← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

64494: DeathSatan4

Click on a word for lexical analysis
Click on a red-colored coordinate for comments and/or translations of the line

00 ܣܽܘܓܼܝܬܵܐ ܕܥܲܠ ܣܵܛܵܢܵܐ ܘܡܲܘܬܵܐ ܥܽܘܢܼܝܬܵܐ܃ ܠܵܟ ܫܽܘܒܚܵܐ ܕܲܒܡܽܘܟܵܟܵܟ ܐܸܬܬܪܼܝܡ ܐܵܕܵܡ܂ ܘܲܒܡܼܝܬܽܘܬܵܟ ܐܸܬܢܲܚܲܡ ܘܲܦܢܵܐ ܠܲܥܕܸܢ݁
01 ܫܡܲܥܝ ܚܼܐܪܽܘܬܵܐ ܡܲܨܽܘܬܵܐ ܕܲܬܪܸܝܢ ܥܲܒ̈ܕܼܝܢ݁ ܟܲܕ ܒܲܚܕܵܕܸ̈ܐ ܡܸܬܟܲܣܣܼܝܢ ܕܲܡܚܼܝ̈ܠܸܐ ܐܢܘ݁ܢ܀
02 ܐܸܢ ܗܵܟܼܝܠ ܢܸܙܟܸܝܟܝ ܒܼܝܫܵܐ ܪܲܒ ܟܽܘܐܵܪܵܐ݁ ܡܲܘܬܵܐ ܟܢܵܬܸܗ ܡܲܟܸܣ ܠܸܗ ܕܲܡܚܼܝܠܵܐ ܗ̄ܘܵܐ܀
03 ܘܸܐܢ ܬܽܘܒ ܡܲܘܬܵܐ ܡܲܬܚܸܒ ܠܸܟܝ ܗܵܐ ܓܽܘܢܲܝܵܐ݁ ܕܒܼܝܫܵܐ ܟܢܵܬܸܗ ܒܵܣܲܪ ܠܸܗ ܕܲܐܝܟ ܛܸܠܵܠܵܐ ܗ̄ܘ܀
04 ܡܲܨܽܘܬܗܘ݁ܢ ܠܸܟܝ ܡܲܚܙܼܝܬܵܐ ܗ̄ܝ ܕܒܵܗ݀ ܗܽܘ ܬܸܚܙܼܝܢ݁ ܕܲܬܪ̈ܲܝܗܘ݁ܢ ܐܲܝܟ ܥܽܘܪܵܐ ܐܢܘ݁ܢ ܠܡܲܦܽܘܚܼܝܬܸܟܝ܀
05 ܘܵܐܦ ܢܒܼܝܸ̈ܐ ܘܲܫܠܼܝ̈ܚܸܐ ܒܡܽܘ̈ܠܟܵܢܲܝܗܘ݁ܢ݁ ܡܲܠܦܼܝܢ ܠܸܟܝ ܕܲܐܝܟ ܗܲܒܵܒܸ̈ܐ ܒܕܸܢܚܸܟܝ ܚܵܡܸܝܢ܀
06 ܣܵܛܵܢܵܐ܃ ܐܲܢ̄ܬ ܗ̄ܽܘ ܡܲܘܬܵܐ ܕܣܵܢܸܝܢ ܠܵܟ ܚܲܝܸ̈ܐ ܘܡܼܝ̈ܬܸܐ݁ ܠܟܽܠ ܪ̈ܽܘܟܵܒܼܝܢ ܫܵܪܸܐ ܐܲܢ̄ܬ ܘܲܡܚܲܒܸܠ ܐܲܢ̄ܬ܀
07 ܡܲܘܬܵܐ܃ ܠܲܘ ܡܲܘܬܵܐ ܓܲܠܝܵܐ ܩܵܛܸܠ ܐܵܘ ܣܵܛܵܢܵܐ݁ ܡܲܘܬܵܟ ܗܽܘ ܟܲܣܝܵܐ ܩܵܛܸܠ ܠܲܒܢ̈ܲܝ ܐ̄ܢܵܫ̈ܵܐ܀
08 ܣܵܛܵܢܵܐ܃ ܠܵܐ ܗ̄ܘܵܐ ܣܢܸܐ ܫܸܡܝ ܐܲܝܟ ܕܼܝܠܵܟ ܕܲܒܣܵܛܵܢܵܐ ܗ̄ܘ݁ ܡܲܠܲܐܟܵܐ ܐܲܡܬܸܠ ܢܲܦܫܸܗ ܒܽܐܘܪܚܵܐ ܠܒܸܠܥܲܡ܀
09 ܡܲܘܬܵܐ܃ ܡܵܐ ܕܵܡܸܐ ܠܵܟ ܫܡܵܟ ܗܵܢܵܐ ܐܵܘ ܣܵܛܵܢܵܐ݁ ܕܡܸܢ ܐܽܘܪܚܵܐ ܣܛܼܝܬ ܐܵܦ ܐܲܣܛܼܝܬ ܠܵܐܕܵܡ ܫܲܒܪܵܐ܀
10 ܣܵܛܵܢܵܐ܃ ܠܵܐ ܬܸܦܗܸܐ ܐܲܝܟ ܗܸܕܝܽܘܛܵܐ ܘܬܲܘܒܸܕ ܫܲܪܒܵܟ݁ ܕܪܽܘܫ ܡܲܘܬܵܐ ܐܸܢ ܣܵܦܸܩ ܐܲܢ̄ܬ ܠܲܗ̈ܦܵܟܵܬܵܐ܀
11 ܡܲܘܬܵܐ܃ ܝܵܕܲܥ ܐ̄ܢܵܐ ܕܲܨܢܼܝܥ ܐܲܢ̄ܬ ܗ̄ܽܘ ܐܵܘ ܣܵܛܵܢܵܐ݁ ܠܡܲܬܩܵܢܽܘ ܡܸܢ ܚܸܠܵܐ ܡܲܚܢܽܘܩܼܝܬܵܐ܀
12 ܣܵܛܵܢܵܐ܃ ܐܲܘܦܼܝ ܠܸܗ ܕܪܵܫܵܟ ܡܲܘܬܵܐ ܕܲܐܝܢܵܐ ܕܚܵܐܸܒ݁ ܡܵܐ ܕܲܓܡܲܪ ܘܲܐܘܦܼܝ ܡܸܠܲܘ̈ܗܝ ܫܲܪܼܝ ܡܨܲܥܲܪ܀
13 ܡܲܘܬܵܐ܃ ܨܹܝܕ ܟܽܠ ܐܼܝܬܲܝ ܙܲܟܵܝܵܐ ܘܒܵܟ ܚܵܐܸܒ ܐ̄ܢܵܐ݁ ܒܲܦܝܵܣܵܟ ܐܵܕܵܡ ܕܲܙܟܼܝܬܸܗ ܐܵܘ ܣܵܛܵܢܵܐ܀
14 ܣܵܛܵܢܵܐ܃ ܐܸܢܵܐ ܐ̄ܢܵܐ ܕܦܲܟܪܸܬ ܘܲܫܕܼܝܬܸܗ ܠܵܐܕܵܡ ܩܽܘܕܡܲܝܟ݁ ܒܓܲܢ̄ܒܵܪܵܐ ܕܦܲܟܪ̈ܲܝ ܨܸܢ̈ܥܵܬܝ ܐܸܬܼܝܬ ܐܸܬܢܲܨܲܚܬ܀
15 ܡܲܘܬܵܐ܃ ܐܸܢܵܐ ܐ̄ܢܵܐ ܕܩܸܛܪܸܬ ܚܲܕܬܵܐܼܝܬ ܬܵܓܵܐ ܒܬܼܒܸܝܠ݁ ܕܠܵܐܕܵܡ ܪܹܝܫ ܓܲܢ̄ܒܵܪܸ̈ܐ ܚܸܒܫܸܬ ܒܲܫܝܽܘܠ܀
16 ܣܵܛܵܢܵܐ܃ ܐܸܢܵܐ ܩܛܲܠܬܸܗ ܒܡܲܘܬܵܐ ܟܲܣܝܵܐ ܠܵܐܕܵܡ ܕܲܚܛܵܐ݁ ܐܲܢ̄ܬ ܡܲܘܬܵܐ ܠܡܼܝܬܵܐ ܗ̄ܘ ܐܲܡܼܝܬܸܬ ܕܲܩܛܼܝܠ ܗ̄ܘܵܐ ܠܼܝ܀
17 ܡܲܘܬܵܐ܃ ܟܲܕ ܨܵܒܸܝܬ ܒܼܝܫܵܐ ܠܡܸܙܟܵܐ ܢܲܦܫܵܟ ܐܲܣܢܼܝܬ݁ ܕܲܐܢ̄ܬ ܡܲܘܬܵܐ ܘܲܐܢ̄ܬ ܣܵܛܵܢܵܐ ܘܲܙܥܽܘܪ ܗ̄ܽܘ ܠܵܟ܀
18 ܣܵܛܵܢܵܐ܃ ܗܘܲܝܬ ܫܵܠܸܐ ܡܵܕܸܝܢ ܡܲܘܬܵܐ ܐܲܝܟ ܚܲܠܵܫܵܐ݁ ܕܠܵܐ ܒܡܸ̈ܠܸܐ ܘܠܵܐ ܒܲܥ̈ܒܵܕܸܐ ܥܲܙܼܝܬ ܠܲܡܩܵܡ܀
19 ܡܲܘܬܵܐ܃ ܠܒܼܝܫܬܵܟ ܗ̄ܽܘ ܙܵܟܸܝܬ ܒܼܝܫܵܐ ܐܸܢ ܦܵܪܸܫ ܐܲܢ̄ܬ݁ ܟܠܼܝܠܵܟ ܟܽܠܸܗ ܟܽܘܐܵܪܵܐ ܗ̄ܘ ܐܸܢ ܪܵܓܸܫ ܐܲܢ̄ܬ܀
20 ܐܸܢܵܐ ܐܸܚܽܘܒ ܘܲܐܢ̄ܬ ܬܸܨܛܲܚܸܐ ܐܵܘ ܣܵܛܵܢܵܐ݁ ܛܵܒ ܠܼܝ ܕܸܐܗܘܸܐ ܗܸܕܝܽܘܛܵܐ ܘܠܵܐ ܣܵܪܽܘܚܵܐ܀
21 ܒܪܼܝܟ ܟܼܐܢܵܐ ܕܲܦܠܲܓ ܐܢܘ݁ܢ ܕܲܐܘܸܝܢ ܗ̄ܘܲܘ ܛܵܒ݁ ܒܪܼܝܟ ܛܵܒܵܐ ܕܡܲܐܘܸܐ ܠܲܢ ܕܲܦܠܼܝܓܼܝܢ ܚܢܲܢ܀
22 ܐܸܙܟܸܐ ܠܒܼܝܫܵܐ ܒܫܽܘܒܩܵܢܵܟ ܐܵܘ ܚܵܐܸܢ ܟܽܠ݁ ܘܸܐܙܟܸܐ ܠܡܲܘܬܵܐ ܒܢܽܘܚܵܡܵܟ ܐܵܘ ܡܲܚܸܐ ܟܽܠ܀