The Comprehensive Aramaic Lexicon

Gen12:01	ואמר ייי לאברם איזל לך מארעך אתפרש מן ילדותך פוק מבית אבוך זיל לארעא דאחזינך
Gen12:02	ואעבדינך לעם רב ואיבריכינך וארבי שמך ותהי מברך
Gen12:03	ואבריך ית כהניא דפרסין ידיהון בצלו ומברכין ית בנך ובלעם דמלטט יתהום אילוט ויקטלוניה לפיתגם דחרב ויתברכון בך כל זרעית ארעא
Gen12:04	ואזל אברם היכמה דמליל ליה ייי ואזל עימיה לוט ואברם בר שובעין וחמש שנין במיפיקיה מחרן
Gen12:05	ודבר אברם ית שרי אינתתיה וית לוט בר אחוי וית כל קיניינהום דיקנו וית נפשתא דיגיירו בחרן ונפקו למיזל לארעא דכנען ואתו לארעא דכנען
Gen12:06	ועבר אברם בארעא עד אתר שכם עד מישר דהוה מיירי וכנענאי בכין הוו בארעא דעד כדון לא מטא זימנא דבני ישראל למירת{א}<ה>
Gen12:07	ואיתגלי ייי לאברם ואמר לבנך אתין ית ארעא הדא ובנא תמן מדבחא קדם ייי דאיתגלי ליה

Gen12:08	ואיסתלק מתמן לטורא דממדנח לביתאל ופרסיה משכניה ביתאל מן מערבא ועי ממדינחא ובנא תמן מדבחא קדם ייי וצלי בשמא דייי

Gen12:09	ונטל אברם אזיל ונטיל לדרומא
Gen12:10	והוה כפנא בארעא ונחת אברם למצרים לאיתותבא תמן ארום תקיף כפנא בארעא
Gen12:11	והוה כמא דקריב למיעל לתחום מצרים ומטו לנהרא וגליאו בשריהון למיעבר ואמר אברם לשרי אינתתיה הא עד כדון לא איסתכלית בבישריך וכדון ידעית ארום אינתתא שפירת חזו אנת
Gen12:12	ויהי ארום יסתכלון ביך מצראי ויחמון ית שופריך ויימרון אינתתיה דא ויקטלון יתי ויתיך יקיימון
Gen12:13	אימרי בבעו דאחתי אנת בגין דייטב לי בגיניך ותתקיים נפשי אמטולתיך
Gen12:14	והוה כדי על אברם למצרים וחמון מצראי ית אינתתא ארום שפירא היא לחדא
Gen12:15	וחמון יתה רברבי פרעה ושבחו יתה לפרעה ואידברת אינתתא לבית מלכותא דפרעה
Gen12:16	ולאברם אוטב פרעה בגינה והוו ליה מדיליה עאן ותורין וחמרין ועבדין ואמהן ואתנין וגמלין
Gen12:17	וגרי מימר דייי בפרעה מכתשין רברבין וית אינש ביתיה על עיסק שרי איתת אברם
Gen12:18	וקרא פרעה לאברם ואמר מה דא עבדת לי למא לא חוית לי ארום אינתתך היא
Gen12:19	למא אמרת אחתי היא ודברית יתה לי לאינתו ומן יד איתגריאת בי מכתשא ולא קריבית לותה וכדון הא אינתתך דבר ואיזל
Gen12:20	ופקיד עילוי פרעה גוברין ואלויאו יתיה וית אינתתיה וית כל דיליה