܡ ܫܵܪܸܐ ܕܲܐܣܼܝܪ ܗ̄ܘܵܐ ܘܠܼܝ ܡܲܥܸܠ ܠܼܝ ܠܓܲܢܲܬ ܥܕܸܢ܀
48 ܒܲܪܣܸܡܵܠܵܐ܃ ܬܸܡܗܸܬ ܠܼܝ ܒܵܟ ܕܲܡܗܲܝܡܢܲܬ ܒܓܲܒܪܵܐ ܩܛܼܝܠܵܐ ܕܡܼܝܬ ܘܸܐܫܬܪܼܝ܂ ܠܡܲܢܽܘ ܫܲܦܼܝܪ ܡܘ݁ܢ ܕܵܐܡܪܲܬ ܐܸܠܵܐ ܐܸܢ ܠܵܟ ܕܲܪܚܸܡܬܵܝܗܝ܀
49 ܒܲܪܝܲܡܼܝܢܵܐ܃ ܬܸܡܗܸܬ ܠܼܝ ܒܵܟ ܕܲܡܓܲܕܦܲܬ ܒܒܲܪ ܐܲܠܵܗܵܐ ܕܲܨܒܵܐ ܘܡܼܝܬ܂ ܢܸܫܠܸܐ ܦܽܘܡܵܟ ܕܟܸܫܠܵܐ ܡܠܸܐ ܒܪܼܝܟ ܗ̄ܽܘ ܙܩܼܝܦܵܐ ܕܲܐܘܕܼܝܬ ܒܸܗ܀
50 ܒܪܼܝܟ ܗ̄ܽܘ ܙܩܼܝܦܵܐ ܕܕܵܢ ܚܲܝܒܸܗ ܠܒܲܪ ܣܸܡܵܠܵܐ ܕܓܲܕܸܦ ܥܠܲܘܗܝ܂ ܘܲܡܠܲܟ ܐܲܬܪܵܐ ܕܚܲܝܸ̈ܐ ܡܠܸܐ ܠܒܲܪ ܝܲܡܼܝܢܵܐ ܕܪ̈ܲܚܡܸܐ ܫܐܸܠ܀
51 ܛܵܒ ܐܸܫܬܲܘܕܼܝ ܠܗܲܘ ܕܲܐܫܪܸܗ ܕܢܸܗܘܸܐ ܥܲܡܸܗ ܒܓܲܢܲܬ ܥܕܸܢ܂ ܒܡܲܠܟܽܘܬܵܟ ܡܵܪܝ ܪܲܚܸܡܥܠܲܝ ܘܸܐܚܙܸܐ ܚܢܵܢܵܟ ܕܲܐܘܕܼܝܬ ܒܵܟ܀