← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

64494: DeathSatan1

Click on a word for lexical analysis
Click on a red-colored coordinate for comments and/or translations of the line

00 ܣܽܘܓܼܝܬܵܐ ܕܥܲܠ ܡܲܘܬܵܐ ܘܣܵܛܵܢܵܐ ܥܽܘܢܼܝܬܵܐ܃ ܫܽܘܒܚܵܐ ܠܵܟ ܡܵܪܝ ܕܲܒܡܲܘܬܵܟ ܚܵܒ ܡܲܘܬܵܐ ܘܣܵܛܵܢܵܐ ܐܸܙܕܟܼܝ
01 ܬܸܗܪܵܐ ܡܵܪܲܢ ܒܡܲܘܬܸܗ ܣܥܲܪ ܒܲܙܩܼܝܦܽܘܬܵܐ ܬܗܲܪܘ ܥܵܠܡܸ̈ܐ܂ ܩܥܵܐ ܗ̄ܘܵܐ ܒܩܵܠܵܐ ܘܡܲܘܬܵܐ ܫܡܲܥ ܘܢܵܕ̈ܝ ܒܸܪ̈ܝܵܬܵܐ ܘܫܽܘ̈ܥܸܐ ܦܩܲܥܘ܀
02 ܒܲܓܸܢ ܚܲܣܝܵܐ ܟܲܕ ܐܸܙܕܩܸܦ ܘܲܫܡܲܥ ܡܲܘܬܵܐ ܘܙܵܥܲܬ ܫܝܽܘܠ܂ ܘܪܵܒܘ ܥܒܼܝ̈ܕܸܐ ܕܲܢܝܲܒܒܽܘܢ ܠܩܵܠ ܢܽܘܚܵܡܵܐ ܕܲܠܗܘ݁ܢ ܣܥܲܪ܀
03 ܬܵܓܸܗ ܕܡܲܘܬܵܐ ܢܵܕ ܘܸܐܣܬܚܸܦ ܕܩܵܛܲܪ ܬܵܓܸ̈ܐ ܙܩܼܝܦܸܗ ܫܪܵܝܗܝ܂ ܫܝܽܘܠ ܟܲܗܼܝܢܬܵܐ ܐܸܣܸ̈ܝܗ݀ ܪ̈ܥܸܠܝ ܘܲܢܦܲܠܘ ܫܽܘܪܸ̈ܝܗ݀ ܘܸܐܬܬܲܪܥܲܬ܀
04 ܒܓܲܘ ܚܸܫܽܘܟܵܐ ܢܽܘܗܪܵܐ ܕܢܲܚ ܘܙܲܗܪܸܗ ܪܲܒܵܐ ܠܡܲܘܬܵܐ ܥܩܲܪ܂ ܥܓܼܝ̈ܢܸܝܗ݀ ܕܲܫܝܽܘܠ ܟܲܦܵܐ ܢܩܲܫܘ ܠܩܵܠ ܢܽܘܚܵܡܵܐ ܕܲܠܗܘ݁ܢ ܩܪܵܐ܀
05 ܣܸܕܪ̈ܲܝ ܡܲܘܬܵܐ ܐܲܝܠܸܠܘ ܥܪܲܩܘ ܘܫܲܠܼܝܛ ܚܸܫܟܵܐ ܒܢܽܘܪܵܐ ܢܦܲܠ܂ ܡܕܼܝܢܲܬ ܡܲܘܬܵܐ ܐܸܫܬܲܝܢܲܬ ܒܚܲܝܲܬ ܡܼܝ̈ܬܸܐ ܕܒܵܗ݀ ܐܲܨܡܚܲܬ܀
06 ܐܲܝܠܸܠ ܡܲܘܬܵܐ ܡܸܢ ܙܲܘܥܬܸܗ ܘܲܠܣܵܛܵܢܵܐ ܟܢܵܬܸܗ ܩܥܵܐ܂ ܕܡܲܢܽܘ ܗܵܢܵܐ ܕܗܵܐ ܐܲܪܗܒܲܢܝ ܕܲܦܩܲܥܘ ܩܲܒܪܸ̈ܐ ܘܡܼܝ̈ܬܸܐ ܚܝܲܘ܀
07 ܐܡܲܪ ܠܼܝ ܒܼܝܫܵܐ ܘܦܲܫܸܩ ܠܼܝ ܕܡܲܢܽܘ ܗܵܢܵܐ ܕܩܵܠܸܗ ܥܩܲܪ܂ ܐܸܣܸ̈ܝܗ݀ ܕܲܫܝܽܘܠ ܟܲܗܼܝܢܬܵܐ ܘܲܩܪܵܐ ܠܡܼܝ̈ܬܸܐ ܘܗܵܐ ܢܵܦܩܼܝܢ܀
08 ܐܵܡܲܪ ܒܼܝܫܵܐ ܝܸܫܽܘܥ ܫܡܸܗ ܦܼܐܪܵܐ ܕܲܗܘܵܐ ܠܲܒܬܽܘܠܬܵܐ܂ ܘܒܲܪ ܐܲܠܵܗܵܐ ܗ̄ܘ ܘܥܲܠ ܕܸܐܙܕܩܸܦ ܒܲܙܩܼܝܦܽܘܬܸܗ ܪܵܬܘ ܥܵܠܡܸ̈ܐ܀
09 ܡܲܘܬܵܐ܃ ܒܲܐܝܕܵܐ ܥܸܠܬܵܐ ܡܵܕܸܝܢ ܙܩܼܝܦ ܘܡܲܢܽܘ ܙܲܩܦܸܗ ܐܲܝܟ ܕܵܐܡܪܲܬ܂ ܘܡܵܢܵܐ ܐܲܠܨܲܬ ܕܢܼܐܬܸܐ ܠܟܵܐ ܕܗܵܐ ܐܲܙܼܝܥܲܢܝ ܟܲܕ ܗ̄ܽܘ ܠܒܲܪ܀
10 ܒܼܝܫܵܐ܃ ܒܲܫܩܵܠ ܛܲܥܢܵܐ ܕܼܝܠܝ ܐܸܙܕܩܸܦ ܒܼܐܝ̈ܕܲܝ ܥܲܡܵܐ ܕܡܸ̈ܠܲܝ ܫܡܲܥ܂ ܗܵܐ ܩܛܼܝܠ ܐܲܪܝܵܐ ܦܬܲܚ ܠܸܗ ܫܝܽܘܠ ܘܲܚܒܽܘܫܼܝܘܗܝ ܒܵܗ݀ ܕܲܡܪܼܝܕ ܗ̄ܘܵܐ܀
11 ܡܲܘܬܵܐ܃ ܓܲܢ̄ܒܵܪܽܘܬܵܟ ܠܽܘܩܒܲܠܝ ܗܘܵܬ ܘܦܲܚܵܐ ܕܨܲܠܼܝܬ ܗܽܘ ܚܲܢܩܲܢܝ܂ ܠܗܵܢܵܐ ܙܩܲܦܬܵܝܗܝ ܘܲܐܬܪܲܢ ܥܩܲܪ ܘܸܐܢ ܩܵܒܪܵܐ ܠܸܗ ܫܝܽܘܠ ܚܵܪܒܵܐ܀
12 ܒܼܝܫܵܐ܃ ܓܲܒܪܵܐ ܗ̄ܘ ܕܲܐܩܠܼܝ ܘܲܐܬܪܲܢ ܟܒܲܫ ܘܡܼܝ̈ܬܸܐ ܬܠܵܬܵܐ ܡܸܢܸܗ ܚܛܲܦ܂ ܒܩܲܝܣܵܐ ܦܟܲܪܬܸܗ ܕܥܲܙܼܝܙ ܗ̄ܘܵܐ ܠܵܐ ܢܙܼܝܥܵܟ ܬܽܘܒ ܘܢܲܕܠܚܵܟ܀
13 ܡܲܘܬܵܐ܃ ܓܲܙ̈ܲܝ ܚܲܠܸܨ ܡܸܢ ܕܸܐܙܕܩܸܦ ܬܲܪ̈ܥܲܝ ܬܲܒܲܪ ܗܵܫܵܐ ܕܡܼܝܬ܂ ܠܵܐ ܒܵܥܸܐ ܗ̄ܘܼܝܬ ܢܼܐܬܸܐ ܠܟܵܐ ܒܼܝܫ ܝܽܘܬܪܵܢܵܐ ܕܲܐܝܬܼܝܬ܀
14 ܒܼܝܫܵܐ܃ ܕܼܝܠܝ ܗ̄ܘܵܬ ܗܵܕܸܐ ܕܸܐܣܥܽܘܪ ܠܚܽܘܕ ܥܕܲܡܵܐ ܠܬܲܪܥܵܐ ܐܲܝܬܼܝܘܗܝ ܠܵܟ܂ ܘܸܐܢ ܝܵܬܲܪ ܐܲܢ̄ܬ ܘܸܐܢ ܚܵܣܪܲܬ ܠܲܘ ܕܼܝܠܝ ܐܼܝܬܸܝܗ݀ ܠܵܐ ܬܲܥܕܠܲܢܝ܀
15 ܡܲܘܬܵܐ܃ ܕܼܝܠܝ ܗ̄ܽܘ ܒܲܠܚܽܘܕ ܐܲܝܟ ܕܵܐܡܪܲܬ ܗܵܢܵܐ ܬܒܵܪܵܐ ܕܲܓܕܲܫ ܠܼܝ܂ ܘܠܵܐ ܝܵܕܲܥ ܐܲܢ̄ܬ ܕܵܐܦ ܠܵܟ ܫܪܵܐ ܡܸܢ ܫܽܘܠܛܵܢܵܐ ܕܒܸܗ ܩܵܝܡܲܬ܀
16 ܒܼܝܫܵܐ܃ ܗܵܐ ܐܲܝܬܼܝܬܸܗ ܚܲܡܣܸܢ ܘܩܽܘܡ ܚܒܽܘܫܵܝܗܝ ܒܲܐܬܪܵܟ ܘܬܲܪܥܵܟ ܛܦܼܝ܂ ܘܣܽܘܟܪ̈ܲܝ ܗܵܡܵܢ ܒܲܐܦܲܘ̈ܗܝ ܒܓܽܘܪ ܘܢܸܚܕܸܐ ܡܸܟܼܝܠ ܐܸܢܵܐ ܘܲܐܢ̄ܬ܀
17 ܡܲܘܬܵܐ܃ ܗܵܐ ܐܲܝܬܼܝܬܵܝܗܝ ܐܲܝܟ ܕܵܐܡܪܲܬ ܡܲܢ ܚܵܒܸܫ ܠܸܗ ܕܡܵܪܵܐ ܗ̄ܘ ܕܟܽܠ܂ ܘܸܐܢ ܟܲܕ ܠܵܐ ܥܲܠ ܥܲܩܪܵܗ݀ ܫܝܽܘܠ ܘܸܐܢ ܥܵܐܸܠ ܠܵܗ݀ ܠܵܐ ܝܵܬܒܵܐ܀
18 ܒܼܝܫܵܐ܃ ܘܵܝ ܠܵܟ ܡܲܘܬܵܐ ܐܸܢ ܕܵܚܠܲܬ ܕܬܲܥܸܠ ܡܼܝܬܵܐ ܠܲܡܕܼܝܢ̄ܬܵܟ܂ ܕܸܐܢ ܟܲܕ ܚܲܝ ܗ̄ܘܵܐ ܥܲܙܼܝܙ ܗ̄ܘܵܐ ܗܵܫܵܐ ܕܡܼܝܬ ܠܸܗ ܠܲܘ ܕܸܚܠܬܵܐ ܗ̄ܘ܀
19 ܡܲܘܬܵܐ܃ ܘܵܝ ܠܵܟ ܒܼܝܫܵܐ ܕܠܵܐ ܕܵܚܠܲܬ ܕܬܸܩܪܸܝܘܗܝ ܡܼܝܬܵܐ ܕܡܼܝ̈ܬܸܐ ܫܡܲܥܘ܂ ܩܵܠܸܗ ܘܲܢܦܲܩܘ ܡܸܢ ܐܲܬܪܗܘ݁ܢ ܟܸܢ̈ܫܼܝܢ ܟܸܢ̈ܫܼܝܢ ܟܲܕ ܕܵܝܨܼܝܢ܀
20 ܒܼܝܫܵܐ܃ ܙܪܼܝܙ ܗ̄ܘܲܝܬ ܡܲܘܬܵܐ ܡܲܢ ܫܲܗܝܵܟ ܦܟܲܪܬ ܥܲܙܼܝ̈ܙܸܐ ܘܠܵܐ ܐܲܪܥܠܽܘܟ܂ ܡܸܢ ܒܲܪ ܝܲܘܣܸܦ ܡܘ݁ܢ ܕܵܚܠܲܬ ܦܬܲܚ ܠܸܗ ܬܲܪܥܵܐ ܘܲܚܒܽܘܫܵܝܗܝ ܠܓܲܘ܀
21 ܡܲܘܬܵܐ܃ ܙܪܼܝܙ ܗ̄ܘܼܝܬ ܟܽܠܝܽܘܡ ܘܲܠܒܼܝܒ ܗܘܼܝܬ ܒܡܼܝ̈ܬܸܐ ܫܚܼܝ̈ܡܸܐ ܕܸܐܬܲܘ ܠܼܝ܂ ܘܗܵܢܵܐ ܚܲܝ ܗ̄ܽܘ ܟܲܕ ܛܵܒ ܩܛܼܝܠ ܘܡܘ݁ܢ ܐܸܥܒܸܕ ܠܸܗ ܕܠܵܐ ܡܸܬܚܒܸܫ܀
22 ܒܼܝܫܵܐ܃ ܚܲܝܠܸܗ ܕܡܼܝܬܵܐ ܟܡܵܐ ܟܲܝ ܢܗܸܐ ܚܽܘܪ ܕܲܫܠܲܕܵܐ ܗ̄ܘ ܘܠܵܐ ܢܲܕܚܠܵܟ܂ ܒܩܲܒܪܵܐ ܚܒܽܘܫܵܝܗܝ ܘܲܐܪܦܵܐ ܪܦܽܘܣ ܘܬܵܐ ܢܸܚܕܸܐ ܠܸܗ ܡܵܢܵܐ ܗܘܵܝܗܝ܀
23 ܡܲܘܬܵܐ܃ ܚܲܒܪܲܢ ܥܲܠ ܡܘ݁ܢ ܠܵܐ ܦܵܪܫܲܬ ܕܬܸܚܙܸܐ ܚܲܝܠܸܗ ܕܲܟܡܵܐ ܩܫܸܐ܂ ܕܩܲܒܪܸ̈ܐ ܘܫܽܘ̈ܥܸܐ ܘܟܼܐܦܸ̈ܐ ܦܩܲܥܘ ܘܸܐܠܽܘ ܫܚܼܝܡ ܗ̄ܘܵܐ ܗܵܕ ܠܵܐ ܗܘܵܬ܀
24 ܒܼܝܫܵܐ܃ ܛܲܥܢܵܝܗܝ ܥܵܐܸܠ ܘܗܵܐ ܡܼܝܬ ܠܸܗ ܦܬܲܚ ܠܸܗ ܬܲܪܥܵܟ ܘܠܵܐ ܢܲܕܚܠܵܟ܂ ܘܣܸܕܪ̈ܲܝ ܣܵܣܵܐ ܫܲܡܲܪ ܥܠܲܘܗܝ ܐܲܝܟ ܕܥܲܠ ܗܵܒܸܝܠ ܗܲܘ ܕܸܐܬܩܛܸܠ܀
25 ܡܲܘܬܵܐ܃ ܛܲܥܡܸܗ ܕܗܵܒܸܝܠ ܒܲܣܼܝܡ ܗ̄ܘܵܐ ܐܲܝܟ ܥܸܢܲܒܬܵܐ ܫܲܪܘܵܝܬܵܐ܂ ܝܸܫܽܘܥ ܛܲܥܡܸܗ ܡܲܪܼܝܪ ܠܼܝ ܕܚܲܫܸ̈ܐ ܡܸܢܸܗ ܠܼܝ ܢܵܒܥܼܝܢ܀
26 ܒܼܝܫܵܐ܃ ܝܲܘ̈ܡܲܝ ܚܲܝܲܘ̈ܗܝ ܡܲܪܼܝܪ ܗ̄ܘܵܐ ܠܼܝ ܘܠܵܟ ܡܲܘܬܵܐ ܛܵܒ ܥܲܠܒܲܢ܂ ܕܡܸܢܵܟ ܕܼܝܠܵܟ ܡܼܝ̈ܬܸܐ ܫܩܲܠ ܘܡܸܢܝ ܠܸܓܝܽܘ̈ܢܸܐ ܒܝܲܡܵܐ ܫܕܵܐ܀
27 ܡܲܘܬܵܐ܃ ܝܲܘܡܵܐ ܕܡܲܘܬܸܗ ܠܼܝ ܛܵܒ ܩܫܸܐ ܕܟܲܕ ܚܲܝ ܡܼܝ̈ܬܸܐ ܬܠܵܬܵܐ ܚܛܲܦ܂ ܘܗܵܫܵܐ ܕܡܼܝܬ ܠܸܗ ܐܸܢܗܽܘ ܕܡܼܝܬ ܟܸܢ̈ܫܸܐ ܐܲܩܼܝܡ ܡܸܢ ܓܲܘ ܫܝܽܘܠ܀
28 ܒܼܝܫܵܐ܃ ܟܡܵܐ ܥܲܙܼܝ̈ܙܸܐ ܐܲܝܬܼܝܬ ܠܵܟ ܟܡܵܐ ܓܲܢ̄ܒܵܪܸ̈ܐ ܒܬܲܪܥܵܟ ܒܪܸܟܘ܂ ܡܽܘܫܸܐ ܘܝܸܫܽܘܥ ܠܵܐ ܣܲܪܕܽܘܟ ܘܗܵܢܵܐ ܕܲܙܩܼܝܦ ܗܽܘ ܫܲܦܠܵܟ܀
29 ܡܲܘܬܵܐ܃ ܟܡܵܐ ܝܲܘ̈ܡܵܬܵܐ ܕܗܵܠܸܝܢ ܚܝܲܘ ܠܼܝ ܒܲܩܪܵܒܗܘ݁ܢ ܒܸܣܡܵܐ ܥܒܲܕܘ܂ ܘܗܵܢܵܐ ܕܲܙܩܼܝܦ ܠܡܼܝ̈ܬܸܐ ܩܪܵܐ ܘܫܲܒܩܽܘܢܝ ܘܲܥܪܲܩܘ ܟܲܕ ܚܵܒܨܼܝܢ܀
30 ܒܼܝܫܵܐ܃ ܠܵܐ ܟܲܝ ܚܵܙܸܝܬ ܐܵܘ ܕܵܘܝܵܐ ܕܡܼܝܬܵܐ ܗ̄ܘ ܫܲܠܝܵܐ ܡܘ݁ܢ ܙܲܥܙܥܵܟ܂ ܚܲܝ ܡܸܢ ܙܲܘܥܵܐ ܘܲܫܟܸܒ ܫܠܵܐ ܩܲܒܪܵܐ ܦܬܲܚ ܠܸܗ ܘܠܵܐ ܬܸܬܪܗܸܒ܀
31 ܡܲܘܬܵܐ܃ ܠܵܐ ܒܵܚܲܪ ܐܲܢ̄ܬ ܡܵܢܵܐ ܓܕܲܫ ܒܡܲܘܬܸܗ ܕܝܸܫܽܘܥ ܕܲܣܒܲܪܬ ܕܡܼܝܬ܂ ܫܸܡܫܵܐ ܒܪܲܘܡܵܐ ܐܲܚܫܸܟ ܠܥܸܠ ܘܲܐܦ̈ܲܝ ܩܽܘܕܫܵܐ ܣܕܸܩ ܬܽܘܒ ܠܬܲܚܬ܀
32 ܒܼܝܫܵܐ܃ ܡܼܝܬܘ ܟܽܠ ܕܵܪܼ̈ܝܢ ܟܲܕ ܥܵܒܪܼܝܢ ܘܐ̄ܢܵܫ ܡܸܢ ܡܼܝ̈ܬܸܐ ܠܵܐ ܐܲܗܪܵܟ܂ ܛܪܽܘܢܵܐ ܕܲܫܝܽܘܠ ܒܡܘ݁ܢ ܣܲ‍<‍ܪ‍>‍ܕ‍{‍ܪ‍}‍ܵܟ ܓܲܒܪܵܐ ܩܛܼܝܠܵܐ ܕܡܼܝܬ ܘܸܐܫܬܪܼܝ܀
33 ܡܲܘܬܵܐ܃ ܡܲܢ ܡܸܢ ܡܼܝ̈ܬܸܐ ܐܲܙܼܝܥ ܫܝܽܘܠ ܒܟܽܠܗܘ݁ܢ ܕܵܪܸ̈ܐ ܕܨܸܝܕܲܝ ܫܪܸܟܘ܂ ܡܼܝܬܵܐ ܐܲܝܟ ܗܵܢ ܠܵܐ ܡܬܽܘܡ ܚܙܼܝܬ ܕܲܠܘܲܝ ܠܵܐ ܡܼܝܬ ܐܸܢ ܡܼܝܬ ܠܸܗ܀
34 ܒܼܝܫܵܐ܃ ܢܦܲܠ ܠܸܗ ܒܦܲܚܲܢ ܘܨܸܝܕܲܝܢ ܗܘܵܐ ܟܡܵܐ ܐܸܢ ܓܲܢ̄ܒܵܪ ܗܵܐ ܡܼܝܬ ܠܸܗ܂ ܗܲܘܬܵܐ ܕܡܼܝ̈ܬܸܐ ܩܕܵܡܲܘܗܝ ܓܠܼܝ ܘܨܸܝܕܲܘܗܝ ܕܵܐܕܵܡ ܐܲܪܦܵܐ ܫܪܵܐ܀
35 ܡܲܘܬܵܐ܃ ܢܦܲܠ ܠܸܗ ܒܦܲܚܲܢ ܐܲܝܟ ܕܵܐܡܪܲܬ ܘܲܒܡܲܦܽܘܠܬܸܗ ܥܲܩܪܵܗ݀ ܫܝܽܘܠ܂ ܩܝܵܡܬܵܐ ܠܡܼܝ̈ܬܸܐ ܥܒܲܕ ܟܲܕ ܢܦܲܠ ܠܲܘ ܡܲܦܽܘܠܬܵܐ ܗ̄ܝ ܡܘ݁ܢ ܣܵܪܒܲܬ܀
36 ܒܼܝܫܵܐ܃ ܣܵܗܸܕ ܩܲܝܣܵܐ ܕܲܙܩܼܝܦ ܥܠܲܘܗܝ ܘܪܽܘܡܚܵܐ ܕܚܲܫܸ̈ܐ ܕܒܸܗ ܐܸܬܕܩܲܪ܂ ܕܚܵܒ ܠܸܗ ܡܸܢܲܢ ܐܵܦ ܐܸܙܕܟܼܝ ܘܲܗܘܵܐ ܡܼܝܬܵܐ ܠܵܐ ܢܲܕܚܠܵܟ܀
37 ܡܲܘܬܵܐ܃ ܣܵܗܕܼܝܢ ܫܽܘ̈ܥܸܐ ܕܡܸܬܦܲܩܥܼܝܢ ܘܟܼܐܦܸ̈ܐ ܘܩܲܒܪܸ̈ܐ ܕܗܵܐ ܡܸܨܛܪܸܝܢ܂ ܘܓܲܪ̈ܡܸܐ ܕܡܼܝ̈ܬܸܐ ܕܡܸܬܟܲܢܫܼܝܢ ܕܗܵܢ ܠܵܐ ܡܵܐܸܬ ܘܠܵܐ ܟܲܕ ܩܛܼܝܠ܀
38 ܒܼܝܫܵܐ܃ ܥܲܡܠܵܐ ܪܲܒܵܐ ܐܲܪܡܼܝܬ ܠܼܝ ܝܽܘܕܵܐ ܘܚܲܢܵܢ ܗܘܲܘ ܦܵܥ̈ܠܲܝ܂ ܠܵܒܛܸܬ ܥܲܡܵܐ ܘܪܵܒܘ ܗ̄ܘܲܘ ܥܠܲܘܗܝ ܦܬܲܚ ܐܲܢ̄ܬ ܩܲܒܪܵܐ ܘܲܐܗܸܠ ܒܸܗ܀
39 ܡܲܘܬܵܐ܃ ܥܲܡܠܵܟ ܒܼܝܫܵܐ ܡܘ݁ܢ ܐܲܘܬܪܲܢܝ ܙܩܼܝܦܵܐ ܕܥܲܬܸܕܬ ܓܽܘܢܚܵܐ ܗ̄ܘ ܠܼܝ܂ ܫܠܲܕܵܐ ܕܲܐܪܡܼܝܬ ܗܵܐ ܣܸܚܦܲܬ ܐܵܦ ܠܼܝ ܐܵܦ ܠܵܟ ܠܵܐ ܬܸܬܚܪܸܐ܀
40 ܒܼܝܫܵܐ܃ ܦܬܲܚ ܠܸܗ ܬܲܪܥܵܐ ܠܡܘ݁ܢ ܕܵܚܠܲܬ ܐܲܪܡܵܝܗܝ ܒܲܫܝܽܘܠ ܡܘ݁ܢ ܙܵܝܥܲܬ܂ ܢܦܲܠ ܠܸܗ ܓܲܒܪܵܐ ܘܡܼܝܬܵܐ ܗܘܵܐ ܚܲܡܣܸܢ ܐܲܢ̄ܬ ܒܸܗ ܘܠܵܐ ܢܲܪܗܒܵܟ܀
41 ܡܲܘܬܵܐ܃ ܦܬܼܝܚܼܝܢ ܐܢܘ݁ܢ ܬܲܪ̈ܥܲܝ ܫܝܽܘܠ ܥܩܼܝܪܵܐ ܗ̄ܝ ܟܽܠܵܗ݀ ܘܠܵܐ ܝܵܬܒܵܐ܂ ܕܩܵܠܸܗ ܕܝܸܫܽܘܥ ܬܲܒܲܪ ܫܪܵܐ ܡܽܘ̈ܟܠܸܐ ܕܗܵܡܵܢ ܚܸܫܽܘܟܬܵܐ܀
42 ܒܼܝܫܵܐ܃ ܨܽܘܬ ܘܲܫܡܲܥܵܝܗܝ ܐܲܝܟܲܢ ܩܥܵܐ ܡܸܢ ܒܸܝܬ ܚܲܫܸ̈ܐ ܘܪܽܘܚܸܗ ܫܒܲܩ܂ ܩܛܼܝܠ ܗ̄ܽܘ ܐܵܦ ܡܼܝܬ ܦܽܘܩ ܣܲܒ ܘܥܽܘܠ ܫܠܲܕܵܐ ܕܝܸܫܽܘܥ ܕܲܐܝܬܼܝܬ ܠܵܟ܀
43 ܡܲܘܬܵܐ܃ ܨܽܘܬ ܐܲܢ̄ܬ ܒܼܝܫܵܐ ܘܩܵܠܵܐ ܫܡܲܥ ܩܵܠ ܒܸܪ̈ܝܵܬܵܐ ܕܲܡܒܲܓ̈ܢܵܢ܂ ܩܥܵܐ ܒܲܙܩܼܝܦܵܐ ܘܥܲܩܪܵܗ݀ ܫܝܽܘܠ ܘܲܐܝܟܲܢ ܡܼܝܬܵܐ ܗ̄ܘ ܐܲܝܟ ܕܵܐܡܪܲܬ܀
44 ܒܼܝܫܵܐ܃ ܩܽܘܡ ܚܲܠܵܫܵܐ ܘܬܵܐ ܦܽܘܩ ܚܙܼܝ ܕܡܸܗ ܕܲܩܛܼܝܠܵܐ ܕܒܲܐܪܥܵܐ ܙܠܼܝܚ܂ ܘܼܐܝ̈ܕܲܘܗܝ ܘܪܸ̈ܓܠܲܘܗܝ ܕܲܡܒܲܙ̈ܥܵܢ ܘܕܲܦܢܸܗ ܬܪܼܝܥܵܐ ܘܚܲܫܸ̈ܐ ܡܠܸܐ܀
45 ܡܲܘܬܵܐ܃ ܩܵܡܸܬ ܘܲܚܙܼܝܬ ܐܲܝܟ ܕܲܦܩܲܕܬ ܘܡܸܢ ܒܸܝܬ ܚܲܫܲܘ̈ܗܝ ܚܲܝܸ̈ܐ ܢܒܲܥܘ܂ ܕܒܲܥܛܵܗ݀ ܠܲܫܝܽܘܠ ܘܗܵܐ ܢܵܝܕܵܐ ܘܸܐܢ ܠܵܐ ܦܵܩܸܕ ܠܵܐ ܫܵܠܝܵܐ܀
46 ܒܼܝܫܵܐ܃ ܪܲܒܵܐ ܗ̄ܝ ܡܲܘܬܵܐ ܡܘ݁ܢ ܕܵܐܡܪܲܬ ܚܲܕܬܵܐ ܗ̄ܝ ܗܵܕܸܐ ܕܲܡܡܲܠܠܲܬ܂ ܫܪܸܐ ܗ̄ܘ ܫܽܘܠܛܵܢܵܟ ܐܲܝܟ ܕܵܐܡܪܲܬ ܐܸܢ ܡܸܢ ܡܼܝܬܵܐ ܡܸܣܬܲܪܕܲܬ܀
47 ܡܲܘܬܵܐ܃ ܪܲܒܵܐ ܗ̄ܝ ܒܼܝܫܵܐ ܕܠܵܐ ܝܵܕܥܲܬ ܕܵܐܦ ܫܽܘܠܛܵܢܵܟ ܕܼܝܠܵܟ ܫܪܸܐ ܗ̄ܘ܂ ܚܽܘܪ ܒܲܦܬܲܟܪ̈ܲܝܟ ܕܗܵܐ ܢܵܝܕܼܝܢ ܕܡܸܢ ܙܲܘܥܲܬܗܘ݁ܢ ܢܸܬܬܲܒܪܽܘܢ܀
48 ܒܼܝܫܵܐ܃ ܫܠܲܕܵܐ ܒܩܲܝܣܵܐ ܠܵܐ ܦܵܝܫܵܐ ܟܡܵܐ ܐܸܢ ܬܸܥܪܽܘܩ ܥܠܲܝܟ ܐܵܬܝܵܐ܂ ܦܽܘܩ ܩܲܒܸܠܵܝܗܝ ܘܲܐܥܸܠ ܚܒܽܘܫ ܘܟܲܬܲܪ ܢܸܚܙܸܐ ܡܘ݁ܢ ܡܸܣܬܥܲܪ܀
49 ܡܲܘܬܵܐ܃ ܫܠܲܕܸܗ ܕܝܸܫܽܘܥ ܐܸܢ ܥܵܪܨܵܐ ܡܩܲܒܸܠ ܐ̄ܢܵܐ ܠܵܗ݀ ܕܠܵܐ ܒܨܸܒܝܵܢܝ܂ ܘܵܝ ܠܵܗ݀ ܠܲܫܝܽܘܠ ܡܵܢܵܐ ܗܘܵܗ݀ ܕܲܒܡܲܥܲܠܬܸܗ ܡܸܣܬܲܕܩܵܐ܀
50 ܒܼܝܫܵܐ܃ ܬܵܐ ܠܵܟ ܡܲܘܬܵܐ ܕܸܐܢܵܐ ܘܲܐܢ̄ܬ ܚܵܒܢܲܢ ܡܸܟܼܝܠ ܘܲܠܥܵܠܡܼܝܢ܂ ܕܸܐܢ ܒܲܫܪܵܪܵܐ ܕܝܸܫܽܘܥ ܙܟܵܐ ܘܗܽܘ ܪܵܕܸܦ ܠܲܢ ܡܸܢ ܥܵܠܡܵܐ܀
51 ܡܲܘܬܵܐ܃ ܬܵܐ ܠܵܟ ܒܼܝܫܵܐ ܐܸܢܵܐ ܘܲܐܢ̄ܬ ܢܸܒܟܸܐ ܠܢܲܦܫܲܢ ܡܵܢܵܐ ܗܘܵܢ܂ ܕܟܽܠܵܗ݀ ܫܒܼܝܬܲܢ ܥܲܡ ܒܸܙܬܲܢ ܐܸܫܬܲܒܝܲܬ ܠܵܗ݀ ܒܗܵܢ ܕܸܐܙܕܩܸܦ܀
52 ܬܲܘܕܼܝܬܵܐ ܠܵܟ ܡܵܪܵܐ ܕܟܽܠ ܕܲܒܝܲܕ ܡܲܘܬܵܟ ܡܼܝܬ ܡܲܘܬܵܐ܂ ܘܵܐܦ ܠܣܵܛܵܢܵܐ ܗܘܵܐ ܬܽܘܩܲܠܬܵܐ ܘܲܬܪ̈ܲܝܗܘ݁ܢ ܚܵܒܘ ܘܵܐܕܵܡ ܙܟܵܐ܀