← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

64494: SynagogueChurch

Click on a word for lexical analysis
Click on a red-colored coordinate for comments and/or translations of the line

00 ܣܽܘܓܼܝܬܵܐ ܕܥܲܠ ܟܢܽܘܫܬܵܐ ܘܥܹܕܬܵܐ
01 ܗܵܐ ܠܥܼܕ̈ܵܬܵܐ ܕܪܵܫܵܐ ܢܦܲܠ ܘܲܒܬܲܟܬܽܘܫܵܐ ܗܵܐ ܩܵܝ̈ܡܵܢ݁ ܢܸܫܡܲܥ ܐܲܚ̈ܲܝ ܡܘ݁ܢ ܐܵܡܪ̈ܵܢ ܒܲܕܪ̈ܵܫܲܝܗܸܝܢ ܟܲܕ ܙܵܡܪ̈ܵܢ܀
02 ܟܢܽܘܫܬܵܐ ܘܥܹܕܬܵܐ ܥܠܲܝ ܢܼܐܡܪ̈ܵܢ ܒܬܸܗܪܵܐ ܪܲܒܵܐ ܬܲܘ ܨܽܘܬܘ ܫܡܲܥܘ݁ ܐܲܝܕܵܐ ܡܸܢܗܸܝܢ ܡܸܙܕܲܟܝܵܐ ܩܕܵܡ ܟܼܐܢܽܘܬܵܐ ܕܗܼܝ ܫܵܡܥܵܐ܀
03 ܒܲܪ̄ܬ ܥܸܒܪ̈ܵܝܸܐ ܗܵܐ ܣܵܪܒܵܐ ܕܒܸܝܬ ܐܲܠܵܗܵܐ ܗܼܝ ܝܵܪܬܵܐ݁ ܘܥܹܕܬܵܐ ܠܩܽܘܒܠܵܗ݀ ܗܵܐ ܐܵܡܪܵܐ ܕܒܲܪܬܵܐ ܐܸܢܵܐ ܝܵܪܽܘܬܬܵܐ܀
04 ܕܽܘܢܘ ܫܵܡܽܘ̈ܥܸܐ ܒܲܝܢܵܬܗܸܝܢ ܒܩܽܘܫܬܵܐ ܓܲܠܝܵܐ ܕܠܵܐ ܡܸܨܛܠܸܐ݁ ܡܵܐ ܕܡܸܠܲܝ̈ܗܸܝܢ ܣܵܟܵܐ ܫܩܲܠ̈ܝ ܗܲܒܘ ܙܵܟܽܘܬܵܐ ܠܫܲܪܼܝܪܬܵܐ܀
05 ܟܢܽܘܫܬܵܐ܃ ܐܵܡܪܵܐ ܟܢܽܘܫܬܵܐ ܒܓܲܘ ܡܲܕܒܪܵܐ ܡܲܟܪܲܢܝ ܐܲܒܵܐ ܘܠܸܗ ܚܵܝܪܵܢܝ݁ ܘܲܐܝܟ ܕܸܐܫܬܲܘܕܼܝ ܠܼܝ ܝܵܪܬܵܢܝ ܘܠܸܟܝ ܒܲܪ̄ܬ ܥܽܘܪ̈ܠܸܐ ܡܲܢ ܐܲܝܬܼܝܟܝ܀
06 ܥܹܕܬܵܐ܃ ܐܵܡܪܵܐ ܥܹܕܬܵܐ ܒܪܵܐ ܕܸܐܙܕܩܸܦ ܥܲܒܕܲܢܝ ܥܲܡܸܟܝ ܝܵܪܽܘܬܬܵܐ݁ ܥܪܸܐ ܗ̄ܽܘ ܒܲܝܬܵܐ ܠܵܐ ܬܸܚܣܡܼܝܢ ܢܼܐܪܲܬ ܐܲܟܚܕܵܐ ܐܸܢܵܐ ܘܲܐܢ̄ܬܝ܀
07 ܟܢܽܘܫܬܵܐ܃ ܒܛܽܘܪܵܐ ܕܣܼܝܢܲܝ ܐܸܬܚܲܬܡܲܬ ܦܸܪܢܼܝܬܵܐ ܕܼܝܠܝ ܕܲܐܒܵܐ ܟܬܲܒ݁ ܘܠܼܝ ܒܲܠܚܽܘܕܲܝ ܐܸܫܬܲܘܕܝܵܗ݀ ܠܲܐܪܥܵܐ ܟܽܠܵܗ݀ ܘܠܵܐ ܝܵܪܬܲܬܝ܀
08 ܥܹܕܬܵܐ܃ ܒܲܝܬܵܐ ܗ̄ܘ ܪܲܒܵܐ ܘܠܵܐ ܡܸܙܕܪܸܒ ܕܟܽܠܗܘ݁ܢ ܥܲܡ̈ܡܸܐ ܠܸܗ ܢܸܥܠܽܘܢ݁ ܚܲܕ ܗ̄ܽܘ ܐܲܒܵܐ ܒܲܡܒܲܕܪܸ̈ܐ ܘܡܲܘܪܸܬ ܗܽܘ ܠܼܝ ܕܸܐܬܟܲܢܫܸܬ܀
09 ܟܢܽܘܫܬܵܐ܃ ܓܢܽܘܢܵܐ ܩܛܲܪ ܠܼܝ ܒܓܲܘ ܡܲܕܒܪܵܐ ܥܢܵܢܵܐ ܕܢܽܘܗܪܵܐ ܥܲܠ ܪܹܝܫܝ ܬܠܵܐ݁ ܐܵܦ ܥܲܡܽܘܕܵܐ ܕܢܽܘܪܵܐ ܫܩܲܠ ܕܡܲܢܗܲܪ ܗ̄ܘܵܐ ܠܼܝ ܒܗܵܝ ܕܲܐܚܒܲܢܝ܀
10 ܥܹܕܬܵܐ܃ ܓܢܽܘܢܸܟܝ ܪܲܒ ܗ̄ܘܵܐ ܘܲܫܒܼܝܚ ܗ̄ܘܵܐ ܐܸܠܽܘ ܥܸܓܠܵܐ ܠܵܐ ܛܲܡܐܸܟܝ݁ ܗܵܐ ܒܲܓܢܽܘܢܸܟܝ ܓܲܘܪܸܟܝ ܪܫܼܝܡ ܐܲܒܵܐ ܢܸܚܽܘܢ ܐܵܦ ܠܼܝ ܘܠܸܟܝ܀
11 ܟܢܽܘܫܬܵܐ܃ ܕܼܝܠܝ ܗܼܝ ܐܲܪܥܵܐ ܘܠܵܐ ܫܵܩܠܲܬܝ ܡܸܢ ܝܵܪܬܽܘܬܵܐ ܕܠܼܝ ܙܵܕܩܵܐ݁ ܕܥܲܡ ܐܲܒܪܵܗܵܡ ܬܲܢܘܲܝ ܥܒܲܕ ܕܟܽܠܵܗ݀ ܐܲܪܥܵܐ ܠܼܝ ܢܸܬܠܼܝܗ݀܀
12 ܥܹܕܬܵܐ܃ ܕܼܝܠܸܟܝ ܬܸܗܘܸܐ ܐܲܪܥܵܐ ܫܠܵܝ ܝܼܪܲܬܝ ܟܽܠܵܗ݀ ܘܠܵܐ ܚܵܣܡܵܢܝ݁ ܕܸܐܢܵܐ ܐܲܪܥܵܐ ܠܵܐ ܒܵܥܝܵܢܝ ܕܨܹܝܕ ܡܟܼܝܪܝ ܠܪܲܘܡܵܐ ܡܸܬܥܲܠܝܵܢܝ܀
13 ܟܢܽܘܫܬܵܐ܃ ܗܵܐ ܡܵܟܽܘܪ̈ܲܝ ܢܒܼܝܸ̈ܐ ܗ̄ܘܲܘ ܩܪܼܝ ܒܲܟܬܵܒܸ̈ܐ ܘܲܚܙܼܝ ܒܗܘ݁ܢ݁ ܕܟܽܠܗܘ݁ܢ ܙܲܝܚܽܘܢܝ ܐܵܦ ܪܲܡܪܡܘ݁ܢܝ ܘܲܐܢ̄ܬܝ ܦܵܗܼܝܬܵܐ ܡܸܢ ܟܸܢܫܸܟܝ܀
14 ܥܹܕܬܵܐ܃ ܗܵܐ ܒܲܟܬܵܒܸ̈ܐ ܓܲܘܪܸܟܝ ܪܫܼܝܡ ܕܥܸܓܠܵܐ ܘܒܲܥܠܵܐ ܡܟܲܪܘ ܣܲܒܠܽܘܟܝ݁ ܘܲܡܟܼܝܪܽܘܬܸܟܝ ܩܲܕܼܝܫܬܵܐ ܠܵܐ ܩܲܕܼܝܬܵܗ݀ ܕܙܲܢܼܝܬܝ ܠܸܟܝ܀
15 ܟܢܽܘܫܬܵܐ܃ ܘܲܥܸܕ ܐܲܒܵܐ ܟܽܠ ܥܲܡ̈ܡܼܝܢ ܕܢܼܐܬܽܘܢ ܠܲܚܠܽܘܠܝ ܙܲܝܚܲܢܝ݁ ܘܲܠܒܸܪ̈ܝܵܬܵܐ ܦܩܲܕ ܫܲܡܫܲܢܝ ܘܡܽܘܫܸܐ ܘܝܸܫܽܘܥ ܗܘܲܘ ܣܵܗ̈ܕܲܝ܀
16 ܥܹܕܬܵܐ܃ ܘܲܥܸܕܬܝ ܐܵܦ ܐܲܢ̄ܬܝ ܟܲܕ ܐܸܬܡܟܲܪܬܝ ܠܪܹ̈ܝܫܸܐ ܕܥܲܡ̈ܡܸܐ ܘܥܲܠܘ ܛܲܢܦܽܘܟܝ݁ ܠܲܐܗܪܽܘܢ ܨܲܚܼܝܬܝ ܘܲܠܚܽܘܪ ܪܓܲܡܬܝ ܒܲܕܓܽܘܢ ܙܲܢܼܝܬܝ ܘܗܵܐ ܣܵܪܒܲܬܝ܀
17 ܟܢܽܘܫܬܵܐ܃ ܙܵܢܼܝܬܵܐ ܐܲܢ̄ܬܝ ܘܗܵܐ ܣܵܗܕܼܝܢ ܨܲܠܡܸ̈ܐ ܘܨܼܝܪܸ̈ܐ ܕܲܥܒܲܕܬܝ ܠܸܟܝ݁ ܘܩܸܢ̈ܝܵܬܵܐ ܕܲܣܓܸܕܬܝ ܠܗܸܝܢ ܘܒܸܝܬ ܩܲܕܼܝܫܵܐ ܡܘ݁ܢ ܥܵܒܕܲܬܝ܀
18 ܥܹܕܬܵܐ܃ ܙܵܢܼܝܬܵܐ ܗ̄ܘܼܝܬ ܘܸܐܬܚܲܪܪܸܬ ܣܚܼܝܬ ܒܲܥܡܵܕܵܐ ܘܸܐܬܩܲܕܫܸܬ݁ ܘܲܒܬܽܘܠܽܘܬܵܐ ܩܢܼܝܬ ܡܸܢܕܪܹܝܫ ܘܲܐܢ̄ܬܝ ܒܲܪ̄ܬ ܚܼܐܪܸ̈ܐ ܗܵܐ ܡܙܲܢܝܲܬ܀
19 ܟܢܽܘܫܬܵܐ܃ ܚܒܲܪܬܵܐ ܕܨܲܠܡܸ̈ܐ ܠܡܘ݁ܢ ܕܵܪܫܲܬܝ ܥܲܡ ܒܲܪ̄ܬ ܝܲܥܩܽܘܒ ܚܲܒܼܝܒܬܵܐ݁ ܐܲܒܵܗ̈ܲܝ ܟܼܐܢܸ̈ܐ ܡܟܲܪܘ ܐܲܥܠܽܘܢܝ ܠܒܸܝܬ ܩܲܕܼܝܫܵܐ ܦܽܘܩܝ ܐܲܢ̄ܬܝ ܠܒܲܪ܀
20 ܥܹܕܬܵܐ܃ ܚܒܲܪܬܵܐ ܕܨܲܠܡܸ̈ܐ ܗ̄ܘܼܝܬ ܡܸܢܩܕܼܝܡ ܘܗܵܫܵܐ ܚܒܲܪܬܸܟܝ ܕܼܝܠܸܟܝ ܗ̄ܘܼܝܬ݁ ܠܡܵܪܸܗ ܕܝܲܥܩܽܘܒ ܗܵܐ ܣܵܓܕܵܢܝ ܘܲܐܢ̄ܬܝ ܠܒܲܪ ܡܵܪܸܟܝ ܒܩܲܝܣܵܐ ܬܠܲܝܬܝ܀
21 ܟܢܽܘܫܬܵܐ܃ ܛܵܥܼܝܬܵܐ ܗ̄ܘܲܝܬܝ ܡܸܢ ܟܸܢܫܸܟܝ ܘܲܠܓܲܘ ܫܲܝܢܵܐ ܡܲܢ ܐܲܥܠܸܟܝ݁ ܒܥܵܢܸܗ ܕܼܐܝܣܚܩ ܡܲܢ ܚܲܠܛܸܟܝ ܕܪܽܘܫܡܸܗ ܕܲܐܒܪܲܡ ܠܵܐ ܐܼܝܬ ܥܠܲܝܟܝ܀
22 ܥܹܕܬܵܐ܃ ܛܵܥܼܝܬܵܐ ܗ̄ܘܼܝܬ ܘܒܵܬܲܪܝ ܢܦܲܩ ܪܵܥܝܵܐ ܛܵܒܵܐ ܒܥܵܐ ܘܸܐܫܟܚܲܢܝ݁ ܥܲܠ ܟܲܬܦ̈ܵܬܸܗ ܛܥܸܢ ܙܲܝܚܲܢܝ ܘܗܵܐ ܒܲܛܝܵܪܸܗ ܡܸܬܒܲܣܡܵܢܝ܀
23 ܟܢܽܘܫܬܵܐ܃ ܝܲܗ̄ܒ ܠܼܝ ܓܙܽܘܪܬܵܐ ܐܲܝܟ ܪܽܘܫܡܵܐ ܛܲܒܥܵܐ ܪܲܒܵܐ ܕܠܵܐ ܡܸܫܬܪܸܐ݁ ܘܡܸܢ ܟܽܠ ܥܲܡ̈ܡܼܝܢ ܟܢܲܫ ܐܲܥܠܲܢܝ ܘܕܼܝܠܸܗ ܐܸܢܵܐ ܠܡܘ݁ܢ ܣܵܪܒܲܬܝ܀
24 ܥܹܕܬܵܐ܃ ܝܲܗ̄ܒ ܠܸܟܝ ܛܲܒܥܸܗ ܟܲܕ ܐܲܢ̄ܬܝ ܗ̄ܘܲܝܬܝ ܥܵܢܸܗ ܒܲܠܚܽܘܕ ܒܓܲܘ ܥܵܠܡܵܐ݁ ܘܟܲܕ ܟܽܠ ܥܲܡ̈ܡܼܝܢ ܨܸܝܕܲܘܗܝ ܦܢܲܘ ܫܲܩܠܸܗ ܠܛܲܒܥܵܐ ܕܠܵܐ ܡܸܬܒܥܸܐ܀
25 ܟܢܽܘܫܬܵܐ܃ ܟܲܕ ܡܸܢ ܡܸܨܪܸܝܢ ܩܪܵܐ ܘܲܐܦܩܲܢܝ ܛܽܘܪܸ̈ܐ ܪܲܩܸܕܘ ܐܲܝܟ ܐܸܡܪܸ̈ܐ݁ ܘܕܵܨ̈ܝ ܪ̈ܵܡܵܬܵܐ ܐܲܝܟ ܐܲܝ̈ܠܸܐ ܘܙܲܝܲܚܘ ܠܲܚܠܽܘܠܝ ܟܽܠ ܥܲܡ̈ܡܼܝܢ܀
26 ܥܹܕܬܵܐ܃ ܟܲܕ ܐܸܙܕܲܝܲܚܬܝ ܐܲܝܟ ܟܲܠܬܵܐ ܡܲܫܟܢܸܗ ܕܡܲܠܟܽܘܡ ܥܲܡܸܟܝ ܢܦܲܩ݁ ܘܟܲܘܟܒܵܐ ܘܟܲܐܽܘܢ ܕܲܣܓܸܕܬܝ ܠܸܗ ܘܣܵܗܸܕ ܗܽܘܫܲܥ ܕܗܽܘ ܦܲܪܣܸܝܟܝ܀
27 ܟܢܽܘܫܬܵܐ܃ ܠܼܝ ܢܵܡܽܘܣܵܐ ܝܲܗ̄ܒ ܐܲܒܵܐ ܫܲܒܸ̈ܐ ܘܥܼܐܕܸ̈ܐ ܘܗܵܐ ܢܵܛܪܵܢܝ݁ ܘܲܒܪܹܝܫ ܝܲܪ̈ܚܸܐ ܗܵܐ ܡܫܲܒܚܵܢܝ ܘܲܐܢ̄ܬܝ ܒܲܛܼܝܠܲܬܝ ܡܸܢ ܟܽܠܗܸܝܢ܀
28 ܥܹܕܬܵܐ܃ ܠܢܵܛܽܘܪ̈ܘܵܬܸܟܝ ܠܵܐ ܫܵܠܡܵܢܝ ܕܲܠܫܲܒܪܽܘܬܸܟܝ ܚܲܠܒܵܐ ܗ̄ܘ̈ܲܝ݁ ܗܵܐ ܡܸܐܟܽܘܠܬܵܐ ܫܲܪܼܝܪܬܵܐ ܬܵܝ ܢܸܬܒܲܣܲܡ ܐܸܢ ܨܵܒܝܲܬܝ܀
29 ܟܢܽܘܫܬܵܐ܃ ܡܲܝ̈ܵܐ ܒܚܽܘܪܼܝܒ ܬܪܲܥ ܘܲܐܫܩܝܲܢܝ ܡܸܢ ܛܲܪܵܢܵܐ ܥܲܠ ܕܲܐܚܒܲܢܝ݁ ܘܡܲܢܢܵܐ ܘܣܲܠܘܲܝ ܩܕܵܡܲܝ ܟܫܵܐ ܘܠܸܟܝ ܡܘ݁ܢ ܝܲܗ̄ܒ ܠܸܟܝ ܕܗܵܐ ܕܵܪܫܲܬܝ܀
30 ܥܹܕܬܵܐ܃ ܡܲܝ̈ܵܐ ܚܲܝܸ̈ܐ ܕܠܵܐ ܡܵܝܬܼܝܢ ܫܲܬܵܝܲܝ̈ܗܘ݁ܢ ܝܲܗ̄ܒ ܠܼܝ ܒܪܵܐ݁ ܢܸܒܥܵܐ ܪܲܒܵܐ ܒܕܲܦܢܸܗ ܬܪܲܥ ܥܲܡܝ ܐܸܬܒܲܣܲܡܝ ܠܵܐ ܚܵܣܡܵܢܝ܀
31 ܟܢܽܘܫܬܵܐ܃ ܢܒܼܝܸ̈ܐ ܟܽܠܗܘ݁ܢ ܠܼܝ ܡܝܲܩܪܼܝܢ ܘܲܐܒܵܗ̈ܵܬܵܐ ܠܼܝ ܡܲܚܒܼܝܢ݁ ܐܵܦ ܠܸܘܵܝܸ̈ܐ ܠܼܝ ܡܙܲܝܚܼܝܢ ܕܒܲܪܬܵܐ ܐܸܢܵܐ ܚܲܒܼܝܒܬܵܐ܀
32 ܥܹܕܬܵܐ܃ ܢܒܼܝܸ̈ܐ ܪܓܼܝܡܼܝܢ ܡܸܢ ܣܵܦܪ̈ܲܝܟܝ ܫܠܼܝ̈ܚܸܐ ܩܛܼܝܠܼܝܢ ܡܸܢ ܟܵܗ̈ܢܲܝܟܝ݁ ܠܡܵܪܸܐ ܢܒܼܝܸ̈ܐ ܒܩܲܝܣܵܐ ܬܠܵܝܗܝ ܚܡܽܘܠܝ ܣܲܦܣܼܪܸܟܝ ܩܵܛܽܘܠܬܵܐ܀
33 ܟܢܽܘܫܬܵܐ܃ ܣܵܗܸܕ ܡܽܘܫܸܐ ܕܦܲܪܢܼܝܬܝ ܪܫܲܡ ܕܨܸܒܥܸܗ ܕܸܐܡܵܐ ܟܬܵܒܝ ܚܲܬܡܸܬ݁ ܘܒܲܝܬܸܗ ܐܲܒܵܐ ܠܼܝ ܐܲܓܥܠܸܗ ܕܸܐܢܵܐ ܐܼܝܬܲܝ ܝܵܪܽܘܬܬܵܐ܀
34 ܥܹܕܬܵܐ܃ ܣܵܗܸܕ ܡܽܘܫܸܐ ܕܩܵܪܸܝܬܝ ܠܸܗ ܕܲܚܙܵܐ ܓܲܘܪܸܟܝ ܘܠܽܘ̈ܚܸܐ ܬܒܲܪ݁ ܕܓܲܝܵܪ̈ܵܬܵܐ ܠܵܐ ܝܵܪ̈ܬܵܢ ܬܠܼܝܚ ܗ̄ܽܘ ܟܬܵܒܸܟܝ ܡܘ݁ܢ ܣܵܪܒܲܬܝ܀
35 ܟܢܽܘܫܬܵܐ܃ ܥܲܡ̈ܡܸܐ ܘܡܲܠܟܸ̈ܐ ܩܕܵܡܲܝ ܚܪܲܒ ܘܥܸܠܸܬ ܝܸܪܬܸܬ ܐܽܘܚܕܵܢܗܘ݁ܢ݁ ܘܫܽܘܪܸ̈ܐ ܪ̈ܵܡܸܐ ܩܕܵܡܲܝ ܣܚܲܦ ܡܲܢ ܗܼܝ ܐܲܟܘܵܬܝ ܢܲܨܼܝܚܬܵܐ܀
36 ܥܹܕܬܵܐ܃ ܥܲܡ̈ܡܸܐ ܚܪܲܒ ܐܲܒܵܐ ܘܦܲܩܕܸܟܝ ܕܠܲܐܠܵܗܲܝ̈ܗܘ݁ܢ ܠܵܐ ܬܸܣܓܕܼܝܢ݁ ܘܲܕܠܵܐ ܫܡܲܥܬܼܝܘܗܝ ܗܵܐ ܒܲܕܪܸܟܝ ܘܲܩܪܵܐ ܠܥܲܡ̈ܡܸܐ ܕܠܸܗ ܢܸܦܠܚܽܘܢ܀
37 ܟܢܽܘܫܬܵܐ܃ ܦܬܲܚ ܠܲܟܬܵܒܸ̈ܐ ܘܲܩܪܼܝ ܒܗܘ݁ܢ ܫܲܪ̈ܒܲܝ ܪ̈ܵܡܸܐ ܕܡܸܫܬܲܒܚܼܝܢ݁ ܢܒܼܝܸ̈ܐ ܟܽܠܗܘ݁ܢ ܠܼܝ ܡܝܲܩܪܼܝܢ ܘܲܐܢ̄ܬܝ ܐܲܝܟܲܢܵܐ ܥܲܡܝ ܕܵܪܫܲܬܝ܀
38 ܥܹܕܬܵܐ܃ ܦܸܬܚܸܬ ܘܲܩܪܼܝܬ ܘܸܐܬܕܲܡܪܸܬ ܕܲܒܟܽܠ ܣܸܦܪܼ̈ܝܢ ܓܲܘܪܸܟܝ ܚܙܼܝܬ݁ ܨܲܥܪܸܟܝ ܪܲܒܵܐ ܟܬܵܒܸ̈ܐ ܡܠܸܝܢ ܘܓܲܠܝ̈ܵܢ ܐܲܦܲܝ̈ܟܝ ܘܲܡܡܲܠܠܲܬܝ܀
39 ܟܢܽܘܫܬܵܐ܃ ܨܲܠܡܸ̈ܐ ܘܨܼܝܪܸ̈ܐ ܒܸܟܝ ܐܸܬܚܫܸܠܘ ܦܬܲܟܪܸ̈ܐ ܟܽܠܗܘ݁ܢ ܐܲܢ̄ܬܝ ܗ̄ܽܘ ܥܒܲܕܬܝ݁ ܘܸܐܢܵܐ ܡܸܡܬܽܘܡ ܠܵܐ ܝܵܕܥܵܢܝ ܐܸܠܵܐ ܠܲܐܒܵܐ ܕܗܽܘ ܐܲܚܒܲܢܝ܀
40 ܥܹܕܬܵܐ܃ ܨܲܠܡܵܐ ܣܲܢܝܵܐ ܗ̄ܘ ܕܸܐܬܚܫܸܠ ܕܲܐܪܒܲܥ ܐܲܦܼ̈ܝܢ ܡܲܢ ܟܲܝ ܥܒܲܕ݁ ܐܲܪܒܲܥ ܐܲܦܼ̈ܝܢ ܗܵܐ ܣܵܗ̈ܕܵܢ ܕܲܓܠܸܐ ܗܽܘ ܓܲܘܪܸܟܝ ܘܠܵܐ ܫܵܠܝܲܬܝ܀
41 ܟܢܽܘܫܬܵܐ܃ ܩܕܵܡ ܟܼܐܢܽܘܬܵܐ ܚܲܘܼܝ ܠܲܢ ܕܲܐܝܟܲܢ ܘܲܒܡܘ݁ܢ ܡܸܫܬܲܒܗܪܲܬܝ݁ ܒܡܲܢܽܘ ܚܬܼܝܪܲܬܝ ܕܗܵܐ ܢܵܨܝܲܬܝ ܥܲܡ ܒܲܪ̄ܬ ܝܲܥܩܽܘܒ ܢܲܨܼܝܚܬܵܐ܀
42 ܥܹܕܬܵܐ܃ ܩܕܵܡܲܘܗܝ ܕܲܐܒܵܐ ܗܵܐ ܐܵܡܪܵܢܝ ܕܸܐܢܵܐ ܒܲܒܪܸܗ ܡܸܫܬܲܒܗܪܵܢܝ݁ ܗܲܘ ܕܲܙܩܲܦܬܼܝܘܗܝ ܗܽܘ ܐܲܦܢܝܲܢܝ ܘܒܸܗ ܗ̄ܽܘ ܚܬܼܝܪܵܢܝ ܘܲܡܡܲܠܠܵܢܝ܀
43 ܟܢܽܘܫܬܵܐ܃ ܪܲܒ ܗ̄ܽܘ ܚܸܣܕܸܟܝ ܐܸܢ ܝܵܕܥܲܬܝ ܐܸܢܵܐ ܙܩܲܦܬܸܗ ܥܲܠ ܕܲܐܛܥܝܲܢܝ݁ ܘܲܐܢ̄ܬ ܩܲܒܸܠܬܼܝܘܗܝ ܘܣܵܓܕܲܬܝ ܠܸܗ ܘܗܵܐ ܡܲܛܥܸܐ ܠܸܟܝ ܘܠܵܐ ܦܵܪܫܲܬܝ܀
44 ܥܹܕܬܵܐ܃ ܪܲܒ ܗ̄ܽܘ ܘܵܝܸܟܝ ܠܡܲܢܽܘ ܙܩܲܦܬܝ ܪܲܒ ܗ̄ܽܘ ܟܼܐܒܸܟܝ ܠܡܘ݁ܢ ܣܵܢܝܲܬܝ݁ ܒܨܲܠܡܵܐ ܕܫܽܘܒܚܸܗ ܕܲܐܒܵܐ ܟܦܲܪܬܝ ܘܥܲܠ ܕܲܥܘܼܝܪܲܬܝ ܠܵܐ ܒܵܚܪܲܬܝ܀
45 ܟܢܽܘܫܬܵܐ܃ ܫܲܐܸܠܝ ܘܼܝܠܲܦܝ ܐܸܢ ܨܵܒܝܲܬܝ ܕܲܐܒܵܐ ܓܢܼܝܙܵܐ ܗ̄ܘ ܘܠܵܐ ܡܸܬܚܙܸܐ݁ ܘܠܵܐ ܐܸܫܬܲܡܥܲܬ ܕܼܐܝܬ ܠܸܗ ܒܪܵܐ ܘܒܲܪ ܝܲܘܣܸܦ ܗ̄ܽܘ ܗܲܘ ܕܸܐܙܕܩܸܦ܀
46 ܥܹܕܬܵܐ܃ ܫܡܲܥܝ ܠܲܟܬܵܒܸ̈ܐ ܐܸܢ ܒܵܥܝܲܬܝ ܕܣܵܗܕܼܝܢ ܠܲܐܒܵܐ ܕܼܐܝܬ ܠܸܗ ܒܪܵܐ݁ ܘܥܲܠ ܕܲܙܩܲܦܬܼܝܘܗܝ ܗܵܐ ܒܵܣܪܲܬܝ ܕܵܐܦܠܵܐ ܐܼܝܬܲܘܗܝ ܟܲܕ ܛܵܒ ܓܠܸܐ ܗ̄ܘ܀
47 ܟܢܽܘܫܬܵܐ܃ ܬܸܡܗܸܬ ܠܼܝ ܒܸܟܝ ܟܡܵܐ ܛܵܥܝܲܬܝ ܕܲܠܒܲܪܢܵܫܵܐ ܗܵܐ ܣܵܓܕܲܬܝ݁ ܕܸܐܠܽܘ ܡܨܸܐ ܗ̄ܘܵܐ ܠܵܐ ܐܸܙܕܩܸܦ ܘܗܵܫܵܐ ܕܲܙܩܼܝܦ ܠܡܘ݁ܢ ܡܸܣܬܓܸܕ܀
48 ܥܹܕܬܵܐ܃ ܬܸܗܪܸܬ ܠܼܝ ܒܸܟܝ ܕܠܵܐ ܡܲܫܪܲܬܝ ܕܵܐܦ ܐܲܠܵܗܵܐ ܗ̄ܘ ܟܲܕ ܛܵܒ ܙܩܼܝܦ݁ ܗܵܐ ܒܲܙܩܼܝܦܸܗ ܠܡܲܘܬܵܐ ܩܛܲܠ ܘܲܐܢ̄ܬܝ ܥܲܠ ܡܵܢܵܐ ܠܵܐ ܡܗܲܝܡܢܲܬܝ܀
49 ܬܸܚܕܸܐ ܥܹܕܬܵܐ ܘܲܬܫܲܒܚܼܝܘܗܝ ܠܲܒܪܵܐ ܩܛܼܝܠܵܐ ܕܗܽܘ ܙܲܟܝܵܗ݀݁ ܒܲܐܪܒܲܥ ܦܸܢ̈ܝܵܢ ܗܽܘ ܪܲܡܪܡܵܗ݀ ܕܒܲܙܩܼܝܦܽܘܬܸܗ ܐܸܬܓܲܘܣܲܬ܀