The Comprehensive Aramaic Lexicon


Gen11:01	והוה כל ארעא לישן חד וממלל חד ועיטא חדא בלישן קודשה הוו ממללין דאיתבריא ביה עלמא מן שירויא

Gen11:02	והוה במיטלהון ממדינחא ואשכחו בקעתא בארעא דבבל ויתיבו תמן
Gen11:03	ואמרו גבר לחבריה הבו נירמי ליבנין וני{ו}<ז>י יתהון באתונא והות להון לבינתא לאבנא וטינא הוות להום לישיע
Gen11:04	ואמרו הבו ניבני לנא קרתא ומוגדלא ורישי מטי עד צית שמיא ונעביד לנא סגדו ברישיה ונישוי חרבא בידיה ותהי עבדא לקובלא סידרי קרבא קדם עד לא ניתבדר מעילוי אנפי ארעא
Gen11:05	ואיתגלי ייי לאיתפרע<א> מנהון על עובד קרתא ומוגדלא דבנו בני נשא
Gen11:06	ואמר ייי הא עמא חד ולישן חד לכולהום ודא אתחש{ד}<ב>ו למיעבד וכדון לא יתמנע מנהון כל דחשיבו למיעבד
Gen11:07	אמר ייי לשבעין מלאכיא דקימין קומוי איתון כדון וניחות ונערבבא תמן לישנהום דלא ישמעון אינש לישן חבריה
Gen11:08	ואיתגליאת מימרא דייי עילוי קרתא ועימיה שובעין מלאכיא כל קבל שו{מ}<ב>עין עממיא וכל חד וחד לישן עממיה ורושם כתביה בידיה ובדרינון מתמן על אנפי כל ארעא לשיבעין לישנין ולא הוה ידע חד מה דיימר חבריה והוו קטלין דין לדין ופסקו מלימיבני קרתא
Gen11:09	בגין כן קרא שמה בבל ארום תמן ערביב ייי לישן כל דיירי ארעא ומתמן בדרינון ייי על אנפי כל ארעא
Gen11:10	אילין גניסת שם שם בר מאה שנין כד אוליד ית ארפכשד תרתין שנין בתר טובענא
Gen11:11	וחיא שם בתר דאוליד ית ארפכשד חמש מאה שנין ואוליד בנין ובנן
Gen11:12	וארפכשד חיא תלתין וחמש שנין ואוליד ית שלח
Gen11:13	וחיא ארפכשד בתר דאוליד ית שלח ארבע מאה ותלתין שנין ואוליד בנין ובנן
Gen11:14	ושלח חיא תלתין שנין ואוליד ית עבר
Gen11:15	וחיא שלח בתר דאוליד ית עבר ארבע מאה ותלת שנין ואוליד בנין ובנן
Gen11:16	וחיא עבר תלתין וארבע שנין ואוליד ית פלג
Gen11:17	וחיא עבר בתר דאוליד ית פלג ארבע מאה ותלתין שנין ואוליד בנין ובנן
Gen11:18	וחיא פלג תלתין שנין ואולד ית רעו
Gen11:19	וחיא פלג בתר דאוליד ית רעו מאתן ותשע שנין ואולד בנין ובנן
Gen11:20	וחיא רעו תלתין ותרתין שנין ואולד ית שרוג
Gen11:21	וחיא רעו בתר דאוליד ית שרוג מאתן ושבע שנין ואולד בנין ובנן
Gen11:22	וחיא שרוג תלתין שנין ואולד ית נחור
Gen11:23	וחיא שרוג בתר דאולד ית נחור מאתן שנין ואולד בנין ובנן
Gen11:24	וחיא נחור עשרין ותשע שנין ואולד ית תרח
Gen11:25	וחיא נחור בתר דאולד ית תרח מאה ו<ת>ש{ת}סרי שנין ואולד בנין ובנן
Gen11:26	וחיא תרח שובעין שנין ואולד ית אברם וית נחור וית הרן
Gen11:27	ואילין גניסת תרח תרח אולד ית אברם וית נחור וית הרן והרן אולד ית לוט
Gen11:28	והוה כד רמא נימרוד ית אברם לאתונא דנורא דלא פלח לטעותיה ולא הוה רשותא לנורא למוקדיה ובכין איתפליג ליביה דהרן למימר אילו נצח נימרוד אהי מן סיעתיה ואילו נצח אברם אהי מן סיעתיה וכד חמון כל עממיא דהוו תמן דלא שלטת נורא באברם אמר<ו> בליבהון הלא הרן אחוי דאברם מלא קוסמין וחרשין ואיהו לחש עילוי אישתא דלא למיקד ית אחוי מן יד נפלת אישתא מן שמי מרומא וגמרתיה ומית הרן למיחמי תרח אבוי היך איתוקד בארע ילדותיה באתון נורא דעבדו כשדאי לאברם אחוי
Gen11:29	ונסיב אברם ונחור להון נשין שום איתת אברם שרי ושום איתת נחור מלכא ברת הרן אבוי דמלכה ואבוי דיסכה היא שרי
Gen11:30	והות שרי עקרא לית לה וולד
Gen11:31	ודבר תרת ית אברם בריה וית לוט בר הרן בר בריה וית שרי כלתיה איתת אברם בריה ונפקו עימהון מאורא דכשדאי למיזל לארעא דכנען ואתו עד חרן ויתיבו תמן
Gen11:32	והוו יומי תרח מאתן וחמש שנין ומית תרח בחרן