← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

64494: ChurchZion

Click on a word for lexical analysis
Click on a red-colored coordinate for comments and/or translations of the line

00 ܣܽܘܓܼܝܬܵܐ ܕܥܲܠ ܥܹܕܬܵܐ ܘܨܸܗܝܽܘܢ ܥܽܘܢܼܝܬܵܐ܃ ܥܲܡܵܐ ܘܥܲܡ̈ܡܸܐ ܬܲܘ ܨܽܘܬܘ ܫܡܲܥܘ ܥܹܕܬܵܐ ܘܨܸܗܝܽܘܢ ܟܲܕ ܕܵܪ̈ܫܵܢ݁ ܘܒܲܬܪܼܝܨܽܘܬܵܐ ܥܲܩܸܒܘ ܚܙܲܘ ܕܡܲܢ ܗܼ̄ܝ ܟܲܠܬܸܗ ܕܲܡܪܲܝܡܵܐ܀
01 ܐܲܒܵܐ ܒܚܽܘܒܸܗ ܠܲܒܪܸܗ ܫܠܲܚ ܕܢܸܚܽܘܬ ܢܸܦܪܽܘܩ ܠܲܓܒܼܝܠܬܸܗ݀ ܘܒܲܪ̄ܬ ܥܸܒܪ̈ܵܝܸܐ ܐܸܫܬܲܓܫܲܬ ܘܲܠܦܽܘ̈ܩܕܵܢܲܘܗܝ ܠܵܐ ܩܲܒܠܲܬ܀
02 ܒܥܼܕܲܬ ܥܲܡ̈ܡܸܐ ܗܵܐ ܡܫܲܒܚܼܝܢ ܒܟܽܠ ܠܸܫܵܢܼܝ̈ܢ ܗܵܐ ܙܵܡܪܼܝܢ݁ ܒܟܽܠ ܦܽܘ̈ܡܼܝܢ ܗܵܐ ܡܒܲܪܟܼܝܢ ܠܗܲܘ ܕܲܒܚܽܘܒܸܗ ܠܗܘ݁ܢ ܐܸܬܓܠܼܝ܀
03 ܓܲܒܝܵܐ ܗ̄ܝ ܥܹܕܬܵܐ ܗܵܐ ܡܸܢ ܩܕܼܝܡ ܘܲܒܝܵܪܬܽܘܬܵܗ݀ ܗܵܐ ܚܵܕܝܵܐ݁ ܠܚܲܬܢܵܐ ܡܟܼܝܪܵܗ݀ ܗܵܐ ܡܝܲܩܪܵܐ ܘܲܠܡܲܠܟܽܘܬܸܗ ܗܵܐ ܡܣܲܟܝܵܐ܀
04 ܨܸܗܝܽܘܢ܃ ܡܲܢ ܗܼ̄ܝ ܗܵܕܸܐ ܕܥܲܡܝ ܕܵܪܫܵܐ ܘܡܸܢ ܒܲܝܬܵܐ ܕܼܝܠܝ ܠܼܝ ܛܵܪܕܵܐ݁ ܐܵܘ ܒܲܪ̄ܬ ܥܽܘܪ̈ܠܸܐ ܠܵܐ ܬܸܬܚܪܼܝܢ ܕܸܐܢܵܐ ܐܼܝܬܲܝ ܩܲܕܼܝܫܬܵܐ܀
05 ܥܹܕܬܵܐ܃ ܠܲܘ ܩܲܕܼܝܫܬܵܐ ܐܢ̄ܬ ܐܲܝܟ ܕܵܐܡܪܲܬܝ ܕܗܵܐ ܒܲܟܬܵܒܸ̈ܐ ܓܲܘܪܸܟܝ ܪܫܼܝܡ݁ ܣܲܒܝ ܠܸܟܝ ܘܲܩܪܼܝ ܘܗܵܐ ܒܵܗܬܲܬܝ ܕܠܲܘ ܒܲܫܪܵܪܵܐ ܩܲܕܼܝܫܬܵܐ ܐܲܢ̄ܬܝ܀
06 ܨܸܗܝܽܘܢ܃ ܡܸܢ ܪܹܝܫܼܝܬܵܐ ܓܒܵܢܝ ܡܵܪܝܵܐ ܘܝܲܗ̄ܒ ܠܼܝ ܩܝܵܡܵܐ ܕܠܵܐ ܡܸܫܬܪܸܐ݁ ܘܒܲܪܸܟ ܝܵܪܬܽܘܬܝ ܐܵܦ ܩܲܕܫܲܢܝ ܘܲܒܒܽܘܪ̈ܟܵܬܸܗ ܝܲܠ̈ܕܲܝ ܣܓܼܝܘ܀
07 ܥܹܕܬܵܐ܃ ܨܒܵܐ ܒܸܟܝ ܡܵܪܝܵܐ ܘܠܵܐ ܐܸܨܛܒܼܝܬܝ ܘܝܲܗ̄ܒ ܠܸܟܝ ܩܝܵܡܵܐ ܘܠܵܐ ܢܛܲܪܬܼܝܘܗܝ݁ ܘܡܸܛܽܠ ܗܵܕܸܐ ܐܵܦ ܐܲܦܩܸܟܝ ܘܝܲܠܕܲܝ̈ܟܝ ܒܬܼܒܸܝܠ ܗܵܐ ܡܒܲܕܪܼܝܢ܀
08 ܨܸܗܝܽܘܢ܃ ܗܵܐ ܐܲܒܪܵܗܵܡ ܐܵܒܝ ܪܵܚܡܵܐ ܒܸܝܬ ܐܲܠܵܗܵܐ ܩܲܕܼܝܫ ܘܟܼܐܝܢ݁ ܘܒܵܬܪܸܗ ܐܼܝܬܲܝ ܘܠܼܝ ܡܲܓܥܠܵܐ ܒܲܝܬܵܝܽܘܬܵܐ ܠܡܘ݁ܢ ܫܵܢܝܲܬܝ܀
09 ܥܹܕܬܵܐ܃ ܩܲܕܼܝܫ ܐܲܒܪܲܡ ܘܼܐܝܣܚܩ ܒܪܸܗ ܘܝܲܥܩܽܘܒ ܟܼܐܝܢ ܗ̄ܽܘ ܐܲܝܟ ܡܸܠܬܸܟܝ݁ ܘܲܐܢ̄ܬܝ ܓܲܝܵܪܬܵܐ ܡܟܼܝܪܸܟܝ ܣܢܲܝܬܝ ܘܡܸܢ ܐܲܒܵܗܲܝ̈ܟܝ ܡܵܢ ܝܵܪܬܲܬܝ܀
10 ܨܸܗܝܽܘܢ܃ ܐܵܘ ܒܲܪ̄ܬ ܥܲܡ̈ܡܸܐ ܠܵܐ ܬܸܬܚܪܼܝܢ ܕܠܼܝ ܒܲܠܚܽܘܕܲܝ ܓܒܵܢܝ ܡܵܪܝܵܐ݁ ܘܲܠܡܸܨܪ̈ܵܝܸܐ ܕܲܐܒܸܫܘ ܠܼܝ ܥܣܲܪ ܡܲܚ̈ܘܵܬܵܐ ܐܲܠܵܗܝ ܡܚܵܐ܀
11 ܥܹܕܬܵܐ܃ ܡܸܢ ܥܲܒܕܽܘܬܵܐ ܕܲܒܡܸܨܪܸܝܢ ܐܲܦܩܸܟܝ ܡܽܘܫܸܐ ܘܠܸܗ ܠܵܐ ܫܡܲܥܬܝ݁ ܘܸܐܢܵܐ ܣܵܓܕܵܢ ܘܲܡܝܲܩܪܵܢ ܠܡܵܪܸܗ ܕܡܽܘܫܸܐ ܕܨܸܐܕܲܝ ܢܚܸܬ܀
12 ܨܸܗܝܽܘܢ܃ ܠܼܝ ܗ̄ܽܘ ܕܲܚܙܵܢܝ ܝܲܡܵܐ ܘܙܵܥ ܘܽܐܘܪܚܵܐ ܒܓܲܘܸܗ ܕܪܲܫ ܘܲܐܥܒܪܲܢܝ݁ ܘܦܸܪܥܽܘܢ ܕܲܚܙܵܢܝ ܒܵܬܲܪܝ ܪܕܲܦ ܘܲܒܓܲܘ ܝܲܡܵܐ ܚܲܝܠܸܗ ܛܒܲܥ܀
13 ܥܹܕܬܵܐ܃ ܡܸܛܽܠ ܡܽܘܫܸܐ ܝܲܡܵܐ ܥܒܲܪܬܝ ܘܡܸܛܽܠ ܐܲܗܪܽܘܢ ܓܲܠ̈ܠܸܐ ܫܘܲܪܬܝ݁ ܘܡܸܛܽܠ ܗܵܢܵܐ ܠܵܐ ܬܸܬܚܪܼܝܢ ܕܠܲܘ ܒܲܨܠܽܘܬܸܟܝ ܝܲܡܵܐ ܦܠܲܓܬܝ܀
14 ܨܸܗܝܽܘܢ܃ ܠܼܝ ܒܲܠܚܽܘܕܲܝ ܒܓܲܘ ܡܲܕܒܪܵܐ ܬܪܲܥ ܛܲܪܵܢܵܐ ܘܡܲܝ̈ܵܐ ܐܸܫܬܼܝܬ݁ ܘܡܲܢܢܵܐ ܒܚܽܘܪܒܵܐ ܗܽܘ ܐܲܘܟܠܲܢܝ ܘܣܲܠܘܲܝ ܕܝܲܡܵܐ ܗܽܘ ܣܲܒܥܲܢܝ܀
15 ܥܹܕܬܵܐ܃ ܬܪܲܥ ܛܲܪܵܢܵܐ ܘܲܐܘܣܸܦܬܝ ܚܛܲܝܬܝ ܘܲܐܚܸܬ ܡܲܢܢܵܐ ܘܠܵܐ ܐܸܬܟܠܼܝܬܝ݁ ܘܲܪܓܸܙ ܡܵܪܝܵܐ ܘܲܐܣܓܼܝ ܚܪܲܒ ܐܵܦ ܠܲܐܒܵܗܲܝ̈ܟܝ ܥܲܠ ܕܡܲܪܡܪܽܘܗܝ܀
16 ܨܸܗܝܽܘܢ܃ ܠܛܽܘܪܵܐ ܕܣܼܝܢܲܝ ܡܽܘܫܸܐ ܣܠܸܩ ܘܡܸܢ ܐܲܠܵܗܵܐ ܟܬܲܒ ܝܲܗ̄ܒ ܠܼܝ݁ ܟܽܠ ܦܽܘ̈ܩܕܵܢܼܝܢ ܘܵܐܦ ܣܲܒܪܲܢܝ ܕܝܵܪܬܽܘܬ ܥܲܡ̈ܡܸܐ ܡܲܘܪܸܬ ܠܼܝ܀
17 ܥܹܕܬܵܐ܃ ܝܲܗ̄ܒ ܠܸܟܝ ܠܽܘ̈ܚܸܐ ܕܲܪܫܼܝܡ ܒܗܸܝܢ ܟܽܠ ܦܽܘ̈ܩܕܵܢܼܝܢ ܡܸܢ ܡܵܪܝܵܐ݁ ܘܲܥܒܲܕܬܝ ܥܸܓܠܵܐ ܒܓܲܘ ܡܲܕܒܪܵܐ ܘܲܛܥܲܝܬܝ ܐܸܡܪܲܬܝ ܕܗܽܘ ܐܲܦܩܸܟܝ܀
18 ܨܸܗܝܽܘܢ܃ ܨܲܠܼܝ ܡܽܘܫܸܐ ܩܕܵܡ ܡܵܪܝܵܐ ܘܥܲܡ̈ܡܸܐ ܘܡܲܠܟܸ̈ܐ ܡܸܢܝ ܐܸܙܕܟܼܝܘ݁ ܘܝܸܫܽܘܥ ܒܲܪ ܢܽܘܢ ܫܸܡܫܵܐ ܟܠܵܐ ܘܲܐܘܪܬܲܢܝ ܐܲܪܥܵܐ ܘܡܲܠܟܸ̈ܐ ܚܪܲܒ܀
19 ܥܹܕܬܵܐ܃ ܝܼܪܸܬܬܝ ܥܲܡ̈ܡܸܐ ܘܲܐܪ̈ܥܵܬܗܘ݁ܢ ܘܠܲܦܬܲܟܪ̈ܲܝܗܘ݁ܢ ܠܸܒܸܟܝ ܪܚܸܡ݁ ܘܗܵܐ ܐܸܬܚܲܠܲܛܬܝ ܒܲܝܢܵܬܗܘ݁ܢ ܘܠܲܓܠܼܝ̈ܦܲܝܗܘ݁ܢ ܗܵܐ ܣܵܓܕܲܬܝ܀
20 ܒܓܲܘ ܐܲܪ̈ܥܵܬܸܟܝ ܐܲܣܓܼܝܬܝ ܣܵܡܬܝ ܦܬܲܟܪܸ̈ܐ ܘܨܲܠܡܸ̈ܐ ܘܲܠܗܘ݁ܢ ܦܠܲܚܬܝ݁ ܘܲܠܦܵܪܽܘܩܸܟܝ ܠܸܗ ܠܵܐ ܫܡܲܥܬܝ ܘܡܸܢ ܒܸܝܬ ܐܲܒܽܘܗܝ ܗܵܐ ܐܲܦܩܸܟܝ܀