← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

64494: DeathSatan3

Click on a word for lexical analysis
Click on a red-colored coordinate for comments and/or translations of the line

00 ܣܽܘܓܼܝܬܵܐ ܕܥܲܠ ܣܵܛܵܢܵܐ ܘܡܲܘܬܵܐ
01 ܬܲܘ ܢܸܫܡܲܥ ܟܲܕ ܡܸܬܟܲܬܫܼܝܢ ܥܲܠ ܙܵܟܽܘܬܵܐ܂ ܚܲܝ̈ܵܒܸܐ ܕܠܵܐ ܙܟܲܘ ܡܸܡܬܽܘܡ ܐܵܦ ܠܵܐ ܙܵܟܸܝܢ܀
02 ܡܲܘܬܵܐ ܠܒܼܝܫܵܐ ܐܵܡܲܪ ܠܸܗ ܠܚܲܪܬܵܐ ܗ̄ܝ ܙܵܟܽܘܬܝ܂ ܕܡܲܘܬܵܐ ܗ̄ܘ ܐܲܚܼܝܕ ܫܽܘܠܵܡܵܐ ܐܲܝܟ ܙܲܟܵܝܵܐ܀
03 ܣܵܛܵܢܵܐ܃ ܡܲܘܬܵܐ ܫܲܪܼܝܪܵܐ ܗܵܢܲܘ ܐܸܢ ܡܸܫܟܲܚ ܐܲܢ̄ܬ܂ ܕܲܬܡܼܝܬܼܝܘܗܝ ܠܐ̄ܢܵܫ ܟܲܕ ܚܲܝ ܒܲܪ̈ܓܼܝܓܵܬܵܐ܀
04 ܡܲܘܬܵܐ܃ ܐܸܢܵܐ ܕܡܵܝܬܼܝܢ ܗܵܐ ܚܵܙܸܐ ܐ̄ܢܵܐ ܛܵܒܸ̈ܐ ܘܒܼܝ̈ܫܸܐ܂ ܙܲܕܼܝ̈ܩܸܐ ܕܒܲܣܪܽܘܟ ܒܼܝܫܵܐ ܠܼܝ ܠܵܐ ܒܲܣܪܽܘܢܝ܀
05 ܣܵܛܵܢܵܐ܃ ܗܵܕܸܐ ܡܼܝܬܽܘܬܵܐ ܕܦܲܓܪܵܐ ܫܸܢܲܬ ܙܲܒܢܵܐ ܗ̄ܝ܂ ܠܵܐ ܬܸܣܒܲܪ ܡܲܘܬܵܐ ܕܡܲܘܬܵܐ ܐܲܢ̄ܬ ܕܲܐܝܟ ܛܸܠܵܠܵܐ ܐܲܢ̄ܬ܀
06 ܡܲܘܬܵܐ܃ ܠܵܟ ܒܼܝܫܵܐ ܙܟܲܐܽܘܟ ܟܼܐܢܸ̈ܐ ܐܵܦ ܙܵܟܸܝܢ ܠܵܟ܂ ܐܸܢܵܐ ܕܹܝܢ ܠܲܐܝܠܸܝܢ ܕܲܙܟܲܐܽܘܟ ܗܵܐ ܙܵܟܸܐ ܐ̄ܢܵܐ܀
07 ܣܵܛܵܢܵܐ܃ ܐܵܦ ܠܟܼܐܢܸ̈ܐ ܕܲܡܡܼܝܬ ܐܲܢ̄ܬ ܠܲܘ ܕܼܝܠܵܟ ܗ̄ܝ܂ ܒܥܸܠܲܬ ܐܵܕܵܡ ܗܲܘ ܕܲܙܟܼܝܬ ܐܸܫܬܼܝܘ ܟܵܣܵܐ܀
08 ܡܲܘܬܵܐ܃ ܗܵܐ ܫܝܽܘܠ ܡܲܠܝܵܐ ܣܲܕܽܘ̈ܡܵܝܸܐ ܘܵܐܬܽܘܪ̈ܵܝܸܐ܂ ܘܓܲܢ̄ܒܵܪܸ̈ܐ ܕܲܒܛܲܘܦܵܢܵܐ ܡܲܢܽܘ ܕܲܐܟܘܵܬܝ܀
09 ܣܵܛܵܢܵܐ܃ ܗܵܠܸܝܢ ܟܽܠܗܘ݁ܢ ܐܵܘ ܡܲܘܬܵܐ ܠܼܝ ܗ̄ܽܘ ܩܛܼܝܠܼܝܢ܂ ܐܸܢܵܐ ܐ̄ܢܵܐ ܕܲܐܚܛܼܝܬ ܐܢܘ݁ܢ ܐܲܝܟ ܕܲܢܣܽܘܦܽܘܢ܀
10 ܡܲܘܬܵܐ܃ ܝܲܘܣܸܦ ܕܲܙܟܵܟ ܙܟܼܝܬܸܗ ܐܵܘ ܣܵܛܵܢܵܐ܂ ܒܬܲܘܵܢܵܐ ܙܟܵܟ ܘܲܒܩܲܒܪܵܐ ܙܟܼܝܬ ܘܲܐܪܡܼܝܬܸܗ܀
11 ܣܵܛܵܢܵܐ܃ ܡܽܘܫܸܐ ܕܲܙܟܵܟ ܐܵܘ ܡܲܘܬܵܐ ܒܲܪܣܵܣ ܕܡܵܐ܂ ܙܟܵܟ ܒܡܸܨܪܸܝܢ ܘܥܲܠ ܟܹܐܦܵܐ ܡܲܢܽܘ ܕܲܙܟܵܝܗܝ܀
12 ܡܲܘܬܵܐ܃ ܐܸܠܼܝܵܐ ܕܠܵܐ ܕܚܸܠ ܡܸܢܵܟ ܐܵܘ ܣܵܛܵܢܵܐ܂ ܡܸܢ ܩܕܵܡ ܐܼܝܙܒܸܠ ܥܪܲܩ ܗ̄ܘܵܐ ܕܒܼܝ ܕܸܚܠܬܸܗ܀
13 ܣܵܛܵܢܵܐ܃ ܐܲܗܪܽܘܢ ܕܲܟܠܵܟ ܐܵܘ ܡܲܘܬܵܐ ܒܥܸܛܪܵܐ ܕܒܸܣ̈ܡܸܐ܂ ܩܕܵܫܸ̈ܐ ܕܕܲܗܒܵܐ ܝܸܗܒܸܬ ܠܸܗ ܘܲܚܫܸܠ ܥܸܓܠܵܐ܀
14 ܡܲܘܬܵܐ܃ ܠܲܐܓܽܘܢܵܐ ܢܚܸܬܬ ܥܲܡ ܐܼܝܽܘܒ ܘܲܙܟܵܟ ܘܲܣܠܸܩ܂ ܐܸܢܵܐ ܕܹܝܢ ܡܸܢ ܒܵܬܲܪ ܕܲܙܟܵܟ ܟܸܢ ܗܽܘ ܙܟܼܝܬܸܗ܀
15 ܣܵܛܵܢܵܐ܃ ܕܲܘܼܝܕ ܕܲܟܠܵܝܗܝ ܒܣܲܩܸܗ ܠܗܲܘ ܡܲܘܬܵܢܵܐ܂ ܥܲܠ ܐܸܓܵܪܵܐ ܙܟܼܝܬ ܠܗܲܘ ܕܲܙܟܵܐ ܠܓܽܘܠܝܲܕ܀
16 ܡܲܘܬܵܐ܃ ܗܲܘ ܕܲܥܩܲܪ ܒܸܝܬ ܒܲܥܠܵܐ ܗܲܝܟܲܠ ܒܼܝܫܵܐ܂ ܕܢܸܥܩܽܘܪ ܠܲܫܝܽܘܠ ܠܵܐ ܐܸܫܟܲܚ ܒܼܝܪܲܬ ܡܲܠܟܽܘܬܝ܀
17 ܣܵܛܵܢܵܐ܃ ܫܠܸܝܡܘ݁ܢ ܕܲܐܥܕܼܝ ܡܸܢ ܦܽܘܡܵܟ ܛܲܠܝܵܐ ܒܕܼܝܢܵܐ܂ ܦܵܥܠܵܐ ܥܒܲܕܬܸܗ ܒܣܲܝܒܽܘܬܸܗ ܠܲܥܠܲܘ̈ܵܬܵܐ܀
18 ܡܲܘܬܵܐ܃ ܫܡܽܘܐܸܝܠ ܕܲܒܕܲܗܒܵܐ ܒܲܣܪܵܟ ܐܵܘ ܣܵܛܵܢܵܐ܂ ܐܸܢܵܐ ܙܟܼܝܬܸܗ ܠܗܲܘ ܙܲܟܵܝܵܐ ܕܲܙܟܵܐ ܫܽܘܚܕܵܐ܀
19 ܣܵܛܵܢܵܐ܃ ܫܸܡܫܽܘܢ ܕܲܒܓܽܘܪܝܵܐ ܕܲܐܪܝܵܐ ܒܲܣܪܵܟ ܡܲܘܬܵܐ܂ ܒܕܲܠܼܝܠܲܐ ܡܵܐܢܵܐ ܕܠܼܝܠܵܐ ܒܪܲܚܝܵܐ ܟܕܲܢܬܸܗ܀
20 ܡܲܘܬܵܐ܃ ܝܽܘܫܼܝܵܐ ܡܸܢ ܛܲܠܝܽܘܬܸܗ ܫܵܛܵܟ ܒܼܝܫܵܐ܂ ܠܼܝ ܕܹܝܢ ܐܵܦܠܵܐ ܒܣܲܝܒܽܘܬܸܗ ܐܸܫܟܲܚ ܚܲܣܢܵܢܝ܀
21 ܣܵܛܵܢܵܐ܃ ܚܸܙܲܩܝܵܐ ܚܲܣܢܵܟ ܡܲܘܬܵܐ ܕܲܙܟܵܐ ܠܩܸܨܵܐ܂ ܕܽܘܪܬܸܗ ܕܲܫܒܲܩ ܬܸܗܪܵܐ ܘܚܲܘܼܝ ܓܲܙܲܘ̈ܗܝ܀
22 ܡܲܘܬܵܐ܃ ܝܽܘܚܲܢܵܢ ܕܲܙܟܵܟ ܒܼܝܫܵܐ ܘܚܲܣܼܝ ܘܲܐܥܡܸܕ܂ ܐܲܕܥܸܟܬܸܗ ܠܗܲܘ ܫܪܵܓܵܐ ܕܠܵܟ ܦܲܪܣܼܝ ܗ̄ܘܵܐ܀
23 ܣܵܛܵܢܵܐ܃ ܫܸܡܥܽܘܢ ܙܟܵܟ ܕܲܐܚܼܝ ܗ̄ܘܵܐ ܠܛܽܘܒܵܢܼܝܬܵܐ܂ ܒܲܐܢ̄ܬܬܵܐ ܙܟܵܟ ܘܲܒܝܲܕ ܐܲܢ̄ܬܬܵܐ ܙܟܼܝܬ ܘܲܐܟܦܲܪܬܸܗ܀
24 ܫܠܼܝ̈ܚܸܐ ܘܲܢܒܼܝܸ̈ܐ ܐܲܟܚܲܕ ܠܵܛܽܘܟ ܡܲܘܬܵܐ܂ ܕܲܐܝܟܵܐ ܗ̄ܝ ܙܵܟܽܘܬܸܗ ܕܡܲܘܬܵܐ ܘܥܽܘܩܣܵܗ݀ ܕܲܫܝܽܘܠ܀
25 ܠܡܵܪܵܟ ܒܲܫܝܽܘܠ ܚܒܲܫܬܵܝܗܝ ܥܲܒܕܵܐ ܠܼܝܛܵܐ܂ ܣܢܵܟ ܐܲܠܵܗܵܐ ܐܵܦ ܐ̄ܢܵܫ̈ܵܐ ܫܲܠܵܐ ܢܲܦܫܵܟ܀
26 ܡܲܘܬܵܐ܃ ܨܸܒܝܵܢܸܗ ܗܽܘ ܕܡܲܚܸܐ ܟܽܠ ܚܲܒܫܸܗ ܒܲܫܝܽܘܠ܂ ܐܲܢ̄ܬ ܗ̄ܽܘ ܩܪܲܝܬܵܝܗܝ ܠܗܵܕܸܐ ܕܠܵܐܕܵܡ ܐܲܚܛܼܝܬ܀
27 ܟܢܵܬܸܗ ܕܲܢܒܸܠ ܕܲܒܕܲܒܪܵܐ ܨܲܥܲܪ ܡܵܪܸܗ܂ ܚܪܸܡ ܦܽܘܡܵܟ ܗܲܘ ܕܸܐܡܲܪ ܠܸܗ ܕܦܸܠ ܘܲܣܓܽܘܕ ܠܼܝ܀