← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

64494: SoulBody

Click on a word for lexical analysis
Click on a red-colored coordinate for comments and/or translations of the line

00 ܣܽܘܓܼܝܬܵܐ ܕܥܲܠ ܢܲܦܫܵܐ ܘܦܲܓܪܵܐ ܥܽܘܢܼܝܬܵܐ܃ ܒܪܼܝܟ ܕܸܐܬܬܲܚܬܼܝ ܘܦܲܓܪܵܐ ܠܒܸܫ ܘܲܠܢܲܦܫܵܐ ܒܦܲܓܪܵܐ ܚܲܝܸܕ݁ ܘܲܥܒܲܕ ܐܢܘ݁ܢ ܚܲܕ ܒܡܸܐܬܝܸܗ ܕܒܸܝܬ ܡܲܠܟܽܘܬܵܐ ܢܸܬܒܲܣܡܘ݁ܢ܀
01 ܠܢܲܦܫܵܐ ܘܦܲܓܪܵܐ ܕܪܵܫܵܐ ܢܦܲܠ ܘܲܒܬܲܟܬܽܘܫܵܐ ܪܲܒܵܐ ܪܡܸܝܢ݁ ܢܸܫܡܲܥ ܗܵܫܵܐ ܡܘ݁ܢ ܐܵܡܪܼܝܢ ܒܕܼܝܢܵܐ ܪܲܒܵܐ ܕܒܸܗ ܩܵܝܡܼܝܢ܀
02 ܛܸܒܵܐ ܕܕܼܝܢܵܐ ܡܣܲܪܸܕ ܠܗܘ݁ܢ ܘܗܵܢܵܐ ܒܗܵܢܵܐ ܡܸܬܥܲܕܠܼܝܢ݁ ܒܩܽܘܫܬܵܐ ܢܸܫܡܲܥ ܒܲܝܢܵܬܗܘ݁ܢ ܐܲܝܟ ܕܲܝܵܢܵܐ ܕܠܵܐ ܡܸܨܛܠܸܐ܀
03 ܐܵܡܪܵܐ ܢܲܦܫܵܐ ܠܵܐ ܡܬܽܘܡ ܚܛܼܝܬ ܘܲܒܒܼܝ̈ܫܵܬܵܐ ܠܵܐ ܐܸܨܛܠܼܝܬ݁ ܐܵܘ ܕܲܝܵܢܵܐ ܠܦܲܓܪܵܐ ܪܕܼܝ ܘܠܼܝ ܠܵܐ ܬܸܡܚܸܐ ܕܠܵܐ ܐܲܣܟܠܸܬ܀
04 ܐܵܡܲܪ ܦܲܓܪܵܐ ܥܲܡܝ ܒܵܠܥܲܬܝ ܐܸܢ ܟܼܐܢܽܘܬܵܐ ܠܲܢ ܕܵܝܢܵܐ݁ ܕܡܸܢ ܒܸܠܥܵܕܲܝܟܝ ܠܵܐ ܐܲܣܟܠܸܬ ܠܡܘ݁ܢ ܠܼܝ ܢܸܓ̈ܕܸܐ ܘܠܸܟܝ ܓܲܢܬܵܐ܀
05 ܢܲܦܫܵܐ ܒܵܟ ܗ̄ܽܘ ܦܲܓܪܵܐ ܢܒܲܥܘ ܟܽܠܗܘ݁ܢ ܚܲܫܸ̈ܐ ܒܼܝ̈ܫܸܐ ܘܠܼܝ ܠܵܐ ܡܛܲܘ݁ ܘܲܪ̈ܓܼܝܓܵܬܵܐ ܡܸܢܵܟ ܪ̈ܕܲܝ ܘܥܲܠ ܗܵܝ ܐܲܢ̄ܬ ܗ̄ܽܘ ܡܸܬܢܲܓܕܲܬ܀
06 ܦܲܓܪܵܐ ܒܸܟܝ ܗ̄ܽܘ ܢܲܦܫܵܐ ܡܸܬܬܙܼܝܥ ܗ̄ܘܼܝܬ ܘܪܵܓܽܘܫܽܘܬܵܐ ܒܸܟܝ ܩܲܒܠܸܬ݁ ܐܸܠܽܘ ܙܲܘ̈ܥܲܝܟܝ ܠܵܐ ܕܵܠܘ ܒܼܝ ܚܲܫܸ̈ܐ ܡܸܡܬܽܘܡ ܠܵܐ ܐܲܟܝܽܘܢܝ܀
07 ܢܲܦܫܵܐ ܓܲܠܝܵܐ ܗ̄ܝ ܗܵܕܸܐ ܕܪܵܡ ܗ̄ܽܘ ܟܝܵܢܝ ܐܵܦ ܡܸܢ ܚܲܫܸ̈ܐ ܘܡܸܢ ܪܸܓܬܵܐ݁ ܪܽܘܚܵܐ ܠܚܲܫܸ̈ܐ ܠܵܐ ܡܫܲܥܒܕܵܐ ܡܸܢܵܟ ܦܲܓܪܵܐ ܢܒܲܥ̈ܝ ܟܽܠܗܸܝܢ܀
08 ܦܲܓܪܵܐ ܓܲܠܝܵܐ ܗ̄ܝ ܗܵܕܸܐ ܕܥܲܡܝ ܒܵܠܥܲܬܝ ܐܸܢ ܕܲܝܵܢܵܐ ܠܵܐ ܡܸܨܛܠܸܐ݁ ܕܪܵܡ ܗ̄ܽܘ ܟܝܵܢܸܟܝ ܘܫܵܠܡܲܬܝ ܠܼܝ ܕܲܒ‍{‍ܩܼ‍}‍‍<‍ܒܼܝ‍>‍ܫ̈ܵܬܵܐ ܥܲܡܝ ܬܸܫܪܥܼܝܢ܀
09 ܢܲܦܫܵܐ ܕܼܝܠܝ ܗ̄ܽܘ ܟܠܼܝܠܵܐ ܘܲܐܢ̄ܬ ܚܵܝܒܲܬ ܕܲܒܒܼܝ̈ܫܵܬܵܐ ܠܵܐ ܐܸܨܛܒܼܝܬ݁ ܘܲܡܥܵܩܵܐ ܗ̄ܘܼܝܬ ܟܲܕ ܣܵܪܚܲܬ ܘܸܐܟܠܸܝܟ ܕܬܸܣܪܽܘܚ ܠܵܐ ܐܸܫܟܚܸܬ܀
10 ܦܲܓܪܵܐ ܕܼܝܠܝ ܗ̄ܽܘ ܢܸܓ̈ܕܸܐ ܐܲܝܟ ܕܵܐܡܪܲܬܝ ܘܸܐܢ ܒܵܠܲܥ ܐ̄ܢܵܐ ܥܲܡܝ ܒܵܠܥܲܬܝ݁ ܕܸܐܠܵܐ ܠܒܸܫܬܼܝܢܝ ܠܲܝܬ ܦܽܘܪܣܵܐ ܐܸܚܲܫ ܐܸܢܵܐ ܠܡܘ݁ܢ ܥܵܪܩܲܬܝ܀
11 ܢܲܦܫܵܐ ܗܲܘ ܕܲܝܵܢܵܐ ܬܪܼܝܨܵܐ ܪܓܼܝܫ ܕܲܣܢܼܝܬ ܥܲܘܠܵܐ ܟܡܵܐ ܕܸܐܫܟܚܸܬ݁ ܘܟܲܕ ܠܵܐ ܦܠܲܚܬܸܗ ܠܡܘ݁ܢ ܒܵܠܥܵܢ ܥܲܡܵܟ ܦܲܓܪܵܐ ܐܲܝܟ ܕܵܐܡܪܲܬ܀
12 ܦܲܓܪܵܐ ܗܵܐ ܕܲܝܵܢܵܐ ܕܩܵܪܝܲܬܝ ܠܸܗ ܢܸܚܙܸܐ ܕܨܵܡܸܬ ܘܸܐܬܟܲܫܦܸܬ݁ ܘܲܐܝܟܲܢ ܟܼܐܢܵܐ ܕܸܐܢܵܐ ܠܐܼܝܬ ܘܲܐܓܪܵܐ ܕܠܸܐܘܲܬܝ ܐܲܢ̄ܬܝ ܬܸܣܒܼܝܘܗܝ܀
13 ܢܲܦܫܵܐ ܘܵܠܸܐ ܕܬܸܕܲܥ ܨܲܘܡܵܐ ܕܨܵܡܬ ܐܸܢܵܐ ܥܨܼܝܬܵܟ ܘܸܐܬܲܝܬ ܠܸܗ݀ ܘܲܐܝܟ ܕܒܲܩܛܼܝܪܵܐ ܕܒܲܪܬܵܟ ܠܗܲܘ ܥܲܡܠܵܐ ܕܡܲܘܬܲܪ ܟܲܕ ܠܵܐ ܪܥܸܝܬ܀
14 ܦܲܓܪܵܐ ܘܵܠܸܐ ܡܵܕܸܝܢ ܕܲܒܟܽܠܗܸܝܢ ܐܲܢ̄ܬܝ ܬܸܒܠܥܼܝܢ ܐܲܝܟ ܕܵܐܡܪܲܬܝ݁ ܕܼܐܝܬ ܒܸܟܝ ܚܲܝܠܵܐ ܘܲܠܡܘ݁ܢ ܫܠܸܝܬܝ ܕܦܸܠܚܸܬ ܥܲܘܠܵܐ ܘܠܵܐ ܟܐܲܝܬܝ ܒܼܝ܀
15 ܢܲܦܫܵܐ ܙܲܕܼܝܩ ܕܵܝܢܵܢ ܘܠܵܐ ܕܵܚܠܵܢ ܘܲܬܟܼܝܠܵܐ ܐ̄ܢܵܐ ܕܠܵܐ ܚܵܝܒܵܢ݁ ܓܲܘܪܵܐ ܘܩܸܛܠܵܐ ܡܸܢܵܟ ܢܒܲܥܘ ܘܲܒܡܲܪܫܽܘܬܵܐ ܐܲܢ̄ܬ ܩܵܝܡܲܬ܀
16 ܦܲܓܪܵܐ ܙܲܕܼܝܩ ܘܲܬܪܼܝܨ ܕܲܢܚܽܘܪ ܒܼܝ ܕܡܸܢ ܕܲܫܒܲܩܬܼܝܢܝ ܠܵܐ ܓܵܪܸܬ݁ ܒܸܟܝ ܙܵܐܲܥ ܗ̄ܘܼܝܬ ܥܲܠ ܪܸܓܬܵܐ ܘܡܸܢ ܕܲܐܪܦܼܝܬܼܝܢܝ ܐܸܫܬܲܬܩܸܬ܀
17 ܢܲܦܫܵܐ ܐ̄ܚܝܵܢܬܵܐ ܐܸܢܵܐ ܕܥܼܝܪܸ̈ܐ ܫܠܼܝ ܘܲܐܢ̄ܬ ܕܲܚܼܝܚܵܐ ܠܡܘ݁ܢ ܕܵܪܫܲܬ݁ ܟܽܠ ܒܼܝ̈ܫܵܬܵܐ ܡܸܢܵܟ ܢܒܲܥ̈ܝ ܘܥܲܠ ܡܵܢܵܐ ܒܼܝ ܡܸܬܥܲܕܠܲܬ܀
18 ܦܲܓܪܵܐ ܐ̄ܚܝܵܢܬܵܐ ܕܥܼܝܪܸ̈ܐ ܐܲܢ̄ܬܝ ܐܲܝܟ ܕܵܐܡܪܲܬܝ ܘܸܐܢܵܐ ܥܲܦܪܵܐ ܘܫܵܠܡܲܬܝ ܠܼܝ݁ ܥܲܡ ܕܲܚܼܝܚܵܐ ܡܸܬܢܲܓܕܲܬܝ ܥܲܠ ܕܲܐܟܘܵܬܸܗ ܥܲܘܠܵܐ ܦܠܲܚܬܝ܀
19 ܢܲܦܫܵܐ ܛܡܲܪ ܠܵܟ ܦܲܚܸ̈ܐ ܘܲܢܦܲܠܬ ܒܗܘ݁ܢ ܒܼܝܫܵܐ ܢܟܼܝܠܵܐ ܕܗܽܘ ܫܲܦܠܵܟ݁ ܘܸܐܢܵܐ ܕܦܲܚܸ̈ܐ ܠܵܐ ܐܲܕܪܟܽܘܢܝ ܘܠܵܐ ܠܡܲܪܫܽܘܬܵܐ ܡܸܬܩܲܪܒܵܢ܀
20 ܦܲܓܪܵܐ ܛܡܲܪ ܠܼܝ ܦܲܚܸ̈ܐ ܗܲܘ ܣܵܢܐܵܐ ܘܠܲܘ ܒܸܠܥܵܕܲܝܟܝ ܢܸܦܠܸܬ ܒܗܘ݁ܢ݁ ܢܲܗܼܝܪܵܐ ܗ̄ܘܲܝܬܝ ܘܠܵܐ ܓܠܲܝܬܝ ܠܼܝ ܐܽܘܪܚܸܗ ܕܦܲܚܵܐ ܕܠܵܐ ܢܸܚܕܲܢܝ܀
21 ܢܲܦܫܵܐ ܝܲܗ̄ܒ ܠܼܝ ܟܼܐܢܵܐ ܟܝܵܢܵܐ ܕܪܵܡ ܡܸܢ ܫܽܘܪ̈ܥܵܬܵܐ ܘܠܵܐ ܡܸܨܛܠܸܐ݁ ܘܲܡܙܲܟܸܐ ܠܼܝ ܕܣܲܓܼܝ ܬܪܸܝܨ ܕܲܒܣܲܟܠܽܘܬܵܟ ܠܵܐ ܢܸܚܠܛܲܢܝ܀
22 ܦܲܓܪܵܐ ܝܲܗ̄ܒ ܠܸܟܝ ܗܲܘܢܵܐ ܘܥܲܒܕܸܟܝ ܠܼܝ ܐܲܝܟ ܣܵܦܲܪܬܵܐ ܚܲܟܼܝܡܬܵܐ݁ ܣܪܲܚܬܼܝܘܗܝ ܠܛܲܠܝܵܐ ܕܠܸܟܝ ܐܸܬܓܥܸܠ ܘܲܒܡܲܪܫܽܘܬܵܐ ܐܲܢ̄ܬܝ ܩܵܝܡܲܬܝ܀
23 ܢܲܦܫܵܐ ܟܲܕ ܓܵܐܲܪ ܗ̄ܘܲܝܬܝ ܠܼܝ ܠܵܐ ܡܛܵܐ ܣܝܵܢܵܟ ܦܲܓܪܵܐ ܕܪܵܡ ܗ̄ܽܘ ܟܝܵܢܝ݁ ܐܲܝܟܲܢ ܟܼܐܢܵܐ ܕܲܢܢܲܓܕܲܢܝ ܬܵܒܲܥ ܓܲܘܪܵܐ ܕܠܵܐ ܐܲܣܟܠܸܬ܀
24 ܦܲܓܪܵܐ ܟܲܕ ܕܲܡܼܝܟ ܗ̄ܘܼܝܬ ܘܲܐܢ̄ܬܝ ܢܵܛܪܲܬܝ ܒܫܸܢܬܵܐ ܫܠܼܝܬܵܐ ܡܲܢܽܘ ܕܓܵܪ݁ ܢܵܛܽܘܪܬܵܐ ܗ̄ܘܲܝܬܝ ܠܡܘ݁ܢ ܠܵܐ ܟܠܲܝܬܝ ܠܓܲܘܪܵܐ ܒܚܸܠܡܵܐ ܕܠܵܐ ܢܣܲܝܒܲܢܝ܀
25 ܢܲܦܫܵܐ ܠܵܐ ܫܸܠܡܸܬ ܠܵܟ ܟܲܕ ܣܵܪܚܲܬ ܘܪܲܚܼܝܩܵܐ ܐ̄ܢܵܐ ܡܵܐ ܕܒܵܠܥܲܬ݁ ܕܲܒܕܲܚܼܝܚܵܟ ܡܸܬܢܲܓܕܲܬ ܘܸܐܢܵܐ ܒܵܐܐܲܪ ܡܸܬܒܲܣܡܵܢ܀
26 ܦܲܓܪܵܐ ܠܵܐ ܪܲܚܼܝܩܲܬܝ ܡܵܐ ܕܡܸܬܪܕܸܝܢ ܐܸܢ ܕܲܝܵܢܵܐ ܠܵܐ ܡܸܨܛܠܸܐ݁ ܕܸܐܠܽܘ ܒܢܲܦܫܵܐ ܠܵܐ ܡܸܬܬܙܼܝܥ ܦܲܓܪܵܐ ܕܢܸܚܛܸܐ ܡܬܽܘܡ ܠܵܐ ܚܛܵܐ܀
27 ܢܲܦܫܵܐ ܡܽܘ̈ܡܸܐ ܒܢܲܦܫܵܐ ܠܵܐ ܩܵܪܒܼܝܢ ܫܽܘ̈ܚܢܸܐ ܒܪܽܘܚܵܐ ܠܵܐ ܓܵܫܦܼܝܢ݁ ܚܛܵܗܸ̈ܐ ܘܚܲܘ̈ܒܸܐ ܘܟܽܠ ܣܲܟ̈ܠܘܵܢ ܕܼܝܠܵܟ ܐܢܘ݁ܢ ܦܲܓܪܵܐ ܫܠܼܝ܀
28 ܦܲܓܪܵܐ ܡܽܘ̈ܡܸܐ ܟܽܠܗܘ݁ܢ ܗܵܠܸܝܢ ܕܒܼܝ ܠܲܘ ܒܸܠܥܵܕܲܝܟܝ ܢܲܦܫܵܐ ܗܘܲܘ݁ ܕܟܲܕ ܪܵܐܸܓ ܗ̄ܘܼܝܬ ܐܸܠܽܘ ܒܥܲܝܬܝ ܟܵܠܝܵܐ ܗ̄ܘܲܝܬܝ ܠܼܝ ܡܸܢ ܪܸܓܬܵܐ܀
29 ܢܲܦܫܵܐ ܢܸܚܙܸܝܢܝ ܕܲܝܵܢܝ ܘܲܢܚܲܪܪܲܢܝ ܡܸܢ ܡܲܪܫܽܘܬܵܐ ܘܲܢܚܲܝܒܵܟ݁ ܕܒܵܐܣܽܘܛܽܘܬܵܐ ܐܸܬܗܲܢܼܝܬ ܕܲܐܢ̄ܬ ܐܵܟܸܠ ܗ̄ܘܲܝܬ ܘܠܼܝ ܡܩܲܛܪܓܼܝܢ܀
30 ܦܲܓܪܵܐ ܢܸܚܙܸܐ ܕܲܝܵܢܝ ܘܠܵܐ ܢܸܦܪܫܸܟܝ ܡܸܢ ܒܲܪ ܙܲܘܓܸܟܝ ܡܵܐ ܕܡܸܬܪܕܸܐ݁ ܕܸܐܠܽܘܠܵܐ ܨܒܲܝܬܝ ܘܲܫܠܸܡܬܝ ܠܼܝ ܥܲܘܠܵܐ ܡܸܡܬܽܘܡ ܠܵܐ ܐܸܣܬܥܲܪ܀
31 ܢܲܦܫܵܐ ܣܵܗܕܼܝܢ ܥܼܝܪܸ̈ܐ ܕܠܵܐ ܫܵܪܥܼܝܢ ܡܸܢ ܪܲܒܽܘܬܵܐ ܕܒܵܗ݀ ܩܵܝܡܼܝܢ݁ ܕܲܟܝܵܢܝ ܪܵܡ ܗ̄ܽܘ ܡܸܢ ܫܽܘܪܥܬܵܐ ܕܪܽܘܚܵܐ ܐܸܢܵܐ ܘܠܵܐ ܚܵܛܝܵܢ܀
32 ܦܲܓܪܵܐ ܣܵܗܸܕ ܕܲܝܵܢܝ ܕܲܟܡܵܐ ܫܪܲܥܘ ܕܲܝ̈ܘܸܐ ܘܲܢܦܲܠܘ ܡܸܢ ܐܲܬܪܗܘ݁ܢ݁ ܕܪܽܘܚܵܐ ܐܢܘ݁ܢ ܘܥܲܠ ܕܸܐܨܛܠܼܝܘ ܗܵܐ ܓܼܗܲܢܵܐ ܠܗܘ݁ܢ ܚܵܝܪܵܐ܀
33 ܢܲܦܫܵܐ ܥܲܡ ܒܼܝ̈ܫܵܬܵܟ ܠܵܐ ܬܸܚܠܛܲܢܝ ܕܪܲܚܼܝܩܵܐ ܐ̄ܢܵܐ ܡܸܢ ܟܽܠܗܸܝܢ݁ ܟܽܠ ܛܵܒ̈ܵܬܵܐ ܡܸܢܝ ܐܸܣܬܥܲܪ̈ܝ ܘܲܐܝܟܲܢ ܟܼܐܢܵܐ ܕܥܲܡܝ ܬܸܫܬܘܸܐ܀
34 ܦܲܓܪܵܐ ܥܲܡ ܛܵܒ̈ܵܬܵܐ ܐܸܢ ܐܼܝܬ ܠܸܟܝ ܚܠܼܝܛܵܐ ܐܸܢܵܐ ܗ̄ܘ ܠܵܐ ܬܸܦܪܫܲܢܝ݁ ܫܲܘ̈ܬܵܦܸܐ ܚܢܲܢ ܘܠܵܐ ܡܫܲܢܝܲܬܝ ܡܸܢ ܒܲܪ ܙܲܘܓܸܟܝ ܡܵܐ ܕܡܸܬܪܕܸܐ܀
35 ܢܲܦܫܵܐ ܦܲܘܠܠܵܘܣ ܢܼܐܬܸܐ ܘܗܽܘ ܢܲܐܠܦܵܟ ܕܪܽܘܚܵܐ ܠܦܲܓܪܵܐ ܠܵܐ ܡܫܲܥܒܕܵܐ݁ ܕܪܸܓܬܸܗ ܕܗܵܢܵܐ ܠܗܵܝ ܙܵܟܝܵܐ ܘܪܸܓܬܵܗ݀ ܕܗܵܕܸܐ ܠܗܵܝ ܡܲܐܟܝܵܐ܀
36 ܦܲܓܪܵܐ ܦܲܐܘܠܵܘܣ ܢܼܐܬܸܐ ܘܡܸܢܸܗ ܫܡܲܥܝ ܕܸܐܢ ܪܸܓܬܵܐ ܕܼܝܠܝ ܠܼܝ ܡܲܐܟܝܵܐ݁ ܒܥܲܘܠܵܐ ܕܥܸܒܕܸܬ ܐܲܢ̄ܬܝ ܒܵܠܥܲܬܝ ܠܸܟܝ ܢܸܟܝܵܢܵܐ ܐܸܢ ܐܲܣܟܠܸܬ܀
37 ܢܲܦܫܵܐ ܨܸܒܝܵܢܵܐ ܕܼܝܠܝ ܣܲܓܼܝ ܢܩܸܕ ܡܝܲܬܲܪ ܘܒܲܣܼܝܡ ܘܚܲܟܼܝܡ ܘܪܵܡ݁ ܘܸܐܢ ܨܸܒܝܵܢܵܐ ܗܽܘ ܡܸܬܬܕܼܝܢ ܥܲܡܵܟ ܦܲܓܪܵܐ ܠܵܐ ܒܵܠܥܵܢ܀
38 ܦܲܓܪܵܐ ܨܸܒܝܵܢܸܟܝ ܪܵܡ ܘܠܸܗ ܠܵܐ ܥܨܲܝܬܝ ܐܵܦܠܵܐ ܒܡܸܕܸܡ ܟܲܕ ܐܲܪܫܥܸܬ݁ ܕܸܐܠܽܘܠܵܐ ܡܬܽܘܡ ܠܵܐ ܐܸܨܛܒܼܝܬܝ ܪܽܘܫܥܵܐ ܡܸܡܬܽܘܡ ܠܵܐ ܐܸܬܓܡܲܪ܀
39 ܢܲܦܫܵܐ ܩܵܠ ܕܲܝܵܢܵܐ ܣܲܓܼܝ ܕܚܼܝܠ ܘܒܲܓܙܵܪ ܕܼܝܢܸܗ ܢܫܲܪܸܐ ܚܕܵܐ݁ ܕܢܸܦܪܽܘܫ ܒܸܝܬ ܠܼܝ ܘܠܵܟ ܦܲܓܪܵܐ ܒܩܽܘܫܬܵܐ ܬܪܼܝܨܵܐ ܕܠܵܐ ܡܸܨܛܠܸܐ܀
40 ܦܲܓܪܵܐ ܩܕܵܡܲܘܗܝ ܕܼܝܠܸܗ ܬܸܫܪܸܐ ܚܕܵܐ ܘܚܲܕ ܦܽܘܩܕܵܢܵܐ ܢܸܓܙܽܘܪ ܥܠܲܝܢ݁ ܘܒܲܓܙܵܪ ܕܼܝܢܸܗ ܠܵܐ ܢܸܦܪܫܸܟܝ ܕܟܼܐܝܢ ܗ̄ܽܘ ܘܲܬܪܼܝܨ ܘܠܵܐ ܡܸܨܛܠܸܐ܀
41 ܢܲܦܫܵܐ ܪܵܡܼܝܢ ܙܲܘ̈ܥܲܝ ܘܲܡܥܲܠܝ̈ܵܢ ܡܸܢ ܒܼܝ̈ܫܵܬܵܐ ܕܡܸܢܵܟ ܗܘ̈ܲܝ݁ ܘܦܵܐܝܵܐ ܗ̄ܝ ܗܵܕܸܐ ܕܲܐܢ̄ܬ ܬܸܬܪܕܸܐ ܘܸܐܢܵܐ ܐܲܓܗܸܐ ܡܸܢ ܒܼܝܫܬܵܐ܀
42 ܦܲܓܪܵܐ ܪܵܡܼܝܢ ܙܲܘ̈ܥܲܝܟܝ ܘܒܼܝ ܐܸܬܬܙܼܝܥܬܝ ܥܲܠ ܛܵܒ̈ܵܬܵܐ ܟܲܕ ܐܸܣܬܥܲܪ̈ܝ݁ ܗܘܼܝܬ ܠܸܟܝ ܡܵܐܢܵܐ ܘܡܲܠܸܠܬܝ ܒܼܝ ܬܪܼܝܨ ܕܲܝܵܢܵܐ ܕܠܵܐ ܢܸܦܪܫܸܟܝ܀
43 ܢܲܦܫܵܐ ܫܡܲܥ ܕܲܝܵܢܵܐ ܘܫܲܪܼܝ ܚܕܵܐ ܒܸܝܬ ܠܼܝ ܠܦܲܓܪܵܐ ܕܲܠܚܼܝܡ ܥܠܲܝ݁ ܐܲܕܢܲܚ ܩܽܘܫܬܵܟ ܒܵܚܲܪ ܟܽܠ ܘܗܲܒ ܠܼܝ ܟܠܼܝܠܵܐ ܕܠܸܗ ܚܵܝܪܵܢ܀
44 ܦܲܓܪܵܐ ܫܡܲܥ ܡܵܪܝ ܘܲܚܙܼܝ ܐܸܢ ܫܵܩܠܵܐ ܟܠܼܝܠܵܐ ܢܲܦܫܵܐ ܠܵܐ ܬܸܓܠܙܲܢܝ݁ ܘܸܐܢ ܒܵܠܲܥ ܐ̄ܢܵܐ ܐܵܦ ܠܵܗ݀ ܡܚܼܝ ܕܡܸܢ ܒܸܠܥܵܕܸܝܗ݀ ܡܬܽܘܡ ܠܵܐ ܚܛܼܝܬ܀
45 ܬܪ̈ܲܝܟܽܘܢ ܟܼܐܢܵܐ ܬܸܬܢܲܓܕܽܘܢ ܐܸܢ ܐܲܣܟܸܠܬܽܘܢ ܠܵܐ ܬܸܕܪܫܽܘܢ݁ ܬܪ̈ܲܝܟܽܘܢ ܙܵܕܸܩ ܕܬܸܬܟܲܠܠܽܘܢ ܚܲܕ ܗ̄ܽܘ ܟܠܼܝܠܵܐ ܕܲܢܛܼܝܪ ܠܟܽܘܢ܀
46 ܬܪ̈ܲܝܟܽܘܢ ܗܵܫܵܐ ܣܥܲܪܬܽܘܢ ܚܕܵܐ ܘܚܲܕ ܗ̄ܽܘ ܕܼܝܢܵܐ ܕܲܢܛܼܝܪ ܠܟܽܘܢ݁ ܩܲܦܘ ܠܲܚܕܵܕܸ̈ܐ ܘܠܵܐ ܬܸܦܪܫܽܘܢ ܕܠܵܐ ܐܼܝܬ ܣܸܕܩܵܐ ܒܲܝܢܵܬܟܽܘܢ܀
47 ܙܲܕܼܝܩ ܕܼܝܢܵܟ ܡܵܪܵܐ ܕܟܽܠ ܠܢܲܦܫܵܐ ܘܦܲܓܪܵܐ ܒܪ̈ܲܚܡܸܐ ܪܕܼܝ݁ ܘܚܽܘܢ ܠܲܬܪ̈ܲܝܗܘ݁ܢ ܡܵܐ ܕܡܸܬܓܠܸܝܬ ܒܗܵܝ ܡܲܠܟܽܘܬܵܐ ܕܠܵܐ ܥܵܒܪܵܐ܀