← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

64494: CherubThief

Click on a word for lexical analysis
Click on a red-colored coordinate for comments and/or translations of the line

00 ܣܽܘܓܼܝܬܵܐ ܕܥܲܠ ܟܪܽܘܒܵܐ ܘܓܲܝܵܣܵܐ
01 ܒܲܙܩܼܝܦܽܘܬܵܐ ܬܸܗܪܵܐ ܚܙܼܝܬ ܟܲܕ ܓܲܝܵܣܵܐ ܠܡܵܪܲܢ ܩܪܵܐ܂ ܕܸܐܬܕܲܟܪܲܝܢܝ ܡܵܪܝ ܒܝܽܘܡ ܡܸܐܬܝܵܟ ܒܗܵܝ ܡܲܠܟܽܘܬܵܐ ܕܠܵܐ ܥܵܒܪܵܐ܀
02 ܥܒܲܕ ܒܵܥܽܘܬܵܐ ܘܲܐܘܫܸܛ ܝܲܗ̄ܒ ܠܡܲܠܟܵܐ ܙܩܼܝܦܵܐ ܘܪ̈ܲܚܡܸܐ ܫܐܸܠ܂ ܘܲܡܠܸܐ ܪ̈ܚܡܸܐ ܒܩܵܠܸܗ ܫܡܲܥ ܘܲܠܒܵܥܽܘܬܸܗ ܬܲܪܥܵܐ ܦܬܲܚ܀
03 ܐܸܬܕܲܟܪܲܝܢܝ ܡܵܪܝ ܩܥܵܐ ܟܲܕ ܙܩܼܝܦ ܒܗܵܝ ܡܲܠܟܽܘܬܵܐ ܕܠܵܐ ܥܵܒܪܵܐ܂ ܘܲܒܗܲܘ ܫܽܘܒܚܵܐ ܕܒܸܗ ܡܸܬܓܠܸܝܬ ܐܸܚܙܸܐ ܢܝܵܚܵܟ ܕܲܐܘܕܼܝܬ ܒܵܟ܀
04 ܐܵܡܲܪ ܡܵܪܲܢ ܕܲܐܘܕܼܝܬ݁ ܒܼܝ ܝܲܘܡܵܢ ܬܸܗܘܸܐ ܒܓܲܢܲܬ ܥܕܸܢ܂ ܐܲܡܼܝܢ ܓܲܒܪܵܐ ܕܠܵܐ ܡܸܬܟܠܸܝܬ ܡܸܢ ܡܲܠܟܽܘܬܵܐ ܕܠܵܗ݀ ܚܵܝܪܲܬ܀
05 ܐܵܬܵܐ ܙܩܼܝܦܵܐ ܣܲܒ ܠܵܟ ܘܙܸܠ ܩܠܼܝܕܵܐ ܪܲܒܵܐ ܕܒܸܗ ܡܸܬܦܬܲܚ܂ ܬܲܪܥܵܐ ܪܲܒܵܐ ܕܗܵܝ ܓܲܢܬܵܐ ܘܥܵܐܸܠ ܐܵܕܵܡ ܕܲܛܪܼܝܕ ܗ̄ܘܵܐ܀
06 ܡܸܠܬܸܗ ܕܡܵܪܲܢ ܐܲܝܟ ܣܲܩܪܵܐ ܡܸܢ ܒܸܝܬ ܡܲܠܟܵܐ ܐܸܬܚܲܬܡܲܬ܂ ܘܲܠܓܲܝܵܣܵܐ ܐܸܫܬܲܘܫܛܲܬ ܘܫܲܩܠܵܗ݀ ܘܲܪܕܵܐ ܠܓܲܢܲܬ ܥܕܸܢ܀
07 ܫܡܲܥ ܗ̄ܘܵܐ ܟܪܽܘܒܵܐ ܘܲܪܗܸܛ ܡܛܵܐ ܘܲܠܓܲܝܵܣܵܐ ܒܬܲܪܥܵܐ ܠܒܸܟ܂ ܟܠܵܝܗܝ ܒܲܫܢܵܢܵܐ ܕܲܐܚܼܝܕ ܗ̄ܘܵܐ ܘܟܲܕ ܡܸܬܒܲܠܗܸܐ ܗܵܟܲܢ ܐܸܡܲܪ܀
08 ܟܪܽܘܒܵܐ܃ ܐ̄ܡܲܪ ܠܼܝ ܓܲܒܪܵܐ ܡܲܢ ܫܲܕܪܵܟ ܘܡܵܢܵܐ ܒܵܥܸܝܬ ܘܲܐܝܟܲܢ ܐܸܬܲܝܬ܂ ܘܲܐܝܕܵܐ ܥܸܠܬܵܐ ܩܪܵܬܵܟ ܠܟܵܐ ܓܠܼܝ ܘܦܲܫܸܩ ܠܼܝ ܡܲܢ ܫܲܕܪܵܟ܀
09 ܓܲܝܵܣܵܐ܃ ܐܵܡܲܪ ܐ̄ܢܵܐ ܠܵܟ ܡܲܢ ܫܲܕܪܲܢܝ ܟܠܼܝ ܠܲܫܢܵܢܵܟ ܘܡܸ̈ܠܲܝ ܫܡܲܥ܂ ܓܲܝܵܣܵܐ ܐ̄ܢܵܐ ܘܪ̈ܲܚܡܸܐ ܒܥܼܝܬ ܘܡܵܪܵܟ ܫܲܠܚܲܢܝ ܕܼܐܬܸܐ ܠܟܵܐ܀
10 ܟܪܽܘܒܵܐ܃ ܒܲܐܝܢܵܐ ܚܲܝܠܵܐ ܗܘܵܐ ܡܸܐܬܝܵܟ ܒܲܐܬܪܵܐ ܕܚܼܝܠܵܐ ܡܲܢ ܐܲܪܕܝܵܟ܂ ܝܲܡܵܐ ܕܢܽܘܪܵܐ ܡܲܢ ܐܲܥܒܪܵܟ ܕܬܸܥܽܘܠ ܠܲܥܕܸܢ ܡܲܢ ܫܲܕܪܵܟ܀
11 ܓܲܝܵܣܵܐ܃ ܒܚܲܝܠܸܗ ܕܲܒܪܵܐ ܕܗܽܘ ܫܲܕܪܲܢܝ ܥܸܒܪܸܬ ܘܸܐܬܼܝܬ ܘܠܵܐ ܐܸܬܟܠܼܝܬ܂ ܘܟܽܠ ܚܲܝ̈ܠܲܘܵܢ ܒܸܗ ܫܲܥܒܕܸܬ ܘܸܐܬܼܝܬ ܐܸܥܽܘܠ ܐܲܝܟ ܕܲܐܬܟܠܵܢܝ܀
12 ܟܪܽܘܒܵܐ܃ ܓܲܝܵܣܵܐ ܐܲܢ̄ܬ ܐܲܝܟ ܕܵܐܡܪܲܬ ܘܲܐܬܪܲܢ ܕܼܝܠܲܢ ܠܵܐ ܡܸܬܓܢܸܒ܂ ܣܼܝܓ ܗ̄ܽܘ ܒܪܽܘܡܚܵܐ ܕܠܸܗ ܢܵܛܪܵܐ ܗܦܽܘܟ ܠܵܟ ܓܲܒܪܵܐ ܐܽܘܪܚܵܐ ܛܥܲܝܬ܀
13 ܓܲܝܵܣܵܐ܃ ܓܲܝܵܣܵܐ ܗ̄ܘܼܝܬ ܘܸܐܬܚܲܠܦܸܬ ܠܵܐ ܗ̄ܘܵܐ ܕܸܐܓܢܽܘܒ ܐܸܬܼܝܬ ܠܟܵܐ܂ ܩܠܼܝܕܵܐ ܕܲܥܕܸܢ ܗܵܐ ܐܼܝܬ ܥܠܲܝ ܕܸܐܦܬܲܚ ܐܸܥܽܘܠ ܘܠܵܐ ܐܸܬܟܠܸܐ܀
14 ܟܪܽܘܒܵܐ܃ ܕܚܼܝܠ ܗ̄ܽܘ ܐܲܬܪܲܢ ܘܠܵܐ ܡܸܬܕܪܸܫ ܕܢܽܘܪܵܐ ܗ̄ܘ ܫܽܘܪܸܗ ܘܠܵܐ ܡܸܬܟܒܸܫ܂ ܫܢܵܢܵܐ ܚܕܵܪ̈ܲܘܗܝ ܡܸܫܬܲܠܗܒܵܐ ܘܲܐܝܟܲܢ ܐܲܡܪܲܚܬ ܕܬܼܐܬܸܐ ܠܟܵܐ܀
15 ܓܲܝܵܣܵܐ܃ ܕܚܼܝܠ ܗ̄ܽܘ ܐܲܬܪܵܟ ܕܸܐܡܲܪܬ ܠܼܝ ܥܕܲܡܵܐ ܕܡܵܪܲܢ ܙܩܼܝܦܵܐ ܪܟܸܒ܂ ܘܪܽܘܡܚܵܐ ܕܚܲܫܸ̈ܐ ܗܽܘ ܩܲܒܥܵܗ݀ ܘܲܫܢܵܢܵܟ ܬܽܘܒ ܠܵܐ ܩܵܛܠܵܐ܀
16 ܟܪܽܘܒܵܐ܃ ܗܵܐ ܡܸܢ ܙܲܒܢܵܐ ܕܵܐܕܵܡ ܢܦܲܩ ܠܵܐ ܚܙܸܐ ܠܼܝ ܐ̄ܢܵܫ ܕܸܐܬܵܐ ܠܟܵܐ܂ ܛܪܼܝܕ ܗ̄ܽܘ ܓܸܢܣܵܟ ܡܸܢ ܓܲܢܬܵܐ ܠܵܐ ܥܵܐܸܠ ܐܲܢ̄ܬ ܠܵܐ ܬܸܬܚܪܸܐ܀
17 ܓܲܝܵܣܵܐ܃ ܗܵܐ ܡܸܢ ܙܲܒܢܵܐ ܕܵܐܕܵܡ ܢܦܲܩ ܪܓܼܝܙ ܗ̄ܽܘ ܡܵܪܵܟ ܥܲܠ ܫܲܪܒܬܲܢ܂ ܐܸܬܪܲܥܼܝ ܠܸܗ ܘܬܲܪܥܵܐ ܦܬܲܚ ܘܡܸܢ ܝܲܬܼܝܪܽܘ ܬܢܵܢ ܩܵܝܡܲܬ܀
18 ܟܪܽܘܒܵܐ܃ ܘܵܠܸܐ ܕܬܸܕܲܥ ܕܠܵܐ ܡܸܫܟܚܵܐ ܕܓܲܒܪܵܐ ܛܲܡܐܵܐ ܢܸܥܽܘܠ ܠܟܵܐ܂ ܘܲܐܢ̄ܬ ܩܵܛܽܘܠܵܐ ܘܵܐܫܸܕ ܕܡܵܐ ܠܲܐܬܪܵܐ ܕܲܟܝܵܐ ܡܲܢ ܐܲܝܬܝܵܟ܀
19 ܓܲܝܵܣܵܐ܃ ܘܵܠܸܐ ܕܬܸܪܓܲܫ ܕܗܵܟܲܢ ܨܒܵܐ ܡܕܲܟܸܐ ܛܲܡܸ̈ܐܐ ܕܥܲܡܝ ܐܸܙܕܩܸܦ܂ ܘܒܲܕܡܵܐ ܕܕܲܦܢܸܗ ܡܪܲܩ ܚܲܠܠܲܢܝ ܘܲܠܦܲܪܕܲܝܣܵܐ ܗܽܘ ܫܲܕܪܲܢܝ܀
20 ܟܪܽܘܒܵܐ܃ ܙܸܠ ܠܵܟ ܓܲܒܪܵܐ ܠܵܐ ܬܸܬܚܪܸܐ ܕܸܐܢܵܐ ܗܵܟܲܢ ܐܸܬܦܲܩܕܸܬ܂ ܕܼܐܝܠܵܢ ܚܲܝܸ̈ܐ ܗܲܘ ܕܼܐܝܬ ܬܢܵܢ ܒܪܽܘܡܚܵܐ ܐܸܛܪܸܝܘܗܝ ܡܸܢ ܓܸܢܣܟܽܘܢ܀
21 ܓܲܝܵܣܵܐ܃ ܙܸܠ ܠܵܟ ܥܼܝܪܵܐ ܘܼܝܠܲܦ ܚܙܼܝ ܕܦܼܐܪܸ̈ܐ ܕܚܲܝܸ̈ܐ ܕܲܒܓܲܢܬܵܟ܂ ܗܵܐ ܒܓܵܓܽܘܠܬܵܐ ܫܒܲܩܬܸܗ ܬܠܸܐ ܕܢܸܥܽܘܠ ܓܸܢܣܲܢ ܘܠܵܐ ܢܸܬܟܠܸܐ܀
22 ܟܪܽܘܒܵܐ܃ ܚܲܘܵܐ ܘܵܐܕܵܡ ܟܬܲܒܘ ܗ̄ܘܲܘ ܘܚܵܒܘ ܚܲܕ ܐ̄ܫܛܵܪܵܐ ܕܠܵܐ ܡܸܬܠܚܸܐ܂ ܒܲܓܙܵܪ ܕܼܝܢܵܐ ܡܸܟܵܐ ܢܦܲܩܘ ܕܒܲܐܪܥܵܐ ܕܟܽܘ̈ܒܸܐ ܢܸܫܬܲܦܠܽܘܢ܀
23 ܓܲܝܵܣܵܐ܃ ܚܲܘܒܬܵܐ ܦܪܼܝܥܵܐ ܟܪܽܘܒܵܐ ܫܡܲܥ ܘܗܵܐ ܒܲܙܩܼܝܦܵܐ ܐ̄ܫܛܵܪܵܐ ܩܒܼܝܥ܂ ܒܲܕܡܵܐ ܘܡܲܝ̈ܵܐ ܡܵܪܵܟ ܠܚܵܝܗܝ ܒܨܸܨܸ̈ܐ ܬܲܠܚܸܗ ܘܠܵܐ ܡܸܬܬܒܲܥ܀
24 ܟܪܽܘܒܵܐ܃ ܛܪܼܝܕ ܗ̄ܽܘ ܐܵܕܵܡ ܡܸܢ ܓܲܢܬܵܐ ܘܠܵܐ ܐܼܝܬ ܦܽܘܪܣܵܐ ܕܢܼܐܬܸܐ ܠܟܵܐ܂ ܫܢܵܢܵܐ ܕܚܲܪܒܵܐ ܡܸܬܗܲܦܟܵܐ ܘܸܐܢܗܽܘ ܕܢܼܐܬܸܐ ܒܸܗ ܦܵܓܥܵܐ܀
25 ܓܲܝܵܣܵܐ܃ ܛܪܼܝܕܵܐ ܦܢܵܐ ܠܸܗ ܠܒܸܝܬ ܐܲܒܽܘܗܝ ܕܪܵܥܝܵܐ ܪܲܒܵܐ ܢܦܲܩ ܐܸܫܟܚܸܗ܂ ܠܥܸܪܒܵܐ ܕܲܢܦܲܩ ܡܸܢ ܓܲܢܬܵܐ ܘܥܲܠ ܟܲܬܦ̈ܵܬܸܗ ܛܥܸܢ ܙܲܝܚܸܗ܀
26 ܟܪܽܘܒܵܐ܃ ܝܲܘܡܵܢ ܡܸܕܸܡ ܚܲܕܬܵܐ ܚܙܼܝܬ ܗܠܲܟܬܵܐ ܕܥܵܐܠܵܐ ܠܓܲܘ ܓܲܢܬܵܐ܂ ܗܵܐ ܕܽܘܪ̈ܟܵܬܸܗ ܕܵܐܕܵܡ ܚܙܼܝ ܕܲܢܦܲܩ ܡܸܟܵܐ ܘܠܵܐ ܬܽܘܒ ܦܢܵܐ܀
27 ܓܲܝܵܣܵܐ܃ ܝܸܫܽܘܥ ܡܵܪܵܟ ܚܲܕܬܵܐ ܣܥܲܪ ܕܲܫܪܵܝܗܝ ܠܵܐܕܵܡ ܕܲܐܣܼܝܪ ܗ̄ܘܵܐ܂ ܘܲܐܩܼܝܡ ܟܸܢ̈ܫܸܐ ܡܸܢ ܓܲܘ ܫܝܽܘܠ ܘܫܲܕܪܽܘܢܝ ܕܸܐܩܕܽܘܡ ܘܸܐܦܬܲܚ ܠܗܘ݁ܢ܀
28 ܟܪܽܘܒܵܐ܃ ܟܪܽܘܒܵܐ ܐܸܢܵܐ ܘܲܐܝܟܲܢ ܦܣܲܥܬ ܥܲܠ ܡܲܛܲܪܬܵܐ ܕܠܼܝ ܡܲܓܥܠܵܐ܂ ܗܵܐ ܢܽܘܪܵܢܵܐ ܠܵܐ ܡܸܙܕܟܸܐ ܘܲܐܢ̄ܬ ܒܲܪ ܐܵܕܵܡ ܟܡܵܐ ܡܲܡܪܚܲܬ܀
29 ܓܲܝܵܣܵܐ܃ ܟܢܵܬܵܟ ܐܸܢܵܐ ܘܚܲܕ ܐܼܝܬ ܠܲܢ ܡܵܪܵܐ ܕܓܲܘܵܐ ܐܵܦ ܠܼܝ ܘܠܵܟ܂ ܘܪܵܡ ܫܽܘܠܛܵܢܸܗ ܡܸܢܵܟ ܘܡܸܢܝ ܘܠܵܐ ܕܵܚܸܠ ܐ̄ܢܵܐ ܕܗܽܘ ܫܲܕܪܲܢܝ܀
30 ܟܪܽܘܒܵܐ܃ ܠܵܐ ܡܸܫܟܲܚ ܐܲܢ̄ܬ ܕܬܸܥܽܘܠ ܠܟܵܐ ܕܲܐܬܪܵܐ ܗ̄ܘ ܙܲܗܝܵܐ ܘܠܵܐ ܡܸܬܕܲܪܲܫ܂ ܫܟܼܝܢܬܵܐ ܒܓܲܘܸܗ ܡܸܙܕܲܝܚܵܐ ܘܪܽܘܡܚܵܐ ܕܢܽܘܪܵܐ ܠܸܗ ܢܵܛܪܵܐ܀
31 ܓܲܝܵܣܵܐ܃ ܠܵܐ ܡܸܫܟܲܚ ܐܲܢ̄ܬ ܕܬܸܟܠܸܐ ܠܐ̄ܢܵܫ ܩܗܵܬ ܠܵܗ݀ ܪܽܘܡܚܵܐ ܘܸܐܫܬܲܗܝܲܬ܂ ܙܩܼܝܦܵܐ ܦܲܬܚܵܗ݀ ܠܓܲܢܲܬ ܥܕܸܢ ܘܠܵܐ ܐܼܝܬ ܦܽܘܪܣܵܐ ܕܬܽܘܒ ܬܸܬܚܸܕ܀
32 ܟܪܽܘܒܵܐ܃ ܡܸܢ ܩܸܪܝܵܢܵܐ ܠܵܐ ܫܡܼܝܥ ܠܵܟ ܟܪܽܘܒܵܐ ܘܚܲܪܒܵܐ ܕܡܸܬܗܲܦܟܼܝܢ܂ ܠܡܸܛܲܪ ܐܽܘܪܚܵܐ ܕܓܲܢܲܬ ܥܕܸܢ ܡܸܢ ܒܸܝܬ ܐܵܕܵܡ ܕܠܵܐ ܢܸܥܠܽܘܢ܀
33 ܓܲܝܵܣܵܐ܃ ܡܸܢ ܓܸܠܝܵܢܵܐ ܠܵܐ ܫܡܼܝܥ ܠܵܟ ܕܲܢܚܸܬ ܡܵܪܵܟ ܘܐ̄ܢܵܫܵܐ ܗܘܵܐ܂ ܘܪܲܥܼܝ ܠܵܐܕܵܡ ܕܲܪܓܼܝܙ ܗ̄ܘܵܐ ܕܢܲܦܢܸܝܘܗܝ ܠܲܥܕܸܢ ܕܲܛܪܼܝܕ ܗ̄ܘܵܐ܀
34 ܟܪܽܘܒܵܐ܃ ܢܼܝܫܵܐ ܕܚܲܪܒܵܐ ܕܡܸܬܗܲܦܟܵܐ ܘܠܼܐܝܠܵܢ ܚܲܝܸ̈ܐ ܗܵܐ ܢܵܛܪܵܐ܂ ܣܲܪܸܕ ܠܵܐܕܵܡ ܟܲܕ ܐܸܬܛܪܸܕ ܘܲܐܢ̄ܬ ܐܲܝܟܲܢܵܐ ܠܵܐ ܕܵܚܠܲܬ܀
35 ܓܲܝܵܣܵܐ܃ ܢܼܝܫܸܗ ܕܡܵܪܵܟ ܗܵܐ ܐܼܝܬ ܥܠܲܝ ܕܪܽܘܡܚܵܐ ܘܚܲܪܒܵܐ ܒܸܗ ܩܵܗܝܵܐ܂ ܘܲܓܙܵܪ ܕܼܝܢܵܐ ܒܸܗ ܡܸܫܬܪܸܐ ܘܵܐܕܵܡ ܕܲܛܪܼܝܕ ܒܸܗ ܡܸܬܦܢܸܐ܀
36 ܟܪܽܘܒܵܐ܃ ܣܸܕܪ̈ܲܝ ܢܽܘܪܵܐ ܬܢܵܢ ܩܵܝܡܼܝܢ ܐܲܠ̈ܦܸܐ ܘܬܸܓ̈ܡܸܐ ܕܠܵܐ ܡܸܬܡܢܸܝܢ܂ ܕܚܼܝܠܼܝܢ ܟܸܢ̈ܫܸܐ ܘܠܵܐ ܡܸܫܟܚܲܬ ܕܬܸܪܕܸܐ ܘܬܸܥܽܘܠ ܒܲܝܢܵܬܗܘ݁ܢ܀
37 ܓܲܝܵܣܵܐ܃ ܣܸܕܪܸ̈ܐ ܘܟܸܢ̈ܫܸܐ ܕܸܐܡܲܪܬ ܠܼܝ ܙܩܼܝܦܵܐ ܚܵܙܸܝܢ ܘܡܸܣܬܲܪܕܼܝܢ܂ ܘܵܐܬܸܗ ܕܲܒܪܵܐ ܠܗܘ݁ܢ ܡܲܪܗܒܵܐ ܘܣܵܓܕܼܝܢ ܩܽܘܕܡܸܝܗ݀ ܘܠܼܝ ܡܝܲܩܪܼܝܢ܀
38 ܟܪܽܘܒܵܐ܃ ܥܲܠ ܡܲܪܟܲܒܬܵܐ ܢܼܝܫܸܗ ܕܡܵܪܝ ܓܐܸܐ ܒܲܬܪܽܘܢܵܘܣ ܘܡܸܢܲܢ ܟܣܸܐ ܗ̄ܘ܂ ܘܲܐܢ̄ܬ ܐܲܝܟܲܢܵܐ ܐܲܝܟ ܕܵܐܡܪܲܬ ܢܼܝܫܸܗ ܛܥܼܝܢ ܐܲܢ̄ܬ ܘܲܡܙܲܝܚܲܬ܀
39 ܓܲܝܵܣܵܐ܃ ܥܲܠ ܡܲܪܟܲܒܬܵܐ ܢܼܝܫܸܗ ܠܥܸܠ ܘܗܵܐ ܒܓܵܓܽܘܠܬܵܐ ܙܩܼܝܦܸܗ ܠܬܲܚܬ܂ ܘܣܲܩܪܵܐ ܚܲܕܬܵܐ ܒܲܕܡܸܗ ܟܬܲܒ ܕܢܲܦܢܸܐ ܠܵܐܕܵܡ ܠܓܲܘ ܓܲܢܬܵܐ܀
40 ܟܪܽܘܒܵܐ܃ ܦܵܥܠܵܐ ܕܲܕܡܵܐ ܡܲܢ ܐܲܝܬܝܵܟ ܩܵܛܸܠ ܐ̄ܢܵܫܵܐ ܡܲܢ ܫܲܕܪܵܟ܂ ܪܽܘܡܚܵܐ ܠܵܛܫܵܐ ܘܸܐܢ ܡܲܡܪܚܲܬ ܫܢܵܢܵܐ ܠܩܽܘܒܠܵܟ ܡܸܫܬܲܠܗܒܵܐ܀
41 ܓܲܝܵܣܵܐ܃ ܦܵܠܚܸܗ ܕܡܲܠܟܵܐ ܠܵܐ ܬܸܬܪܗܸܒ ܫܪܸܐ ܗ̄ܘ ܫܽܘܠܛܵܢܵܟ ܕܡܵܪܵܟ ܨܒܵܐ܂ ܙܩܼܝܦܵܐ ܐܵܬܵܐ ܐܲܝܬܼܝܬ ܠܵܟ ܚܙܼܝ ܐܸܢ ܫܲܪܼܝܪ ܠܵܐ ܬܸܬܦܼܝܪ܀
42 ܟܪܽܘܒܵܐ܃ ܨܠܼܝܒܸܗ ܕܲܒܪܵܐ ܕܲܐܝܬܼܝܬ ܠܼܝ ܠܵܐ ܡܲܡܪܲܚ ܐ̄ܢܵܐ ܕܸܐܚܽܘܪ ܒܸܗ܂ ܫܲܪܼܝܪ ܘܲܕܚܼܝܠ ܘܠܵܐ ܡܸܬܟܠܸܝܬ ܕܬܸܥܽܘܠ ܠܲܥܕܸܢ ܕܗܵܟܲܢ ܨܒܵܐ܀
43 ܓܲܝܵܣܵܐ܃ ܨܠܼܝܒܸܗ ܕܡܵܪܵܟ ܣܝܵܓܵܐ ܬܪܲܥ ܗܲܘ ܕܲܒܢܸܐ ܗ̄ܘܵܐ ܒܸܝܬ ܠܲܢ ܠܟܽܘܢ܂ ܥܒܲܪ ܠܸܗ ܪܽܘܓܙܵܐ ܘܫܲܝܢܵܐ ܗ̄ܘܵܐ ܘܽܐܘܪܚܵܐ ܕܲܥܕܸܢ ܠܵܐ ܦܵܣܩܵܐ܀
44 ܟܪܽܘܒܵܐ܃ ܩܛܼܝܠܵܐ ܒܲܕܡܸܗ ܫܠܲܚ ܣܵܗܕܲܢܝ ܕܲܐܪܦܸܐ ܫܢܵܢܵܐ ܕܲܛܥܼܝܢ ܗ̄ܘܼܝܬ܂ ܕܚܼܝܠܵܐ ܗ̄ܝ ܐܵܬܵܐ ܕܲܐܝܬܼܝܬ ܠܼܝ ܘܠܵܐ ܡܲܗܦܸܟ ܐ̄ܢܵܐ ܥܽܘܠ ܝܵܪܬܵܐ܀
45 ܓܲܝܵܣܵܐ܃ ܩܝܵܡܬܵܐ ܠܓܸܢܣܵܐ ܕܐ̄ܢܵܫ̈ܵܐ ܗܘܵܬ ܕܲܣܚܼܝܦܼܝܢ ܗ̄ܘܲܘ ܡܸܢ ܐܲܬܪܗܘ݁ܢ܂ ܟܪ̈ܽܘܒܸܐ ܘܥܼܝܪܸ̈ܐ ܥܲܡܲܢ ܚܕܲܘ ܕܸܐܬܦܢܼܝܢܲܢ ܠܲܡܕܼܝܢܲܬܟܽܘܢ܀
46 ܟܪܽܘܒܵܐ܃ ܪܲܒ ܗ̄ܽܘ ܚܢܵܢܵܐ ܕܲܗܘܵܐ ܠܟܽܘܢ ܝܲܠܕܲܘ̈ܗܝ ܕܵܐܕܵܡ ܕܲܚܛܵܐ ܘܡܼܝܬ܂ ܥܽܘܠ ܓܲܝܵܣܵܐ ܘܠܵܐ ܡܸܬܟܠܸܝܬ ܦܬܼܝܚ ܗ̄ܽܘ ܬܲܪܥܵܐ ܠܲܕܬܵܝܒܼܝܢ܀
47 ܓܲܝܵܣܵܐ܃ ܪܲܒ ܗ̄ܽܘ ܘܲܫܒܼܝܚ ܚܢܵܢܸܗ ܕܡܵܪܝ ܕܪ̈ܲܚܡܲܘܗܝ ܣܲܥܪܽܘܗܝ ܕܚܽܘܒܸܗ ܥܨܵܝܗܝ܂ ܐܵܘ ܪ̈ܽܘܚܵܢܸܐ ܥܲܡܲܢ ܚܕܲܘ ܕܸܐܬܚܲܠܲܛܢܲܢ ܥܲܡ ܓܸܢܣܟܽܘܢ܀
48 ܟܪܽܘܒܵܐ܃ ܫܢܵܢܵܐ ܘܚܲܪܒܵܐ ܕܲܛܥܼܝܢ ܗ̄ܘܼܝܬ ܢܼܝܚܵܐ ܙܲܓܪܵܗ݀ ܡܸܢ ܓܸܢܣܟܽܘܢ܂ ܛܪܼ̈ܝܕܸܐ ܕܲܦܢܲܘ ܠܵܐ ܬܸܕܚܠܽܘܢ ܥܽܘܠܘ ܒܲܕܝܵܨܵܐ ܠܓܲܘ ܓܲܢܬܵܐ܀
49 ܓܲܝܵܣܵܐ܃ ܫܽܘܒܚܵܐ ܒܲܥܕܸܢ ܕܸܐܫܬܲܝܢܲܬ ܫܠܵܡܵܐ ܒܲܐܪܥܵܐ ܕܸܐܬܚܲܪܪܲܬ܂ ܒܪܼܝܟ ܗ̄ܽܘ ܙܩܼܝܦܵܐ ܕܗܽܘ ܪܲܥܝܲܢ ܕܡܸܢ ܓܸܢܣܟܽܘܢ ܠܵܐ ܢܸܬܓܠܸܙ܀
50 ܬܲܘܕܼܝܬܵܐ ܠܵܟ ܡܵܪܸܐ ܟܽܠ ܕܲܐܦܢܼܝܬ ܠܵܐܕܵܡ ܕܲܛܪܼܝܕ ܗ̄ܘܵܐ܂ ܘܲܠܓܲܝܵܣܵܐ ܕܪ̈ܲܚܡܸܐ ܫܐܸܠ ܦܲܬܚܸܗ ܠܬܲܪܥܵܐ ܕܲܐܚܼܝܕ ܗ̄ܘܵܐ܀
51 ܬܲܘܕܼܝܬܵܐ ܠܵܟ ܕܲܒܡܸܠܬܵܟ ܥܲܠ ܓܲܝܵܣܵܐ ܠܓܲܢܲܬ ܥܕܸܢ܂ ܘܣܲܒܪܵܐ ܛܵܒܵܐ ܠܵܐܕܵܡ ܗܘܵܐ ܘܲܦܢܵܐ ܠܲܐܬܪܸܗ ܕܡܸܢܸܗ ܢܦܲܩ܀